Shivapurana 2.1.8: aṣṭamo'dhyāyaḥ | śabdabrahmatanuvarṇanam
Śivapurāṇa (complete text) 2.1.8
- Language
- Sanskrit
Contents
- 2.1.8.53 — 5 parts
aṣṭamo'dhyāyaḥ | śabdabrahmatanuvarṇanam
2.1.8.1
brahmovāca |
evaṃ tayormuniśreṣṭha darśanaṃ kāṅkṣamāṇayoḥ |
vigarvayośca surayoḥ sadā nau sthitayormune ||
2.1.8.2
dayālurabhavacchambhurdīnānāṃ pratipālakaḥ |
garviṇāṃ garvahartā ca sarveṣāṃ prabhuravyayaḥ ||
2.1.8.3
tadā samabhavattatra nādo vai śabdalakṣaṇaḥ |
omomiti suraśreṣṭhātsuvyaktaḥ plutalakṣaṇaḥ ||
2.1.8.4
kimidaṃ tviti sañcintya mayā tiṣṭhanmahāsvanaḥ |
viṣṇuḥ sarvasurārādhyo nirvairastuṣṭacetasā ||
2.1.8.5
liṅgasya dakṣiṇe bhāge tathāpaśyatsanātanam |
ādyaṃ varṇamakārākhyamukāraṃ cottare tataḥ ||
2.1.8.6
makāraṃ madhyataścaiva nādamante'sya comiti |
sūryamaṇḍalavad dṛṣṭvā varṇamādyaṃ tu dakṣiṇe ||
2.1.8.7
uttare pāvakaprakhyamukāramṛṣisattama |
śītāṃśumaṇḍalaprakhyaṃ makāraṃ tasya madhyataḥ ||
2.1.8.8
tasyopari tadāpaśyacchuddhasphaṭikasuprabham |
turīyātītamamalaṃ niṣkalaṃ nirupadravam ||
2.1.8.9
nirdvandvaṃ kevalaṃ śūnyaṃ bāhyābhyantaravarjitam |
sabāhyābhyantare caiva bāhyābhyantarasaṃsthitam ||
2.1.8.10
ādimadhyāntarahitamānandasyādikāraṇam |
satyamānandamamṛtaṃ paraṃ brahmaparāyaṇam ||
2.1.8.11
kuta evātra sambhūtaḥ parīkṣāvo'gnisambhavam |
adho gamiṣyāmyanalastambhasyānupamasya ca ||
2.1.8.12
vedaśabdobhayāveśaṃ viśvātmānaṃ vyacintayat |
tadābhavadṛṣistatra ṛṣeḥ sāratamaḥ smṛtaḥ ||
2.1.8.13
tenaiva ṛṣiṇā viṣṇurjñātavānparameśvaram |
mahādevaṃ paraṃ brahma śabdabrahmatanuṃ param ||
2.1.8.14
cintayā rahito rudro vāco yanmanasā saha |
aprāpya tannivartante vācyastvekākṣareṇa saḥ ||
2.1.8.15
ekākṣareṇa tadvākyamṛtaṃ paramakāraṇam |
satyamānandamamṛtaṃ paraṃ brahma parātparam ||
2.1.8.16
ekākṣarādakārākhyādbhagavānbījako'ṇḍajaḥ |
ekākṣarādukārākhyāddhariḥ paramakāraṇam ||
2.1.8.17
ekākṣarānmakārākhyādbhagavānnīlalohitaḥ |
sargakartā tvakārākhyo hyukārākhyastu mohakaḥ ||
2.1.8.18
makārākhyastu yo nityamanugrahakaro'bhavat |
makārākhyo vibhurbījī hyakāro bīja ucyate ||
2.1.8.19
ukārākhyo hariryoniḥ pradhānapuruṣeśvaraḥ |
bījī ca bījaṃ tadyonirnādākhyaśca maheśvaraḥ ||
2.1.8.20
bījī vibhajya cātmānaṃ svecchayā tu vyavasthitaḥ |
asya liṅgādabhūd bījamakāro bījinaḥ prabhoḥ ||
2.1.8.21
ukārayonau niḥkṣiptamavardhata samantataḥ |
sauvarṇamabhavaccāṇḍamāvedyaṃ tadalakṣaṇam ||
2.1.8.22
anekābdaṃ tathā cāpsu divyamaṇḍaṃ vyavasthitam |
tato varṣasahasrānte dvidhā kṛtamajodbhavam ||
2.1.8.23
aṇḍamapsu sthitaṃ sākṣād vyāghāteneśvareṇa tu |
tathāsya suśubhaṃ haimaṃ kapālaṃ cordhvasaṃsthitam ||
2.1.8.24
jajñe sā dyaustadaparaṃ pṛthivī pañcalakṣaṇā |
tasmādaṇḍādbhavo jajñe kakārākhyaścaturmukhaḥ ||
2.1.8.25
sa sraṣṭā sarvalokānāṃ sa eva trividhaḥ prabhuḥ |
evamomomiti proktamityāhuryajuṣāṃ varāḥ ||
2.1.8.26
yajuṣāṃ vacanaṃ śrutvā ṛcaḥ sāmāni sādaram |
evameva hare brahmannityāhuścāvayostadā ||
2.1.8.27
tato vijñāya deveśaṃ yathāvacchaktisambhavaiḥ |
mantrairmaheśvaraṃ devaṃ tuṣṭāva sumahodayam ||
2.1.8.28
etasminnantare'nyacca rūpamadbhutasundaram |
dadarśa ca mayā sārdhaṃ bhagavānviśvapālakaḥ ||
2.1.8.29
pañcavaktraṃ daśabhujaṃ gaurakarpūravanmune |
nānākāntisamāyuktaṃ nānābhūṣaṇabhūṣitam ||
2.1.8.30
mahodāraṃ mahāvīryaṃ mahāpuruṣalakṣaṇam |
taṃ dṛṣṭvā paramaṃ rūpaṃ kṛtārtho'bhūnmayā hariḥ ||
2.1.8.31
atha prasanno bhagavānmaheśaḥ parameśvaraḥ |
divyaṃ śabdamayaṃ rūpamākhyāya prahasansthitaḥ ||
2.1.8.32
akārastasya mūrdhā hi lalāṭo dīrgha ucyate |
ikāro dakṣiṇaṃ netramīkāro vāmalocanam ||
2.1.8.33
ukāro dakṣiṇaṃ śrotramūkāro vāma ucyate |
ṛkāro dakṣiṇaṃ tasya kapolaṃ parameṣṭhinaḥ ||
2.1.8.34
vāmaṃ kapolamṝkāro lṛ lṝ nāsāpuṭe ubhe |
ekāraścoṣṭha ūrdhvaśca hyaikārastvadharo vibhoḥ ||
2.1.8.35
okāraśca tathaukāro dantapaṅktidvayaṃ kramāt |
amastu tālunī tasya devadevasya śūlinaḥ ||
2.1.8.36
kādipañcākṣarāṇyasya pañca hastāśca dakṣiṇe |
cādipañcākṣarāṇyevaṃ pañca hastāstu vāmataḥ ||
2.1.8.37
ṭādipañcākṣaraṃ pādāstādi pañcākṣaraṃ tathā |
pakāra udaraṃ tasya phakāraḥ pārśva ucyate ||
2.1.8.38
bakāro vāmapārśvastu bhakāraḥ skandha ucyate |
makāro hṛdayaṃ śambhormahādevasya yoginaḥ ||
2.1.8.39
yakārādisakārāntā vibhorvai saptadhātavaḥ |
hakāro nābhirūpo hi kṣakāro ghrāṇa ucyate ||
2.1.8.40
evaṃ śabdamayaṃ rūpamaguṇasya guṇātmanaḥ |
dṛṣṭvā tamumayā sārdhaṃ kṛtārtho'bhūnmayā hariḥ ||
2.1.8.41
evaṃ dṛṣṭvā maheśānaṃ śabdabrahmatanuṃ śivam |
praṇamya ca mayā viṣṇuḥ punaścāpaśyadūrdhvataḥ ||
2.1.8.42
oṅkāraprabhavaṃ mantraṃ kalāpañcakasaṃyutam |
śuddhasphaṭikasaṅkāśaṃ śubhāṣṭatriṃśadakṣaram ||
2.1.8.43
medhākāramabhūdbhūyaḥ sarvadharmārthasādhakam |
gāyatrīprabhavaṃ mantraṃ sahitaṃ vaśyakārakam ||
2.1.8.44
caturviṃśativarṇāḍhyaṃ catuṣkālamanuttamam |
atha pañcasitaṃ mantraṃ kalāṣṭakasamāyutam ||
2.1.8.45
ābhicārikamatyarthaṃ prāyastriṃśacchubhākṣaram |
yajurvedasamāyuktaṃ pañcaviṃśacchubhākṣaram ||
2.1.8.46
kalāṣṭakasamāyuktaṃ suśvetaṃ śāntikaṃ tathā |
trayodaśakalāyuktaṃ bālādyaiḥ saha lehitam ||
2.1.8.47
babhūvurasya cotpattivṛddhisaṃhārakāraṇam |
varṇā ekādhikāḥ ṣaṣṭirasya mantravarasya tu ||
2.1.8.48
punarmṛtyuñjayaṃ mantraṃ pañcākṣaramataḥ param |
cintāmaṇiṃ tathā mantraṃ dakṣiṇāmūrtisaṃjñakam ||
2.1.8.49
tatastattvamasītyuktaṃ mahāvākyaṃ harasya ca |
pañcamantrāṃstathā labdhvā jajāpa bhagavānhariḥ ||
2.1.8.50
atha dṛṣṭvā kalāvarṇamṛgyajuḥsāmarūpiṇam |
īśānamīśamukuṭaṃ puruṣākhyaṃ purātanam ||
2.1.8.51
aghorahṛdayaṃ hṛdyaṃ sarvaguhyaṃ sadāśivam |
vāmapādaṃ mahādevaṃ mahābhogīndrabhūṣaṇam ||
2.1.8.52
viśvataḥ pādavantaṃ taṃ viśvato'kṣikaraṃ śivam |
brahmaṇo'dhipatiṃ sargasthitisaṃhārakāraṇam ||
2.1.8.53
tuṣṭāva vāgbhiriṣṭābhiḥ sāmbaṃ varadamīśvaram |
mayā ca sahito viṣṇurbhagavāṃstuṣṭacetasā ||
2.1.8.53.c1
iti śrīśivamahāpurāṇe dvitīyāyāṃ rudrasaṃhitāyāṃ prathamakhaṇḍe sṛṣṭyupākhyāne śabdabrahmatanuvarṇanaṃ nāmāṣṭamo'dhyāyaḥ ||
2.1.8.53.p2
śrīgaṇeśāya namaḥ ||
2.1.8.53.p3
śrīgaurīśaṅkarābhyāṃ namaḥ ||
2.1.8.53.p4
śrīśivamahāpurāṇam ||
2.1.8.53.p5
dvitīyāyāṃ rudrasaṃhitāyāṃ prathamaḥ sṛṣṭikhaṇḍaḥ
Linked texts (1)
- Liṅgapurāṇa — Vyāsa, Sanskrit