Pramāṇa · Search · About · API

Shivapurana 1.17: saptadaśo'dhyāyaḥ | praṇavapañcākṣaramantramāhātmyam

Śivapurāṇa (complete text) 1.17

Language
Sanskrit

Contents

saptadaśo'dhyāyaḥ | praṇavapañcākṣaramantramāhātmyam

1.17.1

ṛṣaya ūcuḥ |
praṇavasya ca māhātmyaṃ ṣaḍliṅgasya mahāmune |
śivabhaktasya pūjāṃ ca kramaśo brūhi naḥ prabho ||

1.17.2

sūta uvāca |
tapodhanairbhavadbhiśca samyak praśnastvayaṃ kṛtaḥ |
asyottaraṃ mahādevo jānāti sma na cāparaḥ ||

1.17.3

tathāpi vakṣye tamahaṃ śivasya kṛpayaiva hi |
śivo'smākaṃ ca yuṣmākaṃ rakṣāṃ gṛhṇātu bhūriśaḥ ||

1.17.4

pro hi prakṛtijātasya saṃsārasya mahodadheḥ |
navaṃ nāvāntaramiti praṇavaṃ vai vidurbudhāḥ ||

1.17.5

praḥ prapañco na nāsti vo yuṣmākaṃ praṇavaṃ viduḥ |
prakarṣeṇa nayedyasmānmokṣaṃ vaḥ praṇavaṃ viduḥ ||

1.17.6

svamantrajāpakānāṃ ca pūjakānāṃ ca yoginām |
sarvakarmakṣayaṃ kṛtvā divyajñānaṃ tu nūtanam ||

1.17.7

tameva māyārahitaṃ nūtanaṃ paricakṣate |
prakarṣeṇa mahātmānaṃ navaṃ śuddhasvarūpakam ||

1.17.8

nūtanaṃ vai karotīti praṇavaṃ taṃ vidurbudhāḥ |
praṇavaṃ dvividhaṃ proktaṃ sūkṣmasthūlavibhedataḥ ||

1.17.9

sūkṣmamekākṣaraṃ vidyātsthūlaṃ pañcākṣaraṃ viduḥ |
sūkṣmamavyaktapañcārṇaṃ suvyaktārṇaṃ tathetarat ||

1.17.10

jīvanmuktasya sūkṣmaṃ hi sarvasāraṃ hitasya hi |
mantreṇārthānusandhānaṃ svadehavilayāvadhi ||

1.17.11

svadehe galite pūrṇaṃ śivaṃ prāpnoti niścayaḥ |
kevalaṃ mantrajāpī tu yogaṃ prāpnoti niścayaḥ ||

1.17.12

ṣaṭtriṃśatkoṭijāpī tu niścayaṃ yogamāpnuyāt |
sūkṣmaṃ ca dvividhaṃ jñeyaṃ hrasvadīrghavibhedataḥ ||

1.17.13

akāraśca ukāraśca makāraśca tataḥ param |
bindunādayutaṃ taddhi śabdakālakalānvitam ||

1.17.14

dīrghapraṇavamevaṃ hi yogināmeva hṛdgatam |
makāraṃ tantritattvaṃ hi hrasvapraṇava ucyate ||

1.17.15

śivaḥ śaktistayoraikyaṃ makāraṃ tu trikātmakam |
hrasvamevaṃ hi jāpyaṃ syātsarvapāpakṣayaiṣiṇām ||

1.17.16

bhūvāyukanakārṇodyoḥ śabdādyāśca tathā daśa |
āśānvaye daśa punaḥ pravṛttā iti kathyate ||

1.17.17

hrasvameva pravṛttānāṃ nivṛttānāṃ tu dīrghakam |
vyāhṛtyādau ca mantrādau kāmaṃ śabdakalāyutam ||

1.17.18

vedādau ca prayojyaṃ syādvandane sandhyayorapi |
navakoṭijapāñjaptvā saṃśuddhaḥ puruṣo bhavet ||

1.17.19

punaśca navakoṭyā tu pṛthivījayamāpnuyāt |
punaśca navakoṭyā tu hyapāṃ jayamavāpnuyāt ||

1.17.20

punaśca navakoṭyā tu tejasāṃ jayamāpnuyāt |
punaśca navakoṭyā tu vāyorjayamavāpnuyāt |
ākāśajayamāpnoti navakoṭijapena vai ||

1.17.21

gandhādīnāṃ krameṇaiva navakoṭijapena vai |
ahaṅkārasya ca punarnavakoṭijapena vai ||

1.17.22

sahasramantrajaptena nityaśuddho bhavetpumān |
tataḥ paraṃ svasiddhyarthaṃ japo bhavati hi dvijāḥ ||

1.17.23

evamaṣṭottaraśatakoṭijaptena vai punaḥ |
praṇavena prabuddhastu śuddhayogamavāpnuyāt ||

1.17.24

śuddhayogena saṃyukto jīvanmukto na saṃśayaḥ |
sadā japansadā dhyāyañchivaṃ praṇavarūpiṇam ||

1.17.25

samādhistho mahāyogī śiva eva na saṃśayaḥ |
ṛṣicchando devatādi nyasya dehe punarjapet ||

1.17.26

praṇavaṃ mātṛkāyuktaṃ dehe nyasya ṛṣirbhavet |
daśamātṛṣaḍadhvādi sarvaṃ nyāsaphalaṃ labhet ||

1.17.27

pravṛttānāṃ ca miśrāṇāṃ sthūlapraṇavamiṣyate |
kriyātapojapairyuktāstrividhāḥ śivayoginaḥ ||

1.17.28

dhanādivibhavaiścaiva karādyaṅgairnamādibhiḥ |
kriyayā pūjayā yuktaḥ kriyāyogīti kathyate ||

1.17.29

pūjāyuktaśca mitabhugbāhyendriyajayānvitaḥ |
paradrohādirahitastapoyogīti kathyate ||

1.17.30

etairyuktaḥ sadā śuddhaḥ sarvakāmādivarjitaḥ |
sadā japaparaḥ śānto japayogīti taṃ viduḥ ||

1.17.31

upacāraiḥ ṣoḍaśabhiḥ pūjayā śivayoginām |
sālokyādikrameṇaiva śuddho muktiṃ labhennaraḥ ||

1.17.32

japayogamatho vakṣye gadataḥ śṛṇuta dvijāḥ |
tapaḥ karturjapaḥ prokto yajjapanparimārjate ||

1.17.33

śivanāma namaḥpūrvaṃ caturthyāṃ pañcatattvakam |
sthūlapraṇavarūpaṃ hi śivapañcākṣaraṃ dvijāḥ ||

1.17.34

pañcākṣarajapenaiva sarvasiddhiṃ labhennaraḥ |
praṇavenādisaṃyuktaṃ sadā pañcākṣaraṃ japet ||

1.17.35

gurūpadeśaṃ saṅgamya sukhavāse subhūtale |
pūrvapakṣe samārabhya kṛṣṇabhūtāvadhi dvijāḥ ||

1.17.36

māghaṃ bhādraṃ viśiṣṭaṃ tu sarvakālottamottamam |
ekavāraṃ mitāśī tu vāgyato niyatendriyaḥ ||

1.17.37

svasya rājapitṛṇāṃ ca nityaṃ śuśrūṣaṇaṃ caret |
sahasrajapamātreṇa bhavecchuddho'nyathā ṛṇī ||

1.17.38

pañcākṣaraṃ pañcalakṣaṃ japecchivamanusmaran |
padmāsanasthaṃ śivadaṃ gaṅgācandrakalānvitam ||

1.17.39

vāmorusthitaśaktyā ca virājantaṃ mahāgaṇaiḥ |
mṛgaṭaṅkadharaṃ devaṃ varadābhayapāṇikam ||

1.17.40

sadānugrahakartāraṃ sadāśivamanusmaran |
sampūjya manasā pūrvaṃ hṛdi vā sūryamaṇḍale ||

1.17.41

japetpañcākṣarīṃ vidyāṃ prāṅmukhaḥ śuddhakarmakṛt |
prātaḥ kṛṣṇacaturdaśyāṃ nityakarma samāpya ca ||

1.17.42

manorame śucau deśe niyataḥ śuddhamānasaḥ |
pañcākṣarasya mantrasya sahasraṃ dvādaśaṃ japet ||

1.17.43

varayecca sapatnīkān śaivānvai brāhmaṇottamān |
ekaṃ guruvaraṃ śiṣṭaṃ varayetsāmbamūrtikam ||

1.17.44

īśānaṃ cātha puruṣamaghoraṃ vāmameva ca |
sadyojātaṃ ca pañcaiva śivabhaktāndvijottamān ||

1.17.45

pūjādravyāṇi sampādya śivapūjāṃ samārabhet |
śivapūjāṃ ca vidhivatkṛtvā homaṃ samārabhet ||

1.17.46

mukhāntaṃ ca svasūtreṇa kṛtvā homaṃ samācaret |
daśaikaṃ vā śataikaṃ vā sahasraikamathāpi vā ||

1.17.47

kāpilena ghṛtenaiva juhuyātsvayameva hi |
kārayecchivabhaktairvāpyaṣṭottaraśataṃ budhaḥ ||

1.17.48

homānte dakṣiṇā deyā gurorgomithunaṃ tathā |
īśānādisvarūpāṃstānguruṃ sāmbaṃ vibhāvya ca ||

1.17.49

teṣāṃ patsiktatoyena svaśiraḥ snānamācaret |
ṣaṭtriṃśatkoṭitīrtheṣu sadyaḥ snānaphalaṃ labhet ||

1.17.50

daśāṅgamannaṃ teṣāṃ vai dadyādvai bhaktipūrvakam |
parābuddhyā guroḥ patnīmīśānādikrameṇa tu ||

1.17.51

paramānnena sampūjya yathāvibhavavistaram |
rudrākṣavastrapūrvaṃ ca vaṭakāpūpakairyutam ||

1.17.52

balidānaṃ tataḥ kṛtvā bhūri bhojanamācaret |
tataḥ samprārthya deveśaṃ japaṃ tāvatsamāpayet ||

1.17.53

puraścaraṇamevaṃ tu kṛtvā mantrī bhavennaraḥ |
punaśca pañcalakṣeṇa sarvapāpakṣayo bhavet ||

1.17.54

atalādi samārabhya satyalokāvadhi kramāt |
pañcalakṣajapāttattallokaiśvaryamavāpnuyāt ||

1.17.55

madhyemṛtaścedbhogānte bhūmau tajjāpako bhavet |
punaśca pañcalakṣeṇa brahmasāmīpyamāpnuyāt ||

1.17.56

punaśca pañcalakṣeṇa sārūpyaiśvaryamāpnuyāt |
āhatya śatalakṣeṇa sākṣād brahmasamo bhavet ||

1.17.57

kāryabrahmaṇa evaṃ hi sāyujyaṃ pratipadya vai |
yatheṣṭaṃ bhogamāpnoti tad brahma pralayāvadhi ||

1.17.58

punaḥ kalpāntare vṛtte brahmaputraḥ sa jāyate |
punaśca tapasā dīptaḥ kramānmukto bhaviṣyati ||

1.17.59

pṛthvyādikāryabhūtebhyo lokā vai nirmitāḥ kramāt |
pātālādi ca satyāntaṃ brahmalokāścaturdaśa ||

1.17.60

satyādūrdhvaṃ kṣamāntaṃ vai viṣṇulokāścaturdaśa |
kṣamāloke kāryaviṣṇurvaikuṇṭhe varapattane ||

1.17.61

kāryalakṣmyā mahābhogī rakṣāṃ kṛtvādhitiṣṭhati |
tadūrdhvagāśca śucyantā lokāṣṭāviṃśatiḥ sthitāḥ ||

1.17.62

śucau loke tu kailāse rudro vai bhūtahṛtsthitaḥ |
ṣaḍuttarāśca pañcāśadahiṃsāntāstadūrdhvagāḥ ||

1.17.63

ahiṃsālokamāsthāya jñānakailāsake pure |
kāryeśvarastirobhāvaṃ sarvānkṛtvādhitiṣṭhati ||

1.17.64

tadante kālacakraṃ hi kālātītastataḥ param |
śivenādhiṣṭhitastatra kālaścakreśvarāhvayaḥ ||

1.17.65

māhiṣaṃ dharmamāsthāya sarvānkālena yuñjati |
asatyaścāśuciścaiva hiṃsā caivātha nirghṛṇā ||

1.17.66

asatyādicatuṣpādaḥ sarvāṃśaḥ kāmarūpadhṛk |
nāstikyalakṣmīrduḥsaṅgo vedabāhyadhvaniḥ sadā ||

1.17.67

krodhasaṅgaḥ kṛṣṇavarṇo mahāmahiṣaveṣavān |
tāvanmaheśvaraḥ proktastirodhāstāvadeva hi ||

1.17.68

tadarvākkarmabhogo hi tadūrdhvaṃ jñānabhogakam |
tadarvākkarmamāyā hi jñānamāyā tadūrdhvakam ||

1.17.69

mā lakṣmīḥ karmabhogo vai yāti māyeti kathyate |
mā lakṣmīrjñānabhogo vai yāti māyeti kathyate ||

1.17.70

tadūrdhvaṃ nityabhogo hi tadarvāṅ naśvaraṃ viduḥ |
tadarvākca tirodhānaṃ tadūrdhvaṃ na tirodhanam ||

1.17.71

tadarvāk pāśabandho hi tadūrdhvaṃ nahi bandhanam |
tadarvāk parivartante kāmyakarmānusāriṇaḥ ||

1.17.72

niṣkāmakarmabhogastu tadūrdhvaṃ parikīrtitaḥ |
tadarvāk parivartante bindupūjāparāyaṇāḥ ||

1.17.73

tadūrdhvaṃ hi vrajantyeva niṣkāmā liṅgapūjakāḥ |
tadarvāk parivartante śivānyasurapūjakāḥ ||

1.17.74

śivaikaniratā ye ca tadūrdhvaṃ samprayānti te |
tadarvāgjīvakoṭiḥ syāttadūrdhvaṃ parakoṭikāḥ ||

1.17.75

sāṃsārikāstadarvāk ca muktāḥ khalu tadūrdhvagāḥ |
tadarvāk parivartante prākṛtadravyapūjakāḥ ||

1.17.76

tadūrdhvaṃ hi vrajantyete pauruṣadravyapūjakāḥ |
tadarvākchaktiliṅgaṃ tu śivaliṅgaṃ tadūrdhvakam ||

1.17.77

tadarvāgāvṛtaṃ liṅgaṃ tadūrdhvaṃ hi nirākṛti |
tadarvākkalpitaṃ liṅgaṃ tadūrdhvaṃ vai na kalpitam ||

1.17.78

tadarvāgbāhyaliṅgaṃ syādantaraṅgaṃ tadūrdhvakam |
tadarvākchaktilokā hi śataṃ vai dvādaśādhikam ||

1.17.79

tadarvāgbindurūpaṃ hi nādarūpaṃ taduttaram |
tadarvākkarmalokastu tadūrdhvaṃ jñānalokakaḥ ||

1.17.80

namaskārastadūrdhvaṃ hi madāhaṅkāranāśanaḥ |
janaṃ tasmāt tirodhānaṃ pratyāyāti na nā yataḥ ||

1.17.81

jñānaśabdārtha evaṃ hi tirodhānanivāraṇāt |
tadarvāk parivartante hyādhibhautikapūjakāḥ ||

1.17.82

ādhyātmikārcakā eva tadūrdhvaṃ samprayānti vai |
tāvadvai vedibhāgaṃ tanmahālokātmaliṅgake ||

1.17.83

prakṛtyādyaṣṭabandho'pi vedyate sampratiṣṭhitaḥ |
evametādṛśaṃ jñeyaṃ sarvaṃ laukikavaidikam ||

1.17.84

adharmamahiṣārūḍhaṃ kālacakraṃ taranti te |
satyādidharmayuktā ye śivapūjāparāśca ye ||

1.17.85

tadūrdhvaṃ vṛṣabho dharmo brahmacaryasvarūpadhṛk |
satyādipādayuktastu śivalokāgrataḥ sthitaḥ ||

1.17.86

kṣamāśṛṅgaḥ śamaśrotro vedadhvanivibhūṣitaḥ |
āstikyacakṣurniśvāsagurubuddhimanā vṛṣaḥ ||

1.17.87

kriyādivṛṣabhā jñeyāḥ kāraṇādiṣu sarvadā |
taṃ kriyāvṛṣabhaṃ dharmaṃ kālātīto'dhitiṣṭhati ||

1.17.88

brahmaviṣṇumaheśānāṃ svasvāyurdinamucyate |
tadūrdhvaṃ na dinaṃ rātrirna janmamaraṇādikam ||

1.17.89

punaḥ kāraṇasatyāntāḥ kāraṇabrahmaṇastathā |
gandhādibhyastu bhūtebhyastadūrdhvaṃ nirmitāḥ sadā ||

1.17.90

sūkṣmagandhasvarūpā hi sthitā lokāścaturdaśa |
punaḥ kāraṇaviṣṇorvai sthitā lokāścaturdaśa ||

1.17.91

punaḥ kāraṇarudrasya lokāṣṭāviṃśakā matāḥ |
punaśca kāraṇeśasya ṣaṭpañcāśattadūrdhvagāḥ ||

1.17.92

tataḥ paraṃ brahmacaryalokākhyaṃ śivasammatam |
tatraiva jñānakailāse pañcāvaraṇasaṃyute ||

1.17.93

pañcamaṇḍalasaṃyuktaṃ pañcabrahmakalānvitam |
ādiśaktisamāyuktamādiliṅgaṃ tu tatra vai ||

1.17.94

śivālayamidaṃ proktaṃ śivasya paramātmanaḥ |
paraśaktyā samāyuktastatraiva parameśvaraḥ ||

1.17.95

sṛṣṭiḥ sthitiśca saṃhārastirobhāvo'pyanugrahaḥ |
pañcakṛtyapravīṇo'sau saccidānandavigrahaḥ ||

1.17.96

dhyānadharmaḥ sadā yasya sadānugrahatatparaḥ |
samādhyāsanamāsīnaḥ svātmārāmo virājate ||

1.17.97

tasya sandarśanaṃ sādhyaṃ karmadhyānādibhiḥ kramāt |
nityādikarmayajanācchivakarmamatirbhavet ||

1.17.98

kriyādiśivakarmabhyaḥ śivajñānaṃ prasādhayet |
taddarśanagatāḥ sarve muktā eva na saṃśayaḥ ||

1.17.99

muktirātmasvarūpeṇa svātmārāmatvameva hi |
kriyātapojapajñānadhyānadharmeṣu susthitaḥ ||

1.17.100

śivasya darśanaṃ labdhavā svātmārāmatvameva hi |
yathā raviḥ svakiraṇādaśuddhimapaneṣyati ||

1.17.101

kṛpāvicakṣaṇaḥ śambhurajñānamapaneṣyati |
ajñānavinivṛttau tu śivajñānaṃ pravartate ||

1.17.102

śivajñānātsvasvarūpamātmārāmatvameṣyati |
ātmārāmatvasaṃsiddhau kṛtakṛtyo bhavennaraḥ ||

1.17.103

punaśca śatalakṣeṇa brahmaṇaḥ padamāpnuyāt |
punaśca śatalakṣeṇa viṣṇoḥ padamavāpnuyāt ||

1.17.104

punaśca śatalakṣeṇa rudrasya padamāpnuyāt |
punaśca śatalakṣeṇa aiśvaryaṃ padamāpnuyāt ||

1.17.105

punaścaivaṃvidhenaiva japena susamāhitaḥ |
śivalokādibhūtaṃ hi kālacakramavāpnuyāt ||

1.17.106

kālacakraṃ pañcacakramekaikena kramottare |
sṛṣṭimohau brahmacakraṃ bhogamohau tu vaiṣṇavam ||

1.17.107

kopamohau raudracakraṃ bhramaṇaṃ caiśvaraṃ viduḥ |
śivacakraṃ jñānamohau pañcacakraṃ vidurbudhāḥ ||

1.17.108

punaśca daśakoṭyā hi kāraṇabrahmaṇaḥ padam |
punaśca daśakoṭyā hi tatpadaiśvaryamāpnuyāt ||

1.17.109

evaṃ krameṇa viṣṇvādeḥ padaṃ labdhvā mahaujasaḥ |
krameṇa tatpadaiśvaryaṃ labdhvā caiva mahātmanaḥ ||

1.17.110

śatakoṭimanuṃ japtvā pañcottaramatandritaḥ |
śivalokamavāpnoti pañcamāvaraṇād bahiḥ ||

1.17.111

rājasaṃ maṇḍapaṃ tatra nandisaṃsthānamuttamam |
taporūpaśca vṛṣabhastatraiva paridṛśyate ||

1.17.112

sadyojātasya tatsthānaṃ pañcamāvaraṇaṃ param |
vāmadevasya ca sthānaṃ caturthāvaraṇaṃ punaḥ ||

1.17.113

aghoranilayaṃ paścāt tṛtīyāvaraṇaṃ param |
puruṣasyaiva sāmbasya dvitīyāvaraṇaṃ śubham ||

1.17.114

īśānasya parasyaiva prathamāvaraṇaṃ tataḥ |
dhyānadharmasya ca sthānaṃ pañcamaṃ maṇḍapaṃ tataḥ ||

1.17.115

balināthasya saṃsthānaṃ tatra pūrṇāmṛtapradam |
caturthaṃ maṇḍapaṃ paścāccandraśekharamūrtimat ||

1.17.116

somaskandasya ca sthānaṃ tṛtīyaṃ maṇḍapaṃ param |
dvitīyaṃ maṇḍapaṃ nṛtyamaṇḍapaṃ prāhurāstikāḥ ||

1.17.117

prathamaṃ mūlamāyāyāḥ sthānaṃ tatraiva śobhanam |
tata paraṃ garbhagṛhaṃ liṅgasthānaṃ paraṃ śubham ||

1.17.118

nandisaṃsthānataḥ paścānna viduḥ śivavaibhavam |
nandīśvaro bahistiṣṭhanpañcākṣaramupāsate ||

1.17.119

evaṃ gurukramāllabdhaṃ nandīśācca mayā punaḥ |
tataḥ paraṃ svasaṃvedyaṃ śivenaivānubhāvitam ||

1.17.120

śivasya kṛpayā sākṣācchivalokasya vaibhavam |
vijñātuṃ śakyate sarvairnānyathetyāhurāstikāḥ ||

1.17.121

evaṃ krameṇa muktāḥ syurbrāhmaṇā vai jitendriyāḥ |
anyeṣāṃ ca kramaṃ vakṣye gadataḥ śṛṇutādarāt ||

1.17.122

gurūpadeśājjāpyaṃ vai brāhmaṇānāṃ namo'ntakam |
pañcākṣaraṃ pañcalakṣamāyuṣyaṃ prajapedvidhiḥ ||

1.17.123

strītvāpanayanārthaṃ tu pañcalakṣaṃ japetpunaḥ |
mantreṇa puruṣo bhūtvā kramānmukto bhaved budhaḥ ||

1.17.124

kṣatriyaḥ pañcalakṣeṇa kṣatratvamapaneṣyati |
punaśca pañcalakṣeṇa kṣatriyo brāhmaṇo bhavet ||

1.17.125

mantrasiddhirjapāccaiva kramānmukto bhavennaraḥ |
vaiśyastu pañcalakṣeṇa vaiśyatvamapaneṣyati ||

1.17.126

punaśca pañcalakṣeṇa mantrakṣatriya ucyate |
punaśca pañcalakṣeṇa kṣatratvamapaneṣyati ||

1.17.127

punaśca pañcalakṣeṇa mantrabrāhmaṇa ucyate |
śūdraścaiva namo'ntena pañcaviṃśatilakṣataḥ ||

1.17.128

mantravipratvamāpadya paścācchuddho bhaved dvijaḥ |
nārī vātha naro vātha brāhmaṇo vānya eva vā ||

1.17.129

namo'ntaṃ vā namaḥ pūrvamāturaḥ sarvadā japet |
tatra strīṇāṃ tathaivohya gururnirdarśayetkramāt ||

1.17.130

sādhakaḥ pañcalakṣānte śivaprītyarthameva hi |
mahābhiṣekanaivedyaṃ kṛtvā bhaktāṃśca pūjayet ||

1.17.131

pūjayā śivabhaktasya śivaḥ prītataro bhavet |
śivasya śivabhaktasya bhedo nāsti śivo hi saḥ ||

1.17.132

śivasvarūpamantrasya dhāraṇācchiva eva hi |
śivabhaktaśarīre hi śive tatparamo bhavet ||

1.17.133

śivabhaktāḥ kriyāḥ sarvā veda sarvakriyāṃ viduḥ |
yāvadyāvacchivaṃ mantraṃ yena japtaṃ bhavetkramāt ||

1.17.134

tāvadvai śivasānnidhyaṃ tasmindehe na saṃśayaḥ |
devīliṅgaṃ bhaved rūpaṃ śivabhaktastriyāstathā ||

1.17.135

yāvanmantraṃ japeddevyāstāvatsānnidhyamasti hi |
śivaṃ sampūjayeddhīmānsvayaṃ vai śabdarūpabhāk ||

1.17.136

svayaṃ caiva śivo bhūtvā parāṃ śaktiṃ prapūjayet |
śaktiṃ veraṃ ca liṅgaṃ ca hyālekhyāmāyayā yajet ||

1.17.137

śivaliṅgaṃ śivaṃ matvā svātmānaṃ śaktirūpakam |
śaktiliṅgaṃ ca devīṃ ca matvā svaṃ śivarūpakam ||

1.17.138

śivaliṅgaṃ nādarūpaṃ bindurūpaṃ saśaktikam |
upapradhānabhāvena anyonyāsaktaliṅgakam ||

1.17.139

pūjayecca śivaṃ śaktiṃ sa śivo mūlabhāvanāt |
śivabhaktāñchivamantrarūpakāñchivarūpakān ||

1.17.140

ṣoḍaśairupacāraiśca pūjayediṣṭamāpnuyāt |
yena śuśrūṣaṇādyaiśca śivabhaktasya liṅginaḥ ||

1.17.141

ānandaṃ janayedvidvāñchivaḥ prītataro bhavet |
śivabhaktānsapatnīkānpatnyā saha sadaiva tat ||

1.17.142

pūjayedbhojanādyaiśca pañca vā daśa vā śatam |
dhane dehe ca mantre ca bhāvanāyāmavañcakaḥ ||

1.17.143

śivaśaktisvarūpeṇa na punarjāyate bhuvi |
nābheradho brahmabhāgamākaṇṭhaṃ viṣṇubhāgakam ||

1.17.144

mukhaṃ liṅgamiti proktaṃ śivabhaktaśarīrakam |
mṛtāndāhādiyuktānvā dāhādirahitānmṛtān ||

1.17.145

uddiśya pūjayedādipitaraṃ śivameva hi |
pūjāṃ kṛtvādimātuśca śivabhaktāṃśca pūjayet ||

1.17.146

pitṛlokaṃ samāsādya kramānmukto bhavenmṛtaḥ |
kriyāyuktadaśabhyaśca tapoyukto viśiṣyate ||

1.17.147

tapoyuktaśatebhyaśca japayukto viśiṣyate |
japayuktasahasrebhyaḥ śivajñānī viśiṣyate ||

1.17.148

śivajñāniṣu lakṣeṣu dhyānayukto viśiṣyate |
dhyānayukteṣu koṭibhyaḥ samādhistho viśiṣyate ||

1.17.149

uttarottaravaiśiṣṭyātpūjāyāmuttarottaram |
phalaṃ vaiśiṣṭyarūpaṃ ca durvijñeyaṃ manīṣibhiḥ ||

1.17.150

tasmādvai śivabhaktasya māhātmyaṃ vetti ko naraḥ |
śivaśaktyoḥ pūjanaṃ ca śivabhaktasya pūjanam ||

1.17.151

kurute yo naro bhaktyā sa śivaḥ śivamedhate |
ya imaṃ paṭhate'dhyāyamarthavadvedasammatam ||

1.17.152

śivajñānī bhavedvipraḥ śivena saha modate |
śrāvayecchivabhaktāṃśca viśeṣajño manīśvarāḥ ||

1.17.153

śivaprasādasiddhiḥ syācchivasya kṛpayā budhāḥ ||

1.17.153.c1

iti śrīśivamahāpurāṇe prathamāyāṃ vidyeśvarasaṃhitāyāṃ praṇavapañcākṣaramantramāhātmyavarṇanaṃ nāma saptadaśo'dhyāyaḥ ||

1.17.153.p2

śrīgaṇeśāya namaḥ ||

1.17.153.p3

śrīgaurīśaṅkarābhyāṃ namaḥ ||

1.17.153.p4

vidyeśvarasaṃhitā

Other recensions (2)

Linked texts (3)