Shivapurana 2.2.33: trayastriṃśo'dhyāyaḥ | vīrabhadrayātrā
Śivapurāṇa (complete text) 2.2.33
- Language
- Sanskrit
Contents
trayastriṃśo'dhyāyaḥ | vīrabhadrayātrā
2.2.33.1
brahmovāca |
ityuktaṃ śrīmaheśasya śrutvā vacanamādarāt |
vīrabhadro'tisantuṣṭaḥ praṇanāma maheśvaram ||
2.2.33.1.p1
śāsanaṃ śirasā dhṛtvā devadevasya śūlinaḥ |
pracacāla tataḥ śīghraṃ vīrabhadro makhaṃ prati | 2 ||
2.2.33.3
śivo'tha preṣayāmāsa śobhārthaṃ koṭiśo gaṇān |
tena sārdhaṃ mahāvīrānpralayānalasannibhān ||
2.2.33.4
atha te vīrabhadrasya purataḥ prabalā gaṇāḥ |
paścādapi yayurvīrāḥ kutūhalakarā gaṇāḥ ||
2.2.33.5
vīrabhadrasametā ye gaṇāḥ śatasahasraśaḥ |
pārṣadāḥ kālakālasya sarve rudrasvarūpiṇaḥ ||
2.2.33.6
gaṇaiḥ sametaḥ kila tairmahātmā sa vīrabhadro haraveṣabhūṣaṇaḥ |
sahasrabāhurbhujagādhipāḍhyo yayau rathasthaḥ prabalo'tibhīkaraḥ ||
2.2.33.7
nalvānaṃ ca sahasre dve pramāṇaṃ syandanasya hi |
ayutenaiva siṃhānāṃ vāhanānāṃ prayatnataḥ ||
2.2.33.8
tathaiva prabalāḥ siṃhā bahavaḥ pārśvarakṣakāḥ |
śārdūlā makarā matsyā gajāstatra sahasraśaḥ ||
2.2.33.9
vīrabhadre pracalite dakṣanāśāya satvaram |
kalpavṛkṣasamutsṛṣṭā puṣpavṛṣṭirabhūttadā ||
2.2.33.10
tuṣṭuvuśca gaṇā vīraṃ śipiviṣṭe praceṣṭitam |
cakruḥ kutūhalaṃ sarve tasmiṃśca gamanotsave ||
2.2.33.11
kālī kātyāyanīśānī cāmuṇḍā muṇḍamardinī |
bhadrakālī tathā bhadrā tvaritā vaiṣṇavī tathā ||
2.2.33.11.p1
etābhirnavadurgābhirmahākālī samanvitā |
yayau dakṣavināśāya sarvabhūtagaṇaiḥ saha | 12 ||
2.2.33.13
ḍākinī śākinī caiva bhūtapramathaguhyakāḥ |
kūṣmāṇḍāḥ parpaṭāścaiva caṭakā brahmarākṣasāḥ ||
2.2.33.14
bhairavāḥ kṣetrapālāśca dakṣayajñavināśakāḥ |
niryayustvaritaṃ vīrāḥ śivājñāpratipālakāḥ ||
2.2.33.15
tathaiva yoginīcakraṃ catuḥṣaṣṭigaṇānvitam |
niryayau sahasā kruddhaṃ dakṣayajñaṃ vināśitum ||
2.2.33.16
teṣāṃ gaṇānāṃ sarveṣāṃ saṅkhyānaṃ śṛṇu nārada |
mahābalavatāṃ saṅgho mukhyānāṃ dhairyaśālinām ||
2.2.33.17
abhyayācchaṅkukarṇaśca daśakoṭyā gaṇeśvaraḥ |
daśabhiḥ kekarākṣaśca vikṛto'ṣṭābhireva ca ||
2.2.33.18
catuḥṣaṣṭyā viśākhaśca navabhiḥ pāriyātrikaḥ |
ṣaḍbhiḥ sarvāṅkako vīrastathaiva vikṛtānanaḥ ||
2.2.33.19
jvālakeśo dvādaśabhiḥ koṭibhirgaṇapuṅgavaḥ |
saptabhiḥ samadajjīmān dudrabho'ṣṭābhireva ca ||
2.2.33.20
pañcabhiśca kapālīśaḥ ṣaḍbhiḥ sandārako gaṇaḥ |
koṭikoṭibhireveha koṭikuṇḍastathaiva ca ||
2.2.33.21
viṣṭambho'ṣṭāṣṭabhirvīraiḥ koṭibhirgaṇasattamaḥ |
sahasrakoṭibhistāta sannādaḥ pippalastathā ||
2.2.33.22
āveśanastathāṣṭābhiraṣṭābhiścandratāpanaḥ |
mahāveśaḥ sahasreṇa koṭinā gaṇapo vṛtaḥ ||
2.2.33.23
kuṇḍī dvādaśakoṭībhistathā parvatako mune |
vināśituṃ dakṣayajñaṃ niryayau gaṇasattamaḥ ||
2.2.33.24
kālaśca kālakaścaiva mahākālastathaiva ca |
koṭīnāṃ śatakenaiva dakṣayajñaṃ yayau prati ||
2.2.33.25
agnikṛcchatakoṭyā ca koṭyāgnimukha eva ca |
ādityamūrdhā koṭyā ca tathā caiva ghanāvahaḥ ||
2.2.33.26
sannāhaḥ śatakoṭyā ca koṭyā ca kumudo gaṇaḥ |
amoghaḥ kokilaścaiva koṭikoṭyā gaṇādhipaḥ ||
2.2.33.27
kāṣṭhāgūḍhaścatuḥṣaṣṭyā sukeśo vṛṣabhastathā |
sumantrako gaṇādhīśastathā tāta suniryayau ||
2.2.33.28
kākapādodaraḥ ṣaṣṭikoṭibhirgaṇasattamaḥ |
tathā santānakaḥ ṣaṣṭikoṭibhirgaṇapuṅgavaḥ ||
2.2.33.28.p1
mahābalaśca navabhiḥ koṭibhiḥ puṅgavastathā | 29 ||
2.2.33.30
madhupiṅgastathā tāta gaṇādhīśo hi niryayau |
nīlo navatyā koṭīnāṃ pūrṇabhadrastathaiva ca ||
2.2.33.31
niryayau śatakoṭībhiścaturvaktro gaṇādhipaḥ ||
2.2.33.32
virūpākṣaśca koṭīnāṃ catuḥṣaṣṭyā gaṇeśvaraḥ |
tālaketuḥ ṣaḍāsyaśca pañcāsyaśca gaṇādhipaḥ ||
2.2.33.33
saṃvartakastathā caiva kulīśaśca svayaṃ prabhuḥ |
lokāntakaśca dīptātmā tathā daityāntako mune ||
2.2.33.34
gaṇo bhṛṅgīriṭiḥ śrīmān devadevapriyastathā |
aśanirbhālakaścaiva catuḥṣaṣṭyā sahasrakaḥ ||
2.2.33.35
koṭikoṭisahasrāṇāṃ śatairviṃśatibhirvṛtaḥ |
vīreśo hyabhyayādvīraḥ vīrabhadraḥ śivājñayā ||
2.2.33.36
bhūtakoṭisahasraistu prayayau koṭibhistribhiḥ |
romajaiḥ śvagaṇaiścaiva tathā vīro yayau drutam ||
2.2.33.37
tadā bherīmahānādaḥ śaṅkhāśca vividhasvanāḥ |
jaṭāharo mukhāścaiva śṛṅgāṇi vividhāni ca ||
2.2.33.38
te tāni vitatānyeva bandhanāni sukhāni ca |
vāditrāṇi vineduśca vividhāni mahotsave ||
2.2.33.39
vīrabhadrasya yātrāyāṃ sabalasya mahāmune |
śakunānyabhavaṃstatra bhūrīṇi sukhadāni ca ||
2.2.33.39.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe vīrabhadrayātrāvarṇanaṃ nāma trayastriṃśo'dhyāyaḥ ||
2.2.33.39.p2
śrīgaṇeśāya namaḥ ||
2.2.33.39.p3
śrīgaurīśaṅkarābhyāṃ namaḥ ||
2.2.33.39.p4
śrīśivamahāpurāṇam ||
2.2.33.39.p5
dvitīyā rudrasaṃhitāyāṃ dvitīyaḥ satīkhaṇḍe
Linked texts (1)
- Skandamahāpurāṇa (vulgate) — Sanskrit