Shivapurana 2.1.10: daśamo'dhyāyaḥ | paramaśivatattvavarṇanam
Śivapurāṇa (complete text) 2.1.10
- Language
- Sanskrit
Contents
- 2.1.10.40 — 5 parts
daśamo'dhyāyaḥ | paramaśivatattvavarṇanam
2.1.10.1
parameśvara uvāca |
anyacchṛṇu hare viṣṇo śāsanaṃ mama suvrata |
sadā sarveṣu lokeṣu mānyaḥ pūjyo bhaviṣyasi ||
2.1.10.2
brahmaṇā nirmite loke yadā duḥkhaṃ prajāyate |
tadā tvaṃ sarvaduḥkhānāṃ nāśāya tatparo bhava ||
2.1.10.3
sahāyaṃ te kariṣyāmi sarvakārye ca duḥsahe |
tava śatrūnhaniṣyāmi duḥsādhyānparamotkaṭān ||
2.1.10.4
vividhānavatārāṃśca gṛhītvā kīrtimuttamām |
vistāraya hare loke tāraṇāya paro bhava ||
2.1.10.5
guṇarūpo hyahaṃ rudro hyanena vapuṣā sadā |
kāryaṃ kariṣye lokānāṃ tavāśakyaṃ na saṃśayaḥ ||
2.1.10.6
rudradhyeyo bhavāṃścaiva bhavaddhyeyo harastathā |
yuvayorantaraṃ naiva tava rudrasya kiñcana ||
2.1.10.7
vastutaścāpi caikatvaṃ varato'pi tathaiva ca |
līlayāpi mahāviṣṇo satyaṃ satyaṃ na saṃśayaḥ ||
2.1.10.8
rudrabhakto naro yastu tava nindāṃ kariṣyati |
tasya puṇyaṃ ca nikhilaṃ drutaṃ bhasma bhaviṣyati ||
2.1.10.9
narake patanaṃ tasya tvaddveṣātpuruṣottama |
madājñayā bhavedviṣṇo satyaṃ satyaṃ na saṃśayaḥ ||
2.1.10.10
loke'sminmuktido nṛṇāṃ bhuktidaśca viśeṣataḥ |
dhyeyaḥ pūjyaśca bhaktānāṃ nigrahānugrahau kuru ||
2.1.10.11
ityuktvā māṃ ca dhātāraṃ haste dhṛtvā svayaṃ harim |
kathayāmāsa duḥkheṣu sahāyo bhava sarvadā ||
2.1.10.12
sarvādhyakṣaśca sarveṣu bhaktimuktipradāyakaḥ |
bhava tvaṃ sarvadā śreṣṭhaḥ sarvakāmaprasādhakaḥ ||
2.1.10.13
sarveṣāṃ prāṇarūpaśca bhava tvaṃ ca mamājñayā |
saṅkaṭe bhajanīyo hi sa rudro mattanurhare ||
2.1.10.14
tvāṃ yaḥ samāśrito nūnaṃ māmeva sa samāśritaḥ |
antaraṃ yaśca jānāti niraye patati dhruvam ||
2.1.10.15
āyurbalaṃ śṛṇuṣvādya tridevānāṃ viśeṣataḥ |
sandeho'tra na kartavyo brahmaviṣṇuharātmanām ||
2.1.10.16
caturyugasahasrāṇi brahmaṇo dinamucyate |
rātriśca tāvatī tasya mānametatkrameṇa ha ||
2.1.10.17
teṣāṃ triṃśaddinairmāso dvādaśaistaiśca vatsaraḥ |
śatavarṣapramāṇena brahmāyuḥ parikīrtitam ||
2.1.10.18
brahmaṇo varṣamātreṇa dinaṃ vaiṣṇavamucyate |
so'pi varṣaśataṃ yāvadātmamānena jīvati ||
2.1.10.19
vaiṣṇavena tu varṣeṇa dinaṃ raudraṃ bhaved dhruvam |
haro varṣaśate yāte nararūpeṇa saṃsthitaḥ ||
2.1.10.20
yāvaducchvasitaṃ vaktre sadāśivasamudbhavam |
paścācchaktiṃ samabhyeti yāvanniḥśvasitaṃ bhavet ||
2.1.10.21
niḥśvāsocchvasitānāṃ ca sarveṣāmeva dehinām |
brahmaviṣṇuharāṇāṃ ca gandharvoragarakṣasām ||
2.1.10.22
ekaviṃśasahasrāṇi śataiḥ ṣaḍbhiḥ śatāni ca |
ahorātrāṇi coktāni pramāṇaṃ surasattamau ||
2.1.10.23
ṣaḍbhirucchvāsaniḥśvāsaiḥ palamekaṃ pravartitam |
ghaṭī ṣaṣṭipalā proktā sā ṣaṣṭyā ca dinaṃ niśā ||
2.1.10.24
niḥśvāsocchvāsitānāṃ ca parisaṅkhyā na vidyate |
sadāśivasamutthānametasmātso'kṣayaḥ smṛtaḥ ||
2.1.10.25
itthaṃ rūpaṃ tvayā tāvadrakṣaṇīyaṃ mamājñayā |
tāvatsṛṣṭeśca kāryaṃ vai kartavyaṃ vividhairguṇaiḥ ||
2.1.10.26
brahmovāca |
ityākarṇya vacaḥ śambhormayā ca bhagavānhariḥ |
praṇipatya ca viśveśaṃ prāha mandataraṃ vaśī ||
2.1.10.27
viṣṇuruvāca |
śaṅkara śrūyatāmetatkṛpāsindho jagatpate |
sarvametatkariṣyāmi bhavadājñāvaśānugaḥ ||
2.1.10.28
mama dhyeyaḥ sadā tvaṃ ca bhaviṣyasi na cānyathā |
bhavataḥ sarvasāmarthyaṃ labdhaṃ caiva purā mayā ||
2.1.10.29
kṣaṇamātramapi svāmiṃstava dhyānaṃ paraṃ mama |
cetaso dūrato naiva saṅgacchatu kadācana ||
2.1.10.30
mama bhaktaśca yaḥ svāmim̐stava nindāṃ kariṣyati |
tasya vai niraye vāsaṃ prayaccha niyataṃ dhruvam ||
2.1.10.31
tvadbhakto yo bhavet svāminmama priyataro hi saḥ |
evaṃ vai yo vijānāti tasya muktirna durlabhā ||
2.1.10.32
mahimā ca madīyo'dya vardhito bhavatā dhruvam |
kadācidaguṇaścaiva jāyate kṣamyatāmiti ||
2.1.10.33
brahmovāca |
tadā śambhustadīyaṃ hi śrutvā vacanamuttamam |
uvāca viṣṇuṃ suprītyā kṣamyā te'guṇatā mayā ||
2.1.10.34
evamuktvā hariṃ nau sa karābhyāṃ parameśvaraḥ |
pasparśa sakalāṅgeṣu kṛpayā tu kṛpānidhiḥ ||
2.1.10.35
ādiśya vividhāndharmānsarvaduḥkhaharo haraḥ |
dadau varānanekāṃścāvayorhitacikīrṣayā ||
2.1.10.36
tataḥ sa bhagavān śambhuḥ kṛpayā bhaktavatsalaḥ |
dṛṣṭyā sampaśyatoḥ śīghraṃ tatraivāntaradhīyata ||
2.1.10.37
tadāprabhṛti loke'smim̐lliṅgapūjāvidhiḥ smṛtaḥ |
liṅge pratiṣṭhitaḥ śambhurbhuktimuktipradāyakaḥ ||
2.1.10.38
liṅgavedirmahādevī liṅgaṃ sākṣānmaheśvaraḥ |
layanālliṅgamityuktaṃ tatraiva nikhilaṃ jagat ||
2.1.10.39
yastu laiṅgaṃ paṭhennityamākhyānaṃ liṅgasannidhau |
ṣaṇmāsācchivarūpo vai nātra kāryā vicāraṇā ||
2.1.10.40
yastu liṅgasamīpe tu kāryaṃ kiñcitkaroti ca |
tasya puṇyaphalaṃ vaktuṃ na śaknomi mahāmune ||
2.1.10.40.c1
iti śrīśivamahāpurāṇe dvitīyāyāṃ rudrasaṃhitāyāṃ prathamakhaṇḍe sṛṣṭyupākhyāne parama śivatattvavarṇanaṃ nāma daśamo'dhyāyaḥ ||
2.1.10.40.p2
śrīgaṇeśāya namaḥ ||
2.1.10.40.p3
śrīgaurīśaṅkarābhyāṃ namaḥ ||
2.1.10.40.p4
śrīśivamahāpurāṇam ||
2.1.10.40.p5
dvitīyāyāṃ rudrasaṃhitāyāṃ prathamaḥ sṛṣṭikhaṇḍaḥ
Linked texts (1)
- Liṅgapurāṇa — Vyāsa, Sanskrit