Shivapurana 2.1.20: viṃśo'dhyāyaḥ | kailāsopākhyāne śivasya kailāsagamanam
Śivapurāṇa (complete text) 2.1.20
- Language
- Sanskrit
Contents
viṃśo'dhyāyaḥ | kailāsopākhyāne śivasya kailāsagamanam
2.1.20.1
brahmovāca |
nārada tvaṃ śṛṇu mune śivāgamanamuttamam |
kailāse parvataśreṣṭhe kuberasya tapobalāt ||
2.1.20.2
nidhipatvavaraṃ dattvā gatvā svasthānamuttamam |
vicintya hṛdi viśveśaḥ kuberavaradāyakaḥ ||
2.1.20.3
vidhyaṅgajassvarūpo me pūrṇaḥ pralayakāryakṛt |
tadrūpeṇa gamiṣyāmi kailāsaṃ guhyakālayam ||
2.1.20.4
rudro hṛdayajo me hi pūrṇāṃśo brahma niṣkalaḥ |
haribrahmādibhiḥ sevyo madabhinno nirañjanaḥ ||
2.1.20.5
tatsvarūpeṇa tatraiva suhṛdbhūtvā vilāsyaham |
kuberasya ca vatsyāmi kariṣyāmi tapo mahat ||
2.1.20.6
iti sañcintya rudro'sau śivecchāṃ gantumutsukaḥ |
nanāda tatra ḍhakkāṃ svāṃ sugatiṃ nādarūpiṇīm ||
2.1.20.7
trailokyāmānaśe tasyā dhvanirutsāhakārakaḥ |
āhvānagatisaṃyukto vicitraḥ sāndraśabdakaḥ ||
2.1.20.8
tacchrutvā viṣṇubrahmādyāḥ surāśca munayastathā |
āgamā nigamā mūrtāḥ siddhā jagmuśca tatra vai ||
2.1.20.9
surāsurādyāḥ sakalāstatra jagmuśca sotsavāḥ |
sarve'pi pramathā jagmuryatra kutrāpi saṃsthitāḥ ||
2.1.20.10
gaṇapāśca mahābhāgāḥ sarvalokanamaskṛtāḥ |
teṣāṃ saṅkhyāmahaṃ vacmi sāvadhānatayā śṛṇu ||
2.1.20.11
abhyayācchaṅkhakarṇaśca gaṇakoṭyā gaṇeśvaraḥ |
daśabhiḥ kekarākṣaśca vikṛto'ṣṭābhireva ca ||
2.1.20.12
catuḥ ṣaṣṭyā viśākhaśca navabhiḥ pāriyātrakaḥ |
ṣaḍbhiḥ sarvāntakaḥ śrīmāndundubho'ṣṭābhireva ca ||
2.1.20.13
jālaṅko hi dvādaśabhiḥ koṭibhirgaṇapuṅgavaḥ |
saptabhiḥ samadaḥ śrīmām̐stathaiva vikṛtānanaḥ ||
2.1.20.14
pañcabhiśca kapālī hi ṣaḍbhiḥ sandārakaḥ śubhaḥ |
koṭikoṭibhireveha kaṇḍukaḥ kuṇḍakastathā ||
2.1.20.14.p1
viṣṭambho'ṣṭābhiragamadaṣṭabhiścandratāpanaḥ | 15 ||
2.1.20.14.p2
mahākeśaḥ sahasreṇa koṭīnāṃ gaṇapo vṛtaḥ | 16 ||
2.1.20.17
kuṇḍī dvādaśabhirvāhastathā parvatakaḥ śubhaḥ |
kālaśca kālakaścaiva mahākālaḥ śatena vai ||
2.1.20.18
agnikaḥ śatakoṭyā vai koṭyābhimukha eva ca |
ādityamūrdhā koṭyā ca tathā caiva dhanāvahaḥ ||
2.1.20.19
sannāhaśca śatenaiva kumudaḥ koṭibhistathā |
amoghaḥ kokilaścaiva koṭikoṭyā sumantrakaḥ ||
2.1.20.20
kākapādo'paraḥ ṣaṣṭyā ṣaṣṭyā santānakaḥ prabhuḥ |
mahābalaśca navabhirmadhupiṅgaśca piṅgalaḥ ||
2.1.20.21
nīlo navatyā deveśaṃ pūrṇabhadrastathaiva ca |
koṭīnāṃ caiva saptānāṃ caturvaktro mahābalaḥ ||
2.1.20.22
koṭikoṭisahasrāṇāṃ śatairviṃśatibhirvṛtaḥ |
tatrājagāma sarveśaḥ kailāsagamanāya vai | ||
2.1.20.23
kāṣṭhāgūḍhaścatuḥṣaṣṭyā sukeśo vṛṣabhastathā |
koṭibhiḥ saptabhiścaitro nakulīśassvayaṃ prabhuḥ ||
2.1.20.24
lokāntakaśca dīptātmā tathā daityāntakaḥ prabhuḥ |
devo bhṛṅgī riṭiḥ śrīmāndevadevapriyastathā ||
2.1.20.25
aśanirbhānukaścaiva catuḥṣaṣṭyā sanātanaḥ |
nandīśvaro gaṇādhīśaḥ śatakoṭyā mahābalaḥ ||
2.1.20.26
ete cānye ca gaṇapā asaṅkhyātā mahābalāḥ |
sarve sahasrahastāśca jaṭāmukuṭadhāriṇaḥ ||
2.1.20.27
sarve candrāvataṃsāśca nīlakaṇṭhāstrilocanāḥ |
hārakuṇḍalakeyūramukuṭādyairalaṅkṛtāḥ ||
2.1.20.28
brahmendraviṣṇusaṅkāśā aṇimādigaṇairvṛtāḥ |
sūryakoṭipratīkāśāstatrājagmurgaṇeśvarāḥ ||
2.1.20.29
ete gaṇādhipāścānye mahātmāno'malaprabhāḥ |
jagmustatra mahāprītyā śivadarśanalālasāḥ ||
2.1.20.30
gatvā tatra śivaṃ dṛṣṭvā natvā cakruḥ parāṃ nutim |
sarve sāñjalayo viṣṇupramukhā natamastakāḥ ||
2.1.20.31
iti viṣṇvādibhiḥ sārdhaṃ maheśaḥ parameśvaraḥ |
kailāsamagamatprītyā kuberasya mahātmanaḥ ||
2.1.20.32
kubero'pyāgataṃ śambhuṃ pūjayāmāsa sādaram |
bhaktyā nānopahāraiśca parivārasamanvitaḥ ||
2.1.20.33
tato viṣṇvādikāndevāngaṇāṃścānyānapi dhruvam |
śivānugānsamānarca śivatoṣaṇahetave ||
2.1.20.34
atha śambhuḥ samāliṅgya kuberaṃ prītamānasaḥ |
mūrdhniṃ cāghrāya santasthāvalakāṃ nikaṣākhilaiḥ ||
2.1.20.35
śaśāsa viśvakarmāṇaṃ nirmāṇārthaṃ girau prabhuḥ |
nānābhaktanivāsāya svapareṣāṃ yathocitam ||
2.1.20.36
viśvakarmā tato gatvā tatra nānāvidhāṃ mune |
racanāṃ racayāmāsa drutaṃ śambhoranujñayā ||
2.1.20.37
atha śambhuḥ pramudito hariprārthanayā tadā ||
2.1.20.38
kuberānugrahaṃ kṛtvā yayau kailāsaparvatam |
sumuhūrte praviśyāsau svasthānaṃ parameśvaraḥ ||
2.1.20.38.p1
akarodakhilānprītyā sanāthānbhaktavatsalaḥ |
atha sarve pramuditā viṣṇuprabhṛtayaḥ surāḥ |
munayaścāpare siddhā abhyaṣiñcanmudā śivam | 39 ||
2.1.20.40
samānarcuḥ kramātsarve nānopāyanapāṇayaḥ |
nīrājanaṃ samākārṣurmahotsavapuraḥsaram ||
2.1.20.41
tadāsītsumanovṛṣṭirmaṅgalāyatanā mune |
suprītā nanṛtustatrāpsaraso gānatatparāḥ ||
2.1.20.42
jayaśabdo namaḥ śabdastatrāsītsarvasaṃskṛtaḥ |
tadotsāho mahānāsītsarveṣāṃ sukhavardhanaḥ ||
2.1.20.43
sthitvā siṃhāsane śambhurvirarājādhikaṃ tadā |
sarvaiḥ saṃsevito'bhīkṣṇaṃ viṣṇvādyaiśca yathocitam ||
2.1.20.44
atha sarve surādyāśca tuṣṭuvustaṃ pṛthakpṛthak |
arthyābhirvāgbhiriṣṭābhiḥ śakaraṃ lokaśaṅkaram ||
2.1.20.45
prasannātmā stutiṃ śrutvā teṣāṃ kāmāndadau śivaḥ |
manobhilaṣitānprītyā varānsarveśvaraḥ prabhuḥ ||
2.1.20.46
śivājñayātha te sarve svaṃ svaṃ dhāma yayurmune |
prāptakāmāḥ pramuditā ahaṃ ca viṣṇunā saha ||
2.1.20.47
upaveśyāsane viṣṇuṃ māṃ ca śambhuruvāca ha |
bahu sambodhya suprītyānugṛhya parameśvaraḥ ||
2.1.20.48
śiva uvāca |
he hare he vidhe tātau yuvāṃ priyatarau mama |
surottamau trijagato'vanasargakarau sadā ||
2.1.20.49
gacchataṃ nirbhayaṃ nityaṃ svasthānaṃ ca madājñayā |
sukhapradātāhaṃ vai vāṃ viśeṣātprekṣakaḥ sadā ||
2.1.20.50
ityākarṇya vacaḥ śambhoḥ supraṇamya tadājñayā |
ahaṃ hariśca svaṃ dhāmāgamāva prītamānasau ||
2.1.20.51
tadānīmeva suprītaḥ śaṅkaro nidhipaṃ mudā |
upaveśya gṛhītvā taṃ kara āha śubhaṃ vacaḥ ||
2.1.20.52
tava premṇā vaśībhūto mitratāmagamaṃ sakhe |
svasthānaṃ gaccha vibhayaḥ sahāyo'haṃ sadānagha ||
2.1.20.53
ityākarṇya vacaḥ śambhoḥ kuberaḥ prītamānasaḥ |
tadājñayā svakaṃ dhāma jagāma pramudānvitaḥ ||
2.1.20.54
sa uvāsa girau śambhuḥ kailāse parvatottame |
sagaṇo yoganirataḥ svacchando dhyānatatparaḥ ||
2.1.20.55
kvaciddadhyau svamātmānaṃ kvacidyogarato'bhavat |
itihāsaṃ gaṇānprītyāvādītsvacchandamānasaḥ ||
2.1.20.56
kvacitkailāsakudharasusthāneṣu maheśvaraḥ |
vijahāra gaṇaiḥ prītyā vividheṣu vihāravit ||
2.1.20.57
itthaṃ rudrasvarūpo'sau śaṅkaraḥ parameśvaraḥ |
akārṣītsvagirau līlā nānā yogivaro'pi yaḥ ||
2.1.20.58
nītvā kālaṃ kiyantaṃ so'patnīkaḥ parameśvaraḥ |
paścādavāpa svāṃ patnīṃ dakṣapatnīsamudbhavām ||
2.1.20.59
vijahāra tayā satyā dakṣaputryā maheśvaraḥ |
sukhī babhūva devarṣe lokācāraparāyaṇaḥ ||
2.1.20.60
itthaṃ rudrāvatāraste varṇito'yaṃ munīśvara |
kailāsāgamanaṃ cāsya sakhitvaṃ nidhipasya hi ||
2.1.20.61
tadantargatalīlāpi varṇitā jñānavardhinī |
ihāmutra ca yā nityaṃ sarvakāmaphalapradā ||
2.1.20.62
imāṃ kathāṃ paṭhedyastu śṛṇuyādvā samāhitaḥ |
iha bhuktiṃ samāsādya labhenmuktiṃ paratra saḥ ||
2.1.20.62.c1
iti śrīśivamahāpurāṇe dvitīyāyāṃ rudrasaṃhitāyāṃ prathamakhaṇḍe sṛṣṭyupākhyāne kailāsopākhyāne śivasya kailāsagamanaṃ nāma viṃśo'dhyāyaḥ ||
2.1.20.62.c2
iti śrīśivamahāpurāṇe dvitīyarudrasaṃhitāyāṃ prathamaḥ sṛṣṭikhaṇḍaḥ samāptaḥ ||
Linked texts (1)
- Māheśvaratantra — Sanskrit