Shivapurana 1.5: pañcamo'dhyāyaḥ | śivalliṅgamahimavarṇanam
Śivapurāṇa (complete text) 1.5
- Language
- Sanskrit
Contents
- 1.5.31 — 4 parts
pañcamo'dhyāyaḥ | śivalliṅgamahimavarṇanam
1.5.1
sūta uvāca |
śravaṇāditrike'śakto liṅgaṃ veraṃ ca śāṅkaram |
saṃsthāpya nityamabhyarcya taret saṃsārasāgaram ||
1.5.2
api dravyaṃ vahedeva yathābalamavañcayan |
arpayelliṅgaverārthamarcayedapi santatam ||
1.5.3
maṇḍapaṃ gopuraṃ tīrthaṃ maṭhaṃ kṣetraṃ tathotsavam |
vastraṃ gandhaṃ ca mālyaṃ ca dhūpaṃ dīpaṃ ca bhaktitaḥ ||
1.5.4
vividhānnaṃ ca naivedyamapūpavyañjanairyutam |
chatraṃ dhvajaṃ ca vyajanaṃ cāmaraṃ cāpi sāṅgakam ||
1.5.5
rājopacāravat sarvaṃ dhārayelliṅgaverayoḥ |
pradakṣiṇāṃ namaskāraṃ yathāśakti japaṃ tathā ||
1.5.6
āvāhanādi sargāntaṃ nityaṃ kuryāt subhaktitaḥ |
itthamabhyarcyayan devaṃ liṅge vere ca śāṅkare ||
1.5.7
siddhimeti śivaprītyā hitvāpi śravaṇādikam |
liṅgaverārcanāmātrānmuktāḥ purve mahājanāḥ ||
1.5.8
munaya ūcuḥ |
veramātre tu sarvatra pūjyante devatāgaṇāḥ |
liṅge vere ca sarvatra kathaṃ sampūjyate śivaḥ ||
1.5.9
sūta uvāca |
aho munīśvarāḥ puṇyaṃ praśnametanmahādbhutam |
atra vaktā mahādevo nānyo'sti puruṣaḥ kvacit ||
1.5.10
śivenoktaṃ pravakṣyāmi kramād gurumukhācchrutam |
śivaiko brahmarūpatvānniṣkalaḥ parikīrtitaḥ ||
1.5.11
rūpitvāt sakalastadvattasmāt sakalaniṣkalaḥ |
niṣkalatvānnirākāraṃ liṅgaṃ tasya samāgatam ||
1.5.12
sakalatvāt tathā veraṃ sākāraṃ tasya saṅgatam |
sakalākalarūpatvād brahmaśabdābhidhaḥ paraḥ ||
1.5.13
api liṅge ca vere ca nityamabhyarcyate janaiḥ |
abrahmatvāttadanyeṣāṃ niṣkalatvaṃ na hi kvacit ||
1.5.14
tasmātte niṣkale liṅge nārādhyante sureśvarāḥ |
abrahmatvācca jīvatvāttathānye devatāgaṇāḥ ||
1.5.15
tūṣṇīṃ sakalamātratvādarcyante veramātrake |
jīvatvaṃ śaṅkarānyeṣāṃ brahmatvaṃ śaṅkarasya ca ||
1.5.16
vedāntasārasaṃsiddhaṃ praṇavārthe prakāśanāt |
evameva purā pṛṣṭo mandare nandikeśvaraḥ ||
1.5.17
sanatkumāramuninā brahmaputreṇa dhīmatā |
sanatkumāra uvāca |
śivānyadevavaśyānāṃ sarveṣāmapi sarvataḥ ||
1.5.18
veramātraṃ ca pūjārthaṃ śrutaṃ dṛṣṭaṃ ca bhūriśaḥ |
śivamātrasya pūjāyāṃ liṅgaṃ veraṃ ca dṛśyate ||
1.5.19
atastad brūhi kalyāṇa tattvaṃ me sādhubodhanam |
nandikeśvara uvāca |
anuttaramimaṃ praśnaṃ rahasyaṃ brahmalakṣaṇam ||
1.5.20
kathayāmi śivenoktaṃ bhaktiyuktasya te'nagha |
śivasya brahmarūpatvānniṣkalatvācca niṣkalam ||
1.5.21
liṅgaṃ tasyaiva pūjāyāṃ sarvavedeṣu sammatam |
tasyaiva sakalatvācca tathā sakalaniṣkalam ||
1.5.22
sakalaṃ ca tathā veraṃ pūjāyāṃ lokasammatam |
śivānyeṣāṃ ca jīvatvāt sakalatvācca sarvataḥ ||
1.5.23
veramātraṃ ca pūjāyāṃ sammataṃ vedanirṇaye |
svāvirbhāve ca devānāṃ sakalaṃ rūpameva hi ||
1.5.24
śivasya liṅgaṃ veraṃ ca darśane dṛśyate khalu |
sanatkumāra uvāca |
uktaṃ tvayā mahābhāga liṅgaverapracāraṇam ||
1.5.25
śivasya ca tadanyeṣāṃ vibhajya paramārthataḥ |
tasmāttadeva paramaṃ liṅgaṃ verādisambhavam ||
1.5.26
śrotumicchāmi yogīndra liṅgāvirbhāvalakṣaṇam |
nandikeśvara uvāca |
śṛṇu vatsa bhavatprītyā vakṣyāmi paramārthataḥ ||
1.5.27
purā kalpe mahākāle prapanne lokaviśrute |
ayudhyetāṃ mahātmānau brahmaviṣṇū parasparam ||
1.5.28
tayormānaṃ nirākartuṃ tanmadhye parameśvaraḥ |
niṣkalastambharūpeṇa svarūpaṃ samadarśayat ||
1.5.29
tataḥ svaliṅgacihnatvāt stambhato niṣkalaṃ śivaḥ |
svaliṅgaṃ darśayāmāsa jagatāṃ hitakāmyayā ||
1.5.30
tadāprabhṛti lokeṣu niṣkalaṃ liṅgamaiśvaram |
sakalaṃ ca tathā veraṃ śivasyaiva prakalpitam ||
1.5.31
śivānyeṣāṃ tu devānāṃ veramātraṃ prakalpitam |
tattad veraṃ tu devānāṃ tattadbhogapradaṃ śubham |
śivasya liṅgaveratvaṃ bhogamokṣapradaṃ śubham ||
1.5.31.c1
iti śrīśivamahāpurāṇe prathamāyāṃ vidyeśvarasaṃhitāyāṃ śivalliṅgamahimavarṇanaṃ nāma pañcamo'dhyāyaḥ ||
1.5.31.p2
śrīgaṇeśāya namaḥ ||
1.5.31.p3
śrīgaurīśaṅkarābhyāṃ namaḥ ||
1.5.31.p4
vidyeśvarasaṃhitā
Other recensions (2)
- Śivapurāṇa — Vyāsa, Sanskrit
- Śivapurāṇa (complete text) — Sanskrit