Pramāṇa · Search · About · API

Shivapurana 1.20: viṃśo'dhyāyaḥ | vaidikaḥ pārthivapūjanaprakāraḥ

Śivapurāṇa (complete text) 1.20

Language
Sanskrit

Contents

viṃśo'dhyāyaḥ | vaidikaḥ pārthivapūjanaprakāraḥ

1.20.1

sūta uvāca -
atha vaidikabhaktānāṃ pārthivārcā nigadyate |
vaidikenaiva mārgeṇa bhuktimuktipradāyinī ||

1.20.2

sūtroktavidhinā snātvā sandhyāṃ kṛtvā yathāvidhi |
brahmayajñaṃ vidhāyādau tatastarpaṇamācaret ||

1.20.3

naityikaṃ sakalaṃ kāmaṃ vidhāyānantaraṃ pumān |
śivasmaraṇapūrvaṃ hi bhasmarudrākṣadhārakaḥ ||

1.20.4

vedoktavidhinā samyak sampūrṇaphalasiddhaye |
pūjayetparayā bhaktyā pārthivaṃ liṅgamuttamam ||

1.20.5

nadītīre taḍāge ca parvate kānane'pi ca |
śivālaye śucau deśe pārthivārcā vidhīyate ||

1.20.6

śuddhapradeśasambhūtāṃ mṛdamāhṛtya yatnataḥ |
śivaliṅgaṃ prakalpeta sāvadhānatayā dvijāḥ ||

1.20.7

vipre gaurā smṛtā śoṇā bāhuje pītavarṇakā |
vaiśye kṛṣṇā pādajāte hyathavā yatra yā bhavet ||

1.20.8

saṅgṛhya mṛttikāṃ liṅganirmāṇārthaṃ prayatnataḥ |
atīva śubhadeśe ca sthāpayettāṃ mṛdaṃ śubhām ||

1.20.9

saṃśodhya ca jalenāpi piṇḍīkṛtya śanaiḥ śanaiḥ |
vidhīyeta śubhaṃ liṅgaṃ pārthivaṃ vedamārgataḥ ||

1.20.10

tataḥ sampūjayedbhaktyā bhuktimuktiphalāptaye |
tatprakāramahaṃ vacmi śṛṇudhvaṃ savidhānataḥ ||

1.20.11

namaḥ śivāya mantreṇārcanadravyaṃ ca prokṣayet |
bhūrasīti ca mantreṇa kṣetrasiddhiṃ prakārayet ||

1.20.12

āpo'smāniti mantreṇa jalasaṃskāramācaret |
namaste rudramantreṇa sphāṭikābandhamucyate ||

1.20.13

śambhavāyeti mantreṇa kṣetraśuddhiṃ prakārayet |
kuryātpañcāmṛtasyāpi namaḥpūrveṇa prokṣaṇam ||

1.20.14

nīlagrīvāya mantreṇa namaḥpūrveṇa bhaktimān |
carecchaṅkaraliṅgasya pratiṣṭhāpanamuttamam ||

1.20.15

bhaktitastata etatte rudrāveti ca mantrataḥ |
āsanaṃ ramaṇīyaṃ vai dadyādvaidikamārgakṛt ||

1.20.16

māno mahāntamiti ca mantreṇāvāhanaṃ caret |
yā te rudreṇa mantreṇa sañcaredupaveśanam ||

1.20.17

mantreṇa yāmiṣumiti nyāsaṃ kuryācchivasya ca |
adhyavocaditi premṇādhivāsaṃ manunācaret ||

1.20.18

manunāsau jīva iti devatānyāsamācaret |
asau yo'vasarpatīti cācaredupasarpaṇam ||

1.20.19

namo'stu nīlagrīvāyeti pādyaṃ manunāharet |
arghyaṃ ca rudragāyatryācamanaṃ tryambakeṇa ca ||

1.20.20

payaḥ pṛthivyāṃ mantreṇa payasā snānamācaret |
dadhikrāvṇeti mantreṇa dadhisnānaṃ ca kārayet ||

1.20.21

ghṛtasnānaṃ khalu ghṛtaṃ ghṛtayāveti mantrataḥ |
madhuvvātā madhunaktaṃ madhumānna iti tryṛcā ||

1.20.22

madhukhaṇḍasnapanaṃ proktamiti pañcāmṛtaṃ smṛtam |
athavā pādyamantreṇa snānaṃ pañcāmṛtena ca ||

1.20.23

mānastoke iti premṇā mantreṇa kaṭibandhanam |
namo dhṛṣṇave iti vā uttarīyaṃ ca dhārayet ||

1.20.24

yā te hetiriti premṇā ṛkcatuṣkeṇa vaidikaḥ |
śivāya vidhinā bhaktaścaredvastrasamarpaṇam ||

1.20.25

namaḥ śvabhya iti premṇā gandhaṃ dadyādṛcā sudhīḥ |
namastakṣabhya iti cākṣatānmantreṇa cārpayet ||

1.20.26

namaḥ pāryāya iti vā puṣpaṃ mantreṇa cārpayet |
namaḥ parṇṇāya iti vā bilvapatrasamarpaṇam ||

1.20.27

namaḥ kapardine ceti dhūpaṃ dadyādyathāvidhi |
dīpaṃ dadyādyathoktaṃ tu nama āśava ityṛcā ||

1.20.28

namo jyeṣṭhāya mantreṇa dadyānnaivedyamuttamam |
manunā tryambakamiti punarācamanaṃ smṛtam ||

1.20.29

imā rudrāyeti ṛcā kuryātphalasamarpaṇam |
namo vrajyāyeti ṛcā sakalaṃ śambhave'rpayet ||

1.20.30

māno mahāntamiti ca mānastoke iti tataḥ |
mantradvayenaikādaśākṣatai rudrānprapūjayet ||

1.20.31

hiraṇyagarbha iti tryṛcā dakṣiṇāṃ hi samarpayet |
devasyatveti mantreṇa hyabhiṣekaṃ caredbudhaḥ ||

1.20.32

dīpamantreṇa vā śambhornīrājanavidhiṃ caret |
puṣpāñjaliṃ caredbhaktyā imā rudrāya ca tryṛcā ||

1.20.33

māno mahāntamiti ca caretprājñaḥ pradakṣiṇām |
mānastoketi mantreṇa sāṣṭāṅgaṃ praṇametsudhīḥ ||

1.20.34

eṣa te iti mantreṇa śivamudrāṃ pradarśayet |
yato yata ityabhayāṃ jñānākhyāṃ tryambakeṇa ca ||

1.20.35

namaḥ seneti mantreṇa mahāmudrāṃ pradarśayet |
darśayeddhenumudrāṃ ca namo gobhya ṛcānayā ||

1.20.36

pañca mudrāḥ pradarśyātha śivamantrajapaṃ caret |
śatarudriyamantreṇa japed vedavicakṣaṇaḥ ||

1.20.37

tataḥ pañcāṅgapāṭhaṃ ca kuyād vedavicakṣaṇaḥ |
devāgātviti mantreṇa kuryācchambhorvisarjanam ||

1.20.38

ityuktaḥ śivapūjāyā vyāsato vaidiko vidhiḥ |
samāsataśca śṛṇuta vaidikaṃ vidhimuttamam ||

1.20.39

ṛcā sadyojātamiti mṛdāharaṇamācaret |
vāmadevāya iti ca jalaprakṣepamācaret ||

1.20.40

aghoreṇa ca mantreṇa liṅganirmāṇamācaret |
tatpuruṣāya mantreṇāhvānaṃ kuryādyathāvidhi ||

1.20.41

saṃyojayedvedikāyāmīśānamanunā haram |
anyatsarvaṃ vidhānaṃ ca kuryātsaṅkṣepataḥ sudhīḥ ||

1.20.42

pañcākṣareṇa mantreṇa gurudattena vā tathā |
kuryātpūjāṃ ṣoḍaśopacāreṇa vidhivatsudhīḥ ||

1.20.43

bhavāya bhavanāśāya mahādevāya dhīmahi |
ugrāya ugranāśāya śarvāya śaśimauline ||

1.20.44

anena manunā vāpi pūjayecchaṅkaraṃ sudhīḥ |
subhaktyā ca bhramaṃ tyaktvā bhaktyaiva phaladaḥ śivaḥ ||

1.20.45

ityapi proktamādṛtya vaidikaṃ kramapūjanam |
procyate'nyavidhiḥ samyaksādhāraṇatayā dvijāḥ ||

1.20.46

pūjā pārthivaliṅgasya samproktā śivanāmabhiḥ |
tāṃ śṛṇudhvaṃ muniśreṣṭhāḥ sarvakāmapradāyinīm ||

1.20.47

haro maheśvaraḥ śambhuḥ śūlapāṇiḥ pinākadhṛk |
śivaḥ paśupatiścaiva mahādeva iti kramāt ||

1.20.48

mṛdāharaṇasaṅghaṭṭapratiṣṭhāhvānameva ca |
snapanaṃ pūjanaṃ caiva kṣamasveti visarjanam ||

1.20.49

ūm̐kārādicaturthyantairnamo'ntairnāmabhiḥ kramāt |
kartavyāśca kriyāḥ sarvā bhaktyā paramayā mudā ||

1.20.50

kṛtvā nyāsavidhiṃ samyak ṣaḍaṅgaṃ karayostathā |
ṣaḍakṣareṇa mantreṇa tato dhyānaṃ samācaret ||

1.20.51

kailāsapīṭhāsanamadhyasaṃsthaṃ bhaktaiḥ sanandādibhirarcyamānam |
bhaktārtidāvānalamaprameyaṃ dhyāyedumāliṅgitaviśvabhūṣaṇam ||

1.20.52

dhyāyennityaṃ maheśaṃ rajatagirinibhaṃ cārucandrāvataṃsaṃ ratnākalpojjvalāṅgaṃ paraśumṛgavarābhītihastaṃ prasannam |
padmāsīnaṃ samantātstutamamaragaṇairvyāghrakṛttiṃ vasānam viśvādyaṃ viśvabījaṃ nikhilabhayaharaṃ pañcavaktraṃ trinetram ||

1.20.53

iti dhyātvā ca sampūjya pārthivaṃ liṅgamuttamam |
japetpañcākṣaraṃ mantraṃ gurudattaṃ yathāvidhi ||

1.20.54

stutibhiścaiva deveśaṃ stuvīta praṇamansudhīḥ |
nānābhidhābhirviprendrāḥ paṭhed vai śatarudriyam ||

1.20.55

tataḥ sākṣatapuṣpāṇi gṛhītvāñjalinā mudā |
prārthayecchaṅkaraṃ bhaktyā mantrairebhiḥ subhaktitaḥ ||

1.20.56

tāvakastvadguṇaprāṇastvaccitto'haṃ sadā mṛḍa |
kṛpānidhe iti jñātvā bhūtanātha prasīda me ||

1.20.57

ajñānādyadi vā jñānājjapapūjādikaṃ mayā |
kṛtaṃ tadastu saphalaṃ kṛpayā tava śaṅkara ||

1.20.58

ahaṃ pāpī mahānadya pāvanaśca bhavānmahān |
iti vijñāya gaurīśa yadicchasi tathā kuru ||

1.20.59

vedaiḥ purāṇaiḥ siddhāntairṛṣibhirvividhairapi |
na jñāto'si mahādeva kuto'haṃ tvāṃ sadāśiva ||

1.20.60

yathā tathā tvadīyo'smi sarvabhāvairmaheśvara |
rakṣaṇīyastvayāhaṃ vai prasīda parameśvara ||

1.20.61

ityevaṃ cākṣatānpuṣpāṇyāropya ca śivopari |
praṇamedbhaktitaḥ śambhuṃ sāṣṭāṅgaṃ vidhivanmune ||

1.20.62

tataḥ pradakṣiṇāṃ kuryādyathoktavidhinā sudhīḥ |
punaḥ stuvīta deveśaṃ stutibhiḥ śraddhayānvitaḥ ||

1.20.63

tato galaravaṃ kṛtvā praṇamecchucinamradhīḥ |
kuryādvijñaptimādṛtya visarjanamathācaret ||

1.20.64

ityuktā muniśārdūlāḥ pārthivārcā vidhānataḥ |
bhuktidā muktidā caiva śivabhaktivivardhinī ||

1.20.65

ityadhyāyaṃ sucittena yaḥ paṭhecchṛṇuyādapi |
sarvapāpaviśuddhātmā sarvānkāmānavāpnuyāt ||

1.20.66

āyurārogyadaṃ caiva yaśasyaṃ svargyameva ca |
putrapautrādisukhadamākhyānamidamuttamam ||

1.20.66.c1

iti śrīśivamahāpurāṇe prathamāyāṃ vidyeśvarasaṃhitāyāṃ sādhyasādhanakhaṇḍe pārthivaśivaliṅgapūjāvidhivarṇanaṃ @nāma viṃśo'dhyāyaḥ ||

1.20.66.p2

śrīgaṇeśāya namaḥ ||

1.20.66.p3

śrīgaurīśaṅkarābhyāṃ namaḥ ||

1.20.66.p4

vidyeśvarasaṃhitā

Other recensions (2)

Linked texts (5)