Pramāṇa · Search · About · API

Shivapurana 1.11: ekādaśo'dhyāyaḥ | śivaliṅgapūjanadānaprakārāḥ

Śivapurāṇa (complete text) 1.11

Language
Sanskrit

Contents

ekādaśo'dhyāyaḥ | śivaliṅgapūjanadānaprakārāḥ

1.11.1

ṛṣaya ūcuḥ
kathaṃ liṅgaṃ pratiṣṭhāpyaṃ kathaṃ vā tasya lakṣaṇam |
kathaṃ vā tatsamabhyarcyaṃ deśe kāle ca kena hi ||

1.11.2

sūta uvāca |
yuṣmadarthaṃ pravakṣyāmi buddhyatāmavadhānataḥ |
anukūle śubhe kāle puṇye tīrthe taṭe tathā ||

1.11.3

yatheṣṭaṃ liṅgamāropyaṃ yatra syānnityamarcanam |
pārthivena tathāpyena taijasena yathāruci ||

1.11.4

kalpakṣaṇasaṃyuktaṃ liṅgaṃ pūjāphalaṃ labhet |
sarvalakṣaṇasaṃyuktaṃ sadyaḥ pūjāphalapradam ||

1.11.5

care viśiṣyate sūkṣmaṃ sthāvare sthūlameva hi |
salakṣaṇaṃ sapīṭhaṃ ca sthāpayecchivanirmitam ||

1.11.6

maṇḍalaṃ caturasraṃ vā trikoṇamathavā tathā |
khaṭvāṅgavanmadhyasūkṣmaṃ liṅgapīṭhaṃ mahāphalam ||

1.11.7

prathamaṃ mṛcchilādibhyo liṅgaṃ lohādibhiḥ kṛtam |
yena liṅgaṃ tena pīṭhaṃ sthāvare hi viśiṣyate ||

1.11.8

liṅgaṃ pīṭhaṃ care tvekaṃ liṅgaṃ bāṇakṛtaṃ vinā |
liṅgapramāṇaṃ kartṝṇāṃ dvādaśāṅgulamuttamam ||

1.11.9

nyūnaṃ cetphalamalpaṃ syādadhikaṃ naiva duṣyate |
karturekāṅgulanyūnaṃ care'pi ca tathaiva hi ||

1.11.10

ādau vimānaṃ śilpena kāryaṃ devagaṇairyutam |
tatra garbhagṛhe ramye dṛḍhe darpaṇasannibhe ||

1.11.11

bhūṣite navaratnaiśca digdvāre ca pradhānake |
nīlaṃ raktaṃ ca vaiḍūryaṃ śyāmaṃ mārakataṃ tathā ||

1.11.12

muktāpravālagomedavajrāṇi navaratnakam |
madhye liṅgaṃ mahad dravyaṃ niḥkṣipetsahavaidike ||

1.11.13

sampūjya liṅgaṃ sadyādyaiḥ pañcasthāne yathākramam |
agnau ca hutvā bahudhā haviṣā sakulaṃ ca mām ||

1.11.14

abhyarcya gurumācāryamarthaiḥ kāmaiśca bāndhavam |
dadyādaiśvaryamarthibhyo jaḍamapyajaḍaṃ tathā ||

1.11.15

sthāvaraṃ jaṅgamaṃ jīvaṃ sarvaṃ santoṣya yatnataḥ |
suvarṇapūrite śvabhre navaratnaiśca pūrite ||

1.11.16

sadyādi brahma coccārya dhyātvā devaṃ paraṃ śubham |
udīrya ca mahāmantramoṅkāraṃ nādaghoṣitam ||

1.11.17

liṅgaṃ tatra pratiṣṭhāpya liṅgaṃ pīṭhena yojayet |
liṅgaṃ sapīṭhaṃ nikṣipya nityalepena bandhayet ||

1.11.18

evaṃ veraṃ ca saṃsthāpyaṃ tatraiva paramaṃ śubham |
pañcākṣareṇa veraṃ tu utsavārthaṃ bahistathā ||

1.11.19

veraṃ gurubhyo gṛhṇīyātsādhubhiḥ pūjitaṃ tu vā |
evaṃ liṅge ca vere ca pūjā śivapadapradā ||

1.11.20

punaśca dvividhaṃ proktaṃ sthāvaraṃ jaṅgamaṃ tathā |
sthāvaraṃ liṅgamityāhustarugulmādikaṃ tathā ||

1.11.21

jaṅgamaṃ liṅgamityāhuḥ kṛmikīṭādikaṃ tathā |
sthāvarasya ca śuśrūṣā jaṅgamasya ca tarpaṇam ||

1.11.22

tattatsukhānurāgeṇa śivapūjāṃ vidurbudhāḥ |
pīṭhamambāmayaṃ sarvaṃ śivaliṅgaṃ ca cinmayam ||

1.11.23

yathā devīmumāmaṅke dhṛtvā tiṣṭhati śaṅkaraḥ |
tathā liṅgamidaṃ pīṭhaṃ dhṛtvā tiṣṭhati santatam ||

1.11.24

evaṃ sthāpya mahāliṅgaṃ pūjayedupacārakaiḥ |
nityapūjā yathāśakti dhvajādikaraṇaṃ tathā ||

1.11.25

iti saṃsthāpayelliṅgaṃ sākṣācchivapadapradam |
athavā caraliṅgaṃ tu ṣoḍaśairupacārakaiḥ ||

1.11.26

pūjayecca yathānyāyaṃ kramācchivapadapradam |
āvāhanaṃ cāsanaṃ ca arghyaṃ pādyaṃ tathaiva ca ||

1.11.27

tadaṅgācamanaṃ caiva snānamabhyaṅgapūrvakam |
vastraṃ gandhaṃ tathā puṣpaṃ dhūpaṃ dīpaṃ nivedanam ||

1.11.28

nīrājanaṃ ca tāmbūlaṃ namaskāro visarjanam |
athavārghyādikaṃ kṛtvā naivedyāntaṃ yathāvidhi ||

1.11.29

athābhiṣekaṃ naivedyaṃ namaskāraṃ ca tarpaṇam |
yathāśakti sadā kuryātkramācchivapadapradam ||

1.11.30

athavā mānuṣe liṅge'pyārṣe daive svayambhuvi |
sthāpite'pūrvake liṅge sopacāraṃ yathā tathā ||

1.11.31

pūjopakaraṇe datte yatkiñcitphalamaśnute |
pradakṣiṇānamaskāraiḥ kramācchivapadapradam ||

1.11.32

liṅgadarśanamātraṃ vā niyamena śivapradam |
mṛtpiṣṭagośakṛtpuṣpaiḥ karavīreṇa vā phalaiḥ ||

1.11.33

guḍena navanītena bhasmanānnairyathāruci |
liṅgaṃ yatnena kṛtvānte yajettadanusārataḥ ||

1.11.34

aṅguṣṭhādāvapi tathā pūjāmicchanti kecana |
liṅgakarmaṇi sarvatra niṣedho'sti na karhicit ||

1.11.35

sarvatra phaladātā hi prayāsānuguṇaṃ śivaḥ |
athavā liṅgadānaṃ vā liṅgamaulyamathāpi vā ||

1.11.36

śraddhayā śivabhaktāya dattaṃ śivapadapradam |
athavā praṇavaṃ nityaṃ japeddaśasahasrakam ||

1.11.37

sandhyayośca sahasraṃ vā jñeyaṃ śivapadapradam |
japakāle makārāntaṃ manaḥśuddhikaraṃ bhavet ||

1.11.38

samādhau mānasaṃ proktamupāṃśusārvakālikam |
samānapraṇavaṃ cemaṃ bindunādayutaṃ viduḥ ||

1.11.39

atha pañcākṣaraṃ nityaṃ japedayutamādarāt |
sandhyayośca sahasraṃ vā jñeyaṃ śivapadapradam ||

1.11.40

praṇavenādisaṃyuktaṃ brāhmaṇānāṃ viśiṣyate |
dīkṣāyuktaṃ gurorgrāhyaṃ mantraṃ hyatha phalāptaye ||

1.11.41

kumbhasnānaṃ mantradīkṣāṃ mātṛkānyāsameva ca |
brāhmaṇaḥ satyapūtātmā gururjñānī viśiṣyate ||

1.11.42

dvijānāṃ ca namaḥ pūrvamanyeṣāṃ ca namontakam |
strīṇāṃ ca kecidicchanti namo'ntaṃ ca yathāvidhi ||

1.11.43

viprastrīṇāṃ namaḥ pūrvamidamicchanti kecana |
pañcakoṭijapaṃ kṛtvā sadāśivasamo bhavet ||

1.11.44

ekadvitricatuḥ koṭyā brahmādīnāṃ padaṃ vrajet |
japedakṣaralakṣaṃ vā akṣarāṇāṃ pṛthakpṛthak ||

1.11.45

athavākṣaralakṣaṃ vā jñeyaṃ śivapadapradam |
sahasraṃ tu sahasrāṇāṃ sahasreṇa dinena hi ||

1.11.46

japenmantrādiṣṭasiddhirnityaṃ brāhmaṇabhojanāt |
aṣṭottarasahasraṃ vai gāyatrīṃ prātareva hi ||

1.11.47

brāhmaṇastu japennityaṃ kramācchivapadapradām |
vedamantrāṃśca sūktāni japenniyamamāsthitaḥ ||

1.11.48

ekaṃ daśārṇamantraṃ ca śatonaṃ ca tadūrdhvakam |
ayutaṃ ca sahasraṃ ca śatamekaṃ vinā bhavet ||

1.11.49

vedapārāyaṇaṃ caiva jñeyaṃ śivapadapradam |
anyānbahutarānmantrāñjapedakṣaralakṣataḥ ||

1.11.50

ekākṣarāṃstathā mantrāñjapedakṣarakoṭitaḥ |
tataḥ paraṃ japeccaiva sahasraṃ bhaktipūrvakam ||

1.11.51

evaṃ kuryādyathāśakti kramācchivapadaṃ labhet |
nityaṃ rucikaraṃ tvekaṃ mantramāmaraṇāntikam ||

1.11.52

sahasramomiti japetsarvābhīṣṭaṃ śivājñayā |
puṣpārāmādikaṃ vāpi tathā sammārjanādikam ||

1.11.53

śivāya śivakāryārthe kṛtvā śivapadaṃ labhet |
śivakṣetre tathā vāsaṃ nityaṃ kuryācca bhaktitaḥ ||

1.11.54

jaḍānāmajaḍānāṃ ca sarveṣāṃ bhuktimuktidam |
tasmādvāsaṃ śivakṣetre kuryādāmaraṇaṃ budhaḥ ||

1.11.55

liṅgāddhastaśataṃ puṇyaṃ kṣetre mānuṣake viduḥ |
sahasrāratnimātraṃ tu puṇyaṃ kṣetre tathārṣake ||

1.11.56

daivaliṅge tathā jñeyaṃ sahasrāratnimānataḥ |
dhanuḥpramāṇasāhasraṃ puṇyaṃ kṣetre svayambhuvi ||

1.11.57

puṇyakṣetre sthitā vāpī kūpādyaṃ puṣkarāṇi ca |
śivagaṅgeti vijñeyaṃ śivasya vacanaṃ yathā ||

1.11.58

tatra snātvā tathā dattvā japitvā hi śivaṃ vrajet |
śivakṣetraṃ samāśritya vasedāmaraṇaṃ tathā ||

1.11.59

dvāhaṃ daśāhaṃ māsyaṃ vā sapiṇḍīkaraṇaṃ tu vā |
ābdikaṃ vā śivakṣetre kṣetre piṇḍamathāpi vā ||

1.11.60

sarvapāpavinirmuktaḥ sadyaḥ śivapadaṃ labhet |
athavā saptarātraṃ vā vasedvā pañcarātrakam ||

1.11.61

trirātramekarātraṃ vā kramācchivapadaṃ labhet |
svavarṇānuguṇaṃ loke svācārātprāpnute naraḥ ||

1.11.62

varṇoddhāreṇa bhaktyā ca tatphalātiśayaṃ naraḥ |
sarvaṃ kṛtaṃ kāmanayā sadyaḥ phalamavāpnuyāt ||

1.11.63

sarvaṃ kṛtamakāmena sākṣācchivapadapradam |
prātarmadhyāhnasāyāhnamahastriṣvekataḥ kramāt ||

1.11.64

prātarvidhikaraṃ jñeyaṃ madhyāhnaṃ kāmikaṃ tathā |
sāyāhnaṃ śāntikaṃ jñeyaṃ rātrāvapi tathaiva hi ||

1.11.65

kālo niśītho vai prokto madhyayāmadvayaṃ niśi |
śivapūjā viśeṣeṇa tatkāle'bhīṣṭasiddhidā ||

1.11.66

evaṃ jñātvā naraḥ kurvanyathoktaphalabhāgbhavet |
kalau yuge viśeṣeṇa phalasiddhistu karmaṇā ||

1.11.67

uktena kenacidvāpi hyadhikāravibhedataḥ |
sadvṛttiḥ pāpabhīruścettattatphalamavāpnuyāt ||

1.11.68

ṛṣaya ūcuḥ |
atha kṣetrāṇi puṇyāni samāsātkathayasva naḥ |
sarvāḥ striyaśca puruṣā yānyāśritya padaṃ labhet ||

1.11.69

sūta yogivaraśreṣṭha śivakṣetrāgamāṃstathā |
sūta uvāca |
śṛṇuta śraddhayā sarvakṣetrāṇi ca tadāgamān ||

1.11.69.c1

iti śrīśivamahāpurāṇe prathamāyāṃ vidyeśvarasaṃhitāyāṃ śivaliṅgapūjādivarṇanaṃ nāma ekādaśo'dhyāyaḥ ||

1.11.69.p2

śrīgaṇeśāya namaḥ ||

1.11.69.p3

śrīgaurīśaṅkarābhyāṃ namaḥ ||

1.11.69.p4

vidyeśvarasaṃhitā

Other recensions (2)

Linked texts (1)