Prakriyapada 22
Prakriyāpāda 22
- Language
- Sanskrit
Contents
- 22.33 — 1 part
22.1
'atha dvāviṃśo'dhyāyaḥ
kalpasaṃkhyānirūpaṇaṃ
ṛṣaya ūcuḥ | atyadbhutamidaṃ sarvvaṃ kalpānānte mahāmune
rahasyaṃ vai samākhyātaṃ mantrāṇāñca prakalpanaṃ
22.2
na tavāviditaṃ kiñcit triṣu lokeṣu vidyate
tasmādvistarataḥ sarvvāḥ kalpasaṃkhyā bravīhi naḥ
22.3
vāyuruvāca | atra vaḥ kathayiṣyāmi kalpasaṃkhyā yathā tathā
yugāgrañca varṣāgrantu brahmaṇaḥ parameṣṭhinaḥ
22.4
ekaṃ kalpasahasrantu brahmaṇo'bdaḥ prakīrttitaḥ
etadaṣṭasahasrantu brahmaṇastadyugaṃ smṛtaṃ
22.5
ekaṃ yugasahasrantu savanaṃ tat prajāpateḥ
savanānāṃ sahasrantu triguṇaṃ nivṛttaṃ tathā
22.6
brahmaṇaḥ sthitikālasya caitatsarvvaṃ prakīrttitaṃ
tasya saṃkhyāṃ pravakṣyāmi purastādvai yathākramaṃ
22.7
aṣṭāviṃśatirye kalpā nāmataḥ parikīrttitāḥ
teṣāṃ purastādvakṣyāmi kalpasaṃjñā yathākramaṃ
22.8
rathantarasya sāmnastu upariṣṭānnibodhata
kalpānte nāmadheyāni mantrotpattiśca yasya yā
22.6-2
ekonaviṃśakaḥ kalpo vijñeyaḥ śvetalohitaḥ
yasmiṃstat paramadhyānaṃ dhyāyato brahmaṇastathā
22.10
śvetoṣṇīṣaḥ śvetamālyaḥ śvetāmbaradharaḥ śikhī
utpannastu mahātejāḥ kumāraḥ pāvakopamaḥ
22.11
bhīmaṃ mukhaṃ mahāraudraṃ sughoraṃ śvetalohitaṃ
dīptaṃ dīptena vapuṣā mahāsyaṃ śvetavarcasaṃ
22.12
taṃ dṛṣṭvā puruṣaḥ śrīmān brahmā vai viśvato mukhaḥ
kumāraṃ lokadhātāraṃ viśvarūpaṃ maheśvaraṃ
22.13
purāṇapuruṣaṃ devaṃ viśvātmā yogināṃ ciraṃ
vavande devadeveśaṃ brahmā lokapitāmahaḥ
22.14
hṛdi kṛtvā mahādevaṃ paramātmānamīśvaraṃ
sadyojātaṃ tato brahma brahmā vai samacintayat
jñātvā mumoca deveśo hṛṣṭo hāsaṃ jagatpatiḥ
22.15
tato'sya pārśvataḥ śvetā ṛṣayo brahmavarcasaḥ
prādurbhūtā mahātmānaḥ śvetamālyānulepanāḥ
22.16
sunando nandakaścaiva viśvanando'tha nandanaḥ
śiṣyāste vai mahātmāno yaistu brahma tato vṛtaṃ
22.17
tasyāgre śvetavarṇābhaḥ śvetanāmā mahāmuniḥ
vijajñe'tha mahātejā yasmājjajñe narastvasau
22.18
tatra te ṛṣayaḥ sarvve sadyojātaṃ maheśvaraṃ
tasmācchikheśvaraṃ devaṃ ye prapaśyanti (1) vai dvijāḥ
prāṇāyāmaparā yuktā brahmaṇi vyavasāyinaḥ
22.16-2
te sarvve pāvanirmuktā vimalā brahmavarcasaḥ
brahmalokamatikramya brahmalokaṃ vrajanti ca
22.20
vāyuruvāca | tatastriṃśattamaḥ kalpo rakto nāma prakīrttitaḥ
rakto yatra mahātejā raktavarṇamadhārayat
22.21
dhyāyataḥ putrakāmasya brahmaṇaḥ parameṣṭhinaḥ
prādurbhūto mahātejāḥ kumāro raktavigrahaḥ
raktamālyāmbaradharo raktanetraḥ pratāpavān
22.22
sa taṃ dṛṣṭvā mahādevaṃ kumāraṃ raktavāsasaṃ
dhyānayogaṃ paraṅgatvā bubudhe viśvamīśvaraṃ
22.23
sa taṃ praṇamya bhagavān brahmā paramayantritaḥ
vāmadevaṃ tato brahmā brahmātmakaṃ vyacintayat
22.24
evaṃ dhyāto mahādevo brahmaṇā parameṣṭhinā
manasā prītiyuktena pitāmahamathābravīt
22.25
dhyāyatā putrakāmena yasmātte'haṃ pitāmahaḥ
dṛṣṭaḥ paramayā bhaktyā dhyānayogena sattama
22.26
tasmādjñānaṃ paraṃ prāpya kalpe kalpe mahātapāḥ
vetsyase māṃ mahāsattva lokadhātāramīśvaraṃ
evamuktvā tataḥ śarvvaḥ aṭṭahāsaṃ mumoca ha
22.27
tatastasya mahātmānaścatvāraśca kumārakāḥ
sambabhūvurmahātmāno virejuḥ śuddhabuddhayaḥ
22.28
virajaśca vivāhaśca (1) viśoko viśvabhāvanaḥ
brahmaṇya brahmaṇāstulyā vīrā adhyavasāyinaḥ
22.29
raktāmbaradharāḥ sarvve raktamālyānulapanāḥ
raktabhasrmānuliptāṅgā raktāsyā raktalocanāḥ
22.30
tato varṣasahasrānte brahmaṇā vyavasāyinaḥ
gṛṇantaśca mahātmāno brahma tadvāmadaivakaṃ
22.31
anugrahārthaṃ lokānāṃ śiṣyāṇāṃ hitakāmyayā
dharmopadeśamakhilaṃ kṛtvā te brāhmaṇāḥ svayaṃ
punareva mahādevaṃ praviṣṭā rudramavyayaṃ
22.32
ye'pi cānye dvijaśreṣṭhā yuñjānā vāmamīśvaraṃ
prapadyanti mahādevaṃ tadbhaktāstatparāyaṇāḥ
22.33
te sarvve pāpanirmuktā vimalā brahmavarcasaḥ
rudralokaṃ gamiṣyanti punarāvṛttidurlabhaṃ
22.33.p1
iti śrīmadbhāpurāṇe vāyuprokte kalpasaṃkhyānirūpaṇaṃ nāma dvāviṃśo'dhyāyaḥ
Linked texts (5)
- Vāyupurāṇa — Vyāsa, Sanskrit
- Liṅgapurāṇa — Vyāsa, Sanskrit
- Skandamahāpurāṇa (vulgate) — Sanskrit
- Liṅga — Sanskrit
- Liṅgapurāṇa — Ativīrarāma Pāṇṭiyar 1500, Sanskrit