Shivapurana 2.2.28: aṣṭāviṃśo'dhyāyaḥ | satīyātrāvarṇanam
Śivapurāṇa (complete text) 2.2.28
- Language
- Sanskrit
Contents
- 2.2.28.43 — 5 parts
aṣṭāviṃśo'dhyāyaḥ | satīyātrāvarṇanam
2.2.28.1
brahmovāca |
yadā yayurdakṣamakhamutsavena surarṣayaḥ |
tasminnevāntare devī parvate gandhamādane ||
2.2.28.2
dhārāgṛhe vitānena sakhībhiḥ parivāritā |
dākṣāyaṇī mahākrīḍāścakāra vividhāḥ satī ||
2.2.28.3
krīḍāsaktā tadā devī dadarśātha mudā satī |
dakṣayajñe prayāntīṃ tāṃ rohiṇyāpṛcchya satvaram ||
2.2.28.4
dṛṣṭvā sīmantayā bhūtāṃ vijayāṃ prāha sā satī |
svasakhīṃ pravarāṃ prāṇapriyāṃ sā hi hitāvahām ||
2.2.28.5
satyuvāca |
he sakhīpravare prāṇapriye tvaṃ vijaye mama |
kva gamiṣyati candro'yaṃ rohiṇyā pṛccha satvaram ||
2.2.28.6
brahmovāca |
tathoktā vijayā satyā gatvā tatsannidhau drutam |
kva gacchasīti papraccha śaśinaṃ taṃ yathocitam ||
2.2.28.7
vijayoktamathākarṇya svayātrāṃ pūrvamādarāt |
kathitaṃ tena tatsarvaṃ dakṣayajñotsavādikam ||
2.2.28.8
tacchrutvā vijayā devīṃ tvaritā jātasambhramā |
kathayāmāsa tatsarvaṃ yaduktaṃ śaśinā satīm ||
2.2.28.9
tacchrutvā kālikā devī vismitābhūtsatī tadā |
vimṛśya kāraṇaṃ tatrājñātvā cetasyacintayat ||
2.2.28.10
dakṣaḥ pitā me mātā ca vīriṇī nau kutaḥ satī |
āhvānaṃ na karoti sma vismṛtā māṃ priyāṃ sutām ||
2.2.28.11
pṛccheyaṃ śaṅkaraṃ tatra kāraṇaṃ sarvamādarāt |
cintayitveti sāsīdvai tatra gantuṃ suniścayā ||
2.2.28.12
atha dākṣāyaṇī devī vijayāṃ pravarāṃ sakhīm |
sthāpayitvā drutaṃ tatra samagacchacchivāntikam ||
2.2.28.13
dadarśa taṃ sabhāmadhye saṃsthitaṃ bahubhirgaṇaiḥ |
nandyādibhirmahāvīraiḥ pravarairyūthayūthapaiḥ ||
2.2.28.14
dṛṣṭvā taṃ prabhumīśānaṃ svapatiṃ sātha dakṣajā |
praṣṭuṃ tatkāraṇaṃ śīghraṃ prāpa śaṅkarasannidhim ||
2.2.28.15
śivena sthāpitā svāṅke prītiyuktena svapriyā |
pramoditā vacobhiḥ sā bahumānapuraḥsaram ||
2.2.28.16
atha śambhurmahālīlaḥ sarveśaḥ sukhadaḥ satām |
satīmuvāca tvaritaṃ gaṇamadhyastha ādarāt ||
2.2.28.17
śambhuruvāca |
kimarthamāgatātra tvaṃ sabhāmadhye savismayā |
kāraṇaṃ tasya suprītyā śīghraṃ vada sumadhyame ||
2.2.28.18
brahmovāca |
evamuktā tadā tena maheśena munīśvara |
sāñjaliḥ supraṇamyāśu satyuvāca prabhuṃ śivā ||
2.2.28.19
satyuvāca |
piturmama mahān yajño bhavatīti mayā śrutam |
tatrotsavo mahānasti samavetāḥ surarṣayaḥ ||
2.2.28.20
piturmama mahāyajñe kasmāttava na rocate |
gamanaṃ devadeveśa tatsarvaṃ kathaya prabho ||
2.2.28.21
suhṛdāmeṣa vai dharmaḥ suhṛdbhiḥ saha saṅgatiḥ |
kurvanti yanmahādeva suhṛdaḥ prītivardhinīm ||
2.2.28.22
tasmātsarvaprayatnena mayā gaccha saha prabho |
yajñavāṭaṃ piturme'dya svāmin prārthanayā mama ||
2.2.28.23
brahmovāca |
tasyāstadvacanaṃ śrutvā satyā devo maheśvaraḥ |
dakṣavāgiṣuhṛdviddho babhāṣe sūnṛtaṃ vacaḥ ||
2.2.28.24
maheśvara uvāca |
dakṣastava pitā devi mama drohī viśeṣataḥ ||
2.2.28.25
yasya ye māninaḥ sarve sasurarṣimukhāḥ pare |
te mūḍhā yajanaṃ prāptāḥ pituste jñānavarjitāḥ ||
2.2.28.26
anāhūtāśca ye devi gacchanti paramandiram |
avamānaṃ prāpnuvanti maraṇādadhikaṃ tathā ||
2.2.28.27
parālayaṃ gato'pīndro laghurbhavati tadvidhaḥ |
kā kathā ca pareṣāṃ vai rīḍhā yātrā hi tadvidhā ||
2.2.28.28
tasmāttvayā mayā cāpi dakṣasya yajanaṃ prati |
na gantavyaṃ viśeṣeṇa satyamuktaṃ mayā priye ||
2.2.28.29
tathāribhirna vyathate hyardito'pi śarairjanaḥ |
svānāṃ duruktibhirmarmatāḍitaḥ sa yathā mataḥ ||
2.2.28.30
vidyādibhirguṇaiḥ ṣaḍbhirasadanyaiḥ satāṃ smṛtau |
hatāyāṃ bhūyasāṃ dhāma na paśyanti khalāḥ priye ||
2.2.28.31
brahmovāca |
evamuktā satī tena maheśena mahātmanā |
uvāca roṣasaṃyuktā śivaṃ vākyavidāṃ varam ||
2.2.28.32
satyuvāca |
yajñaḥsyātsaphalo yena sa tvaṃ śambho'khileśvara |
anāhūto'si tenādya pitrā me duṣṭakāriṇā ||
2.2.28.33
tatsarvaṃ jñātumicchāmi bhava bhāvaṃ durātmanaḥ |
surarṣīṇāṃ ca sarveṣāmāgatānāṃ durātmanām ||
2.2.28.34
tasmāccādyaiva gacchāmi svapituryajanaṃ prabho |
anujñāṃ dehi me nātha tatra gantuṃ maheśvara ||
2.2.28.35
brahmovāca |
ityukto bhagavān rudrastayā devyā śivaḥ svayam |
vijñātākhiladṛk draṣṭā satīṃ sūtikaro'bravīt ||
2.2.28.36
śiva uvāca |
yadyevaṃ te rucirdevi tatra gantumavaśyakam |
suvrate vacanānme tvaṃ gaccha śīghraṃ piturmakham ||
2.2.28.37
etaṃ nandinamāruhya vṛṣabhaṃ sajjamādarāt |
mahārājopacārāṇi kṛtvā bahuguṇānvitā ||
2.2.28.38
bhūṣitaṃ vṛṣamārohetyuktā rudreṇa sā satī |
subhūṣitā satī yuktā hyagamatpitṛmandiram ||
2.2.28.39
mahārājopacārāṇi dattāni paramātmanā |
succhatracāmarādīni sadvastrābharaṇāni ca ||
2.2.28.40
gaṇāḥ ṣaṣṭisahasrāṇi raudrā jagmuḥ śivājñayā |
kutūhalayutāḥ prītā mahotsavasamanvitāḥ ||
2.2.28.41
tadotsavo mahānāsīdyajane tatra sarvataḥ |
satyāḥ śivapriyāyāstu vāmadevagaṇaiḥ kṛtaḥ ||
2.2.28.42
kutūhalaṃ gaṇāścakruḥ śivayoryaśa ujjaguḥ |
balātte pupluvuḥ prītyā mahāvīrāḥ śivapriyāḥ ||
2.2.28.43
sarvathāsīnmahāśobhā gamane jagadambike |
sukhārāvaḥ sambabhūva pūritaṃ bhuvanatrayam ||
2.2.28.43.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe satīyātrāvarṇanaṃ nāmāṣṭaviṃśo'dhyāyaḥ ||
2.2.28.43.p2
śrīgaṇeśāya namaḥ ||
2.2.28.43.p3
śrīgaurīśaṅkarābhyāṃ namaḥ ||
2.2.28.43.p4
śrīśivamahāpurāṇam ||
2.2.28.43.p5
dvitīyāyāṃ rudrasaṃhitāyāṃ dvitīyaḥ satīkhaṇḍe
Linked texts (1)
- Skandamahāpurāṇa (vulgate) — Sanskrit