[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Śivapurāṇa](https://indike.org/pramana/in.purana.siva) › [Shivapurana (complete text)](https://indike.org/pramana/in.purana.siva*complete-2) › 2.2.27 # Shivapurana 2.2.27: saptaviṃśo'dhyāyaḥ | dakṣayajñārambhaḥ Śivapurāṇa (complete text) 2.2.27 - **Language:** Sanskrit ## Contents - [2.2.27.56](https://indike.org/pramana/in.purana.siva*complete-2.2.2.27.56) — 5 parts ### saptaviṃśo'dhyāyaḥ | dakṣayajñārambhaḥ ### [2.2.27.1](https://indike.org/pramana/in.purana.siva*complete-2.2.2.27.1) brahmovāca | ekadā tu mune tena yajñaḥ prārambhito mahān | tatrāhūtāstadā sarve dīkṣitena surarṣayaḥ || ### [2.2.27.2](https://indike.org/pramana/in.purana.siva*complete-2.2.2.27.2) maharṣayo'khilāstatra nirjarāśca samāgatāḥ | yadyajñakaraṇārthaṃ hi śivamāyāvimohitāḥ || ### [2.2.27.3](https://indike.org/pramana/in.purana.siva*complete-2.2.2.27.3) agastyaḥ kaśyapo'triśca vāmadevastathā bhṛguḥ | dadhīcirbhagavān vyāso bhāradvājo'tha gautamaḥ || ### [2.2.27.4](https://indike.org/pramana/in.purana.siva*complete-2.2.2.27.4) pailaḥ parāśaro gargo bhārgavaḥ kakubhaḥ sitaḥ | sumantutrikakaṅkāśca vaiśampāyana eva ca || ### [2.2.27.5](https://indike.org/pramana/in.purana.siva*complete-2.2.2.27.5) ete cānye ca bahavo munayo harṣitā yayuḥ | mama putrasya dakṣasya sadārāḥ sasutā makham || ### [2.2.27.6](https://indike.org/pramana/in.purana.siva*complete-2.2.2.27.6) tathā sarve suragaṇā lokapālā mahodayāḥ | tathopanirjarāḥ sarve svopakārabalānvitāḥ || ### [2.2.27.7](https://indike.org/pramana/in.purana.siva*complete-2.2.2.27.7) satyalokātsamānīto nuto'haṃ viśvakārakaḥ | sasutaḥ saparīvāro mūrtavedādisaṃyutaḥ || ### [2.2.27.8](https://indike.org/pramana/in.purana.siva*complete-2.2.2.27.8) vaikuṇṭhācca tathā viṣṇuḥ samprārthya vividhādarāt | sapārṣadaparīvāraḥ samānīto makhaṃ prati || ### [2.2.27.9](https://indike.org/pramana/in.purana.siva*complete-2.2.2.27.9) evamanye samāyātā dakṣayajñaṃ vimohitāḥ | satkṛtāstena dakṣeṇa sarve te hi durātmanā || ### [2.2.27.10](https://indike.org/pramana/in.purana.siva*complete-2.2.2.27.10) bhavanāni mahārhāṇi suprabhāṇi mahānti ca | tvaṣṭrā kṛtāni divyāni tebhyo dattāni tena vai || ### [2.2.27.11](https://indike.org/pramana/in.purana.siva*complete-2.2.2.27.11) teṣu sarveṣu dhiṣṇyeṣu yathāyogyaṃ ca saṃsthitāḥ | sanmānitā arājaṃste sakalā viṣṇunā mayā || ### [2.2.27.12](https://indike.org/pramana/in.purana.siva*complete-2.2.2.27.12) vartamāne mahāyajñe tīrthe kanakhale tadā | ṛtvijaśca kṛtāstena bhṛgvādyāśca tapodhanāḥ || ### [2.2.27.13](https://indike.org/pramana/in.purana.siva*complete-2.2.2.27.13) adhiṣṭhātā svayaṃ viṣṇuḥ saha sarvamarudgaṇaiḥ | ahaṃ tatrābhavaṃ brahmā trayīvidhinidarśakaḥ || ### [2.2.27.14](https://indike.org/pramana/in.purana.siva*complete-2.2.2.27.14) tathaiva sarve dikpālā dvārapālāśca rakṣakāḥ | sāyudhāḥ saparīvārāḥ kutūhalakarāḥ sadā || ### [2.2.27.15](https://indike.org/pramana/in.purana.siva*complete-2.2.2.27.15) upatasthe svayaṃ yajñaḥ surūpastasya cādhvare | sarve mahāmuniśreṣṭhāḥ svayaṃ vedadharābhavan || ### [2.2.27.16](https://indike.org/pramana/in.purana.siva*complete-2.2.2.27.16) tanūnapādapi nijaṃ cakre rūpaṃ sahasraśaḥ | haviṣāṃ grahaṇāyāśu tasmin yajñe mahotsave || ### [2.2.27.17](https://indike.org/pramana/in.purana.siva*complete-2.2.2.27.17) aṣṭāśītisahasrāṇi juhvati saha ṛtvijaḥ | udgātāraścatuḥṣaṣṭisahasrāṇi surarṣayaḥ || ### [2.2.27.18](https://indike.org/pramana/in.purana.siva*complete-2.2.2.27.18) adhvaryavo'tha hotārastāvanto nāradādayaḥ | saptarṣayaḥ samā gāthāḥ kurvanti sma pṛthakpṛthak || ### [2.2.27.19](https://indike.org/pramana/in.purana.siva*complete-2.2.2.27.19) gandharvavidyādharasiddhasaṅghā-nādityasaṅghān sagaṇān sayajñān | saṅkhyāvatānnāgacarān samastān vavre sa dakṣo hi mahādhvare sve || ### [2.2.27.20](https://indike.org/pramana/in.purana.siva*complete-2.2.2.27.20) dvijarṣirājarṣisurarṣisaṅghā nṛpāḥ samitrāḥ sacivāḥ sasainyāḥ | vasupramukhyā gaṇadevatāśca sarve vṛtāstena makhopavettrā || ### [2.2.27.21](https://indike.org/pramana/in.purana.siva*complete-2.2.2.27.21) dīkṣāyuktastadā dakṣaḥ kṛtakautukamaṅgalaḥ | bhāryayā sahito reje kṛtasvastyayano bhṛśam || ### [2.2.27.22](https://indike.org/pramana/in.purana.siva*complete-2.2.2.27.22) tasmin yajñe vṛtaḥ śambhurna dakṣeṇa durātmanā | kapālīti viniścitya tasya yajñārhatā na hi || ### [2.2.27.23](https://indike.org/pramana/in.purana.siva*complete-2.2.2.27.23) kapālibhāryeti satī dayitā svasutāpi ca | nāhūtā yajñaviṣaye dakṣeṇāguṇadarśinā || ### [2.2.27.24](https://indike.org/pramana/in.purana.siva*complete-2.2.2.27.24) evaṃ pravartamāne hi dakṣayajñe mahotsave | svakāryalagnāstatrāsan sarve te'dhvarasammatāḥ || ### [2.2.27.25](https://indike.org/pramana/in.purana.siva*complete-2.2.2.27.25) etasminnantare'dṛṣṭvā tatra vai śaṅkaraṃ prabhum | prodvignamānasaḥ śaivo dadhīco vākyamabravīt || ### [2.2.27.26](https://indike.org/pramana/in.purana.siva*complete-2.2.2.27.26) dadhīca uvāca | sarve śṛṇuta madvākyaṃ devarṣipramukhā mudā | kasmānnaivāgataḥ śambhurasmin yajñe mahotsave || ### [2.2.27.27](https://indike.org/pramana/in.purana.siva*complete-2.2.2.27.27) ete sureśā munayo mahattarāḥ salokapālāśca samāgatā hi | tathāpi yajñastu na śobhate bhṛśaṃ pinākinā tena mahātmanā vinā || ### [2.2.27.28](https://indike.org/pramana/in.purana.siva*complete-2.2.2.27.28) yenaiva sarvāṇyapi maṅgalāni bhavanti śaṃsanti mahāvipaścitaḥ | so'sau na dṛṣṭo'tra pumān purāṇo vṛṣadhvajo nīlagalaḥ pareśaḥ || ### [2.2.27.29](https://indike.org/pramana/in.purana.siva*complete-2.2.2.27.29) amaṅgalānyeva ca maṅgalāni bhavanti yenādhigatāni dakṣa | tripañcakenāpyatha maṅgalāni bhavanti sadyaḥ parataḥ parāṇi || ### [2.2.27.30](https://indike.org/pramana/in.purana.siva*complete-2.2.2.27.30) tasmāttvayaiva kartavyamāhvānaṃ parameśituḥ | tvaritaṃ brahmaṇā vāpi viṣṇunā prabhuviṣṇunā || ### [2.2.27.31](https://indike.org/pramana/in.purana.siva*complete-2.2.2.27.31) indreṇa lokapālaiśca dvijaiḥ siddhaiḥ sahādhunā | sarvathānayanīyo'sau śaṅkaro yajñapūrtaye || ### [2.2.27.32](https://indike.org/pramana/in.purana.siva*complete-2.2.2.27.32) sarvairbhavadbhirgantavyaṃ yatra devo maheśvaraḥ | dākṣāyaṇyā samaṃ śambhumānayadhvaṃ tvarānvitāḥ || ### [2.2.27.33](https://indike.org/pramana/in.purana.siva*complete-2.2.2.27.33) tena sarvaṃ pavitraṃ syācchambhunā paramātmanā | atrāgatena deveśāḥ sāmbena paramātmanā || ### [2.2.27.34](https://indike.org/pramana/in.purana.siva*complete-2.2.2.27.34) yasya smṛtyā ca nāmoktyā samagraṃ sukṛtaṃ bhavet | tasmātsarvaprayatnena hyānetavyo vṛṣadhvajaḥ || ### [2.2.27.35](https://indike.org/pramana/in.purana.siva*complete-2.2.2.27.35) samāgate śaṅkare'tra pāvano hi bhavenmakhaḥ | bhaviṣyatyanyathāpūrṇaḥ satyametad bravīmyaham || ### [2.2.27.36](https://indike.org/pramana/in.purana.siva*complete-2.2.2.27.36) brahmovāca | tasya tadvacanaṃ śrutvā dakṣo roṣasamanvitaḥ | uvāca tvaritaṃ mūḍhaḥ prahasanniva duṣṭadhīḥ || ### [2.2.27.37](https://indike.org/pramana/in.purana.siva*complete-2.2.2.27.37) mūlaṃ viṣṇurdevatānāṃ yatra dharmaḥ sanātanaḥ | samānīto mayā samyak kimūnaṃ yajñakarmaṇi || ### [2.2.27.38](https://indike.org/pramana/in.purana.siva*complete-2.2.2.27.38) yasmin vedāśca yajñāśca karmāṇi vividhāni ca | pratiṣṭhitāni sarvāṇi so'sau viṣṇurihāgataḥ || ### [2.2.27.39](https://indike.org/pramana/in.purana.siva*complete-2.2.2.27.39) satyalokātsamāyāto brahmā lokapitāmahaḥ | vedaiḥ sopaniṣadbhiśca vividhairāgamaiḥ saha || ### [2.2.27.40](https://indike.org/pramana/in.purana.siva*complete-2.2.2.27.40) tathā suragaṇaiḥ sākamāgataḥ surarāṭ svayam | tathā yūyaṃ samāyātā ṛṣayo vītakalmaṣāḥ || ### [2.2.27.41](https://indike.org/pramana/in.purana.siva*complete-2.2.2.27.41) ye ye yajñocitāḥ śāntāḥ pātrabhūtāḥ samāgatāḥ | vedavedārthatattvajñāḥ sarve yūyaṃ dṛḍhavratāḥ || ### [2.2.27.42](https://indike.org/pramana/in.purana.siva*complete-2.2.2.27.42) atraiva ca kimasmākaṃ rudreṇāpi prayojanam | kanyā dattā mayā vipra brahmaṇā noditena hi || ### [2.2.27.43](https://indike.org/pramana/in.purana.siva*complete-2.2.2.27.43) haro'kulīno'sau vipra pitṛmātṛvivarjitaḥ | bhūtapretapiśācānāṃ patireko duratyayaḥ || ### [2.2.27.44](https://indike.org/pramana/in.purana.siva*complete-2.2.2.27.44) ātmasambhāvito mūḍhaḥ stabdho maunī samatsaraḥ | karmaṇyasminna yogyo'sau nānīto hi mayādhunā || ### [2.2.27.45](https://indike.org/pramana/in.purana.siva*complete-2.2.2.27.45) tasmāttvayedṛśaṃ vākyaṃ punarvācyaṃ na hi kvacit | sarvairbhavadbhiḥ kartavyo yajño me saphalo mahān || ### [2.2.27.46](https://indike.org/pramana/in.purana.siva*complete-2.2.2.27.46) brahmovāca | etacchrutvā vacastasya dadhīcirvākyamabravīt | sarveṣāṃ śṛṇvatāṃ devamunīnāṃ sārasaṃyutam || ### [2.2.27.47](https://indike.org/pramana/in.purana.siva*complete-2.2.2.27.47) dadhīca uvāca | ayajño'yaṃ mahājāto vinā tena śivena hi | vināśo'pi viśeṣeṇa hyatra te hi bhaviṣyati || ### [2.2.27.48](https://indike.org/pramana/in.purana.siva*complete-2.2.2.27.48) evamuktvā dadhīco'sāveka eva vinirgataḥ | yajñavāṭācca dakṣasya tvaritaḥ svāśramaṃ yayau || ### [2.2.27.49](https://indike.org/pramana/in.purana.siva*complete-2.2.2.27.49) tato'nye śāṅkarā ye ca mukhyāḥ śivamatānugāḥ | niryayuḥ svāśramān sadyaḥ śāpaṃ dattvā tathaiva ca || ### [2.2.27.50](https://indike.org/pramana/in.purana.siva*complete-2.2.2.27.50) munau vinirgate tasmin makhādanyeṣu duṣṭadhīḥ | śivadrohī munīn dakṣaḥ prahasannidamabravīt || ### [2.2.27.51](https://indike.org/pramana/in.purana.siva*complete-2.2.2.27.51) dakṣa uvāca | gataḥ śivapriyo vipro dadhīco nāma nāmataḥ | anye tathāvidhā ye ca gatāste mama cādhvarāt || ### [2.2.27.52](https://indike.org/pramana/in.purana.siva*complete-2.2.2.27.52) etacchubhataraṃ jātaṃ sammataṃ me hi sarvathā | satyaṃ bravīmi deveśa surāśca munayastathā || ### [2.2.27.53](https://indike.org/pramana/in.purana.siva*complete-2.2.2.27.53) vinaṣṭacittā mandāśca mithyāvādaratāḥ khalāḥ | vedabāhyā durācārāḥ tyājyāste makhakarmaṇi || ### [2.2.27.54](https://indike.org/pramana/in.purana.siva*complete-2.2.2.27.54) vedavādaratā yūyaṃ sarve viṣṇupurogamāḥ | yajñaṃ me saphalaṃ viprāḥ surāḥ kurvantu māciram || ### [2.2.27.55](https://indike.org/pramana/in.purana.siva*complete-2.2.2.27.55) brahmovāca | ityākarṇya vacastasya śivamāyāvimohitāḥ | tanmakhe devayajanaṃ cakruḥ sarve surarṣayaḥ || ### [2.2.27.56](https://indike.org/pramana/in.purana.siva*complete-2.2.2.27.56) iti tanmakhaśāpo hi varṇito me munīśvara | yajñavidhvaṃsayogo'pi procyate śṛṇu sādaram || ### [2.2.27.56.c1](https://indike.org/pramana/in.purana.siva*complete-2.2.2.27.56.c1) iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe yajñaprārambho nāma saptaviṃśo'dhyāyaḥ || ### [2.2.27.56.p2](https://indike.org/pramana/in.purana.siva*complete-2.2.2.27.56.p2) śrīgaṇeśāya namaḥ || ### [2.2.27.56.p3](https://indike.org/pramana/in.purana.siva*complete-2.2.2.27.56.p3) śrīgaurīśaṅkarābhyāṃ namaḥ || ### [2.2.27.56.p4](https://indike.org/pramana/in.purana.siva*complete-2.2.2.27.56.p4) śrīśivamahāpurāṇam || ### [2.2.27.56.p5](https://indike.org/pramana/in.purana.siva*complete-2.2.2.27.56.p5) dvitīyāyāṃ rudrasaṃhitāyāṃ dvitīyaḥ satīkhaṇḍe ## Linked texts (3) - [Skandamahāpurāṇa (vulgate)](https://indike.org/pramana/in.purana.skanda*vulgate.1.3.1.1) — Sanskrit - [Kālikāpurāṇa](https://indike.org/pramana/in.purana.upa.sakta.kalika.2.383) — Sanskrit - [Vaiṣṇavakhaṇḍa](https://indike.org/pramana/in.purana.vaisnavakhanda.6.1) — Sanskrit --- Source: [https://indike.org/pramana/in.purana.siva*complete-2.2.2.27](https://indike.org/pramana/in.purana.siva*complete-2.2.2.27) · Pramāṇa