Shivapurana 2.1.19: ekonaviṃśo'dhyāyaḥ | kailāsagamanopākhyāne kuberasya śivamitratvavarṇanam
Śivapurāṇa (complete text) 2.1.19
- Language
- Sanskrit
Contents
- 2.1.19.33 — 5 parts
ekonaviṃśo'dhyāyaḥ | kailāsagamanopākhyāne kuberasya śivamitratvavarṇanam
2.1.19.1
brahmovāca |
pādme kalpe mama purā brahmaṇo mānasātsutāt |
pulastyādviśravā jajñe tasya vaiśravaṇaḥ sutaḥ ||
2.1.19.2
teneyamalakā bhuktā purī viśvakṛtā kṛtā |
ārādhya tryambakaṃ devamatyugratapasā purā ||
2.1.19.3
vyatīte tatra kalpe vai pravṛtte meghavāhane |
yājñadattirasau śrīmān tapastepe suduḥsaham ||
2.1.19.4
bhaktiprabhāvaṃ vijñāya śambhostaddīpamātrataḥ |
purā purāreḥ samprāpya kāśikāṃ citprakāśikām ||
2.1.19.5
śivaikādaśamudbodhya cittaratnapradīpakaiḥ |
ananyabhaktisnehāḍhyastanmayo dhyānaniścalaḥ ||
2.1.19.6
śivaikyaṃ sumahāpātraṃ tapo'gniparibṛṃhitam |
kāmakrodhamahāvighnapataṅgāghātavarjitam ||
2.1.19.7
prāṇasaṃrodhanirvātaṃ nirmalaṃ nirmalekṣaṇāt |
saṃsthāpya śāmbhavaṃ liṅgaṃ sadbhāvakusumārcitam ||
2.1.19.8
tāvattatāpa sa tapastvagasthipariśeṣitam |
yāvad babhūva tadvarṣma varṣāṇāmayutaṃ śatam ||
2.1.19.9
tataḥ saha viśālākṣyā devo viśveśvaraḥ svayam |
alakāpatimālokya prasannenāntarātmanā ||
2.1.19.10
liṅge manaḥsamādhāya sthitaṃ sthāṇusvarūpiṇam |
uvāca varado'smīti tadācakṣvālakāpate ||
2.1.19.11
unmīlya nayane yāvatsa paśyati tapodhanaḥ |
tāvadudyatsahasrāṃśusahasrādhikatejasam ||
2.1.19.12
puro dadarśa śrīkaṇṭhaṃ candracūḍamumādhavam |
tattejaḥ paribhūtākṣitejāḥ sammīlya locane ||
2.1.19.13
uvāca devadeveśaṃ manorathapadātigam |
nijāṅghridarśane nātha dṛksāmarthyaṃ prayaccha me ||
2.1.19.14
ayameva varo nātha yattvaṃ sākṣānnirīkṣyase |
kimanyena vareṇeśa namaste śaśiśekhara ||
2.1.19.15
iti tadvacanaṃ śrutvā devadeva umāpatiḥ |
dadau darśanasāmarthyaṃ spṛṣṭvā pāṇitalena tam ||
2.1.19.16
prasārya nayane pūrvamumāmeva vyalokayat |
tato'sau yājñadattistu tatsāmarthyamavāpya ca ||
2.1.19.17
śambhoḥ samīpe kā yoṣideṣā sarvāṅgasundarī |
anayā kiṃ tapastaptaṃ mamāpi tapaso'dhikam ||
2.1.19.18
aho rūpamaho prema saubhāgyaṃ śrīraho bhṛśam |
ityavādīdasau putro muhurmuhuratīva hi ||
2.1.19.19
krūradṛgvīkṣate yāvatpunaḥ punaridaṃ vadan |
tāvatpusphoṭa tannetraṃ vāmaṃ vāmāvilokanāt ||
2.1.19.20
atha devyabravīddevaṃ kimasau duṣṭatāpasaḥ |
asakṛdvīkṣya māṃ vakti vada tvaṃ me tapaḥprabhām ||
2.1.19.21
asakṛddakṣiṇenākṣṇā punarmāmeva paśyati |
asūyamāno me rūpapremasaubhāgyasampadaḥ ||
2.1.19.22
iti devīgiraṃ śrutvā prahasya prāha tāṃ prabhuḥ |
ume tvadīyaḥ putro'yaṃ na ca krūreṇa cakṣuṣā ||
2.1.19.23
sampaśyati tapolakṣmīṃ tava kiṃ tvadhivarṇayet |
iti devīṃ samābhāṣya tamīśaḥ punarabravīt ||
2.1.19.24
varāndadāmi te vatsa tapasānena toṣitaḥ |
nidhīnāmatha nāthastvaṃ guhyakānāṃ bhaveśvaraḥ ||
2.1.19.25
yakṣāṇāṃ kinnarāṇāṃ ca rājñāṃ rājā ca suvrata |
patiḥ puṇyajanānāṃ ca sarveṣāṃ dhanado bhava ||
2.1.19.26
mayā sakhyaṃ ca te nityaṃ vatsyāmi ca tavāntike |
alakāṃ nikaṣā mitra tava prītivivṛddhaye ||
2.1.19.27
āgaccha pādayorasyāḥ pata te jananī tviyam |
yājñadatte mahābhakta suprasannena cetasā ||
2.1.19.28
brahmovāca |
iti dattvā varāndevaḥ punarāha śivāṃ śivaḥ |
prasādaṃ kuru deveśi tapasvinyaṅgaje'tra vai ||
2.1.19.29
ityākarṇya vacaḥ śambhoḥ pārvatī jagadambikā |
abravīdyājñadattiṃ taṃ suprasannena cetasā ||
2.1.19.30
devyuvāca |
vatsa te nirmalā bhaktirbhave bhavatu sarvadā |
bhavaikapiṅgo netreṇa vāmena sphuṭitena ha ||
2.1.19.31
devena dattā ye tubhyaṃ varāḥ santu tathaiva te |
kubero bhava nāmnā tvaṃ mama rūperṣyayā suta ||
2.1.19.32
iti dattvā varāndevo devyā saha maheśvaraḥ |
dhanadāyāviveśātha dhāma vaiśveśvarābhidham ||
2.1.19.33
itthaṃ sakhitvaṃ śrīśambhoḥ prāpaiṣa dhanadaḥ puram |
alakānnikaṣā cāsītkailāsaḥ śaṅkarālayaḥ ||
2.1.19.33.c1
iti śrīśivamahāpurāṇe dvitīyāyāṃ rudrasaṃhitāyāṃ prathamakhaṇḍe kailāsagamanopākhyāne kuberasya śivamitratvavarṇanaṃ nāmaikonaviṃśo'dhyāyaḥ ||
2.1.19.33.p2
śrīgaṇeśāya namaḥ ||
2.1.19.33.p3
śrīgaurīśaṅkarābhyāṃ namaḥ ||
2.1.19.33.p4
śrīśivamahāpurāṇam ||
2.1.19.33.p5
dvitīyāyāṃ rudrasaṃhitāyāṃ prathamaḥ sṛṣṭikhaṇḍeḥ
Linked texts (1)
- Skandamahāpurāṇa (vulgate) — Sanskrit