Prakriyapada 18: athāṣṭādaśo'dhyāyaḥ
Prakriyāpāda 18
- Language
- Sanskrit
Contents
- 18.20 — 1 part
athāṣṭādaśo'dhyāyaḥ
18.1
yatiprāyaścittavidhiḥ
vāyuruvāca | ataḥ ūrddhaṃ pravakṣyāmi yatīnāmiha niścayam
prāyaścittāni tattvena yānyakāmakṛtāni tu
atha kāmakṛtepyāhuḥ sūkṣmadharmmavido janāḥ
18.2
pāpañca trividhaṃ proktaṃ vāṅmanaḥkāyasambhavaṃ
satataṃ hi divā rātrau yenedaṃ badhyate jagat
18.3
na karmāṇi na cāpyeṣa tiṣṭhatīti parā śrutiḥ
kṣaṇameva prayojyantu āyuṣastu vidhāraṇāt
18.4
bhaveddhīro'pramattastu yogo hi paramaṃ balaṃ
na hi yogātparaṃ kiñcinnarāṇāmiha dṛśyate
tasmādyogaṃ praśaṃsanti dharmyuktā manīṣiṇaḥ
18.5
avidyāṃ vidyayā tīrtvā prāpyaiśvaryyamanuttamaṃ
dṛṣṭvā parāparaṃ dhīrāḥ paraṃ gacchanti tatpadaṃ
18.6
vratāni yāni bhikṣūṇāṃ tathaivopavratāni ca
ekaikāpakrame teṣāṃ prāyaścittaṃ vidhīyate
18.7
upetya tu striyaṃ kāmāt prāyaścittaṃ vinirdiśet
prāṇāyāmasamāyuktaṃ kuryyātsāntapanaṃ tathā
18.8
tataścarati nirddeśaṃ kṛcchrasyānte samāhitaḥ
punarāśramamāgamya caredbhikṣuratandritaḥ
na marmayuktaṃ vacanaṃ hinastīti manīṣiṇaḥ
18.6-2
tathāpi ca na karttavyaḥ prasaṅgo hyeṣa dāruṇaḥ
ahorātrādhikaḥ kaścinnāsyadharma iti śrutiḥ
18.10
hiṃsā hyeṣā parā sṛṣṭā haivatairmunibhistathā
yadetaddraviṇaṃ nāma prāṇā hyete vahiścarāḥ
sa tasya harati prāṇān yo yasya harate dhanaṃ
18.11
evaṃ kṛtvā sa duṣṭātmā bhinnavṛtto vratātcyutaḥ
bhūyo nirvvedamāpannaścareccāndrāyaṇaṃ vrataṃ
18.12
vidhinā śāstradṛṣṭena saṃvatsaramiti śrutiḥ
tataḥ saṃvatsarasyānte bhūyaḥ prakṣīṇakalmaṣaḥ
bhūyo nirvvedamāpannaścaredvikṣuratandritaḥ
18.13
ahiṃsā sarvvabhūtānāṃ karmmaṇā manasā girā
akāmādapi hiṃseta yadi bhikṣuḥ paśūn mṛgān
kṛcchrātikṛcchraṃ kurvvīta cāndrāyaṇamathāpi vā
18.14
skandedindriyadaurbvalyāt striyaṃ dṛṣṭvā yatiryyadi
tena dhārayitavyā vai prāṇāyāmāstu ṣor̤aśa
18.15
divā skannasya viprasya prāyaścittaṃ vidhīyate
trirātramupavāsaśca prāṇāyāmaśataṃ tathā
18.16
rātrau skannaḥ śuciḥ snāto dvādaśaiva tu dhāraṇāḥ
prāṇāyāmena śuddhātmā virajā jāyate dvijaḥ
18.17
ekānnaṃ madhu māṃsaṃ vā hyāmamnāṅgaṃ tathaiva ca
abhojyāni yatīnāñca pratyakṣalavaṇāni ca
18.18
ekaikātikrame teṣāṃ prāyaścittaṃ vidhīyate
prājāpatyena kṛcchreṇa tataḥ pāpāt pramucyate
18.18-2
vyatikramācca ye kecidāṅganaḥ kāyasambhavaṃ
sadbhiḥ saha viniścitya yadbhūyastatsamācaret
18.20
viśuddhabuddhiḥ samaloṣṭakāñcanaḥ
samastabhūteṣu caran samāhitaḥ
sthānaṃ dhruvaṃ śāśvatamavyayaṃ satāṃ
paraṃ sa gatvā na punarihaṃ jāyate
18.20.p1
iti śrīmadbhāpurāṇe vāyuprokte yatiprāyaścittavidhirnāmāṣṭādaśo'dhyāyaḥ
Linked texts (1)
- Vāyupurāṇa — Vyāsa, Sanskrit