Shivapurana 2.2.18: aṣṭādaśo'dhyāyaḥ | śivasatīvivāhaḥ
Śivapurāṇa (complete text) 2.2.18
- Language
- Sanskrit
Contents
- 2.2.18.37 — 5 parts
aṣṭādaśo'dhyāyaḥ | śivasatīvivāhaḥ
2.2.18.1
nārada uvāca |
rudrapārśve tvayi gate kimabhūccaritaṃ tataḥ |
kā vārtā hyabhavattāta kiṃ cakāra haraḥ svayam ||
2.2.18.2
brahmovāca |
athāhaṃ śivamānetuṃ prasannaḥ parameśvaram |
āsadaṃ hi mahādevaṃ himavadgirisaṃsthitam ||
2.2.18.3
māṃ vīkṣya lokasraṣṭāramāyāntaṃ vṛṣabhadhvajaḥ |
manasā saṃśayaṃ cakre satīprāptau muhurmuhuḥ ||
2.2.18.4
atha prītyā haro loke gatimāśritya līlayā |
satyā bhaktyā ca māṃ kṣipramuvāca prākṛto yathā ||
2.2.18.5
īśvara uvāca |
kimakārṣītsurajyeṣṭha satyarthe tvatsutaḥ sa mām |
kathayasva yathā svāntaṃ na dīryenmanmathena hi ||
2.2.18.6
dhāvamāno viprayogo māmeva ca satīṃ prati |
abhihanti surajyeṣṭha tyaktvānyāṃ prāṇadhāriṇīm ||
2.2.18.7
satīti satataṃ brahman vada kāryaṃ karomyaham |
abhedānmama sā prāpyā tadvidhe kriyatāṃ tathā ||
2.2.18.8
brahmovāca |
iti rudroktavacanaṃ lokācārasugarbhitam |
śrutvāhaṃ nāradamune sāntvayannagadaṃ śivam ||
2.2.18.9
brahmovāca satyarthaṃ yanmama suto vadati sma vṛṣadhvaja |
tacchraṇuṣva nijāsādhyaṃ siddhamityavadhāraya ||
2.2.18.10
deyā tasmai mayā putrī tadarthaṃ parikalpitā |
mamābhīṣṭamidaṃ kāryaṃ tvadvākyādadhikaṃ punaḥ ||
2.2.18.11
matputryārādhitaḥ śambhuretadarthaṃ svayaṃ punaḥ |
so'pyanviṣyati māṃ yasmāttadā deyā mayā hare ||
2.2.18.12
śubhe lagne sumuhūrte samāgacchatu se'ntikam |
tadā dāsyāmi tanayāṃ bhikṣārthaṃ śambhave vidhe ||
2.2.18.13
ityuvāca sa māṃ dakṣastasmāttvaṃ vṛṣabhadhvaja |
śubhe muhūrte tadveśma gaccha tāmānayasva ca ||
2.2.18.14
brahmovāca iti śrutvā mama vaco laukikīṃ gatimāśritaḥ |
uvāca vihasan rudro mune māṃ bhaktavatsalaḥ ||
2.2.18.15
rudra uvāca |
gamiṣye bhavatā sārdhaṃ nāradena ca tadgṛham |
ahameva jagatsraṣṭastasmāttvaṃ nāradaṃ smara ||
2.2.18.16
marīcyādīn svaputrāṃśca mānasānapi saṃsmara |
taiḥ sārdhaṃ dakṣanilayaṃ gamiṣye sagaṇo vidhe ||
2.2.18.17
brahmovāca |
ityājñapto'hamīśena lokācārapareṇa ha |
saṃsmaraṃ nāradaṃ tvāṃ ca marīcyādīnsutāṃstathā ||
2.2.18.18
tataḥ samāgatāḥ sarve mānasāstanayāstvayā |
mama smaraṇamātreṇa hṛṣṭāste drutamādarāt ||
2.2.18.19
viṣṇuḥ samāgatastūrṇaṃ smṛto rudreṇa śaivarāṭ |
sa svasainyaiḥ kamalayā garuḍārūḍha eva ca ||
2.2.18.20
atha caitrasite pakṣe nakṣatre bhagadaivate |
trayodaśyāṃ dine bhānau nirgacchatsa maheśvaraḥ ||
2.2.18.21
sarvaiḥ suragaṇaiḥ sārdhaṃ brahmaviṣṇupuraḥsaraiḥ |
tathā tairmunibhirgacchan sa babhau pathi śaṅkaraḥ ||
2.2.18.22
mārge samutsavo jāto devādīnāṃ ca gacchatām |
tathā haragaṇānāṃ ca sānandamanasāmati ||
2.2.18.23
gajagovyāghrasarpāśca jaṭā candrakalā tathā |
jagmuḥ sarve bhūṣaṇatvaṃ yathāyogyaṃ śivecchayā ||
2.2.18.24
tataḥ kṣaṇena balinā balīvardena veginā |
saviṣṇupramukhaḥ prītyā prāpa dakṣālayaṃ haraḥ ||
2.2.18.25
tato dakṣo vinītātmā samprahṛṣṭatanūruhaḥ |
prayayau sammukhaṃ tasya saṃyuktaḥ sakalairnijaiḥ ||
2.2.18.26
sarve suragaṇāstatra svayaṃ dakṣeṇa satkṛtāḥ |
pārśve śreṣṭhaṃ ca munibhirupaviṣṭā yathākramam ||
2.2.18.27
parivāryākhilāndevāngaṇāṃśca munibhiryathā |
dakṣaḥ samānayāmāsa gṛhābhyantarataḥ śivam ||
2.2.18.28
atha dakṣaḥ prasannātmā svayaṃ sarveśvaraṃ haram |
samānarca vidhānena dattvāsanamanuttamam ||
2.2.18.29
tato viṣṇuṃ ca māṃ viprānsurānsarvāngaṇāṃstathā |
pūjayāmāsa sadbhaktyā yathocitavidhānataḥ ||
2.2.18.30
kṛtvā yathocitāṃ pūjāṃ teṣāṃ pūjyādibhistathā |
cakāra saṃvidaṃ dakṣo munibhirmānasaiḥ punaḥ ||
2.2.18.31
tato māṃ pitaraṃ prāha dakṣaḥ prītyā hi matsutaḥ |
praṇipatya tvayā karma kāryaṃ vaivāhikaṃ vibho ||
2.2.18.32
vāḍhamityahamapyuktvā prahṛṣṭenāntarātmanā |
samutthāya tato'kārṣaṃ tatkāryamakhilaṃ tathā ||
2.2.18.33
tataḥ śubhe muhūrte hi lagne grahabalānvite |
satīṃ nijasutāṃ dakṣo dadau harṣeṇa śambhave ||
2.2.18.34
udvāhavidhinā so'pi pāṇiṃ jagrāha harṣitaḥ |
dākṣāyaṇyā varatanostadānīṃ vṛṣabhadhvajaḥ ||
2.2.18.35
ahaṃ haristvadādyā vai munayaśca surā gaṇāḥ |
nemuḥ sarve saṃstutibhiḥ toṣayāmāsurīśvaram ||
2.2.18.36
samutsavo mahānāsīnnṛtyagānapuraḥsaraḥ |
ānandaṃ paramaṃ jagmuḥ sarve munigaṇāḥ surāḥ ||
2.2.18.37
kanyāṃ dattvā kṛtārtho'bhūttadā dakṣo hi matsutaḥ |
śivāśivau prasannau ca nikhilaṃ maṅgalālayam ||
2.2.18.37.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe kanyādānavarṇanaṃ nāmāṣṭādaśo'dhyāyaḥ ||
2.2.18.37.p2
śrīgaṇeśāya namaḥ ||
2.2.18.37.p3
śrīgaurīśaṅkarābhyāṃ namaḥ ||
2.2.18.37.p4
śrīśivamahāpurāṇam ||
2.2.18.37.p5
dvitīyāyāṃ rudrasaṃhitāyāṃ dvitīyaḥ satīkhaṇḍe
Linked texts (2)
- Kālikāpurāṇa — Sanskrit
- Skandamahāpurāṇa (vulgate) — Sanskrit