Pramāṇa · Search · About · API

Shivapurana 1.22: dvāviṃśo'dhyāyaḥ | śivanaivedyabhakṣaṇanirṇayaḥ bilvamāhātmyaṃ ca

Śivapurāṇa (complete text) 1.22

Language
Sanskrit

Contents

dvāviṃśo'dhyāyaḥ | śivanaivedyabhakṣaṇanirṇayaḥ bilvamāhātmyaṃ ca

1.22.1

ṛṣaya ūcuḥ |
agrāhyaṃ śivanaivedyamiti pūrvaṃ śrutaṃ vacaḥ |
brūhi tannirṇayaṃ bilvamāhātmyamapi sanmune ||

1.22.2

sūta uvāca |
śṛṇudhvaṃ munayaḥsarve sāvadhānatayādhunā |
sarvaṃ vadāmi samprītyā dhanyā yūyaṃ śivavratāḥ ||

1.22.3

śivabhaktaḥ śuciḥ śuddhaḥ sadvratī dṛḍhaniścayaḥ |
bhakṣayecchivanaivedyaṃ tyajedagrāhyabhāvanām ||

1.22.4

dṛṣṭvāpi śivanaivedyaṃ yānti pāpāni dūrataḥ |
bhukte tu śivanaivedye puṇyānyāyānti koṭiśaḥ ||

1.22.5

alaṃ yāgasahasreṇāpyalaṃ yāgārbudairapi |
bhakṣite śivanaivedye śivasāyujyamāpnuyāt ||

1.22.6

yadgṛhe śivanaivedyapracāro'pi prajāyate |
tadgṛhaṃ pāvanaṃ sarvamanyapāvanakāraṇam ||

1.22.7

āgataṃ śivanaivedyaṃ gṛhītvā śirasā mudā |
bhakṣaṇīyaṃ prayatnena śivasmaraṇapūrvakam ||

1.22.8

āgataṃ śivanaivedyamanyadā grāhyamityapi |
vilambe pāpasambandho bhavatyeva hi mānavaḥ ||

1.22.9

na yasya śivanaivedya grahaṇecchā prajāyate |
sa pāpiṣṭhaḥ gariṣṭhaḥ syānnarakaṃ yātyapi dhruvam ||

1.22.10

hṛdaye candrakānte ca svarṇarūpyādinirmite |
śivadīkṣāvatā bhaktenedaṃ bhakṣyamitīryate ||

1.22.11

śivadīkṣānvito bhakto mahāprasādasaṃjñakam |
sarveṣāmapi liṅgānāṃ naivedyaṃ bhakṣayecchubham ||

1.22.12

anyadīkṣāyujāṃ nṝṇāṃ śivabhaktiratātmanām |
śṛṇudhvaṃ nirṇayaṃ prītyā śivanaivedyabhakṣaṇe ||

1.22.13

śālagrāmodbhave liṅge rasaliṅge tathā dvijāḥ |
pāṣāṇe rājate svarṇe surasiddhapratiṣṭhite ||

1.22.14

kāśmīre sphāṭike rātne jyotirliṅgeṣu sarvaśaḥ |
cāndrāyaṇasamaṃ proktaṃ śambhornaivedyabhakṣaṇam ||

1.22.15

brahmahāpi śucirbhūtvā nirmālyaṃ yastu dhārayet |
bhakṣayitvā drutaṃ tasya sarvapāpaṃ praṇaśyati ||

1.22.16

caṇḍādhikāro yatrāsti tadbhoktavyaṃ na mānavaiḥ |
caṇḍādhikāro no yatra bhoktavyaṃ tacca bhaktitaḥ ||

1.22.17

bāṇaliṅge ca lauhe ca siddhe liṅge svayambhuvi |
pratimāsu ca sarvāsu na caṇḍo'dhikṛto bhavet ||

1.22.18

snāpayitvā vidhānena yo liṅgasnapanodakam |
triḥpibettrividhaṃ pāpaṃ tasyehāśu vinaśyati ||

1.22.19

agrāhyaṃ śivanaivedyaṃ patraṃ puṣpaṃ phalaṃ jalam |
śālagrāmaśilāsaṅgātsarvaṃ yāti pavitratām ||

1.22.20

liṅgopari ca yad dravyaṃ tadagrāhyaṃ munīśvarāḥ |
supavitraṃ ca tajjñeyaṃ yalliṅgasparśabāhyataḥ ||

1.22.21

naivedyanirṇayaḥ prokta itthaṃ vo munisattamāḥ |
śṛṇudhvaṃ bilvamāhātmyaṃ sāvadhānatayādarāt ||

1.22.22

mahādevasvarūpo'yaṃ bilvo devairapi stutaḥ |
yathākathañcidetasya mahimā jñāyate katham ||

1.22.23

puṇyatīrthāni yāvanti lokeṣu prathitānyapi |
tāni sarvāṇi tīrthāni bilvamūle vasanti hi ||

1.22.24

bilvamūle mahādevaṃ liṅgarūpiṇamavyayam |
yaḥ pūjayati puṇyātmā sa śivaṃ prāpnuyād dhruvam ||

1.22.25

bilvamūle jalairyastu mūrdhānamabhiṣiñcati |
sa sarvatīrthasnātaḥ syātsa eva bhuvi pāvanaḥ ||

1.22.26

etasya bilvamūlasyāthālavālamanuttamam |
jalākulaṃ mahādevo dṛṣṭvā tuṣṭo bhavatyalam ||

1.22.27

pūjayed bilvamūlaṃ yo gandhapuṣpādibhirnaraḥ |
śivalokamavāpnoti santatirvardhate sukham ||

1.22.28

bilvamūle dīpamālāṃ yaḥ kalpayati sādaram |
sa tattvajñānasampanno maheśāntargato bhavet ||

1.22.29

bilvaśākhāṃ samādāya hastena navapallavam |
gṛhītvā pūjayed bilvaṃ sa ca pāpaiḥ pramucyate ||

1.22.30

bilvamūle śivarataṃ bhojayedyastu bhaktitaḥ |
ekaṃ vā koṭiguṇitaṃ tasya puṇyaṃ prajāyate ||

1.22.31

bilvamūle kṣīrayuktamannamājyena saṃyutam |
yo dadyācchivabhaktāya sa daridro na jāyate ||

1.22.32

sāṅgopāṅgamiti proktaṃ śivaliṅgaprapūjanam |
pravṛttānāṃ nivṛttānāṃ bhedato dvividhaṃ dvijāḥ ||

1.22.33

pravṛttānāṃ pīṭhapūjā sarvābhīṣṭapradā bhuvi |
pātreṇaiva pravṛttastu sarvapūjāṃ samācaret ||

1.22.34

naivedyamabhiṣekānte śālyannena samācaret |
pūjānte sthāpayelliṅgaṃ puṭe śuddhe pṛthaggṛhe ||

1.22.35

karapūjānivṛttānāṃ svabhojyaṃ tu nivedayet |
nivṛttānāṃ paraṃ sūkṣmaṃ liṅgameva viśiṣyate ||

1.22.36

vibhūtyabhyarcanaṃ kuryādvibhūtiṃ ca nivedayet |
pūjāṃ kṛtvā tathā liṅgaṃ śirasā dhārayetsadā ||

1.22.36.c1

iti śrīśivamahāpurāṇe prathamāyāṃ vidyeśvarasaṃhitāyāṃ sādhyasādhanakhaṇḍe śivanaivedyavarṇanaṃ nāma dvāviṃśo'dhyāyaḥ ||

1.22.36.p2

śrīgaṇeśāya namaḥ ||

1.22.36.p3

śrīgaurīśaṅkarābhyāṃ namaḥ ||

1.22.36.p4

vidyeśvarasaṃhitā

Other recensions (2)

Linked texts (4)