Shivapurana 2.2.20: viṃśo'dhyāyaḥ | satīvivāhotsava
Śivapurāṇa (complete text) 2.2.20
- Language
- Sanskrit
Contents
viṃśo'dhyāyaḥ | satīvivāhotsava
2.2.20.1
nārada uvāca |
brahman vidhe mahābhāga śivabhakta varaprabho |
śrāvitaṃ caritaṃ śambhoradbhutaṃ maṅgalāyanam ||
2.2.20.1.p1
tataḥ kimabhavattāta kathyatāṃ śaśimaulinaḥ |
satyāśca caritaṃ divyaṃ sarvāghaughavināśanam | 2 ||
2.2.20.3
brahmovāca |
nivṛtte śaṅkare cāsmadvadhādbhaktānukampini |
abhavannirbhayāḥ sarve sukhinaḥ suprasannakāḥ ||
2.2.20.4
nataskandhāḥ sāñjalayaḥ praṇemurnikhilāśca te |
tuṣṭuvuḥ śaṅkaraṃ bhaktyā cakrurjayaravaṃ mudā ||
2.2.20.5
etasminneva kāle'haṃ prasanno nirbhayo mune |
astavaṃ śaṅkaraṃ bhaktyā vividhaiśca śubhastavaiḥ ||
2.2.20.6
tatastuṣṭamanāḥ śambhurbahulīlākaraḥ prabhuḥ |
mune māṃ samuvācedaṃ sarveṣāṃ śṛṇvatāṃ tadā ||
2.2.20.7
rudra uvāca |
brahman tāta prasanno'haṃ nirbhayastvaṃ bhavādhunā |
svaśīrṣaṃ spṛśa hastena madājñāṃ kurvasaṃśayam ||
2.2.20.8
brahmovāca |
ityākarṇya vacaḥ śambhorbahulīlākṛtaḥ prabhoḥ |
spṛśan svaṃ kaṃ tathā bhūtvā prāṇamaṃ vṛṣabhadhvajam ||
2.2.20.9
yāvadevamahaṃ svaṃ kaṃ spṛśāmi nijapāṇinā |
tāvattatra sthitaṃ sadyastadrūpavṛṣavāhanam ||
2.2.20.10
tato lajjāparītāṅgaḥ sthitaścāhamadhomukhaḥ |
indrādyairamaraiḥ sarvaiḥ sudṛṣṭaḥ sarvataḥ sthitaiḥ ||
2.2.20.11
athāhaṃ lajjayāviṣṭaḥ praṇipatya maheśvaram |
prāvocaṃ saṃstutiṃ kṛtvā kṣamyatāṃ kṣamyatāmiti ||
2.2.20.12
asya pāpasya śuddhyarthaṃ prāyaścittaṃ vada prabho |
nigrahaṃ ca tathā nyāyaṃ yena pāpaṃ prayātu me ||
2.2.20.13
ityuktastu mayā śambhuruvāca praṇataṃ hi mām |
suprasannataro bhūtvā sarveśo bhaktavatsalaḥ ||
2.2.20.14
śambhuruvāca |
anenaiva svarūpeṇa madadhiṣṭhitakena hi |
tapaḥ kuru prasannātmā madārādhanatatparaḥ ||
2.2.20.15
khyātiṃ yāsyasi sarvatra nāmnā rudraśiraḥ kṣitau |
sādhakaḥ sarvakṛtyānāṃ tejobhājāṃ dvijanmanām ||
2.2.20.16
manuṣyāṇāmidaṃ kṛtyaṃ yasmādvīryaṃ tvayādhunā |
tasmāttvaṃ mānuṣo bhūtvā vicariṣyasi bhūtale ||
2.2.20.17
yastvāṃ cānena rūpeṇa dṛṣṭvā kau vicariṣyati |
kimetad brahmaṇo mūrdhni vadanniti purāntakaḥ ||
2.2.20.18
tataste ceṣṭitaṃ sarvaṃ kautukācchroṣyatīti yaḥ |
paradārakṛtāttyāgānmuktiṃ sadyaḥ sa yāsyati ||
2.2.20.19
yathā yathā janaścaitatkṛtyaṃ te kīrtayiṣyati |
tathā tathā viśuddhiste pāpasyāsya bhaviṣyati ||
2.2.20.20
etadeva hi te brahman prāyaścittaṃ mayeritam |
janahāsyakaraṃ loke tava garhākaraṃ param ||
2.2.20.21
etacca tava vīryaṃ hi patitaṃ vedimadhyagam |
kāmārtasya mayā dṛṣṭaṃ naitaddhāryaṃ bhaviṣyati ||
2.2.20.22
caturbindumitaṃ retaḥ patitaṃ yatkṣitau tava |
tanmitāstoyadā vyomni bhaveyuḥ pralayaṅkarāḥ ||
2.2.20.23
etasminnantare tatra devarṣīṇāṃ puro drutam |
tadretasaḥ samabhavaṃstanmitāśca balāhakāḥ ||
2.2.20.24
saṃvartakastathāvartaḥ puṣkaro droṇa eva ca |
ete caturvidhāstāta mahāmeghā layaṅkarāḥ ||
2.2.20.25
garjantaścātha muñcantastoyānīṣacchivecchayā |
phelurvyomni muniśreṣṭha toyadāste kadāravāḥ ||
2.2.20.26
taistu sañchādite vyomni sugarjadbhiśca śaṅkaraḥ |
praśān dākṣāyaṇī devī bhṛśaṃ śānto'bhavad drutam ||
2.2.20.27
atha cāhaṃ vītabhayaḥ śaṅkarasyājñayā tadā |
śeṣaṃ vaivāhikaṃ karma samāptimanayaṃ mune ||
2.2.20.28
papāta puṣpavṛṣṭiśca śivāśivaśiraskayoḥ |
sarvatra ca muniśreṣṭha mudā devagaṇojjhitā ||
2.2.20.29
vādyamāneṣu vādyeṣu gāyamāneṣu teṣu ca |
paṭhatsu vipravargeṣu vedān bhaktyānviteṣu ca ||
2.2.20.30
rambhādiṣu purandhrīṣu nṛtyamānāsu sādaram |
mahotsavo mahānāsīddevapatnīṣu nārada ||
2.2.20.31
atha karmavitāneśaḥ prasannaḥ parameśvaraḥ |
prāha māṃ prāñjaliṃ prītyā laukikīṃ gatimāśritaḥ ||
2.2.20.32
īśvara uvāca |
he brahman sukṛtaṃ karma sarvaṃ vaivāhikaṃ ca yat |
prasanno'smi tvamācāryo dadyāṃ te dakṣiṇāṃ ca kām ||
2.2.20.33
yācasva tāṃ surajyeṣṭha yadyapi syātsudurlabhā |
brūhi śīghraṃ mahābhāga nādeyaṃ vidyate mama ||
2.2.20.34
brahmovāca |
ityākarṇya vacaḥ so'haṃ śaṅkarasya kṛtāñjaliḥ |
mune'vocaṃ vinītātmā praṇamyeśaṃ muhurmuhuḥ ||
2.2.20.35
yadi prasanno deveśa varayogyo'smyahaṃ yadi |
tatkuru tvaṃ maheśāna suprītyā yadvadāmyaham ||
2.2.20.36
anenaiva tu rūpeṇa vedyāmasyāṃ maheśvara |
tvayā stheyaṃ sadaivātra nṛṇāṃ pāpaviśuddhaye ||
2.2.20.37
yenāsya sannidhau kṛtvā svāśramaṃ śaśiśekhara |
tapaḥ kuryāṃ vināśāya svapāpasyāsya śaṅkara ||
2.2.20.38
caitraśuklatrayodaśyāṃ nakṣatre bhagadaivate |
sūryavāre ca yo bhaktyā vīkṣeta bhuvi mānavaḥ ||
2.2.20.39
tadaiva tasya pāpāni prayāntu hara saṅkṣayam |
vardhate vipulaṃ puṇyaṃ rogā naśyantu sarvaśaḥ ||
2.2.20.40
yā nārī durbhagā vandhyā kāṇā rūpavivarjitā |
sāpi tvaddarśanādeva nirdoṣā sambhaved dhruvam ||
2.2.20.41
brahmovāca |
ityākarṇya vaco me hi svātmasarvasukhāvaham |
tathāstviti śivaḥ prāha suprasannena cetasā ||
2.2.20.42
śiva uvāca |
hitāya sarvalokasya vedyāṃ tasyāṃ vyavasthitaḥ |
sthāsyāmi sahitaḥ patnyā satyā tvadvacanādvidhe ||
2.2.20.43
brahmovāca |
ityuktvā bhagavāṃstatra sabhāryo vṛṣabhadhvajaḥ |
uvāca vedimadhyastho mūrtiṃ kṛtvāṃśarūpiṇīm ||
2.2.20.44
tato dakṣaṃ samāmantrya śaṅkaraḥ parameśvaraḥ |
patnyā satyā gantumanā abhūtsvajanavatsalaḥ ||
2.2.20.45
etasminnantare dakṣo vinayāvanataḥ sudhīḥ |
sāñjalirnatakaḥ prītyā tuṣṭāva vṛṣabhadhvajam ||
2.2.20.46
viṣṇvādayaḥ surāḥ sarve munayaśca gaṇāstadā |
natvā saṃstūya vividhaṃ cakrurjayaravaṃ mudā ||
2.2.20.47
āropya vṛṣabhe śambhuḥ satīṃ dakṣājñayā mudā |
jagāma himavatprasthaṃ vṛṣabhasthaḥ svayaṃ prabhuḥ ||
2.2.20.48
atha sā śaṅkarābhyāśe sudatī cāruhāsinī |
vireje vṛṣabhasthā vai candrānte kālikā yathā ||
2.2.20.49
viṣṇvādayaḥ surāḥ sarve marīcyādyāstatharṣayaḥ |
dakṣo'pi mohitaścāsīttathānye niścalā janāḥ ||
2.2.20.50
kecidvādyānvādayanto gāyantaḥ susvaraṃ pare |
śivaṃ śivayaśaḥ śuddhamanujagmuḥ śivaṃ mudā ||
2.2.20.51
madhyamārgādvisṛṣṭo hi dakṣaḥ prītyātha śambhunā |
svadhāma prāpa sagaṇaḥ śambhuḥ premasamākulaḥ ||
2.2.20.52
visṛṣṭā api viṣṇvādyāḥ śambhunā punareva te |
anujagmuḥ śivaṃ bhaktyā surāḥ paramayā mudā ||
2.2.20.53
taiḥ sarvaiḥ sagaṇaiḥ śambhuḥ satyā ca svastriyā yutaḥ |
prāpa svaṃ dhāma saṃhṛṣṭo himavad giriśobhitam ||
2.2.20.54
tatra gatvākhilāndevānmunīnapi parāṃstathā |
mudā visarjayāmāsa bahu sammānya sādaram ||
2.2.20.55
śambhumābhāṣya te sarve viṣṇvādyā muditānanāḥ |
svaṃ svaṃ dhāma yayurnatvā stutvā ca munayaḥ surāḥ ||
2.2.20.56
śivo'pi mudito'tyarthaṃ svapatnyā dakṣakanyayā |
himavatprasthasaṃstho hi vijahāra bhavānugaḥ ||
2.2.20.57
tataḥ sa śaṅkaraḥ satyā sagaṇaḥ sūtikṛnmune |
prāpa svaṃ dhāma saṃhṛṣṭaḥ kailāsaṃ parvatottamam ||
2.2.20.58
etad vaḥ sarvamākhyātaṃ yathā tasya purābhavat |
vivāho vṛṣayānasya manusvāyambhuvāntare ||
2.2.20.59
vivāhasamaye yajñe prārambhe vā śṛṇoti yaḥ |
etadākhyānamavyagraḥ sampūjya vṛṣabhadhvajam ||
2.2.20.60
tasyāvighnaṃ bhavetsarvaṃ karma vaivāhikaṃ ca yat |
śubhākhyamaparaṃ karma nirvighnaṃ sarvadā bhavet ||
2.2.20.61
kanyā ca sukhasaubhāgyaśīlācāraguṇānvitā |
sādhvī syātputriṇī prītyā śrutvākhyānamidaṃ śubham ||
2.2.20.61.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe satīvivāhavarṇanaṃ nāma viṃśo'dhyāyaḥ ||
2.2.20.61.p2
śrīgaṇeśāya namaḥ ||
2.2.20.61.p3
śrīgaurīśaṅkarābhyāṃ namaḥ ||
2.2.20.61.p4
śrīśivamahāpurāṇam ||
2.2.20.61.p5
dvitīyāyāṃ rudrasaṃhitāyāṃ dvitīyaḥ satīkhaṇḍe
Linked texts (2)
- Skandamahāpurāṇa (vulgate) — Sanskrit
- Kālikāpurāṇa — Sanskrit