[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Śivapurāṇa](https://indike.org/pramana/in.purana.siva) › [Shivapurana (complete text)](https://indike.org/pramana/in.purana.siva*complete-2) › 2.2.18 # Shivapurana 2.2.18: aṣṭādaśo'dhyāyaḥ | śivasatīvivāhaḥ Śivapurāṇa (complete text) 2.2.18 - **Language:** Sanskrit ## Contents - [2.2.18.37](https://indike.org/pramana/in.purana.siva*complete-2.2.2.18.37) — 5 parts ### aṣṭādaśo'dhyāyaḥ | śivasatīvivāhaḥ ### [2.2.18.1](https://indike.org/pramana/in.purana.siva*complete-2.2.2.18.1) nārada uvāca | rudrapārśve tvayi gate kimabhūccaritaṃ tataḥ | kā vārtā hyabhavattāta kiṃ cakāra haraḥ svayam || ### [2.2.18.2](https://indike.org/pramana/in.purana.siva*complete-2.2.2.18.2) brahmovāca | athāhaṃ śivamānetuṃ prasannaḥ parameśvaram | āsadaṃ hi mahādevaṃ himavadgirisaṃsthitam || ### [2.2.18.3](https://indike.org/pramana/in.purana.siva*complete-2.2.2.18.3) māṃ vīkṣya lokasraṣṭāramāyāntaṃ vṛṣabhadhvajaḥ | manasā saṃśayaṃ cakre satīprāptau muhurmuhuḥ || ### [2.2.18.4](https://indike.org/pramana/in.purana.siva*complete-2.2.2.18.4) atha prītyā haro loke gatimāśritya līlayā | satyā bhaktyā ca māṃ kṣipramuvāca prākṛto yathā || ### [2.2.18.5](https://indike.org/pramana/in.purana.siva*complete-2.2.2.18.5) īśvara uvāca | kimakārṣītsurajyeṣṭha satyarthe tvatsutaḥ sa mām | kathayasva yathā svāntaṃ na dīryenmanmathena hi || ### [2.2.18.6](https://indike.org/pramana/in.purana.siva*complete-2.2.2.18.6) dhāvamāno viprayogo māmeva ca satīṃ prati | abhihanti surajyeṣṭha tyaktvānyāṃ prāṇadhāriṇīm || ### [2.2.18.7](https://indike.org/pramana/in.purana.siva*complete-2.2.2.18.7) satīti satataṃ brahman vada kāryaṃ karomyaham | abhedānmama sā prāpyā tadvidhe kriyatāṃ tathā || ### [2.2.18.8](https://indike.org/pramana/in.purana.siva*complete-2.2.2.18.8) brahmovāca | iti rudroktavacanaṃ lokācārasugarbhitam | śrutvāhaṃ nāradamune sāntvayannagadaṃ śivam || ### [2.2.18.9](https://indike.org/pramana/in.purana.siva*complete-2.2.2.18.9) brahmovāca satyarthaṃ yanmama suto vadati sma vṛṣadhvaja | tacchraṇuṣva nijāsādhyaṃ siddhamityavadhāraya || ### [2.2.18.10](https://indike.org/pramana/in.purana.siva*complete-2.2.2.18.10) deyā tasmai mayā putrī tadarthaṃ parikalpitā | mamābhīṣṭamidaṃ kāryaṃ tvadvākyādadhikaṃ punaḥ || ### [2.2.18.11](https://indike.org/pramana/in.purana.siva*complete-2.2.2.18.11) matputryārādhitaḥ śambhuretadarthaṃ svayaṃ punaḥ | so'pyanviṣyati māṃ yasmāttadā deyā mayā hare || ### [2.2.18.12](https://indike.org/pramana/in.purana.siva*complete-2.2.2.18.12) śubhe lagne sumuhūrte samāgacchatu se'ntikam | tadā dāsyāmi tanayāṃ bhikṣārthaṃ śambhave vidhe || ### [2.2.18.13](https://indike.org/pramana/in.purana.siva*complete-2.2.2.18.13) ityuvāca sa māṃ dakṣastasmāttvaṃ vṛṣabhadhvaja | śubhe muhūrte tadveśma gaccha tāmānayasva ca || ### [2.2.18.14](https://indike.org/pramana/in.purana.siva*complete-2.2.2.18.14) brahmovāca iti śrutvā mama vaco laukikīṃ gatimāśritaḥ | uvāca vihasan rudro mune māṃ bhaktavatsalaḥ || ### [2.2.18.15](https://indike.org/pramana/in.purana.siva*complete-2.2.2.18.15) rudra uvāca | gamiṣye bhavatā sārdhaṃ nāradena ca tadgṛham | ahameva jagatsraṣṭastasmāttvaṃ nāradaṃ smara || ### [2.2.18.16](https://indike.org/pramana/in.purana.siva*complete-2.2.2.18.16) marīcyādīn svaputrāṃśca mānasānapi saṃsmara | taiḥ sārdhaṃ dakṣanilayaṃ gamiṣye sagaṇo vidhe || ### [2.2.18.17](https://indike.org/pramana/in.purana.siva*complete-2.2.2.18.17) brahmovāca | ityājñapto'hamīśena lokācārapareṇa ha | saṃsmaraṃ nāradaṃ tvāṃ ca marīcyādīnsutāṃstathā || ### [2.2.18.18](https://indike.org/pramana/in.purana.siva*complete-2.2.2.18.18) tataḥ samāgatāḥ sarve mānasāstanayāstvayā | mama smaraṇamātreṇa hṛṣṭāste drutamādarāt || ### [2.2.18.19](https://indike.org/pramana/in.purana.siva*complete-2.2.2.18.19) viṣṇuḥ samāgatastūrṇaṃ smṛto rudreṇa śaivarāṭ | sa svasainyaiḥ kamalayā garuḍārūḍha eva ca || ### [2.2.18.20](https://indike.org/pramana/in.purana.siva*complete-2.2.2.18.20) atha caitrasite pakṣe nakṣatre bhagadaivate | trayodaśyāṃ dine bhānau nirgacchatsa maheśvaraḥ || ### [2.2.18.21](https://indike.org/pramana/in.purana.siva*complete-2.2.2.18.21) sarvaiḥ suragaṇaiḥ sārdhaṃ brahmaviṣṇupuraḥsaraiḥ | tathā tairmunibhirgacchan sa babhau pathi śaṅkaraḥ || ### [2.2.18.22](https://indike.org/pramana/in.purana.siva*complete-2.2.2.18.22) mārge samutsavo jāto devādīnāṃ ca gacchatām | tathā haragaṇānāṃ ca sānandamanasāmati || ### [2.2.18.23](https://indike.org/pramana/in.purana.siva*complete-2.2.2.18.23) gajagovyāghrasarpāśca jaṭā candrakalā tathā | jagmuḥ sarve bhūṣaṇatvaṃ yathāyogyaṃ śivecchayā || ### [2.2.18.24](https://indike.org/pramana/in.purana.siva*complete-2.2.2.18.24) tataḥ kṣaṇena balinā balīvardena veginā | saviṣṇupramukhaḥ prītyā prāpa dakṣālayaṃ haraḥ || ### [2.2.18.25](https://indike.org/pramana/in.purana.siva*complete-2.2.2.18.25) tato dakṣo vinītātmā samprahṛṣṭatanūruhaḥ | prayayau sammukhaṃ tasya saṃyuktaḥ sakalairnijaiḥ || ### [2.2.18.26](https://indike.org/pramana/in.purana.siva*complete-2.2.2.18.26) sarve suragaṇāstatra svayaṃ dakṣeṇa satkṛtāḥ | pārśve śreṣṭhaṃ ca munibhirupaviṣṭā yathākramam || ### [2.2.18.27](https://indike.org/pramana/in.purana.siva*complete-2.2.2.18.27) parivāryākhilāndevāngaṇāṃśca munibhiryathā | dakṣaḥ samānayāmāsa gṛhābhyantarataḥ śivam || ### [2.2.18.28](https://indike.org/pramana/in.purana.siva*complete-2.2.2.18.28) atha dakṣaḥ prasannātmā svayaṃ sarveśvaraṃ haram | samānarca vidhānena dattvāsanamanuttamam || ### [2.2.18.29](https://indike.org/pramana/in.purana.siva*complete-2.2.2.18.29) tato viṣṇuṃ ca māṃ viprānsurānsarvāngaṇāṃstathā | pūjayāmāsa sadbhaktyā yathocitavidhānataḥ || ### [2.2.18.30](https://indike.org/pramana/in.purana.siva*complete-2.2.2.18.30) kṛtvā yathocitāṃ pūjāṃ teṣāṃ pūjyādibhistathā | cakāra saṃvidaṃ dakṣo munibhirmānasaiḥ punaḥ || ### [2.2.18.31](https://indike.org/pramana/in.purana.siva*complete-2.2.2.18.31) tato māṃ pitaraṃ prāha dakṣaḥ prītyā hi matsutaḥ | praṇipatya tvayā karma kāryaṃ vaivāhikaṃ vibho || ### [2.2.18.32](https://indike.org/pramana/in.purana.siva*complete-2.2.2.18.32) vāḍhamityahamapyuktvā prahṛṣṭenāntarātmanā | samutthāya tato'kārṣaṃ tatkāryamakhilaṃ tathā || ### [2.2.18.33](https://indike.org/pramana/in.purana.siva*complete-2.2.2.18.33) tataḥ śubhe muhūrte hi lagne grahabalānvite | satīṃ nijasutāṃ dakṣo dadau harṣeṇa śambhave || ### [2.2.18.34](https://indike.org/pramana/in.purana.siva*complete-2.2.2.18.34) udvāhavidhinā so'pi pāṇiṃ jagrāha harṣitaḥ | dākṣāyaṇyā varatanostadānīṃ vṛṣabhadhvajaḥ || ### [2.2.18.35](https://indike.org/pramana/in.purana.siva*complete-2.2.2.18.35) ahaṃ haristvadādyā vai munayaśca surā gaṇāḥ | nemuḥ sarve saṃstutibhiḥ toṣayāmāsurīśvaram || ### [2.2.18.36](https://indike.org/pramana/in.purana.siva*complete-2.2.2.18.36) samutsavo mahānāsīnnṛtyagānapuraḥsaraḥ | ānandaṃ paramaṃ jagmuḥ sarve munigaṇāḥ surāḥ || ### [2.2.18.37](https://indike.org/pramana/in.purana.siva*complete-2.2.2.18.37) kanyāṃ dattvā kṛtārtho'bhūttadā dakṣo hi matsutaḥ | śivāśivau prasannau ca nikhilaṃ maṅgalālayam || ### [2.2.18.37.c1](https://indike.org/pramana/in.purana.siva*complete-2.2.2.18.37.c1) iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe kanyādānavarṇanaṃ nāmāṣṭādaśo'dhyāyaḥ || ### [2.2.18.37.p2](https://indike.org/pramana/in.purana.siva*complete-2.2.2.18.37.p2) śrīgaṇeśāya namaḥ || ### [2.2.18.37.p3](https://indike.org/pramana/in.purana.siva*complete-2.2.2.18.37.p3) śrīgaurīśaṅkarābhyāṃ namaḥ || ### [2.2.18.37.p4](https://indike.org/pramana/in.purana.siva*complete-2.2.2.18.37.p4) śrīśivamahāpurāṇam || ### [2.2.18.37.p5](https://indike.org/pramana/in.purana.siva*complete-2.2.2.18.37.p5) dvitīyāyāṃ rudrasaṃhitāyāṃ dvitīyaḥ satīkhaṇḍe ## Linked texts (3) - [Kālikāpurāṇa](https://indike.org/pramana/in.purana.upa.sakta.kalika.2.24) — Sanskrit - [Skandamahāpurāṇa (vulgate)](https://indike.org/pramana/in.purana.skanda*vulgate.5.77.19) — Sanskrit - [Hāṭakeśvaramāhātmya](https://indike.org/pramana/in.purana.sthala.hatakesvaramahatmya.77.19) — Sanskrit --- Source: [https://indike.org/pramana/in.purana.siva*complete-2.2.2.18](https://indike.org/pramana/in.purana.siva*complete-2.2.2.18) · Pramāṇa