Shivapurana 2.1.5: pañcamo'dhyāyaḥ | nāradasya kāśīkṣetragamanam
Śivapurāṇa (complete text) 2.1.5
- Language
- Sanskrit
Contents
- 2.1.5.35 — 5 parts
pañcamo'dhyāyaḥ | nāradasya kāśīkṣetragamanam
2.1.5.1
sūta uvāca |
antarhite harau viprā nārado munisattamaḥ |
vicacāra mahīṃ paśyan śivaliṅgāni bhaktitaḥ ||
2.1.5.2
pṛthivyā aṭanaṃ kṛtvā śivarūpāṇyanekaśaḥ |
dadarśa prītito viprā bhuktimuktipradāni saḥ ||
2.1.5.3
atha taṃ vicarantaṃ kau nāradaṃ divyadarśanam |
jñātvā śambhugaṇau tau tu sucittamupajagmatuḥ ||
2.1.5.4
śirasā supraṇamyāśu gaṇāvūcaturādarāt |
gṛhītvā caraṇau tasya śāpoddhārecchayā ca tau ||
2.1.5.5
śivagaṇāvūcatuḥ
brahmaputra surarṣe hi śṛṇu prītyāvayorvacaḥ |
tavāparādhakartārāvāvāṃ viprau na vastutaḥ ||
2.1.5.6
āvāṃ haragaṇau vipra tavāgaskāriṇau mune |
svayamvare rājaputryā māyāmohitacetasā ||
2.1.5.7
tvayā dattaśca nau śāpaḥ pareśapreritena ha |
jñātvā kusamayaṃ tatra maunameva hi jīvanam ||
2.1.5.8
svakarmaṇaḥ phalaṃ prāptaṃ kasyāpi na hi dūṣaṇam |
suprasanno bhava vibho kurvanugrahamadya nau ||
2.1.5.9
sūta uvāca |
vaca ākarṇya gaṇayoriti bhaktyuktamādarāt |
pratyuvāca muniḥ prītyā paścāttāpamavāpya saḥ ||
2.1.5.10
nārada uvāca |
śṛṇutaṃ me mahādevagaṇau mānyatamau satām |
vacanaṃ sukhadaṃ mohanirmuktaṃ ca yathārthakam ||
2.1.5.11
purā mama matirbhraṣṭāsīcchivecchāvaśād dhruvam |
sarvathā mohamāpannaḥ śaptavānvāṃ kuśemuṣiḥ ||
2.1.5.12
yaduktaṃ tattathā bhāvi tathāpi śṛṇutāṃ gaṇau |
śāpoddhāramahaṃ vacmi kṣamethāmaghamadya me ||
2.1.5.13
vīryānmunivarasyāptvā rākṣaseśatvamādiśam |
syātāṃ vibhavasaṃyuktau balinau supratāpinau ||
2.1.5.14
sarvabrahmāṇḍarājānau śivabhaktau jitendriyau |
śivāparatanormṛtyuṃ prāpya svaṃ padamāpsyathaḥ ||
2.1.5.15
sūta uvāca |
ityākarṇya munervākyaṃ nāradasya mahātmanaḥ |
ubhau haragaṇau prītau svaṃ padaṃ jagmaturmudā ||
2.1.5.16
nārado'pi paraṃ prīto dhyāyan śivamananyadhīḥ |
vicacāra mahīṃ paśyan śivatīrthānyabhīkṣṇaśaḥ ||
2.1.5.17
kāśīṃ prāpyātha sa muniḥ sarvoparivirājitām |
śivapriyāṃ śambhusukhapradāṃ śambhusvarūpiṇīm ||
2.1.5.18
dṛṣṭvā kāśīṃ kṛtārtho'bhūtkāśīnāthaṃ dadarśa ha |
ānarca paramaprītyā paramānandasaṃyutaḥ ||
2.1.5.19
samudaḥ sevya tāṃ kāśīṃ kṛtārtho munisattamaḥ |
namansaṃvarṇayanbhaktyā saṃsmaranpremavihvalaḥ ||
2.1.5.20
brahmalokaṃ jagāmātha śivasmaraṇasanmatiḥ |
śivatattvaṃ viśeṣeṇa jñātumicchuḥ sa nāradaḥ ||
2.1.5.21
natvā tatra vidhiṃ bhaktyā stutvā ca vividhaistavaiḥ |
papraccha śivasattattvaṃ śivasaṃyuktamānasaḥ ||
2.1.5.22
nārada uvāca |
brahmanbrahmasvarūpajña pitāmaha jagatprabho |
tvatprasādānmayā sarvaṃ viṣṇormāhātmyamuttamam ||
2.1.5.23
bhaktimārgaṃ jñānamārgaṃ tapomārgaṃ sudustaram |
dānamārgaṃ ca tīrthānāṃ mārgaṃ ca śrutavānaham ||
2.1.5.24
na jñātaṃ śivatattvaṃ ca pūjāvidhimataḥ kramāt |
caritraṃ vividhaṃ tasya nivedaya mama prabho ||
2.1.5.25
nirguṇo'pi śivastāta saguṇaḥ śaṅkaraḥ katham |
śivatattvaṃ na jānāmi mohitaḥ śivamāyayā ||
2.1.5.26
sṛṣṭeḥ pūrvaṃ kathaṃ śambhuḥ svarūpeṇa pratiṣṭhitaḥ |
sṛṣṭimadhye sa hi kathaṃ krīḍansaṃvartate prabhuḥ ||
2.1.5.27
tadante ca kathaṃ devaḥ sa tiṣṭhati maheśvaraḥ |
kathaṃ prasannatāṃ yāti śaṅkaro lokaśaṅkaraḥ ||
2.1.5.28
santuṣṭaśca svabhaktebhyaḥ parebhyaśca maheśvaraḥ |
kiṃ phalaṃ yacchati vidhe tatsarvaṃ kathayasva me ||
2.1.5.29
sadyaḥ prasanno bhagavānbhavatītyanusaṃśrutam |
bhaktaprayāsaṃ sa mahānna paśyati dayāparaḥ ||
2.1.5.30
brahmā viṣṇurmaheśaśca trayo devāḥ śivāṃśajāḥ |
maheśastatra pūrṇāṃśaḥ svayameva śivaḥ paraḥ ||
2.1.5.31
tasyāvirbhāvamākhyāhi caritāni viśeṣataḥ |
umāvirbhāvamākhyāhi tadvivāhaṃ tathā vibho ||
2.1.5.32
tadgārhasthyaṃ viśeṣeṇa tathā līlāḥ parā api |
etatsarvaṃ tathānyacca kathanīyaṃ tvayānagha ||
2.1.5.33
tadutpattiṃ vivāhaṃ ca śivāyāstu viśeṣataḥ |
prabrūhi me prajānātha guhajanma tathaiva ca ||
2.1.5.34
bahubhyaśca śrutaṃ pūrvaṃ na tṛpto'smi jagatprabho |
atastvāṃ śaraṇaṃ prāptaḥ kṛpāṃ kuru mamopari ||
2.1.5.35
iti śrutvā vacastasya nāradasyāṅgajasya hi |
uvāca vacanaṃ tatra brahmā lokapitāmahaḥ ||
2.1.5.35.c1
iti śrīśivamahāpurāṇe dvitīyāyāṃ rudrasaṃhitāyāṃ prathamakhaṇḍe sṛṣṭyupākhyāne nāradapraśnavarṇanaṃ nāma pañcamo'dhyāyaḥ ||
2.1.5.35.p2
śrīgaṇeśāya namaḥ ||
2.1.5.35.p3
śrīgaurīśaṅkarābhyāṃ namaḥ ||
2.1.5.35.p4
śrīśivamahāpurāṇam ||
2.1.5.35.p5
dvitīyāyāṃ rudrasaṃhitāyāṃ prathamaḥ sṛṣṭikhaṇḍaḥ