Shivapurana 1.8: aṣṭamo'dhyāyaḥ | brahmopari śivasyānugrahaḥ
Śivapurāṇa (complete text) 1.8
- Language
- Sanskrit
Contents
- 1.8.21 — 4 parts
aṣṭamo'dhyāyaḥ | brahmopari śivasyānugrahaḥ
1.8.1
nandikeśvara uvāca |
sasarjātha mahādevaḥ puruṣaṃ kañcidadbhutam |
bhairavākhyaṃ bhruvormadhyād brahmadarpajighāṃsayā ||
1.8.2
sa vai tadā tatra patiṃ praṇamya śivamaṅgaṇe |
kiṃ kāryaṃ karavāṇyatra śīghramājñāpaya prabho ||
1.8.3
śiva uvāca |
vatsa yo'yaṃ vidhiḥ sākṣājjagatāmādyadaivatam |
nūnamarcaya khaḍgena tigmena javasā param ||
1.8.4
sa vai gṛhītvaikakareṇa keśaṃ tatpañcamaṃ dṛptamasatyabhāṣiṇam |
chittvā śiro hyasya nihantumudyataḥ prakampayan khaḍgamatisphuṭaṃ karaiḥ ||
1.8.5
pitā tavotsṛṣṭavibhūṣaṇāmbara-sraguttarīyāmalakeśasaṃhatiḥ |
pravātarambheva lateva cañcalaḥ papāta vai bhairavapādapaṅkaje ||
1.8.6
tāvadvidhiṃ tāta didṛkṣuracyutaḥ kṛpālurasmatpatipādapallavam |
niṣicya bāṣpairavadat kṛtāñjali-ryathā śiśuḥ svaṃ pitaraṃ kalākṣaram ||
1.8.7
acyuta uvāca |
tvayā prayatnena purā hi dattaṃ yadasya pañcānanamīśa cihnam |
tasmāt kṣamasvādyamanugrahārhaṃ kuru prasādaṃ vidhaye hyamuṣmai ||
1.8.8
ityarthito'cyuteneśastuṣṭaḥ suragaṇāṅgaṇe |
nivartayāmāsa tadā bhairavaṃ brahmadaṇḍataḥ ||
1.8.9
athāha devaḥ kitavaṃ vidhiṃ vigatakandharam |
brahmaṃstvamarhaṇākāṅkṣī śaṭheśatvaṃ samāsthitaḥ ||
1.8.10
nātaste satkṛtirloke bhūyāt sthānotsavādikam |
brahmovāca - svāmin prasīdādya mahāvibhūte manye varaṃ me śirasaḥ pramokṣam ||
1.8.11
namastubhyaṃ bhagavate bandhave viśvayonaye |
sahiṣṇave ca doṣāṇāṃ śambhave śailadhanvane ||
1.8.12
īśvara uvāca |
arājabhayametadvai jagat sarvaṃ naśiṣyati |
tatastvaṃ jahi daṇḍārhaṃ vaha lokadhuraṃ śiśo ||
1.8.13
varaṃ dadāmi te tatra gṛhāṇa durlabhaṃ param |
vaitānikeṣu gṛhyeṣu yajñeṣu ca bhavān guruḥ ||
1.8.14
niṣphalastvadṛte yajñaḥ sāṅgaśca sahadakṣiṇaḥ |
athāha devaḥ kitavaṃ ketakaṃ kūṭasākṣiṇam ||
1.8.15
re re ketaka duṣṭastvaṃ śaṭha dūramito vraja |
mamāpi prema te puṣpe mābhūtpūjāsvitaḥ param ||
1.8.16
ityukte tatra devena ketakaṃ devajātayaḥ |
sarvā nivārayāmāsustatpārśvādanyatastadā ||
1.8.17
ketaka uvāca |
namaste nātha me janma niṣphalaṃ bhavadājñayā |
saphalaṃ kriyatāṃ tāta kṣamyatāṃ mama kilbiṣam ||
1.8.18
jñānājñānakṛtaṃ pāpaṃ nāśayatyeva te smṛtiḥ |
tādṛśe tvayi dṛṣṭe me mithyādoṣaḥ kuto bhavet ||
1.8.19
tathā stutastu bhagavān ketakena sabhāsthale |
na me tvaddhāraṇaṃ yogyaṃ satyavāgahamīśvaraḥ ||
1.8.20
madīyāstvāṃ dhariṣyanti janma te saphalaṃ tataḥ |
tvaṃ vai vitānavyājena mamopari bhaviṣyasi ||
1.8.21
ityanugṛhya bhagavān ketakaṃ vidhimādhavau |
virarāja sabhāmadhye sarvadevairabhiṣṭutaḥ ||
1.8.21.c1
iti śrīśivamahāpurāṇe prathamāyāṃ vidyeśvarasaṃhitāyāṃ śivānugrahavarṇanaṃ nāmāṣṭamo'dhyāyaḥ ||
1.8.21.p2
śrīgaṇeśāya namaḥ ||
1.8.21.p3
śrīgaurīśaṅkarābhyāṃ namaḥ ||
1.8.21.p4
vidyeśvarasaṃhitā
Other recensions (2)
- Śivapurāṇa — Vyāsa, Sanskrit
- Śivapurāṇa (complete text) — Sanskrit