Shivapurana 1.23: trayoviṃśo'dhyāyaḥ | rudrākṣamāhātmyaṃ śivanāmamahimā ca
Śivapurāṇa (complete text) 1.23
- Language
- Sanskrit
Contents
- 1.23.45 — 4 parts
trayoviṃśo'dhyāyaḥ | rudrākṣamāhātmyaṃ śivanāmamahimā ca
1.23.1
ṛṣaya ūcuḥ |
sūta sūta mahābhāga vyāsaśiṣya namo'stu te |
tadeva vyāsato brūhi bhasmamāhātmyamuttamam ||
1.23.2
tathā rudrākṣamāhātmyaṃ nāmamāhātmyamuttamam |
tritayaṃ brūhi suprītyā mamānandaya mānasam ||
1.23.3
sūta uvāca |
sādhu pṛṣṭaṃ bhavadbhiśca lokānāṃ hitakārakam |
bhavanto vai mahādhanyāḥ pavitrāḥ kulabhūṣaṇāḥ ||
1.23.4
yeṣāṃ caiva śivaḥ sākṣād daivataṃ paramaṃ śubham |
sadāśivakathā loke vallabhā bhavatāṃ sadā ||
1.23.5
te dhanyāśca kṛtārthāśca saphalaṃ dehadhāraṇam |
uddhṛtaṃ ca kulaṃ teṣāṃ ye śivaṃ samupāsate ||
1.23.6
śivanāma mukhe yasya sadā śivaśiveti ca |
pāpāni na spṛśantyeva khadirāṅgārakaṃ yathā ||
1.23.7
śrīśivāya namastubhyaṃ mukhaṃ vyāharate yadā |
tanmukhaṃ pāvanaṃ tīrthaṃ sarvapāpavināśanam ||
1.23.8
tanmukhaṃ ca tathā yo vai paśyati prītimānnaraḥ |
tīrthajanyaṃ phalaṃ tasya bhavatīti suniścitam ||
1.23.9
yatra trayaṃ sadā tiṣṭhedetacchubhataraṃ dvijāḥ |
tasya darśanamātreṇa veṇīsnānaphalaṃ labhet ||
1.23.10
śivanāma vibhūtiśca tathā rudrākṣa eva ca |
etattrayaṃ mahāpuṇyaṃ triveṇīsadṛśaṃ smṛtam ||
1.23.11
etattrayaṃ śarīre ca yasya tiṣṭhati nityaśaḥ |
tasyaiva darśanaṃ loke durlabhaṃ pāpahārakam ||
1.23.12
taddarśanaṃ yathā veṇī nobhayorantaraṃ manāk |
evaṃ yo na vijānāti sa pāpiṣṭho na saṃśayaḥ ||
1.23.13
vibhūtiryasya no bhāle nāṅge rudrākṣadhāraṇam |
nāsye śivamayī vāṇī taṃ tyajedadhamaṃ yathā ||
1.23.14
śaivaṃ nāma yathā gaṅgā vibhūtiryamunā matā |
rudrākṣaṃ vidhijā proktā sarvapāpavināśinī ||
1.23.15
śarīre ca trayaṃ yasya tatphalaṃ caikataḥ sthitam |
ekato veṇikāyāśca snānajaṃ tu phalaṃ budhaiḥ ||
1.23.16
tadevaṃ tulitaṃ pūrvaṃ brahmaṇā hitakāriṇā |
samānaṃ caiva tajjātaṃ tasmād dhāryaṃ sadā budhaiḥ ||
1.23.17
taddinaṃ hi samārabhya brahmaviṣṇvādibhiḥ suraiḥ |
dhāryate tritayaṃ tacca darśanātpāpahārakam ||
1.23.18
ṛṣya ūcuḥ |
īdṛśaṃ hi phalaṃ proktaṃ nāmāditritayodbhavam |
tanmāhātmyaṃ viśeṣeṇa vaktumarhasi suvrata ||
1.23.19
sūta uvāca |
ṛṣayo hi mahāprājñāḥ sacchaivā jñānināṃ varāḥ |
tanmāhātmyaṃ hi sadbhaktyā śṛṇutādarato dvijāḥ ||
1.23.20
sugūḍhamapi śāstreṣu purāṇeṣu śrutiṣvapi |
bhavatsnehānmayā viprāḥ prakāśaḥ kriyate'dhunā ||
1.23.21
kastattritayamāhātmyaṃ sañjānāti dvijottamāḥ |
maheśvaraṃ vinā sarvaṃ brahmāṇḍe sadasatparam ||
1.23.22
vacmyahaṃ nāmamāhātmyaṃ yathābhakti samāsataḥ |
śṛṇuta prītito viprāḥ sarvapāpaharaṃ param ||
1.23.23
śiveti nāmadāvāgnermahāpātakaparvatāḥ |
bhasmībhavantyanāyāsātsatyaṃ satyaṃ na saṃśayaḥ ||
1.23.24
pāpamūlāni duḥkhāni vividhānyapi śaunaka |
śivanāmaikanaśyāni nānyanaśyāni sarvathā ||
1.23.25
sa vaidikaḥ sa puṇyātmā sa dhanyaḥ sa budho mataḥ |
śivanāmajapāsakto yo nityaṃ bhuvi mānavaḥ ||
1.23.26
bhavanti vividhā dharmāsteṣāṃ sadyaḥ phalonmukhāḥ |
yeṣāṃ bhavati viśvāsaḥ śivanāmajape mune ||
1.23.27
pātakāni vinaśyanti yāvanti śivanāmataḥ |
bhuvi tāvanti pāpāni kriyante na narairmune ||
1.23.28
brahmahatyādipāpānāṃ rāśīnapramitānmune |
śivanāma drutaṃ proktaṃ nāśayatyakhilānnaraiḥ ||
1.23.29
śivanāmatarīṃ prāpya saṃsārābdhiṃ taranti ye |
saṃsāramūlapāpāni tāni naśyantyasaṃśayam ||
1.23.30
saṃsāramūlabhūtānāṃ pātakānāṃ mahāmune |
śivanāmakuṭhāreṇa vināśo jāyate dhruvam ||
1.23.31
śivanāmāmṛtaṃ peyaṃ pāpadāvānalārditaiḥ |
pāpadāvāgnitaptānāṃ śāntistena vinā na hi ||
1.23.32
śiveti nāmapīyūṣavarṣadhārāpariplutāḥ |
saṃsāradavamadhye'pi na śocanti kadācana ||
1.23.33
śivanāmni mahadbhaktirjātā yeṣāṃ mahātmanām |
tadvidhānāṃ tu sahasā muktirbhavati sarvathā ||
1.23.34
anekajanmabhiryena tapastaptaṃ munīśvara |
śivanāmni bhavedbhaktiḥ sarvapāpāpahāriṇī ||
1.23.35
yasyāsādhāraṇī śambhunāmni bhaktirakhaṇḍitā |
tasyaiva mokṣaḥ sulabho nānyasyeti matirmama ||
1.23.36
kṛtvāpyanekapāpāni śivanāmajapādaraḥ |
sarvapāpavinirmukto bhavatyeva na saṃśayaḥ ||
1.23.37
bhavanti bhasmasād vṛkṣā davadagdhā yathā vane |
tathā tāvanti dagdhāni pāpāni śivanāmataḥ ||
1.23.38
yo nityaṃ bhasmapūtāṅgaḥ śivanāmajapādaraḥ |
sa taratyeva saṃsāramaghoramapi śaunaka ||
1.23.39
brahmasvaharaṇaṃ kṛtvā hatvāpi brāhmaṇānbahūn |
na lipyate naraḥ pāpaiḥ śivanāmajapādaraḥ ||
1.23.40
vilokya vedānakhilān śivanāmajapaḥ paraḥ |
saṃsārataraṇopāya iti pūrvairviniścitam ||
1.23.41
kiṃ bahūktyā muniśreṣṭhāḥ ślokenaikena vacmyaham |
śivābhidhānamāhātmyaṃ sarvapāpāpahāraṇam ||
1.23.42
pāpānāṃ haraṇe śambhornāmnaḥ śaktirhi yāvatī |
śaknoti pātakaṃ tāvatkartuṃ nāpi naraḥ kvacit ||
1.23.43
śivanāmaprabhāveṇa lebhe sadgatimuttamām |
indradyumnanṛpaḥ pūrvaṃ mahāpāpayuto mune ||
1.23.44
tathā kācid dvijā yoṣā'sau mune bahupāpinī |
śivanāmaprabhāveṇa lebhe sadgatimuttamām ||
1.23.45
ityuktaṃ vo dvijaśreṣṭhā nāmamāhātmyamuttamam |
śṛṇudhvaṃ bhasmamāhātmyaṃ sarvapāvanapāvanam ||
1.23.45.c1
iti śrīśivamahāpurāṇe prathamāyāṃ vidyeśvarasaṃhitāyāṃ sādhyasādhanakhaṇḍe śivanāmamāhātmyavarṇanaṃ nāma trayoviṃśo'dhyāyaḥ ||
1.23.45.p2
śrīgaṇeśāya namaḥ ||
1.23.45.p3
śrīgaurīśaṅkarābhyāṃ namaḥ ||
1.23.45.p4
vidyeśvarasaṃhitā
Other recensions (1)
- Śivapurāṇa — Vyāsa, Sanskrit