Shivapurana 2.2.30: triṃśo'dhyāyaḥ | satīdehatyāgopadravavarṇanam
Śivapurāṇa (complete text) 2.2.30
- Language
- Sanskrit
Contents
- 2.2.30.31 — 5 parts
triṃśo'dhyāyaḥ | satīdehatyāgopadravavarṇanam
2.2.30.1
nārada uvāca |
maunībhūtā yadā sāsītsatī śaṅkaravallabhā |
caritraṃ kimabhūttatra vidhe tadvada cādarāt ||
2.2.30.2
brahmovāca |
maunībhūtā satī devī smṛtvā svapatimādarāt |
kṣitāvudīcyāṃ sahasā niṣasāda praśāntadhīḥ ||
2.2.30.3
jalamācamya vidhivat saṃvṛtā vāsasā śuciḥ |
dṛṅ nimīlya patiṃ smṛtvā yogamārgaṃ samāviśat ||
2.2.30.4
kṛtvā samānāvanilau prāṇāpānau sitānanā |
utthāpyodānamatha ca yatnātsā nābhicakrataḥ ||
2.2.30.5
hṛdi sthāpyorasi dhiyā sthitaṃ kaṇṭhād bhruvoḥ satī |
aninditānayanmadhyaṃ śaṅkaraprāṇavallabhā ||
2.2.30.6
evaṃ svadehaṃ sahasā dakṣakopājjihāsatī |
dagdhe gātre vāyuśucirdhāritaṃ yogamārgataḥ ||
2.2.30.7
tataḥ svabhartuścaraṇaṃ cintayantī na cāparam |
apaśyatsā satī tatra yogamārganiviṣṭadhīḥ ||
2.2.30.8
hatakalmaṣataddehaḥ prāpatacca tadagninā |
bhasmasādabhavatsadyo muniśreṣṭha tadicchayā ||
2.2.30.9
tatpaśyatāṃ ca khe bhūmau vādo'bhūtsumahāṃstadā |
hāheti so'dbhutaścitraḥ surādīnāṃ bhayāvahaḥ ||
2.2.30.10
hanta priyā parā śambhordevī daivatamasya hi |
jahāvasūn satī kena suduṣṭena prakopitā ||
2.2.30.11
aho tvanātmyaṃ sumahadasya dakṣasya paśyata |
carācaraṃ prajā yasya yatputrasya prajāpateḥ ||
2.2.30.12
aho'dya vimanābhūtsā satī devī manasvinī |
vṛṣadhvajapriyābhīkṣṇaṃ mānayogyā satāṃ sadā ||
2.2.30.13
so'yaṃ durmarṣahṛdayo brahmadhruk sa prajāpatiḥ |
mahatīmapakīrtiṃ hi prāpsyati tvakhile bhave ||
2.2.30.14
yatsvāṅgajāṃ sutāṃ śambhudviṭ nyaṣedhatsamudyatām |
mahānarakabhogī sa mṛtaye no'parādhataḥ ||
2.2.30.15
vadatyevaṃ jane satyā dṛṣṭvāsutyāgamadbhutam |
drutaṃ tatpārṣadāḥ krodhādudatiṣṭhannudāyudhāḥ ||
2.2.30.16
dvāri sthitā gaṇāḥ sarve rasāyutamitā ruṣā |
śaṅkarasya prabhāvātte'krudhyannatimahābalāḥ ||
2.2.30.17
hāhākāramakurvaṃste dhig dhig no neti vādinaḥ |
uccaiḥ sarve'sakṛdvīrāḥ śaṅkarasya gaṇādhipāḥ ||
2.2.30.18
hāhākāreṇa mahatā vyāptamāsīddigantaram |
sarve prāpan bhayaṃ devā munayo'nye'pi te sthitāḥ ||
2.2.30.19
gaṇāḥ sammantrya te sarve'bhūvan kruddhā udāyudhāḥ |
kurvantaḥ pralayaṃ vādyaiḥ śastrairvyāptaṃ digantaram ||
2.2.30.20
śastrairaghnannijāṅgāni kecittatra śucākulāḥ |
śiromukhāni devarṣe sutīkṣṇaiḥ prāṇanāśibhiḥ ||
2.2.30.21
itthaṃ te vilayaṃ prāptā dākṣāyaṇyāḥ samaṃ tadā |
gaṇāyute dve ca tadā tadadbhutamivābhavat ||
2.2.30.22
gaṇā nāśāvaśiṣṭā ye śaṅkarasya mahātmanaḥ |
dakṣaṃ taṃ krodhitaṃ hantumudatiṣṭhannudāyudhāḥ ||
2.2.30.23
teṣāmāpatatāṃ vegaṃ niśamya bhagavān bhṛguḥ |
yajñaghnaghnena yajuṣā dakṣiṇāgnau juhonmune ||
2.2.30.24
hūyamāne ca bhṛguṇā samutpeturmahāsurāḥ |
ṛbhavo nāma prabalā vīrāstatra sahasraśaḥ ||
2.2.30.25
tairalātāyudhaistatra pramathānāṃ munīśvara |
abhūdyuddhaṃ suvikaṭaṃ śṛṇvatāṃ romaharṣaṇam ||
2.2.30.26
ṛbhubhistairmahāvīrairhanyamānāḥ samantataḥ |
ayatnayānāḥ pramathā uśadbhirbrahmatejasā ||
2.2.30.27
evaṃ śivagaṇāste vai hatā vidrāvitā drutam |
śivecchayā mahāśaktyā tadadbhutamivābhavat ||
2.2.30.28
tad dṛṣṭvā ṛṣayo devāḥ śakrādyāḥ samarudgaṇāḥ |
viśve'śvinau lokapālāstūṣṇīṃ bhūtāstadābhavan ||
2.2.30.29
kecidviṣṇuṃ prabhuṃ tatra prārthayantaḥ samantataḥ |
udvignā mantrayantaśca vighnābhāvaṃ muhurmuhuḥ ||
2.2.30.30
suvicāryodarkaphalaṃ mahodvignāḥ subuddhayaḥ |
suraviṣṇvādayo'bhūvaṃstannāśādrāvaṇānmuhuḥ ||
2.2.30.31
evambhūtastadā yajño vighno jāto durātmanaḥ |
brahmabandhośca dakṣasya śaṅkaradrohiṇo mune ||
2.2.30.31.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe satyupākhyāne satīdehatyāgopadravavarṇanaṃ nāma triṃśo'dhyāyaḥ ||
2.2.30.31.p2
śrīgaṇeśāya namaḥ ||
2.2.30.31.p3
śrīgaurīśaṅkarābhyāṃ namaḥ ||
2.2.30.31.p4
śrīśivamahāpurāṇam ||
2.2.30.31.p5
dvitīyāyāṃ rudrasaṃhitāyāṃ dvitīyaḥ satīkhaṇḍe
Linked texts (2)
- Skandamahāpurāṇa (vulgate) — Sanskrit
- Bhāgavatapurāṇa — Vyāsa, Sanskrit