Shivapurana 2.2.35: pañcatriṃśo'dhyāyaḥ | viṣṇuvacanam
Śivapurāṇa (complete text) 2.2.35
- Language
- Sanskrit
Contents
- 2.2.35.54 — 5 parts
pañcatriṃśo'dhyāyaḥ | viṣṇuvacanam
2.2.35.1
dakṣa uvāca |
devadeva hare viṣṇo dīnabandho kṛpānidhe |
mama rakṣā vidhātavyā bhavatā sādhvarasya ca ||
2.2.35.2
rakṣakastvaṃ makhasyaiva makhakarmā makhātmakaḥ |
kṛpā vidheyā yajñasya bhaṅgo bhavatu na prabho ||
2.2.35.3
brahmovāca |
itthaṃ bahuvidhāṃ dakṣaḥ kṛtvā vijñaptimādarāt |
papāta pādayostasya bhayavyākulamānasaḥ ||
2.2.35.4
utthāpya taṃ tato viṣṇurdakṣaṃ viklinnamānasam |
śrutvā ca tasya tadvākyaṃ kumaterasmaracchivam ||
2.2.35.5
smṛtvā śivaṃ maheśānaṃ svaprabhuṃ parameśvaram |
avadacchivatattvajño dakṣaṃ sambodhayanhariḥ ||
2.2.35.6
hariruvāca |
śṛṇu dakṣa pravakṣyāmi tattvataḥ śṛṇu me vacaḥ |
sarvathā te hitakaraṃ mahāmantrasukhapradam ||
2.2.35.7
avajñā hi kṛtā dakṣa tvayā tattvamajānatā |
sakalādhīśvarasyaiva śaṅkarasya parātmanaḥ ||
2.2.35.8
īśvarāvajñayā sarvaṃ kāryaṃ bhavati sarvathā |
viphalaṃ kevalaṃ naiva vipattiśca pade pade ||
2.2.35.9
apūjyā yatra pūjyante pūjanīyo na pūjyate |
trīṇi tatra bhaviṣyanti dāridryaṃ maraṇaṃ bhayam ||
2.2.35.10
tasmātsarvaprayatnena mānanīyo vṛṣadhvajaḥ |
amānitānmaheśācca mahadbhayamupasthitam ||
2.2.35.11
adyāpi na vayaṃ sarve prabhavaḥ prabhavāmahe |
bhavato durnayenaiva mayā satyamudīryate ||
2.2.35.12
brahmovāca |
viṣṇostadvacanaṃ śrutvā dakṣaścintāparo'bhavat |
vivarṇavadano bhūtvā tūṣṇīmāsīdbhuvi sthitaḥ ||
2.2.35.13
etasminnantare vīrabhadraḥ sainyasamanvitaḥ |
agacchadadhvaraṃ rudraprerito gaṇanāyakaḥ ||
2.2.35.14
pṛṣṭhe kecitsamāyātā gagane kecidāgatāḥ |
diśaśca vidiśaḥ sarve samāvṛtya tathāpare ||
2.2.35.15
śarvājñayā gaṇāḥ śūrā nirbhayā rudravikramāḥ |
asaṅkhyāḥ siṃhanādānvai kurvanto vīrasattamāḥ ||
2.2.35.16
tena nādena mahatā nāditaṃ bhuvanatrayam |
rajasā cāvṛtaṃ vyoma tamasā cāvṛtā diśaḥ ||
2.2.35.17
saptadvīpānvitā pṛthvī cacālāti bhayākulā |
saśailakānanā tatra cukṣubhuḥ sakalābdhayaḥ ||
2.2.35.18
evambhūtaṃ ca tatsainyaṃ lokakṣayakaraṃ mahat |
dṛṣṭvā ca vismitāḥ sarve babhūvuramarādayaḥ ||
2.2.35.19
sainyodyogamathālokya dakṣaścāsṛṅmukhākulaḥ |
daṇḍavatpatito viṣṇuṃ sakalatro'bhyabhāṣata ||
2.2.35.20
dakṣa uvāca |
bhavadbalenaiva mayā yajñaḥ prārambhito mahān |
satkarmasiddhaye viṣṇo pramāṇaṃ tvaṃ mahāprabho ||
2.2.35.21
viṣṇo tvaṃ karmaṇāṃ sākṣī yajñānāṃ pratipālakaḥ |
dharmasya vedagarbhasya brahmaṇastvaṃ mahāprabho ||
2.2.35.22
tasmādrakṣā vidhātavyā yajñasyāsya mama prabho |
tvadanyaḥ kaḥ samartho'sti yatastvaṃ sakalaprabhuḥ ||
2.2.35.23
brahmovāca |
dakṣasya vacanaṃ śrutvā viṣṇurdīnataraṃ tadā |
avocad bodhayaṃstaṃ vai śivatattvaparāṅmukham ||
2.2.35.24
viṣṇuruvāca |
mayā rakṣā vidhātavyā tava yajñasya dakṣa vai |
khyāto mama paṇaḥ satyo dharmasya paripālanam ||
2.2.35.25
tatsatyaṃ tu tvayoktaṃ hi kiṃ tattasya vyatikramaḥ |
śṛṇu tvaṃ vacmyahaṃ dakṣa krūrabuddhiṃ tyajādhunā ||
2.2.35.26
naimiṣe'nimiṣakṣetre yajjātaṃ vṛttamadbhutam |
tat kiṃ na smaryate dakṣa vismṛtaṃ kiṃ kubuddhinā ||
2.2.35.27
rudrakopācca ko hyatra samartho rakṣaṇe tava |
na yasyābhimataṃ dakṣa yastvāṃ rakṣati durmatiḥ ||
2.2.35.28
kiṃ karma kimakarmeti tanna paśyasi durmate |
samarthaṃ kevalaṃ karma na bhaviṣyati sarvadā ||
2.2.35.29
svakarma viddhi tadyena samarthatvena jāyate |
na tvanyaḥ karmaṇo dātā śaṃ bhavedīśvaraṃ vinā ||
2.2.35.30
īśvarasya ca yo bhaktyā śāntastadgatamānasaḥ |
karmaṇo hi phalaṃ tasya prayacchati tadā śivaḥ ||
2.2.35.31
kevalaṃ jñānamāśritya nirīśvaraparā narāḥ |
nirayaṃ te ca gacchanti kalpakoṭiśatāni ca ||
2.2.35.32
punaḥ karmamayaiḥ pāśairbaddhā janmani janmani |
nirayeṣu prapacyante kevalaṃ karmarūpiṇaḥ ||
2.2.35.33
ayaṃ rudragaṇādhīśo vīrabhadro'rimardanaḥ |
rudrakopāgnisambhūtaḥ samāyāto'dhvarāṅgaṇe ||
2.2.35.34
ayamasmadvināśārthamāgato'sti na saṃśayaḥ |
aśakyamasya nāstyeva kimapyastu tu vastutaḥ ||
2.2.35.35
prajvālyāsmānayaṃ sarvān dhruvameva mahāprabhuḥ |
tataḥ praśāntahṛdayo bhaviṣyati na saṃśayaḥ ||
2.2.35.36
śrīmahādevaśapathaṃ samullaṅghya bhramānmayā |
yataḥ sthitaṃ tataḥ prāpyaṃ mayā duḥkhaṃ tvayā saha ||
2.2.35.37
śaktirmama tu nāstyeva dakṣādyaitannivāraṇe |
śapathollaṅghanādeva śivadrohī yato'smyaham ||
2.2.35.38
kālatraye'pi na yato maheśadrohiṇāṃ sukham |
tato'vaśyaṃ mayā prāptaṃ duḥkhamadya tvayā saha ||
2.2.35.39
sudarśanābhidhaṃ cakrametasminna lagiṣyati |
śaivacakramidaṃ yasmādaśaivalayakāraṇam ||
2.2.35.40
vināpi vīrabhadreṇa nāmaitaccakramaiśvaram |
hatvā gamiṣyatyadhunā satvaraṃ harasannidhau ||
2.2.35.41
śaivaṃ śapathamullaṅghya sthitaṃ māṃ cakramīdṛśam |
asaṃhatyaiva sahasā kṛpayaiva sthiraṃ param ||
2.2.35.42
ataḥ paramidaṃ cakramapi na sthāsyati dhruvam |
gamiṣyatyadhunā śīghraṃ jvālāmālāsamākulam ||
2.2.35.43
vīrabhadraḥ pūjito'pi śīghramasmābhirādarāt |
mahākrodhasamākrānto nāsmān saṃrakṣayiṣyati ||
2.2.35.44
akāṇḍapralayo'smākamāgato'dya hi hā hahā |
hā hā bata tavedānīṃ nāśo'smākamupasthitaḥ ||
2.2.35.45
śaraṇyo'smākamadhunā nāstyeva hi jagattraye |
śaṅkaradrohiṇo loke kaḥ śaraṇyo bhaviṣyati ||
2.2.35.46
tanunāśe'pi samprāpyāstaiścāpi yamayātanāḥ |
tā naiva śakyate soḍhuṃ bahuduḥkhapradāyinīḥ ||
2.2.35.47
śivadrohiṇamālokya daṣṭadanto yamaḥ svayam |
taptatailakaṭāheṣu pātayatyeva nānyathā ||
2.2.35.48
gantumevāhamudyuktaṃḥ sarvathā śapathottaram |
tathāpi na gataḥ śīghraṃ duṣṭasaṃsargapāpataḥ ||
2.2.35.49
yadadya kriyate'smābhiḥ palāyanamitastadā |
śārvo nākarṣakaḥ śastrairasmānākarṣayiṣyati ||
2.2.35.50
svarge vā bhuvi pātāle yatra kutrāpi vā yataḥ |
śrīvīrabhadraśastrāṇāṃ gamanaṃ na hi durlabham ||
2.2.35.51
yāvantaśca gaṇāḥ santi śrīrudrasya triśūlinaḥ |
tāvatāmapi sarveṣāṃ śaktiretādṛśī dhruvam ||
2.2.35.52
śrīkālabhairavaḥ kāśyāṃ nakhāgreṇaiva līlayā |
purā śiraśca ciccheda pañcamaṃ brahmaṇo dhruvam ||
2.2.35.53
etaduktvā sthito viṣṇuratitrastamukhāmbujaḥ |
vīrabhadro'pi samprāpa tadaivādhvaramaṇḍapam ||
2.2.35.54
evaṃ bruvati govinda āgataṃ sainyasāgaram |
vīrabhadreṇa sahitaṃ dadṛśuśca surādayaḥ ||
2.2.35.54.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe satyupākhyāne viṣṇuvākyavarṇanaṃ nāma pañcatriṃśo'dhyāyaḥ ||
2.2.35.54.p2
śrīgaṇeśāya namaḥ ||
2.2.35.54.p3
śrīgaurīśaṅkarābhyāṃ namaḥ ||
2.2.35.54.p4
śrīśivamahāpurāṇam ||
2.2.35.54.p5
dvitīyāyāṃ rudrasaṃhitāyāṃ dvitīyaḥ satīkhaṇḍe
Linked texts (3)
- Haracaritacintāmaṇi — Jayadratha, Sanskrit
- Skandapurāṇa (early; "Ambikākhaṇḍa") (ed. Bakker) — Sanskrit
- Vaiṣṇavakhaṇḍa — Sanskrit