Pramāṇa · Search · About · API

Prakriyapada 11: athaikādaśo'dhyāyaḥ

Prakriyāpāda 11

Language
Sanskrit

Contents

athaikādaśo'dhyāyaḥ

11.1

pāśupatayogaḥ
vāyuruvāca| ekaṃ mahāntaṃ divasamahorātramathāpi vā
arddhamāsaṃ tathā māsamayanāvdyugāni ca

11.2

mahāyugasahasrāṇi ṛṣayastapasi sthitāḥ
upāsate mahātmānaḥ prāṇaṃ divyena cakṣuṣā

11.3

ata ūrdhvaṃ pravakṣyāmi prāṇāyāmaprayojanaṃ
phalañcaiva viśeṣeṇa yathāha bhagavān prabhuḥ

11.4

prayojanāni catvāri prāṇāyāmasya viddhi vai
śāntiḥ praśāntirdīptiśca prasādaśca catuṣṭayaṃ

11.5

ghorākāraśivāntāntu karmmaṇāṃ phalasambhavaṃ
svayaṅgatāni kālena ihāmutra ca dehināṃ

11.6

pitṛmātṛpraduṣṭānāṃ jñātisambandhisaṅkaraiḥ
kṣapaṇaṃ hi kaṣāyāṇāṃ pāpānāṃ śāntirucyate

11.7

lobhamānātmakānāṃ hi pāpānāmapi saṃyamaḥ
ihāmutra hitārthāya praśāntistapa ucyate

11.8

sūryendugrahatārāṇāṃ tulyastu viṣayo bhavet
ṛṣīṇāñca prasiddhānāṃ jñānavijñānasampadāṃ

11.6-2

atītānāgatānāñca darśanaṃ sāmpratasya ca
buddheśca samatāṃ yānti dīptiḥ syāttapa ucyate

11.10

indriyāṇīndriyārthāṃśca manaḥ pañca ca mārutān
prasādayati yenāsau prasāda iti saṃjñitaḥ

11.11

ityeṣa dharmaḥ prathamaḥ prāṇāyāmaścaturvidhaḥ
sannikṛṣṭaphalo jñeyaḥ sadyaḥ kāla prasādajaḥ

11.12

ata ūrdhvaṃ pravakṣyāmi prāṇāyāmasya lakṣaṇaṃ
āsanañca yathā tattvaṃ yuñjato yogameva ca

11.13

oṃ kāraṃ prathamaṃ kṛtvā candrasūryyau namasya ca
āsanaṃ svastikaṃ kṛtvā padmamarddhāsanantathā

11.14

samajānurekajānuruttānaḥ susthito'pi ca
samo dṛḍhāsano bhūtvā saṃhṛtya caraṇāvubhau

11.15

saṃhatāṃso'vabaddhākṣa uro viṣṭabhya cāyataḥ
pārṣṇibhyāṃ vṛṣaṇau cchādya tathā prajananaṃ yataḥ

11.16

kiñcidunnāmitaśirāḥ śirogrīvāṃ tathaiva ca
samprekṣya nāsikāgraṃ svaṃ diśaścānavalokayan

11.17

tamaḥ pracchādya rajasā rajaḥ sattvena cchādayet
tataḥ sattvasthito bhūtvā yogaṃ yuñjan samāhitaḥ

11.18

indriyāṇīndriyārthāṃśca manaḥ pañca sa mārutān
nigṛhya samavāyena pratyāhāramupakramet

11.19

yastu pratyāharet kāmān kūrmo'ṅgānīva sarvvataḥ
tathātmaratirekasthaḥ paśyatyātmānamātmani

11.20

pūrayitvā śarīrantu sa vāhyābhyantaraṃ śuciḥ
ākarṣaṇāmiyogena pratyāhāramupakramet

11.21

kalāmātrastu vijñeyo nimeṣonmeṣa eva ca
tathā dvādaśamātrastu prāṇāyāmo vidhīyate

11.22

dhāraṇādvādaśāyāmo yogī vai dhāraṇādvayaṃ
tathā vai yogayuktaśca aiśvaryyaṃ pratipadyate
vīkṣate paramātmānaṃ dīpyamānaṃ svatejasā

11.23

prāṇāyāmena yuktasya viprasya niyatātmanaḥ
sarvve doṣāḥ praṇaśyanti sattvasthaścaiva jāyate

11.24

evaṃ vai niyatāhāraḥ prāṇāyāmaparāyaṇaḥ
jitvā jitvā sadā bhūmimārohettu sadā muniḥ

11.25

ajitā hi mahābhūmirdoṣānutpādayed bahūn
vivarddhayati sammohaṃ na rohedajitāṃ tataḥ

11.26

nālena tu yathā toyaṃ yantreṇaiva balānvitaḥ
āpiveta(1) prayatnena tathā vāyuñjitaśramaḥ

11.27

nābhyāñca hṛdaye caiva kaṇṭhe urasi cānane
nāsāgre tu tathā netre bhruvormmadhye'tha mūrddhani

11.28

kiñcidūrddhaṃ parasmiṃśca dhāraṇā paramā smṛtā
prāṇāpānasamārodhāt prāṇāyāmaḥ sa kathyate

11.29

manaso dhāraṇā caiva dhāraṇeti prakīrttitā
nivṛttirviṣayāṇāntu pratyāhārastu saṃjñitaḥ

11.30

sarvveṣāṃ samavāye tu siddhiḥ syād yogalakṣaṇā
tayorutpannasya yogasya dhyānaṃ vai siddhilakṣaṇaṃ
dhyānayuktaḥ sadā paśyedātmānaṃ sūryyacandravat

11.31

sattvasyānupapattau tu darśanantu na vidyate
adeśakālayogasya darśanantu na vidyate

11.32

agnyabhyāse vane vāpi śuṣkaparṇacaye tathā
jantuvyāpte śmaśāne vā jīrṇagoṣṭhe catuṣpathe

11.33

saśabde sabhaye vāpi caityavalmīkasañcaye
udapāne tathā nadyānna bādhātaḥ kadācana

11.34

kṣudhāviṣṭāstathā'prītā na ca vyākulacetasaḥ
yuñjīta paramaṃ dhyānaṃ yogī dhyānaparaḥ sadā

11.35

etān doṣān viniścitya pramādādyo yunakti vai
tasya doṣāḥ prakupyanti śarīre vighnakārakāḥ

11.36

jar̤atvaṃ badhiratvañca mūkatvañcādhigacchati
andhatvaṃ smṛtilopaśca jarā rogastathaiva ca

11.37

tasya doṣāḥ prakupyanti ajñānādyo yunakti vai
tasmājjñānena śuddhena yogī yuñjīta samāhitaḥ

11.38

apramattaḥ sadā caiva na doṣān prāpnuyāt kvacit
teṣāṃ cikitsāṃ vakṣyāmi doṣāṇāñca yathākramaṃ
yathā gacchanti te doṣāḥ prāṇāyāmasamutthitāḥ

11.48

snigdhāṃ yavāgūmṛtyuṣṇāṃ bhuktvā tatrāvadhārayet
etena kramayogena vātagulmaṃ praśāmyati

11.40

gudāvarttapratīkāramidaṃ kuryyāccikitsitaṃ
bhuktvā dadhi yavāgūrvā vāyururddhaṃ tato vrajet

11.41

vāyugranthiṃ tato bhittvā vāyuddeśe prayojayet
tathāpi na viśeṣaḥ syāddhāraṇāṃ mūrddha dhārayet

11.42

yuñjānasya tanuntasya sasvasthasyaiva dehinaḥ
gudāvarttapratīghāte etat kuryyāccikitsitaṃ

11.43

sarvvagātraprakampena samārabdhasya yoginaḥ
imāṃ cikitsāṃ kurvīta tayā sampadyate sukhī

11.44

manasā yadrataṃ kiñcidiṣṭamīkṛtya dhārayet
uroddhāte uraḥsthānaṃ kaṇṭhadeśe ca dhārayet

11.45

tvaco'vaghāte tāṃ vāci bādhirye śrotrayostathā
jihvāsthāne tṛṣārttastu agre snehāṃśca tantubhiḥ
phalaṃ vai cintayedyogī tataḥ sampadyate sukhī

11.46

kṣaye kuṣṭhe sakīlāse dhārayetsarvvamātmikau
yasmin yasmin rajo deśe tasmin yukto vinirdiśet

11.47

yogotpannasya viprasya idaṃ kuryyāccikitsitaṃ
vaṃśakīlena mūrddhānaṃ dhārayānasya tār̤ayet
mūrddha kaulaṃ pratiṣṭhāpya kāṣṭhakāṣṭhena tār̤ayet

11.48-2

bhayabhītasya sā saṃjñā tataḥ pratyāgamiṣyati
atha vā luptasaṃjñasya hastābhyāṃ tata dhārayet

11.46-2

pratilabhya tataḥ saṃjñāṃ dhāraṇāṃ mūrddhi dhārayet
snigdhamalpañca bhuñjīta tataḥ sampadyate sukhī

11.50

amānuṣeṇa sattvena yadā badhyati yogavit
divañca pṛthivīñcaiva vāyumagniñca dhārayet

11.51

prāṇāyāmena tatsarvvaṃ dahyamānaṃ vaśībhavet
athāpi praviśeddehaṃ tatastaṃ pratiṣedhayet

11.52

tataḥ saṃstabhya yogena dhārayānasya mūrddhani
prāṇāyāmāgninā dagdhaṃ tatsarvvaṃ vilayaṃ vrajet

11.53

kṛṣṇasarpāparādhantu dhārayedgagyodare
maho janastapaḥ satyaṃ hṛdi kṛtvā tu dhārayet

11.54

viṣasya tu phalaṃ pītvā viśalyāṃ dhārayettataḥ
sarvvataḥ sanagāṃ pṛthvīṃ kṛtvā manasi dhārayet

11.55

hṛdi kṛtvā samudrāṃśca tathā sarvvāśca devatāḥ
sahasreṇa ghaṭānāñca yuktaḥ snāyīta yogavit

11.56

udake kaṇṭhamātre tu dhāraṇāṃ mūrdhni dhārayet
pratiśrotoviṣāviṣṭo dhārayet sarvvagātrikīṃ

11.57

śīrṇairḍākapacapuṭaiḥ pivedambho'kammṛttikāṃ
cikitsitavidhihryeṣa viśruto yoganirmitaḥ

11.58

vyākhyātastu samāsena yogadṛṣṭena hetunā
bruvato lakṣaṇaṃ viddhi viprasya kathayet kvacit

11.59

adyāpi kathayenmohāttadvijñānaṃ pralīyate
tasmāt pravṛttiyoṃgasya na vaktavyā kathañcana

11.60

sattvaṃ tathārogyamalolupatvaṃ
varṇaprabhā susvarasaumyatā ca
gandhaḥ śubho mūtrapurīṣamalpaṃ
yogapravṛttiḥ prathamā śarīre

11.61

ātmānaṃ pṛthivīñcaiva jvalantīṃ yadi paśyati
kṛtvāmyaṃ viśate caiva vidyāt siddhimapasthitāṃ

11.61.p1

iti śrīmahāpurāṇe vāyuprokte pāśupatayogo nāmaikādaśo'dhyāyaḥ

Linked texts (4)