Pramāṇa · Search · About · API

Shivapurana 2.2.38: aṣṭatriṃśo'dhyāyaḥ | kṣuvadadhīcavivādaḥ

Śivapurāṇa (complete text) 2.2.38

Language
Sanskrit

Contents

aṣṭatriṃśo'dhyāyaḥ | kṣuvadadhīcavivādaḥ

2.2.38.1

sūta uvāca |
ityākarṇya vacastasya vidheramitadhīmataḥ |
papraccha nāradaḥ prītyā vismitastaṃ dvijottamaḥ ||

2.2.38.2

nārada uvāca |
śivaṃ vihāya dakṣasya surairyajñaṃ harirgataḥ |
hetunā kena tad brūhi yatrāvajñābhavattataḥ ||

2.2.38.3

jānāti kiṃ sa śambhuṃ no hariḥ pralayavikramam |
raṇaṃ kathaṃ ca kṛtavān tadgaṇairabudho yathā ||

2.2.38.4

eṣa me saṃśayo bhūyāṃstaṃ chindhi karuṇānidhe |
caritaṃ brūhi śambhostu cittotsāhakaraṃ prabho ||

2.2.38.5

brahmovāca |
dvijavarya śṛṇu prītyā caritaṃ śaśimaulinaḥ |
yatpṛcchate kurvataśca sarvasaṃśayahārakam ||

2.2.38.6

dadhīcasya muneḥ śāpād bhraṣṭajñāno hariḥ purā |
sāmaro dakṣayajñaṃ vai gataḥ kṣuvasahāyakṛt ||

2.2.38.7

nārada uvāca |
kimarthaṃ śaptavānviṣṇuṃ dadhīco munisattamaḥ |
ko'pakāraḥ kṛtastasya hariṇā tatsahāyinā ||

2.2.38.8

brahmovāca |
samutpanno mahātejā rājā kṣuva iti smṛtaḥ |
abhūnmitraṃ dadhīcasya munīndrasya mahāprabhoḥ ||

2.2.38.9

cirāttapaḥprasaṅgādvai vādaḥ kṣuvadadhīcayoḥ |
mahānarthakaraḥ khyātastrilokeṣvabhavatpurā ||

2.2.38.10

tatra trivarṇataḥ śreṣṭho vipra eva na saṃśayaḥ |
iti prāha dadhīco hi śivabhaktastu vedavit ||

2.2.38.11

tacchrutvā vacanaṃ tasya dadhīcasya mahāmune |
kṣuvaḥ prāheti nṛpatiḥ śrīmadena vimohitaḥ ||

2.2.38.12

kṣuva uvāca |
aṣṭānāṃ lokapālānāṃ vapurdhārayate nṛpaḥ |
tasmānnṛpo variṣṭho hi varṇāśramapatiḥ prabhuḥ ||

2.2.38.13

sarvadevamayo rājā śrutiḥ prāheti tatparā |
mahatī devatā yā sā so'hameva tato mune ||

2.2.38.14

tasmādviprādvaro rājā cyāvaneya vicāryatām |
nāvamantavya evātaḥ pūjyo'haṃ sarvathā tvayā ||

2.2.38.15

brahmovāca |
śrutvā tathā mataṃ tasya kṣuvasya munisattamaḥ |
śrutismṛtiviruddhaṃ taṃ cukopātīva bhārgavaḥ ||

2.2.38.16

atha kruddho mahātejā gauravāccātmano mune |
atāḍayatkṣuvaṃ mūrdhni dadhīco vāmamuṣṭitaḥ ||

2.2.38.17

vajreṇa taṃ ca ciccheda dadhīcaṃ tāḍitaḥ kṣuvaḥ |
jagarjātīva saṅkruddho brahmāṇḍādhipatiḥ kudhīḥ ||

2.2.38.18

papāta bhūmau nihato tena vajreṇa bhārgavaḥ |
śukraṃ sasmāra kṣuvakṛdbhārgavasya kulandharaḥ ||

2.2.38.19

śukro'tha sandhayāmāsa tāḍitaṃ ca kṣuvena tu |
yogī dadhīcasya tadā dehamāgatya sa drutam ||

2.2.38.20

sandhāya pūrvavaddehaṃ dadhīcasyāha bhārgavaḥ |
śivabhaktāgraṇīrmṛtyañjayavidyāpravartakaḥ ||

2.2.38.21

śukra uvāca |
dadhīca tāta sampūjya śivaṃ sarveśvaraṃ prabhum |
mahāmṛtyuñjayaṃ mantraṃ śrautamagryaṃ vadāmi te ||

2.2.38.22

tryambakaṃ yajāmahe trailokyaṃ pitaraṃ prabhum |
trimaṇḍalasya pitaraṃ triguṇasya maheśvaram ||

2.2.38.23

tritattvasya trivahneśca tridhābhūtasya sarvataḥ |
tridivasya tribāhośca tridhābhūtasya sarvataḥ ||

2.2.38.24

tridevasya mahādevaḥ sugandhiṃ puṣṭivarddhanam |
sarvabhūteṣu sarvatra triguṇeṣu kṛtau yathā ||

2.2.38.25

indriyeṣu tathānyeṣu deveṣu ca gaṇeṣu ca |
puṣpe sugandhivatsūraḥ sugandhiramareśvaraḥ ||

2.2.38.26

puṣṭiśca prakṛteryasmātpuruṣād vai dvijottama |
mahadādiviśeṣāntavikalpaścāpi suvrata ||

2.2.38.27

viṣṇoḥ pitāmahasyāpi munīnāṃ ca mahāmune |
indriyāṇāṃ ca devānāṃ tasmād vai puṣṭivardhanaḥ ||

2.2.38.28

taṃ devamamṛtaṃ rudraṃ karmaṇā tapasāpi vā |
svādhyāyena ca yogena dhyānena ca prajāyate ||

2.2.38.29

satyenānyena sūkṣmāgrānmṛtyupāśādbhavaḥ svayam |
bandhamokṣakaro yasmādurvārukamiva prabhuḥ ||

2.2.38.30

mṛtasañjīvanīmantro mama sarvottamaḥ smṛtaḥ |
evaṃ japaparaḥ prītyā niyamena śivaṃ smaran ||

2.2.38.31

japtvā hutvābhimantryaivaṃ jalaṃ piba divāniśam |
śivasya sannidhau dhyātvā nāsti mṛtyubhayaṃ kvacit ||

2.2.38.32

kṛtvā nyāsādikaṃ sarvaṃ sampūjya vidhivacchivam |
saṃvidhāyedaṃ nirvyagraḥ śaṅkaraṃ bhaktavatsalam ||

2.2.38.33

dhyānamasya pravakṣyāmi yathā dhyātvā japenmanum |
siddhamantro bhaveddhīmān yāvacchambhuprabhāvataḥ ||

2.2.38.34

hastāmbhojayugasthakumbhayugalāduddhṛtya toyaṃ śiraḥ siñcantaṃ karayoryugena dadhataṃ svāṅke sakumbhau karau |
akṣasraṅmṛgahastamambujagataṃ mūrdhasthacandrasravat-pīyūṣārdratanuṃ bhaje sagirijaṃ tryakṣaṃ ca mṛtyuñjayam ||

2.2.38.35

brahmovāca |
upadiśyeti śukraḥ taṃ dadhīciṃ munisattamam |
svasthānamagamattāta saṃsmaran śaṅkaraṃ prabhum ||

2.2.38.36

tasya tadvacanaṃ śrutvā dadhīco hi mahāmuniḥ |
vanaṃ jagāma tapase mahāprītyā śivaṃ smaran ||

2.2.38.37

tatra gatvā vidhānena mahāmṛtyuñjayābhidham |
taṃ manuṃ prajapan prītyā tapastepe śivaṃ smaran ||

2.2.38.38

tanmanuṃ suciraṃ japtvā tapasārādhya śaṅkaram |
śivaṃ santoṣayāmāsa mahāmṛtyuñjayaṃ hi saḥ ||

2.2.38.39

atha śambhuḥ prasannātmā tajjapādbhaktavatsalaḥ |
āvirbabhūva puratastasya prītyā mahāmune ||

2.2.38.40

taṃ dṛṣṭvā svaprabhuṃ śambhuṃ sa mumoda munīśvaraḥ |
praṇamya vidhivadbhaktyā tuṣṭāva sukṛtāñjaliḥ ||

2.2.38.41

atha prītyā śivastāta prasannaścyāvaniṃ mune |
varaṃ brūhīti sa prāha suprasannena cetasā ||

2.2.38.42

tacchrutvā śambhuvacanaṃ dadhīco bhaktasattamaḥ |
sāñjalirnatakaḥ prāha śaṅkaraṃ bhaktavatsalam ||

2.2.38.43

dadhīca uvāca |
devadeva mahādeva mahyaṃ dehi varatrayam |
vajrāsthitvamavadhyatvamadīnatvaṃ hi sarvataḥ ||

2.2.38.44

brahmovāca |
taduktavacanaṃ śrutvā prasannaḥ parameśvaraḥ |
varatrayaṃ dadau tasmai dadhīcāya tathāstviti ||

2.2.38.45

varatrayaṃ śivātprāpya sānandaśca mahāmuniḥ |
kṣuvasthānaṃ jagāmāśu vedamārge pratiṣṭhitaḥ ||

2.2.38.46

prāpyāvadhyatvamugrātsa vajrāsthitvamadīnatām |
atāḍayacca rājendraṃ pādamūlena mūrdhani ||

2.2.38.47

kṣuvo dadhīcaṃ vajreṇa jaghānorasyatho nṛpaḥ |
krodhaṃ kṛtvā viśeṣeṇa viṣṇugauravagarvitaḥ ||

2.2.38.48

nābhūnnāśāya tadvajraṃ dadhīcasya mahātmanaḥ |
prabhāvātparameśasya dhātṛputro visismiye ||

2.2.38.49

dṛṣṭvāpyavadhyatvamadīnatāṃ ca vajrasya cātyantaparaprabhāvam |
kṣuvo dadhīcasya munīśvarasya visismiye cetasi dhātṛputraḥ ||

2.2.38.50

ārādhayāmāsa hariṃ mukunda-mindrānujaṃ kānanamāśu gatvā |
prapannapālaśca parājito hi dadhīcamṛtyuñjayasevakena ||

2.2.38.51

pūjayā tasya santuṣṭo bhagavān madhusūdanaḥ |
pradadau darśanaṃ tasmai divyaṃ vai garuḍadhvajaḥ ||

2.2.38.52

divyena darśanenaiva dṛṣṭvā devaṃ janārdanam |
tuṣṭāva vāgbhiriṣṭābhiḥ praṇamya garuḍadhvajam ||

2.2.38.53

sampūjya caivaṃ tridaśeśvarādyaiḥ stutvā stutaṃ devamajeyamīśam |
vijñāpayāmāsa nirīkṣya bhaktyā janārdanāya praṇipatya mūrdhnā ||

2.2.38.54

rājovāca |
bhagavan brāhmaṇaḥ kaściddadhīca iti viśrutaḥ |
dharmavettā vinītātmā sakhā mama purābhavat ||

2.2.38.55

avadhyaḥ sarvadā sarvaiḥ śaṅkarasya prabhāvataḥ |
tamārādhya mahādevaṃ mṛtyuñjayamanāmayam ||

2.2.38.56

sāvajñaṃ vāmapādena mama mūrdhni sadasyapi |
tāḍayāmāsa vegena sa dadhīco mahātapāḥ ||

2.2.38.57

uvāca māṃ ca garveṇa na bibhemīti sarvataḥ |
mṛtyuñjayāptasuvaro garvito hyatulaṃ hare ||

2.2.38.58

atha jñātvā dadhīcasya hyavadhyatvaṃ mahātmanaḥ |
sasmārāsya maheśasya prabhāvamatulaṃ hariḥ ||

2.2.38.59

evaṃ smṛtvā hariḥ prāha kṣuvaṃ vidhisutaṃ drutam |
viprāṇāṃ nāsti rājendra bhayamaṇvapi kutracit ||

2.2.38.60

viśeṣād rudrabhaktānāṃ bhayaṃ nāsti ca bhūpate |
duḥkhaṃ karoti viprasya śāpārthaṃ sa surasya me ||

2.2.38.61

bhavitā tasya śāpena dakṣayajñe sureśvarāt |
vināśo mama rājendra punarutthānameva ca ||

2.2.38.62

tasmātsametya rājendra sarvayajño na bhūyate |
karomi yatnaṃ rājendra dadhīcavijayāya te ||

2.2.38.63

śrutvā vākyaṃ kṣuvaḥ prāha tathāstviti harernṛpaḥ |
tasthau tatraiva tatprītyā tatkāmotsukamānasaḥ ||

2.2.38.63.c1

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe kṣuvadadhīcavādavarṇanaṃ nāmāṣṭatriṃśo'dhyāyaḥ ||

2.2.38.63.p2

śrīgaṇeśāya namaḥ ||

2.2.38.63.p3

śrīgaurīśaṅkarābhyāṃ namaḥ ||

2.2.38.63.p4

śrīśivamahāpurāṇam ||

2.2.38.63.p5

dvitīyāyāṃ rudrasaṃhitāyāṃ dvitīyaḥ satīkhaṇḍe

Linked texts (3)