Pramāṇa · Search · About · API

Shivapurana 1.12: dvādaśo'dhyāyaḥ | śivakṣetravarṇanam

Śivapurāṇa (complete text) 1.12

Language
Sanskrit

Contents

dvādaśo'dhyāyaḥ | śivakṣetravarṇanam

1.12.1

sūta uvāca |
śṛṇudhvamṛṣayaḥ prājñāḥ śivakṣetraṃ vimuktidam |
tadāgamāṃstato vakṣye lokarakṣārthameva hi ||

1.12.2

pañcāśatkoṭivistīrṇā saśailavanakānanā |
śivājñayā hi pṛthivī lokaṃ dhṛtvā ca tiṣṭhati ||

1.12.3

tatra tatra śivakṣetraṃ tatra tatra nivāsinām |
mokṣārthaṃ kṛpayā devaḥ kṣetraṃ kalpitavānprabhuḥ ||

1.12.4

parigrahād ṝṣīṇāṃ ca devānāṃ ca parigrahāt |
svayambhūtānyathānyāni lokarakṣārthameva hi ||

1.12.5

tīrthe kṣetre sadā kāryaṃ snānadānajapādikam |
anyathā rogadāridryamūkatvādyāpnuyānnaraḥ ||

1.12.6

athāsminbhārate varṣe prāpnoti maraṇaṃ naraḥ |
svayambhūsthānavāsena punarmānuṣyamāpnuyāt ||

1.12.7

kṣetre pāpasya karaṇaṃ dṛḍhaṃ bhavati bhūsurāḥ |
puṇyakṣetre nivāse hi pāpamaṇvapi nācaret ||

1.12.8

yena kenāpyupāyena puṇyakṣetre vasennaraḥ |
sindhoḥ śatanadītīre santi kṣetrāṇyanekaśaḥ ||

1.12.9

sarasvatī nadī puṇyā proktā ṣaṣṭimukhā tathā |
tattattīre vasetprājñaḥ kramād brahmapadaṃ labhet ||

1.12.10

himavadgirijā gaṅgā puṇyā śatamukhā nadī |
tattīre caiva kāśyādipuṇyakṣetrāṇyanekaśaḥ ||

1.12.11

tatra tīraṃ praśastaṃ hi mṛge mṛgabṛhaspatau |
śoṇabhadro daśamukhaḥ puṇyo'bhīṣṭaphalapradaḥ ||

1.12.12

tatra snānopavāsena padaṃ vaināyakaṃ labhet |
caturvīṃśamukhā puṇyā narmadā ca mahānadī ||

1.12.13

tasyāṃ snānena vāsena padaṃ vaiṣṇavamāpnuyāt |
tamasā dvādaśamukhā revā daśamukhā nadī ||

1.12.14

godāvarī mahāpuṇyā brahmagovadhanāśinī |
ekaviṃśamukhā proktā rudralokapradāyinī ||

1.12.15

kṛṣṇa veṇī puṇyanadī sarvapāpakṣayāvahā |
sāṣṭādaśamukhā proktā viṣṇulokapradāyinī ||

1.12.16

tuṅgabhadrā daśamukhā brahmalokapradāyinī |
suvarṇamukharī puṇyā proktā navamukhā tathā ||

1.12.17

tatraiva suprajāyante brahmalokacyutāstathā |
sarasvatī ca pampā ca kanyā śvetanadī śubhā ||

1.12.18

etāsāṃ tīravāsena indralokamavāpnuyāt |
sahyādrijā mahāpuṇyā kāverīti mahānadī ||

1.12.19

saptaviṃśamukhā proktā sarvābhīṣṭapradāyinī |
tattīrāḥ svargadāścaiva brahmaviṣṇupadapradāḥ ||

1.12.20

śivalokapradāḥ śaivāstathābhīṣṭaphalapradāḥ |
naimiṣe badare snāyānmeṣage ca gurau ravau ||

1.12.21

brahmalokapradaṃ vidyāttataḥ pūjādikaṃ tathā |
sindhunadyāṃ tathā snānaṃ siṃhe karkaṭage ravau ||

1.12.22

kedārodakapānaṃ ca snānaṃ ca jñānadaṃ viduḥ |
godāvaryāṃ siṃhamāse snāyātsiṃhabṛhaspatau ||

1.12.23

śivalokapradamiti śivenoktaṃ tathā purā |
yamunāśoṇayoḥ snāyād gurau kanyāgate ravau ||

1.12.24

dharmaloke dantiloke mahābhogapradaṃ viduḥ |
kāveryāṃ ca tathā snāyāttulāge tu ravau gurau ||

1.12.25

viṣṇorvacanamāhātmyātsarvābhīṣṭapradaṃ viduḥ |
vṛścike māsi samprāpte tathārke guruvṛścike ||

1.12.26

narmadāyāṃ nadīsnānādviṣṇulokamavāpnuyāt |
suvarṇamukharīsnānāṃ cāpage ca gurau ravau ||

1.12.27

śivalokapradamiti brāhmaṇo vacanaṃ yathā |
mṛgamāsi tathā snāyājjāhnavyāṃ mṛgage gurau ||

1.12.28

śivalokapradamiti brahmaṇo vacanaṃ yathā |
brahmaviṣṇvoḥ pade bhuktvā tadante jñānamāpnuyāt ||

1.12.29

gaṅgāyāṃ māghamāse tu tathā kumbhagate ravau |
śrāddhaṃ vā piṇḍadānaṃ vā tilodakamathāpi vā ||

1.12.30

vaṃśadvayapitṝṇāṃ ca kulakoṭyuddharaṃ viduḥ |
kṛṣṇaveṇyāṃ praśaṃsanti mīnage ca gurau ravau ||

1.12.31

tattattīrthe ca tanmāsi snānamindrapadapradam |
gaṅgāṃ vā sahyajāṃ vāpi samāśritya vased budhaḥ ||

1.12.32

tatkālakṛtapāpasya kṣayo bhavati niścitam |
rudralokapradānyeva santi kṣetrāṇyanekaśaḥ ||

1.12.33

tāmraparṇī vegavatī brahmalokaphalaprade |
tayostīre hi santyeva kṣetrāṇi svargadāni ca ||

1.12.34

santi kṣetrāṇi tanmadhye puṇyadāni ca bhūriśaḥ |
tatra tatra vasanprājñastādṛśaṃ ca phalaṃ labhet ||

1.12.35

sadācāreṇa sadvṛttyā sadā bhāvanayāpi ca |
vaseddayāluḥ prājño vai nānyathā tatphalaṃ labhet ||

1.12.36

puṇyakṣetre kṛtaṃ puṇyaṃ bahudhā ṛddhimṛcchati |
puṇyakṣetre kṛtaṃ pāpaṃ mahadaṇvāpi jāyate ||

1.12.37

tatkālaṃ jīvanārthaścetpuṇyena kṣayameṣyati |
puṇyamaiśvaryadaṃ prāhuḥ kāyikaṃ vācikaṃ tathā ||

1.12.38

mānasaṃ ca tathā pāpaṃ tādṛśaṃ nāśayed dvijāḥ |
mānasaṃ vajralepaṃ tu kalpakalpānugaṃ tathā ||

1.12.39

dhyānādeva hi tannaśyennānyathā nāśamṛcchati |
vācikaṃ japajālena kāyikaṃ kāyaśoṣaṇāt ||

1.12.40

dānāddhanakṛtaṃ naśyennānyathā kalpakoṭibhiḥ |
kvacitpāpena puṇyaṃ ca vṛddhipūrveṇa naśyati ||

1.12.41

bījāṃśaścaiva vṛddhyaṃśo bhogāṃśaḥ puṇyapāpayoḥ |
jñānanāśyo hi bījāṃśo vṛddhiruktaprakārataḥ ||

1.12.42

bhogāṃśo bhoganāśyastu nānyathā puṇyakoṭibhiḥ |
bījaprarohe naṣṭe tu śeṣo bhogāya kalpate ||

1.12.43

devānāṃ pūjayā caiva brahmaṇānāṃ ca dānataḥ |
tapodhikyācca kālena bhogaḥ sahyo bhavennṛṇām |
tasmātpāpamakṛtvaiva vastavyaṃ sukhamicchatā ||

1.12.43.c1

iti śrīśivamahāpurāṇe prathamāyāṃ vidyeśvarasaṃhitāyāṃ śivakṣetravarṇanaṃ nāma dvādaśo'dhyāyaḥ ||

1.12.43.p2

śrīgaṇeśāya namaḥ ||

1.12.43.p3

śrīgaurīśaṅkarābhyāṃ namaḥ ||

1.12.43.p4

vidyeśvarasaṃhitā

Other recensions (2)

Linked texts (1)