Pramāṇa · Search · About · API

Shivapurana 1.9: navamo'dhyāyaḥ | śivasyātmano maheśvarābhidhānam

Śivapurāṇa (complete text) 1.9

Language
Sanskrit

Contents

navamo'dhyāyaḥ | śivasyātmano maheśvarābhidhānam

1.9.1

nandikeśvara uvāca |
tatrāntare tau ca nāthaṃ praṇamya vidhimādhavau |
baddhāñjalipuṭau tūṣṇīṃ tasthaturdakṣavāmagau ||

1.9.2

tatra saṃsthāpya tau devaṃ sakuṭumbaṃ varāsane |
pūjayāmāsatuḥ pūjyaṃ puṇyaiḥ puruṣavastubhiḥ ||

1.9.3

pauruṣaṃ prākṛtaṃ vastu jñeyaṃ dīrghālpakālikam |
hāranūpurakeyūrakirīṭamaṇikuṇḍalaiḥ ||

1.9.4

yajñasūtrottarīyasrakkṣaumamālyāṅgulīyakaiḥ |
puṣpatāmbūlakarpūracandanāgurulepanaiḥ ||

1.9.5

dhūpadīpasitacchatravyajanadhvajacāmaraiḥ |
anyairdivyopahāraiśca vāṅmanotītavaibhavaiḥ ||

1.9.6

patiyogyaiḥ paśvalabhyaistau samārcayatāṃ patim |
yadyacchreṣṭhatamaṃ vastu patiyogyaṃ hitadhvaja ||

1.9.7

tadvastvakhilamīśo'pi pāramparyacikīrṣayā |
sabhyānāṃ pradadau hṛṣṭaḥ pṛthak tatra yathākramam ||

1.9.8

kolāhalo mahānāsīttatra tadvastu gṛhyatām |
tatraiva brahmaviṣṇubhyāṃ cārcitaḥ śaṅkaraḥ purā ||

1.9.9

prasannaḥ prāha tau namrau sasmitaṃ bhaktivardhanaḥ |
īśvara uvāca |
tuṣṭo'hamadya vāṃ vatsau pūjayāsmin mahādine ||

1.9.10

dinametattataḥ puṇyaṃ bhaviṣyati mahattaram |
śivarātririti khyātā tithireṣā mama priyā ||

1.9.11

etatkāle tu yaḥ kuryāt pūjāṃ malliṅgaverayoḥ |
kuryāt sa jagataḥ kṛtyaṃ sthitisargādikaṃ pumān ||

1.9.12

śivarātrāvahorātraṃ nirāhāro jitendriyaḥ |
arcayedvā yathānyāyaṃ yathābalamavañcakaḥ ||

1.9.13

yatphalaṃ mama pūjāyāṃ varṣamekaṃ nirantaram |
tatphalaṃ labhate sadyaḥ śivarātrau madarcanāt ||

1.9.14

maddharmavṛddhikālo'yaṃ candrakāla ivāmbudheḥ |
pratiṣṭhādyutsavo yatra māmako maṅgalāyanaḥ ||

1.9.15

yatpunaḥ stambharūpeṇa svāvirāsamahaṃ purā |
sa kālo mārgaśīrṣe tu syādārdrāṛkṣamarbhakau ||

1.9.16

ārdrāyāṃ mārgaśīrṣe tu yaḥ paśyenmāmumāsakham |
madveramapi vā liṅgaṃ sa guhādapi me priyaḥ ||

1.9.17

alaṃ darśanamātreṇa phalaṃ tasmin dine śubhe |
abhyarcanaṃ cedadhikaṃ phalaṃ vācāmagocaram ||

1.9.18

raṇaraṅgatale'muṣmin yadahaṃ liṅgavarṣmaṇā |
jṛmbhito liṅgavattasmālliṅgasthānamidaṃ bhavet ||

1.9.19

anādyantamidaṃ stambhamaṇumātraṃ bhaviṣyati |
darśanārthaṃ hi jagatāṃ pūjanārthaṃ hi putrakau ||

1.9.20

bhogāvahamidaṃ liṅgaṃ bhuktimuktyekasādhanam |
darśanasparśanadhyānājjantūnāṃ janmamocanam ||

1.9.21

analācalasaṅkāśaṃ yadidaṃ liṅgamutthitam |
aruṇācalamityeva tadidaṃ khyātimeṣyati ||

1.9.22

atra tīrthaṃ ca bahudhā bhaviṣyati mahattaram |
muktirapyatra jantūnāṃ vāsena maraṇena ca ||

1.9.23

rathotsavādikalyāṇaṃ janāvāsaṃ tu sarvataḥ |
atra dattaṃ hutaṃ japtaṃ sarvaṃ koṭiguṇaṃ bhavet ||

1.9.24

matkṣetrādapi sarvasmāt kṣetrametanmahattaram |
atra saṃsmṛtimātreṇa muktirbhavati dehinām ||

1.9.25

tasmānmahattaramidaṃ kṣetramatyantaśobhanam |
sarvakalyāṇasampūrṇaṃ sarvamuktikaraṃ śubham ||

1.9.26

arcayitvātra māmeva liṅge liṅginamīśvaram |
sālokyaṃ caiva sāmīpyaṃ sārūpyaṃ sārṣṭireva ca ||

1.9.27

sāyujyamiti pañcaite kriyādīnāṃ phalaṃ matam |
sarve'pi yūyaṃ sakalaṃ prāpsyathāśu manoratham ||

1.9.28

nandikeśvara uvāca |
ityanugṛhya bhagavān vinītau vidhimādhavau |
yatpūrvaṃ prahataṃ yuddhe tayoḥ sainyaṃ parasparam ||

1.9.29

tadutthāpayadatyarthaṃ svaśaktyāmṛtadhārayā |
tayormauḍhyaṃ ca vairaṃ ca vyapanetumuvāca tau ||

1.9.30

sakalaṃ niṣkalaṃ ceti svarūpadvayamasti me |
nānyasya kasyacittasmādanyaḥ sarvo'pyanīśvaraḥ ||

1.9.31

purastāt stambharūpeṇa paścād rūpeṇa cārbhakau |
brahmatvaṃ niṣkalaṃ proktamīśatvaṃ sakalaṃ tathā ||

1.9.32

dvayaṃ mamaiva saṃsiddhaṃ na madanyasya kasyacit |
tasmādīśatvamanyeṣāṃ yuvayorapi na kvacit ||

1.9.33

tadajñānena vāṃ vṛttamīśamānaṃ mahādbhutam |
tannirākartumatraivamutthito'haṃ raṇakṣitau ||

1.9.34

tyajataṃ mānamātmīyaṃ mayīśe kurutaṃ matim |
matprasādena lokeṣu sarvo'pyarthaḥ prakāśate ||

1.9.35

gurūktirvyañjakaṃ tatra pramāṇaṃ vā punaḥ punaḥ |
brahmatattvamidaṃ gūḍhaṃ bhavatprītyā bhaṇāmyaham ||

1.9.36

ahameva paraṃ brahma matsvarūpaṃ kalākalam |
brahmatvādīśvaraścāhaṃ kṛtyaṃ me'nugrahādikam ||

1.9.37

bṛhattvād bṛṃhaṇatvācca brahmāhaṃ brahmakeśavau |
samatvādvyāpakatvācca tathaivātmāhamarbhakau ||

1.9.38

anātmānaḥ pare sarve jīvā eva na saṃśayaḥ |
anugrahādyaṃ sargāntaṃ jagatkṛtyaṃ ca pañcakam ||

1.9.39

īśatvādeva me nityaṃ na madanyasya kasyacit |
ādau brahmatvabuddhyarthaṃ niṣkalaṃ liṅgamutthitam ||

1.9.40

tasmādajñātamīśatvaṃ vyaktaṃ dyotayituṃ hi vām |
sakalo'hamato jātaḥ sākṣādīśastu tatkṣaṇāt ||

1.9.41

sakalatvamato jñeyamīśatvaṃ mayi satvaram |
yadidaṃ niṣkalaṃ stambhaṃ mama brahmatvabodhakam ||

1.9.42

liṅgalakṣaṇayuktatvānmama liṅgaṃ bhavedidam |
tadidaṃ nityamabhyaryaṃ yuvābhyāmatra putrakau ||

1.9.43

madātmakamidaṃ nityaṃ mama sānnidhyakāraṇam |
mahatpūjyamidaṃ nityamabhedālliṅgaliṅginoḥ ||

1.9.44

yatra pratiṣṭhitaṃ yena madīyaṃ liṅgamīdṛśam |
tatra pratiṣṭhitaḥ so'hamapratiṣṭho'pi vatsakau ||

1.9.45

matsāmyamekaliṅgasya sthāpane phalamīritam |
dvitīye sthāpite liṅge madaikyaṃ phalameva hi ||

1.9.46

liṅgaṃ prādhānyataḥ sthāpyaṃ tathā veraṃ tu gauṇakam |
liṅgābhāve na tatkṣetraṃ saveramapi sarvataḥ ||

1.9.46.c1

iti śrīśivamahāpurāṇe prathamāyāṃ vidyeśvarasaṃhitāyāṃ śivasya maheśvarābhidhānavarṇanaṃ nāma navamo'dhyāyaḥ ||

1.9.46.p2

śrīgaṇeśāya namaḥ ||

1.9.46.p3

śrīgaurīśaṅkarābhyāṃ namaḥ ||

1.9.46.p4

vidyeśvarasaṃhitā

Other recensions (2)

Linked texts (1)