Shivapurana 2.2.31: ekatriṃśo'dhyāyaḥ | ākāśavāṇī
Śivapurāṇa (complete text) 2.2.31
- Language
- Sanskrit
Contents
ekatriṃśo'dhyāyaḥ | ākāśavāṇī
2.2.31.1
brahmovāca |
etasminnantare tatra nabhovāṇī munīśvara |
avocacchṛṇvatāṃ dakṣasurādīnāṃ yathārthataḥ ||
2.2.31.2
vyomavāṇyuvāca |
re re dakṣa durācāra dambhācāraparāyaṇa |
kiṃ kṛtaṃ te mahāmūḍha karma cānarthakārakam ||
2.2.31.3
na kṛtaṃ śaivarājasya dadhīcervacanasya hi |
pramāṇaṃ tatkṛte mūḍha sarvānandakaraṃ śubham ||
2.2.31.4
nirgataste makhādvipraḥ śāpaṃ dattvā suduḥsaham |
tato'pi buddhaṃ kiñcinno tvayā mūḍhena cetasi ||
2.2.31.5
tataḥ kṛtaḥ kathaṃ no vai svaputryāstvādaraḥ paraḥ |
samāgatāyāḥ satyāśca maṅgalāyā gṛhaṃ svataḥ ||
2.2.31.6
satībhavau nārcitau hi kimidaṃ jñānadurbala |
brahmaputra iti vṛthā garvito'si vimohitaḥ ||
2.2.31.7
sā satyeva sadārādhyā sarvapuṇyaphalapradā |
trilokamātā kalyāṇī śaṅkarārdhāṅgabhāginī ||
2.2.31.8
sā satyevārcitā nityaṃ sarvasaubhāgyadāyinī |
māheśvarī svabhaktānāṃ sarvamaṅgaladāyinī ||
2.2.31.9
sā satyevārcitā nityaṃ saṃsārabhayanāśinī |
mano'bhīṣṭapradā devī sarvopadravahāriṇī ||
2.2.31.10
sā satyevārcitā nityaṃ kīrtisampatpradāyinī |
paramā parameśānī bhuktimuktipradāyinī ||
2.2.31.11
sā satyeva jagaddhātrī jagadrakṣaṇakāriṇī |
anādiśaktiḥ kalpānte jagatsaṃhārakāriṇī ||
2.2.31.12
sā satyeva jaganmātā viṣṇumātā vilāsinī |
brahmendracandravahnyarkadevādijananī smṛtā ||
2.2.31.13
sā satyeva tapodharmadānādiphaladāyinī |
śambhuśaktirmahādevī duṣṭahantrī parātparā ||
2.2.31.14
īdṛgvidhā satī devī yasya patnī sadā priyā |
tasyai bhāgo na dattaste mūḍhena kuvicāriṇā ||
2.2.31.15
śambhurhi parameśānaḥ sarvasvāmī parātparaḥ |
viṣṇubrahmādisaṃsevyaḥ sarvakalyāṇakārakaḥ ||
2.2.31.16
tapyate hi tapaḥ siddhairetaddarśanakāṅkṣibhiḥ |
yujyate yogibhiryogairetaddarśanakāṅkṣibhiḥ ||
2.2.31.17
anantadhanadhānyānāṃ yāgādīnāṃ tathaiva ca |
darśanaṃ śaṅkarasyaiva mahatphalamudāhṛtam ||
2.2.31.18
śiva eva jagaddhātā sarvavidyāpatiḥ prabhuḥ |
ādividyāvarasvāmī sarvamaṅgalamaṅgalaḥ ||
2.2.31.19
tacchakterna kṛto yasmātsatkaro'dya tvayā khala |
ata evādhvarasyāsya vināśo hi bhaviṣyati ||
2.2.31.20
amaṅgalaṃ bhavatyeva pūjārhāṇāmapūjayā |
pūjyamānā ca nāsau hi yataḥ pūjyatamā śivā ||
2.2.31.21
sahasreṇāpi śirasāṃ śeṣo yatpādajaṃ rajaḥ |
vahatyaharahaḥ prītyā tasya śaktiḥ śivā satī ||
2.2.31.22
yatpādapadmamaniśaṃ dhyātvā sampūjya sādaram |
viṣṇurviṣṇutvamāpannastasya śambhoḥ priyā satī ||
2.2.31.23
yatpādapadmamaniśaṃ dhyātvā sampūjya sādaram |
brahmā brahmatvamāpannastasya śambhoḥ priyā satī ||
2.2.31.24
yatpādapadmamaniśaṃ dhyātvā sampūjya sādaram |
indrādayo lokapālāḥ prāpuḥ svaṃ svaṃ paraṃ padam ||
2.2.31.25
jagatpitā śivaḥ śaktirjaganmātā ca sā satī |
satkṛtau na tvayā mūḍha kathaṃ śreyo bhaviṣyati ||
2.2.31.26
daurbhāgyaṃ tvayi saṅkrāntaṃ saṅkrāntāstvayi cāpadaḥ |
yau cānārādhitau bhaktyā bhavānīśaṅkarau ca tau ||
2.2.31.27
anabhyarcya śivaṃ śambhuṃ kalyāṇaṃ prāpnuyāmiti |
kimasti garvo durvāraḥ sa garvo'dya vinaśyati ||
2.2.31.28
sarveśavimukho bhūtvā deveṣveteṣu kastava |
kariṣyati sahāyaṃ taṃ na te paśyāmi sarvathā ||
2.2.31.29
yadi devāḥ kariṣyanti sāhāyyamadhunā tava |
tadā nāśaṃ samāpsyanti śalabhā iva vahninā ||
2.2.31.30
jvalatvadya mukhaṃ te vai yajñadhvaṃso bhavatviti |
sahāyāstava yāvantaste jvalantvadya satvaram ||
2.2.31.31
amarāṇāṃ ca sarveṣāṃ śapatho'maṅgalāya te |
kariṣyantyadya sāhāyyaṃ yadetasya durātmanaḥ ||
2.2.31.32
nirgacchantvamarāḥ svokametadadhvaramaṇḍapāt |
anyathā bhavato nāśo bhaviṣyatyadya sarvathā ||
2.2.31.33
nirgacchantvapare sarve munināgādayo makhāt |
anyathā bhavatāṃ nāśo bhaviṣyatyadya sarvathā ||
2.2.31.34
nirgaccha tvaṃ hare śīghrametadadhvaramaṇḍapāt |
anyathā bhavato nāśo bhaviṣyatyadya sarvathā ||
2.2.31.35
nirgaccha tvaṃ vidhe śīghrametadadhvaramaṇḍapāt |
anyathā bhavato nāśo bhaviṣyatyadya sarvathā ||
2.2.31.35.p1
brahmovāca |
ityuktvādhvaraśālāyāmakhilāyāṃ susaṃsthitān ||
2.2.31.36
vyaramatsā nabhovāṇī sarvakalyāṇakāriṇī ||
2.2.31.37
tacchrutvā vyomavacanaṃ sarve haryādayaḥ surāḥ |
akārṣurvismayaṃ tāta munayaśca tathāpare ||
2.2.31.37.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe satyupākhyāne nabhovāṇīvarṇanaṃ nāmaikatriṃśo'dhyāyaḥ ||
2.2.31.37.p2
śrīgaṇeśāya namaḥ ||
2.2.31.37.p3
śrīgaurīśaṅkarābhyāṃ namaḥ ||
2.2.31.37.p4
śrīśivamahāpurāṇam ||
2.2.31.37.p5
dvitīyāyāṃ rudrasaṃhitāyāṃ dvitīyaḥ satīkhaṇḍe