Shivapurana 1.6: ṣaṣṭho'dhyāyaḥ | kailāsayātrāvarṇanam
Śivapurāṇa (complete text) 1.6
- Language
- Sanskrit
Contents
- 1.6.28 — 4 parts
ṣaṣṭho'dhyāyaḥ | kailāsayātrāvarṇanam
1.6.1
nandikeśvara uvāca |
purā kadācidyogīndra viṣṇurviṣadharāsanaḥ |
suṣvāpa parayā bhūtyā svānugairapi saṃvṛtaḥ ||
1.6.2
yadṛcchayāgatastatra brahmā brahmavidāṃ varaḥ |
apṛcchat puṇḍarīkākṣaṃ śayānaṃ sarvasundaram ||
1.6.3
kastvaṃ puruṣavaccheṣe dṛṣṭvā māmapi dṛptavat |
uttiṣṭha vatsa māṃ paśya tava nāthamihāgatam ||
1.6.4
āgataṃ gurumārādhyaṃ dṛṣṭvā yo dṛptavaccaret |
drohiṇastasya mūḍhasya prāyaścittaṃ vidhīyate ||
1.6.5
iti śrutvā vacaḥ kruddho bahiḥ śāntavadācaran |
svasti te svāgataṃ vatsa tiṣṭha pīṭhamito viśa ||
1.6.6
kimu te vyagravadvaktraṃ vibhāti viṣamekṣaṇam |
brahmovāca - vatsa viṣṇo mahāmānamāgataṃ kālavegataḥ ||
1.6.7
pitāmahaśca jagataḥ pātā ca tava vatsaka |
viṣṇuruvāca -
matsthaṃ jagadidaṃ vatsa manuṣe tvaṃ hi coravat ||
1.6.8
mannābhikamalājjātaḥ putrastvaṃ bhāṣase vṛthā |
nandikeśvara uvāca |
evaṃ hi vadatostatra mugdhayorajayostadā ||
1.6.9
ahameva varo na tvamahaṃ prabhurahaṃ prabhuḥ |
parasparaṃ hantukāmau cakratuḥ samarodyamam ||
1.6.10
yuyudhāte'marau vīrau haṃsapakṣīndravāhanau |
vairañcyā vaiṣṇavāścaivaṃ mitho yuyudhire tadā ||
1.6.11
tāvadvimānagatayaḥ sarvā vai devajātayaḥ |
didṛkṣavaḥ samājagmuḥ samaraṃ taṃ mahādbhutam ||
1.6.12
kṣipantaḥ puṣpavarṣāṇi paśyantaḥ svairamambare |
suparṇavāhanastatra kruddho vai brahmavakṣasi ||
1.6.13
mumoca bāṇānasahānastrāṃśca vividhān bahūn |
mumocātha vidhiḥ kruddho viṣṇorurasi duḥsahān ||
1.6.14
bāṇānanalasaṅkāśānastrāṃśca bahuśastadā |
tadāścaryamiti spaṣṭaṃ tayoḥ samaragocaram ||
1.6.15
samīkṣya daivatagaṇāḥ śaśaṃsurbhṛśamākulāḥ |
tato viṣṇuḥ susaṅkruddhaḥ śvasan vyasanakarśitaḥ ||
1.6.16
māheśvarāstraṃ matimān sandadhe brahmaṇopari |
tato brahmā bhṛśaṃ kruddhaḥ kampayan viśvameva hi ||
1.6.17
astraṃ pāśupataṃ ghoraṃ sandadhe viṣṇuvakṣasi |
tatastadutthitaṃ vyomni tapanāyutasannibham ||
1.6.18
sahasramukhamatyugraṃ caṇḍavātabhayaṅkaram |
astradvayamidaṃ tatra brahmaviṣṇvorbhayaṅkaram ||
1.6.19
itthaṃ babhūva samaraṃ brahmaviṣṇvoḥ parasparam |
tato devagaṇāḥ sarve viṣaṇṇā bhṛśamākulāḥ |
ūcuḥ parasparaṃ tāta rājakṣobhe yathā dvijāḥ ||
1.6.20
sṛṣṭiḥ sthitiśca saṃhārastirobhāvo'pyanugrahaḥ |
yasmāt pravartate tasmai brahmaṇe ca triśūline ||
1.6.21
aśakyamanyairyadanugrahaṃ vinā tṛṇakṣayo'pyatra yadṛcchayā kvacit ||
1.6.22
iti devā bhayaṃ kṛtvā vicinvantaḥ śivakṣayam |
jagmuḥ kailāsaśikharaṃ yatrāste candraśekharaḥ ||
1.6.23
dṛṣṭvaivamamarā hṛṣṭāḥ padaṃ tatpārameśvaram |
praṇemuḥ praṇavākāraṃ praviṣṭāstatra sadmani ||
1.6.24
te'pi tatra sabhāmadhye maṇḍape maṇiviṣṭare |
virājamānamumayā dadṛśurdevapuṅgavam ||
1.6.25
savyottaretarapadaṃ tadarpitakarāmbujam |
svagaṇaiḥ sarvato juṣṭaṃ sarvalakṣaṇalakṣitam ||
1.6.26
vījyamānaṃ viśeṣajñaiḥ strījanaistīvrabhāvanaiḥ |
śaṃsyamānaṃ sadā vedairanugṛhṇantamīśvaram ||
1.6.27
dṛṣṭvaivamīśamamarāḥ santoṣasalilekṣaṇāḥ |
daṇḍavad dūrato vatsa namaścakrurmahāgaṇāḥ ||
1.6.28
tānavekṣya patirdevān samīpe cāhvayad gaṇaiḥ |
atha saṃhlādayan devān devo devaśikhāmaṇiḥ |
avocadatha gambhīraṃ vacanaṃ madhumaṅgalam ||
1.6.28.c1
iti śrīśivamahāpurāṇe prathamāyāṃ vidyeśvarasaṃhitāyāṃ devānāṃ kailāsayātrāvarṇanaṃ nāma ṣaṣṭho'dhyāyaḥ ||
1.6.28.p2
śrīgaṇeśāya namaḥ ||
1.6.28.p3
śrīgaurīśaṅkarābhyāṃ namaḥ ||
1.6.28.p4
vidyeśvarasaṃhitā
Other recensions (2)
- Śivapurāṇa — Vyāsa, Sanskrit
- Śivapurāṇa (complete text) — Sanskrit