Shivapurana 2.2.32: dvātriṃśo'dhyāyaḥ | vīrabhadrotpattiḥ śivopadeśaśca
Śivapurāṇa (complete text) 2.2.32
- Language
- Sanskrit
Contents
- 2.2.32.59 — 5 parts
dvātriṃśo'dhyāyaḥ | vīrabhadrotpattiḥ śivopadeśaśca
2.2.32.1
nārada uvāca |
śrutvā vyomagiraṃ dakṣaḥ kimakārṣīttadābudhaḥ |
anye ca kṛtavantaḥ kiṃ tataśca kimabhūd vada ||
2.2.32.2
parājitāḥ śivagaṇā bhṛgumantrabalena vai |
kimakārṣuḥ kutra gatāstattvaṃ vada mahāmate ||
2.2.32.3
brahmovāca |
śrutvā vyomagiraṃ sarve vismitāśca surādayaḥ |
nāvocatkiñcidapi te tiṣṭhantastu vimohitāḥ ||
2.2.32.4
palāyamānā ye vīrā bhṛgumantrabalena te |
avaśiṣṭāḥ śivagaṇāḥ śivaṃ śaraṇamāyayuḥ ||
2.2.32.5
sarvaṃ nivedayāmāsū rudrāyāmitatejase |
caritraṃ ca tathābhūtaṃ supraṇamyādarācca te ||
2.2.32.6
gaṇā ūcuḥ |
devadeva mahādeva pāhi naḥ śaraṇāgatān |
saṃśṛṇvādarato nātha satīvārtāṃ ca vistarāt ||
2.2.32.7
garvitena maheśāna dakṣeṇa sudurātmanā |
apamānaḥ kṛtaḥ satyānādaro nirjaraistathā ||
2.2.32.8
tubhyaṃ bhāgamadānno sa devebhyaśca pradattavān |
durvacāṃsyavadatproccairduṣṭo dakṣaḥ sugarvitaḥ ||
2.2.32.9
tato dṛṣṭvā na te bhāgaṃ yajñe'kupyatsatī prabho |
vinindya bahuśastātamadhākṣītsvatanuṃ tadā ||
2.2.32.10
gaṇāstvayutasaṅkhyākā mṛtāstatra vilajjayā |
svāṅgānyācchidya śastraiśca krudhyāma hyapare vayam ||
2.2.32.11
tadyajñaṃ dhvaṃsituṃ vegātsannaddhāstu bhayāvahāḥ |
tiraskṛtā hi bhṛguṇā svaprabhāvādvirodhinā ||
2.2.32.12
te vayaṃ śaraṇaṃ prāptāstava viśvambhara prabho |
nirbhayān kuru nastasmād dayamāna bhavādbhayāt ||
2.2.32.13
apamānaṃ viśeṣeṇa tasmin yajñe mahāprabho |
dakṣādyāste'khilā duṣṭā akurvan garvitā ati ||
2.2.32.14
ityuktaṃ nikhilaṃ vṛttaṃ sveṣāṃ satyāśca śaṅkara |
teṣāṃ ca mūḍhabuddhīnāṃ yathecchasi tathā kuru ||
2.2.32.15
brahmovāca |
ityākarṇya vacastasya svagaṇānāṃ vacaḥ prabhuḥ |
sasmāra nāradaṃ sarvaṃ jñātuṃ taccaritaṃ laghu ||
2.2.32.16
āgatastvaṃ drutaṃ tatra devarṣe divyadarśanaḥ |
praṇamya śaṅkaraṃ bhaktyā sāñjalistatra tasthivān ||
2.2.32.17
tvāṃ praśasyātha sa svāmī satyā vārtāṃ ca pṛṣṭavān |
dakṣayajñagatāyā vai paraṃ ca caritaṃ tathā ||
2.2.32.18
pṛṣṭena śambhunā tāta tvayāśveva śivātmanā |
tatsarvaṃ kathitaṃ vṛttaṃ jātaṃ dakṣādhvare hi yat ||
2.2.32.19
tadākarṇyeśvaro vākyaṃ mune tat tvanmukhoditam |
cukopātidrutaṃ rudro mahāraudraparākramaḥ ||
2.2.32.20
utpāṭyaikāṃ jaṭāṃ rudro lokasaṃhārakārakaḥ |
āsphālayāmāsa ruṣā parvatasya tadopari ||
2.2.32.21
todanācca dvidhā bhūtā sā jaṭā ca mune prabhoḥ |
sambabhūva mahārāvo mahāpralayabhīṣaṇaḥ ||
2.2.32.22
tajjaṭāyāḥ samudbhūto vīrabhadro mahābalaḥ |
pūrvabhāgena devarṣe mahābhīmo gaṇāgraṇīḥ ||
2.2.32.23
sa bhūmiṃ viśvato vṛtya cātyatiṣṭhaddaśāṅgulam |
pralayānalasaṅkāśaḥ pronnato doḥsahasravān ||
2.2.32.24
kopaniḥśvāsatastatra mahārudrasya ceśituḥ |
jātaṃ jvarāṇāṃ śatakaṃ sannipātāstrayodaśa ||
2.2.32.25
mahākālī samutpannā tajjaṭāparabhāgataḥ |
mahābhayaṅkarā tāta bhūtakoṭibhirāvṛtā ||
2.2.32.26
sarve mūrtidharāḥ krūrāḥ jvarā lokabhayaṅkarāḥ |
svatejasā prajvalanto dahanta iva sarvataḥ ||
2.2.32.27
atha vīro vīrabhadraḥ praṇamya parameśvaram |
kṛtāñjalipuṭaḥ prāha vākyaṃ vākyaviśāradaḥ ||
2.2.32.28
vīrabhadra uvāca |
mahārudra mahāraudra somasūryāgnilocana |
kiṃ kartavyaṃ mayā kāryaṃ śīghramājñāpaya prabho ||
2.2.32.29
śoṣaṇīyāḥ kimīśāna kṣaṇārdhenaiva sindhavaḥ |
peṣaṇīyāḥ kimīśāna kṣaṇārdhenaiva parvatāḥ ||
2.2.32.30
kṣaṇena bhasmasātkuryāṃ brahmāṇḍamuta kiṃ hara |
kṣaṇena bhasmasātkuryāṃ surānvā kiṃ munīśvarān ||
2.2.32.31
vyāśvāsaḥ sarvalokānāṃ kimu kāryo hi śaṅkara |
kartavyaṃ kimuteśāna sarvaprāṇivihiṃsanam ||
2.2.32.32
mamāśakyaṃ na kutrāpi tvatprasādānmaheśvara |
parākrameṇa mattulyo na bhūto na bhaviṣyati ||
2.2.32.33
yatra yatkāryamuddiśya preṣayiṣyasi māṃ prabho |
tatkāryaṃ sādhayāmyeva satvaraṃ tvatprasādataḥ ||
2.2.32.34
kṣudrāstaranti lokābdhiṃ śāsanācchaṅkarasya te |
harāto'haṃ na kiṃ tartuṃ mahāpatsāgaraṃ kṣamaḥ ||
2.2.32.35
tvatpreṣitatṛṇenāpi mahatkāryamayatnataḥ |
kṣaṇena śakyate kartuṃ śaṅkarātra na saṃśayaḥ ||
2.2.32.36
līlāmātreṇa te śambho kāryaṃ yadyapi sidhyati |
tathāpyahaṃ preṣaṇīyo tavaivānugraho hyayam ||
2.2.32.37
śaktiretādṛśī śambho mamāpi tvadanugrahāt |
vinā śaktirna kasyāpi śaṅkara tvadanugrahāt ||
2.2.32.38
tvadājñayā vinā ko'pi tṛṇādīnapi vastutaḥ |
naiva cālayituṃ śaktaḥ satyametanna saṃśayaḥ ||
2.2.32.39
śambho niyamyāḥ sarve'pi devādyāste maheśvara |
tathaivāhaṃ niyamyaste niyantuḥ sarvadehinām ||
2.2.32.40
praṇato'smi mahādeva bhūyo'pi praṇato'smyaham |
preṣaya sveṣṭasiddhyarthaṃ māmadya hara satvaram ||
2.2.32.41
spando'pi jāyate śambho'savyāṅgānāṃ muhurmuhuḥ |
bhaviṣyatyadya vijayo māmataḥ preṣaya prabho ||
2.2.32.42
harṣotsāhaviśeṣo'pi jāyate mama kaścana |
śambho tvatpādakamale saṃsaktaśca mano mama ||
2.2.32.43
bhaviṣyati pratipadaṃ śubhasantānasantatiḥ ||
2.2.32.44
tasyaiva vijayo nityaṃ tasyaiva śubhamanvaham |
yasya śambhau dṛḍhā bhaktistvayi śobhanasaṃśraye ||
2.2.32.45
brahmovāca |
ityuktaṃ tadvacaḥ śrutvā santuṣṭo maṅgalāpatiḥ |
vīrabhadra jayeti tvaṃ proktāśīḥ prāha taṃ punaḥ ||
2.2.32.46
maheśvara uvāca |
śṛṇu madvacanaṃ tāta vīrabhadra sucetasā |
karaṇīyaṃ prayatnena tad drutaṃ me pratoṣakam ||
2.2.32.47
yāgaṃ kartuṃ samudyukto dakṣo vidhisutaḥ khalaḥ |
madvirodhī viśeṣeṇa mahāgarvo'budho'dhunā ||
2.2.32.48
tanmakhaṃ bhasmasātkṛtvā sayāgaparivārakam |
punarāyāhi matsthānaṃ satvaraṃ gaṇasattama ||
2.2.32.49
surā bhavantu gandharvā yakṣā vānye ca kecana |
tānapyadyaiva sahasā bhasmasātkuru satvaram ||
2.2.32.50
tatrāstu viṣṇurbrahmā vā śacīśo vā yamo'pi vā |
api cādyaiva tānsarvānpātayasva prayatnataḥ ||
2.2.32.51
surā bhavantu gandharvā yakṣā vānye ca kecana |
tānapyadyaiva sahasā bhasmasātkuru satvaram ||
2.2.32.52
dadhīcikṛtamullaṅghya śapathaṃ mayi tatra ye |
tiṣṭhanti te prayatnena jvālanīyāstvayā dhruvam ||
2.2.32.53
pramathāścāgamiṣyanti yadi viṣṇvādayo bhramāt |
nānākarṣaṇamantreṇa jvālayānīya satvaram ||
2.2.32.54
ye tatrollaṅghya śapathaṃ madīyaṃ garvitāḥ sthitāḥ |
te hi maddrohiṇo'tastān jvālayānalamālayā ||
2.2.32.55
sapatnīkānsasārāṃśca dakṣayāgasthalasthitān |
prajvālya bhasmasātkṛtvā punarāyāhi satvaram ||
2.2.32.56
tatra tvayi gate devā viśvādyā api sādaram |
stoṣyanti tvāṃ tadāpyāśu jvālayā jvālayaiva tān ||
2.2.32.57
devānapi kṛtadrohān jvālāmālāsamākulaiḥ |
jvālaya jvalanaiḥ śīghraṃ mādhyāyādhyāyapālakam ||
2.2.32.58
dakṣādīnsakalāṃstatra sapatnīkānsabāndhavān |
prajvālya vīra dakṣaṃ nu salīlaṃ salilaṃ piba ||
2.2.32.59
brahmovāca |
ityuktvā roṣatāmrākṣo vedamaryādapālakaḥ |
virarāma mahāvīraṃ kālāriḥ sakaleśvaraḥ ||
2.2.32.59.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe vīrabhadrotpattiśivopadeśavarṇanaṃ nāma dvātriṃśo'dhyāyaḥ ||
2.2.32.59.p2
śrīgaṇeśāya namaḥ ||
2.2.32.59.p3
śrīgaurīśaṅkarābhyāṃ namaḥ ||
2.2.32.59.p4
śrīśivamahāpurāṇam ||
2.2.32.59.p5
dvitīyāyāṃ rudrasaṃhitāyāṃ dvitīyaḥ satīkhaṇḍe