Pramāṇa · Search · About · API

Shivapurana 1.19: ekonaviṃśo'dhyāyaḥ | pārthivapūjanamāhātmyaṃ bhasmaprakārābhidhānaṃ ca

Śivapurāṇa (complete text) 1.19

Language
Sanskrit

Contents

ekonaviṃśo'dhyāyaḥ | pārthivapūjanamāhātmyaṃ bhasmaprakārābhidhānaṃ ca

1.19.1

ṛṣaya ūcuḥ |
sūta sūta cirañjīva dhanyastvaṃ śivabhaktimān |
samyaguktastvayā liṅgamahimā satphalapradaḥ ||

1.19.2

yatra pārthivamāheśaliṅgasya mahimādhunā |
sarvotkṛṣṭaśca kathito vyāsato brūhi taṃ punaḥ ||

1.19.3

sūta uvāca |
śṛṇudhvamṛṣayaḥ sarve sadbhaktyādarato'khilāḥ |
śivapārthivaliṅgasya mahimā procyate mayā ||

1.19.4

ukteṣveteṣu liṅgeṣu pārthivaṃ liṅgamuttamam |
tasya pūjanato viprā bahavaḥ siddhimāgatāḥ ||

1.19.5

harirbrahmā ca ṛṣayaḥ saprajāpatayastathā |
sampūjya pārthivaṃ liṅgaṃ prāpuḥ sarvepsitaṃ dvijāḥ ||

1.19.6

devāsuramanuṣyāśca gandharvoragarākṣasāḥ |
anye'pi bahavaḥ siddhiṃ taṃ sampūjya gatāḥ parām ||

1.19.7

kṛte ratnamayaṃ liṅgaṃ tretāyāṃ hemasambhavam |
dvāpare pāradaṃ śreṣṭhaṃ pārthivaṃ tu kalau yuge ||

1.19.8

aṣṭamūrtiṣu sarvāsu mūrtirvai pārthivī varā |
ananyapūjitā viprāstapastasmānmahatphalam ||

1.19.9

yathā sarveṣu deveṣu jyeṣṭhaḥ śreṣṭhaḥ maheśvaraḥ |
evaṃ sarveṣu liṅgeṣu pārthivaṃ śreṣṭhamucyate ||

1.19.10

yathā nadīṣu sarvāsu jyeṣṭhā śreṣṭhā surāpagā |
tathā sarveṣu liṅgeṣu pārthivaṃ śreṣṭhamucyate ||

1.19.11

yathā sarveṣu mantreṣu praṇavo hi mahānsmṛtaḥ |
tathedaṃ pārthivaṃ śreṣṭhamārādhyaṃ pūjyameva hi ||

1.19.12

yathā sarveṣu varṇeṣu brāhmaṇaḥ śreṣṭha ucyate |
tathā sarveṣu liṅgeṣu pārthivaṃ śreṣṭhamucyate ||

1.19.13

yathā purīṣu sarvāsu kāśī śreṣṭhatamā smṛtā |
tathā sarveṣu liṅgeṣu pārthivaṃ śreṣṭhamucyate ||

1.19.14

yathā vrateṣu sarveṣu śivarātrivrataṃ param |
tathā sarveṣu liṅgeṣu pārthivaṃ śreṣṭhamucyate ||

1.19.15

yathā devīṣu sarvāsu śaivī śaktiḥ parā smṛtā |
tathā sarveṣu liṅgeṣu pārthivaṃ śreṣṭhamucyate ||

1.19.16

prakṛtya pārthivaṃ liṅgaṃ yo'nyadevaṃ prapūjayet |
vṛthā bhavati sā pūjā snānadānādikaṃ vṛthā ||

1.19.17

pārthivārādhanaṃ puṇyaṃ dhanyamāyurvivardhanam |
tuṣṭidaṃ puṣṭidaṃ śrīdaṃ kāryaṃ sādhakasattamaiḥ ||

1.19.18

yathālabdhopacāraiśca bhaktiśraddhāsamanvitaḥ |
pūjayetpārthivaṃ liṅgaṃ sarvakāmārthasiddhidam ||

1.19.19

yaḥ kṛtvā pārthivaṃ liṅgaṃ pūjayecchubhavedikam |
ihaiva dhanavāñchrīmānante rudro'bhijāyate ||

1.19.20

trisandhyaṃ yo'rcayaṃlliṅgaṃ kṛtvā bilvena pārthivam |
daśaikādaśakaṃ yāvattasya puṇyaphalaṃ śṛṇu ||

1.19.21

anenaiva svadehena rudraloke mahīyate |
pāpahaṃ sarvamartyānāṃ darśanātsparśanādapi ||

1.19.22

jīvanmuktaḥ sa vai jñānī śiva eva na saṃśayaḥ |
tasya darśanamātreṇa bhuktirmuktiśca jāyate ||

1.19.23

śivaṃ yaḥ pūjayennityaṃ kṛtvā liṅgaṃ tu pārthivam |
yāvajjīvanaparyantaṃ sa yāti śivamandiram ||

1.19.24

mṛḍenāpramitānvarṣāñchivaloke hi tiṣṭhati |
sakāmaḥ punarāgatya rājendro bhārate bhavet ||

1.19.25

niṣkāmaḥ pūjayennityaṃ pārthivaṃ liṅgamuttamam |
śivaloke sadā tiṣṭhettasya sāyujyamāpnuyāt ||

1.19.26

pārthivaṃ śivaliṅgaṃ ca vipro yadi na pūjayet |
sa yāti narakaṃ ghoraṃ śūlaprotaṃ sudāruṇam ||

1.19.27

yathākathañcidvidhinā ramyaṃ liṅgaṃ prakārayet |
pañcasūtravidhānaṃ ca pārthive na vicārayet ||

1.19.28

akhaṇḍaṃ taddhi kartavyaṃ na vikhaṇḍaṃ prakārayet |
vikhaṇḍaṃ tu prakurvāṇo naiva pūjāphalaṃ labhet ||

1.19.29

ratnajaṃ hemajaṃ liṅgaṃ pāradaṃ sphāṭikaṃ tathā |
pārthivaṃ puṣparāgotthamakhaṇḍaṃ tu prakārayet ||

1.19.30

akhaṇḍaṃ tu caraṃ liṅgaṃ dvikhaṇḍamacaraṃ smṛtam |
khaṇḍākhaṇḍavicāro'yaṃ sacarācarayoḥ smṛtaḥ ||

1.19.31

vedikā tu mahāvidyā liṅgaṃ devo maheśvaraḥ |
ato hi sthāvare liṅge smṛtā śreṣṭhā dvikhaṇḍatā ||

1.19.32

dvikhaṇḍaṃ sthāvaraṃ liṅgaṃ kartavyaṃ hi vidhānataḥ |
akhaṇḍaṃ jaṅgamaṃ proktaṃ śaivasiddhāntavedibhiḥ ||

1.19.33

dvikhaṇḍaṃ tu caraṃ liṅgaṃ kurvantyajñānamohitāḥ |
naiva siddhāntavettāro munayaḥ śāstrakovidāḥ ||

1.19.34

akhaṇḍaṃ sthāvaraṃ liṅgaṃ dvikhaṇḍaṃ carameva ca |
ye kurvanti narā mūḍhā na pūjāphalabhāginaḥ ||

1.19.35

tasmācchāstroktavidhinā akhaṇḍaṃ carasaṃjñakam |
dvikhaṇḍaṃ sthāvaraṃ liṅgaṃ kartavyaṃ parayā mudā ||

1.19.36

akhaṇḍe tu care pūjā sampūrṇaphaladāyinī |
dvikhaṇḍe tu care pūjā mahāhānipradā smṛtā ||

1.19.37

akhaṇḍe sthāvare pūjā na kāmaphaladāyinī |
pratyavāyakarī nityamityuktaṃ śāstravedibhiḥ ||

1.19.37.c1

iti śrīśivamahāpurāṇe prathamāyāṃ vidyeśvarasaṃhitāyāṃ sādhyasādhanakhaṇḍe pārthivaśivaliṅgapūjanamāhātmyavarṇanaṃ nāmaikonaviṃśo'dhyāyaḥ ||

1.19.37.p2

śrīgaṇeśāya namaḥ ||

1.19.37.p3

śrīgaurīśaṅkarābhyāṃ namaḥ ||

1.19.37.p4

vidyeśvarasaṃhitā

Other recensions (2)

Linked texts (2)