Shivapurana 1.25: pañcaviṃśo'dhyāyaḥ | rudrākṣamāhātmyam

Śivapurāṇa (complete text) 1.25

Language: Sanskrit

1.25.95 — 2 parts

pañcaviṃśo'dhyāyaḥ | rudrākṣamāhātmyam

1.25.1

sūta uvāca |
śaunakarṣe mahāprājña śivarūpa mahāpate |
śṛṇu rudrākṣamāhātmyaṃ samāsāt kathayāmyaham ||

1.25.2

śivapriyatamo jñeyo rudrākṣaḥ parapāvanaḥ |
darśanāt sparśanājjāpyāt sarvapāpaharaḥ smṛtaḥ ||

1.25.3

purā rudrākṣamahimā devyagre kathito mune |
lokopakaraṇārthāya śivena paramātmanā ||

1.25.4

śiva uvāca |
śrūyatāṃ tu maheśāni rudrākṣamahimā śive |
kathayāmi tava prītyā bhaktānāṃ hitakāmyayā ||

1.25.5

divyavarṣasahasrāṇi maheśāni punaḥ purā |
tapaḥ prakurvatastrastaṃ manaḥ saṃyamya vai mama ||

1.25.6

svatantreṇa pareśena lokopakṛtikāriṇā |
līlayā parameśāni cakṣurunmīlitaṃ mayā ||

1.25.7

puṭābhyāṃ cārucakṣurbhyāṃ patitā jalabindavaḥ |
tatrāśrubinduto jātā vṛkṣā rudrākṣasaṃjñakāḥ ||

1.25.8

sthāvaratvamanuprāpya bhaktānugrahakāraṇāt |
te dattā viṣṇubhaktebhyaścaturvarṇebhya eva ca ||

1.25.9

bhūmau gauḍodbhavāṃścakre rudrākṣāñchivavallabhān |
mathurāyāmayodhyāyāṃ laṅkāyāṃ malaye tathā ||

1.25.10

sahyādrau ca tathā kāśyāṃ deśeṣvanyeṣu vā tathā |
parānasahyapāpaughabhedanāñchrutinodanān ||

1.25.11

brāhmaṇāḥ kṣatriyā vaiśyāḥ śūdrā jātā mamājñayā |
rudrākṣāste pṛthivyāṃ tu tajjātīyāḥ śubhākṣakāḥ ||

1.25.12

śvetaraktāḥ pītakṛṣṇā varṇā jñeyāḥ kramād budhaiḥ |
svajātīyaṃ nṛbhirdhāryaṃ rudrākṣaṃ varṇataḥ kramāt ||

1.25.13

varṇaistu tatphalaṃ dhāryaṃ bhuktimuktiphalepsubhiḥ |
śivabhaktairviśeṣeṇa śivayoḥ prītaye sadā ||

1.25.14

dhātrīphalapramāṇaṃ yacchreṣṭhametadudāhṛtam |
badarīphalamātraṃ tu madhyamaṃ samprakīrtitam ||

1.25.15

adhamaṃ caṇamātraṃ syāt prakriyaiṣā parocyate |
śṛṇu pārvati suprītyā bhaktānāṃ hitakāmyayā ||

1.25.16

badarīphalamātraṃ ca yat syāt kila maheśvari |
tathāpi phaladaṃ loke sukhasaubhāgyavardhanam ||

1.25.17

dhātrīphalasamaṃ yat syāt sarvāriṣṭavināśanam |
guñjayā sadṛśaṃ yat syāt sarvārthaphalasādhanam ||

1.25.18

yathā yathā laghuḥ syādvai tathādhikaphalapradaḥ |
ekaikataḥ phalaṃ proktaṃ daśāṃśairadhikaṃ budhaiḥ ||

1.25.19

rudrākṣadhāraṇaṃ proktaṃ pāpanāśanahetave |
tasmācca dhāraṇīyo vai sarvārthasādhano dhruvam ||

1.25.20

yathā ca dṛśyate loke rudrākṣaḥ phaladaḥ śubhaḥ |
na tathā dṛśyate'nyā ca mālikā parameśvari ||

1.25.21

samāḥ snigdhā dṛḍhāḥ sthūlāḥ kaṇṭakaiḥ saṃyutāḥ śubhāḥ |
rudrākṣāḥ kāmadā devi bhuktimuktipradāḥ sadā ||

1.25.22

kṛmiduṣṭaṃ chinnabhinnaṃ kaṇṭakairhīnameva ca |
vraṇayuktamavṛttaṃ ca rudrākṣān ṣaḍ vivarjayet ||

1.25.23

svayameva kṛtadvāraṃ rudrākṣaṃ syādihottamam |
yattu pauruṣayatnena kṛtaṃ tanmadhyamaṃ bhavet ||

1.25.24

rudrākṣadhāraṇaṃ proktaṃ mahāpātakanāśanam |
rudrasaṅkhyāśataṃ dhṛtvā rudrarūpo bhavennaraḥ ||

1.25.25

ekādaśaśatānīha dhṛtvā yatphalamāpyate |
tatphalaṃ śakyate naiva vaktuṃ varṣaśatairapi ||

1.25.26

śatārdhena yutaiḥ pañcaśatairvai mukuṭaṃ matam |
rudrākṣairviracetsamyagbhaktimānpuruṣo varaḥ ||

1.25.27

tribhiḥ śataiḥ ṣaṣṭiyuktaistrirāvṛttyā tathā punaḥ |
rudrākṣairupavītaṃ ca nirmīyādbhaktitatparaḥ ||

1.25.28

śikhāyāṃ ca trayaṃ proktaṃ rudrakṣāṇāṃ maheśvari |
karṇayoḥ ṣaṭ ca ṣaṭ caiva vāmadakṣiṇayostathā ||

1.25.29

śatamekottaraṃ kaṇṭhe bāhvorvai rudrasaṅkhyayā |
kūrparadvārayostatra maṇibandhe tathā punaḥ ||

1.25.30

upavīte trayaṃ dhāryaṃ śivabhaktiratairnaraiḥ |
śeṣānurvaritānpañca sammitāndhārayetkaṭau ||

1.25.31

etatsaṅkhyā dhṛtā yena rudrākṣāḥ parameśvari |
tadrūpaṃ tu praṇamyaṃ hi stutyaṃ sarvairmaheśavat ||

1.25.32

evambhūtaṃ sthitaṃ dhyāne yadā kṛtvāsane janam |
śiveti vyāharaṃścaiva dṛṣṭvā pāpaiḥ pramucyate ||

1.25.33

śatādhikasahasrasya vidhireṣa prakīrtitaḥ |
tadabhāve prakāro'nyaḥ śubhaḥ samprocyate mayā ||

1.25.34

śikhāyāmekarudrākṣaṃ śirasā triṃśataṃ vahet |
pañcāśacca gale dadhyād bāhvoḥ ṣoḍaśa ṣoḍaśa ||

1.25.35

maṇibandhe dvādaśa dviskandhe pañcaśataṃ vahet |
aṣṭottaraśatairmālyamupavītaṃ prakalpayet ||

1.25.36

evaṃ sahasrarudrākṣāndhārayedyo dṛḍhavrataḥ |
taṃ namanti surāḥ sarve yathā rudrastathaiva saḥ ||

1.25.37

ekaṃ śikhāyāṃ rudrākṣaṃ catvāriṃśattu mastake |
dvātriṃśatkaṇṭhadeśe tu vakṣasyaṣṭottaraṃ śatam ||

1.25.38

ekaikaṃ karṇayoḥ ṣaṭ ṣaṭ bāhvoḥ ṣoḍaśa ṣoḍaśa |
karayo ravimānena dviguṇena munīśvara ||

1.25.39

saṅkhyā prītidhṛtā yena so'pi śaivajanaḥ paraḥ |
śivavatpūjanīyo hi vandyaḥ sarvairabhīkṣṇaśaḥ ||

1.25.40

śirasīśānamantreṇa karṇe tatpuruṣeṇa ca |
aghoreṇa gale dhāryaṃ tenaiva hṛdaye'pi ca ||

1.25.41

aghorabījamantreṇa karayordhārayetsudhīḥ |
pañcadaśākṣagrathitāṃ vāmadevena codare ||

1.25.42

pañcabrahmabhiraṅgaiśca trimālāṃ pañca sapta ca |
atha vā mūlamantreṇa sarvānakṣāṃstu dhārayet ||

1.25.43

madyaṃ māṃsaṃ tu laśunaṃ palāṇḍuṃ śigrumeva ca |
śleṣmāntakaṃ viḍvarāhaṃ bhakṣaṇe varjayettataḥ ||

1.25.44

valakṣaṃ rudrākṣaṃ dvijatanubhireveha vihitaṃ suraktaṃ kṣatrāṇāṃ pramuditamume pītamasakṛt |
tato vaiśyairdhāryaṃ pratidivasabhāvaśyakamaho tathā kṛṣṇaṃ śūdraiḥ śrutigaditamārgo'yamagaje ||

1.25.45

varṇī vanī gṛhayatīrniyamena dadhyā-detadrahasyaparamo na hi jātu tiṣṭhet |
rudrākṣadhāraṇamidaṃ sukṛtaiśca labhyaṃ tyaktvedametadakhilānnarakān prayānti ||

ādāvāmalakāstato laghutarā rugṇāstataḥ kaṇṭakaiḥ sandaṣṭāḥ kṛmibhistanūpakaraṇa-cchidreṇa hīnāstathā |
dhāryā naiva śubhepsubhiścaṇakavad rudrākṣamapyantato rudrākṣo mama liṅgamaṅgalamume sūkṣmaṃ praśastaṃ sadā ||

1.25.47

sarvāśramāṇāṃ varṇānāṃ strīśūdrāṇāṃ śivājñayā |
dhāryāḥ sadaiva rudrākṣā yatīnāṃ praṇavena hi ||

1.25.48

divā bibhradrātrikṛtai rātrau bibhraddivākṛtaiḥ |
prātarmadhyāhnasāyāhne mucyate sarvapātakaiḥ ||

1.25.49

ye tripuṇḍradharā loke jaṭādhāriṇa eva ye |
ye rudrākṣadharāste vai yamalokaṃ prayānti na ||

1.25.50

rudrākṣamekaṃ śirasā bibharti tathā tripuṇḍraṃ ca lalāṭamadhye |
pañcākṣaraṃ ye hi japanti mantraṃ pūjyā bhavadbhiḥ khalu te hi sādhavaḥ ||

1.25.51

yasyāṅge nāsti rudrākṣastripuṇḍraṃ bhālapaṭṭake |
mukhe pañcākṣaraṃ nāsti tamānaya yamālayam ||

1.25.52

jñātvā jñātvā tatprabhāvaṃ bhasmarudrākṣadhāriṇaḥ |
te pūjyāḥ sarvadāsmākaṃ no netavyāḥ kadācana ||

1.25.53

evamājñāpayāmāsa kālo'pi nijakiṅkarān |
tatheti matvā te sarve tūṣṇīmāsansuvismitāḥ ||

1.25.54

ata eva mahādevi rudrākṣo'pyaghanāśanaḥ |
taddharo matpriyaḥ śuddho'tyaghavānapi pārvati ||

1.25.55

haste bāhau tathā mūrdhni rudrākṣaṃ dhārayettu yaḥ |
avadhyaḥ sarvabhūtānāṃ rudrarūpī caredbhuvi ||

1.25.56

surāsurāṇāṃ sarveṣāṃ vandanīyaḥ sadā sa vai |
pūjanīyo hi dṛṣṭasya pāpahā ca yathā śivaḥ ||

1.25.57

dhyānajñānāvamukto'pi rudrākṣaṃ dhārayettu yaḥ |
sarvapāpavinirmuktaḥ sa yāti paramāṃ gatim ||

1.25.58

rudrākṣeṇa japanmantraṃ puṇyaṃ koṭiguṇaṃ bhavet |
daśakoṭiguṇaṃ puṇyaṃ dhāraṇāllabhate naraḥ ||

1.25.59

yāvatkālaṃ hi jīvasya śarīrastho bhavetsa vai |
tāvatkālaṃ svalpamṛtyurna taṃ devi vibādhate ||

1.25.60

tripuṇḍreṇa ca saṃyuktaṃ rudrākṣāvilasāṅgakam |
mṛtyuñjayaṃ japantaṃ ca dṛṣṭvā rudraphalaṃ labhet ||

1.25.61

pañcadevapriyaścaiva sarvadevapriyastathā |
sarvamantrāñjapedbhakto rudrākṣamālayā priye ||

1.25.62

viṣṇvādidevabhaktāśca dhārayeyurna saṃśayaḥ |
rudrabhakto viśeṣeṇa rudrākṣāndhārayetsadā ||

1.25.63

rudrākṣā vividhāḥ proktāsteṣāṃ bhedān vadāmyaham |
śṛṇu pārvati sadbhaktyā bhuktimuktiphalapradān ||

1.25.64

ekavaktraḥ śivaḥ sākṣādbhuktimuktiphalapradaḥ |
tasya darśanamātreṇa brahmahatyāṃ vyapohati ||

1.25.65

yatra sampūjitastatra lakṣmīrdūratarā nahi |
naśyantyupadravāḥ sarve sarvakāmā bhavanti hi ||

1.25.66

dvivaktro devadeveśaḥ sarvakāmaphalapradaḥ |
viśeṣataḥ sa rudrākṣo govadhaṃ nāśayed drutam ||

1.25.67

trivaktro yo hi rudrākṣaḥ sākṣātsādhanadaḥ sadā |
tatprabhāvādbhaveyurvai vidyāḥ sarvāḥ pratiṣṭhitāḥ ||

1.25.68

caturvaktraḥ svayaṃ brahmā narahatyāṃ vyapohati |
darśanāt sparśanāt sadyaścaturvargaphalapradaḥ ||

1.25.69

pañcavaktraḥ svayaṃ rudraḥ kālāgnirnāmataḥ prabhuḥ |
sarvamuktipradaścaiva sarvakāmaphalapradaḥ ||

1.25.70

agamyāgamanaṃ pāpamabhakṣyasya ca bhakṣaṇam |
ityādisarvapāpāni pañcavaktro vyapohati ||

1.25.71

ṣaḍvaktraḥ kārtikeyastu dhāraṇād dakṣiṇe bhuje |
brahmahatyādikaiḥ pāpairmucyate nātra saṃśayaḥ ||

1.25.72

saptavaktro maheśāni hyanaṅgo nāma nāmataḥ |
dhāraṇāttasya deveśi daridro'pīśvaro bhavet ||

1.25.73

rudrākṣaścāṣṭavaktraśca vasumūrtiśca bhairavaḥ |
dhāraṇāttasya pūrṇāyurmṛto bhavati śūlabhṛt ||

1.25.74

bhairavo navavaktraśca kapilaśca muniḥ smṛtaḥ |
durgā vā tadadhiṣṭhātrī navarūpā maheśvarī ||

1.25.75

taṃ dhārayedvāmahaste rudrākṣaṃ bhaktitatparaḥ |
sarveśvaro bhavennūnaṃ mama tulyo na saṃśayaḥ ||

1.25.76

daśavaktro maheśāni svayaṃ devo janārdanaḥ |
dhāraṇāttasya deveśi sarvānkāmānavāpnuyāt ||

1.25.77

ekādaśamukho yastu rudrākṣaḥ parameśvari |
sa rudro dhāraṇāttasya sarvatra vijayī bhavet ||

1.25.78

dvādaśāsyaṃ tu rudrākṣaṃ dhārayet keśadeśake |
ādityāścaiva te sarve dvādaśaiva sthitāstathā ||

1.25.79

trayodaśamukho viśvedevastaddhāraṇānnaraḥ |
sarvānkāmānavāpnoti saubhāgyaṃ maṅgalaṃ labhet ||

1.25.80

caturdaśamukho yo hi rudrākṣaḥ paramaḥ śivaḥ |
dhārayenmūrdhni taṃ bhaktyā sarvapāpaṃ praṇaśyati ||

1.25.81

iti rudrākṣabhedā hi proktā vai mukhabhedataḥ |
tattanmantrāñchṛṇu prītyā kramācchaileśvarātmaje ||

1.25.82

oṃ hrīṃ namaḥ 1 oṃ namaḥ 2 oṃ klīṃ namaḥ 3 oṃ hrīṃ namaḥ 4 oṃ hrīṃ namaḥ 5 oṃ hrīṃ huṃ namaḥ 6 oṃ huṃ namaḥ 7 oṃ huṃ namaḥ 8 oṃ hrīṃ huṃ namaḥ 9 oṃ hrīṃ namaḥ 10 oṃ hrīṃ huṃ namaḥ 11 oṃ krauṃ kṣauṃ rauṃ namaḥ 12 oṃ hrīṃ namaḥ 13 oṃ namaḥ 14 bhaktiśraddhāyutaścaiva sarvakāmārthasiddhaye |
rudrākṣāndhārayenmantrairdevi ālasyavarjitaḥ ||

Other recensions (2)

Śivapurāṇa — Vyāsa, Sanskrit
Śivapurāṇa (complete text) — Sanskrit

Linked texts (2)

Candrajñānāgama — Sanskrit
Agnipurāṇa — Vyāsa, Sanskrit

Shivapurana 1.25: pañcaviṃśo'dhyāyaḥ | rudrākṣamāhātmyam

Contents

pañcaviṃśo'dhyāyaḥ | rudrākṣamāhātmyam

Other recensions (2)

Linked texts (2)