Shivapurana 2.2.39: ekonacatvāriṃśo'dhyāyaḥ | viṣṇudadhīcayuddhavarṇanam
Śivapurāṇa (complete text) 2.2.39
- Language
- Sanskrit
Contents
ekonacatvāriṃśo'dhyāyaḥ | viṣṇudadhīcayuddhavarṇanam
2.2.39.1
brahmovāca |
kṣuvasya hitakṛtyena dadhīcasyāśramaṃ yayau |
viprarūpamathāsthāya bhagavān bhaktavatsalaḥ ||
2.2.39.2
dadhīcaṃ prāha viprarṣimabhivandya jagadguruḥ |
kṣuvakāryārthamudyuktaḥ śaivendraṃ chalamāśritaḥ ||
2.2.39.3
viṣṇuruvāca |
bho bho dadhīca viprarṣe bhavārcanaratāvyaya |
varamekaṃ vṛṇe tvattastadbhavān dātumarhati ||
2.2.39.3.p1
brahmovāca |
yācito devadevena dadhīcaḥ śaivasattamaḥ ||
2.2.39.4
kṣuvakāryārthinā śīghraṃ jagāda vacanaṃ harim ||
2.2.39.5
dadhīca uvāca |
jñātaṃ tavepsitaṃ vipra kṣuvakāryārthamāgataḥ |
bhagavān viprarūpeṇa māyī tvamasi vai hariḥ ||
2.2.39.6
bhūtaṃ bhaviṣyaṃ deveśa vartamānaṃ janārdana |
jñānaṃ prasādād rudrasya sadā traikālikaṃ mama ||
2.2.39.7
tvāṃ jāne'haṃ hariṃ viṣṇuṃ dvijatvaṃ tyaja suvrata |
ārādhito'si bhūpena kṣuveṇa khalabuddhinā ||
2.2.39.8
jāne tavaiva bhagavan bhaktavatsalatāṃ hare |
chalaṃ tyaja svarūpaṃ hi svīkuru smara śaṅkaram ||
2.2.39.9
asti cetkasyacidbhītirbhavārcanaratasya me |
vaktumarhasi yatnena satyadhāraṇapūrvakam ||
2.2.39.10
vadāmi na mṛṣā kvāpi śivasmaraṇasaktadhīḥ |
na bibhemi jagatyasmindevadaityādikādapi ||
2.2.39.11
viṣṇuruvāca |
bhayaṃ dadhīca sarvatra naṣṭaṃ ca tava suvrata |
bhavārcanarato yasmādbhavānsarvajña eva ca ||
2.2.39.12
bibhemīti sakṛdvaktumarhasi tvaṃ namastava |
niyogānmama rājendra kṣuvāt pratisahādaham ||
2.2.39.13
brahmovāca |
evaṃ śrutvāpi tadvākyaṃ viṣṇoḥ sa tu mahāmuniḥ |
vihasya nirbhayaḥ prāha dadhīcaḥ śaivasattamaḥ ||
2.2.39.14
dadhīca uvāca |
na bibhemi sadā kvāpi kutaścidapi kiñcana |
prabhāvāddevadevasya śambhoḥ sākṣātpinākinaḥ ||
2.2.39.15
brahmovāca |
tatastasya muneḥ śrutvā vacanaṃ kupito hariḥ |
cakramudyamya santasthau didhakṣurmunisattamam ||
2.2.39.16
abhavatkuṇṭhitaṃ tatra vipre cakraṃ sudāruṇam |
prabhāvācca tadīśasya nṛpateḥ sannidhāvapi ||
2.2.39.17
dṛṣṭvā taṃ kuṇṭhitāsyaṃ taccakraṃ viṣṇuṃ jagāda ha |
dadhīcaḥ sasmitaṃ sākṣātsadasadvyaktikāraṇam ||
2.2.39.18
dadhīca uvāca |
bhagavan bhavatā labdhaṃ purātīva sudāruṇam |
sudarśanamiti khyātaṃ cakraṃ viṣṇoḥ prayatnataḥ |
bhavasya tacchubhaṃ cakraṃ na jighāṃsati māmiha ||
2.2.39.19
bhagavānatha kruddho'smai sarvāstrāṇi kramāddhariḥ |
brahmāstrādyaiḥ śaraiścāstraiḥ prayatnaṃ kartumarhasi ||
2.2.39.20
brahmovāca |
sa tasya vacanaṃ śrutvā dṛṣṭvā nirvīryamānuṣam |
sasarjātha krudhā tasmai sarvāstrāṇi kramāddhariḥ ||
2.2.39.21
cakrurdevāstatastasya viṣṇoḥsāhāyyamādarāt |
dvijenaikena saṃyoddhuṃ prasṛtasya vibuddhayaḥ ||
2.2.39.22
cikṣipuḥ svāni svānyāśu śastrāṇyastrāṇi sarvataḥ |
dadhīcopari vegena śakrādyā haripākṣikāḥ ||
2.2.39.23
kuśamuṣṭimathādāya dadhīcaḥ saṃsmaran śivam |
sasarja sarvadevebhyo vajrāsthiḥ sarvato vaśī ||
2.2.39.24
śaṅkarasya prabhāvāttu kuśamuṣṭirmunerhi sā |
divyaṃ triśūlamabhavat kālāgnisadṛśaṃ mune ||
2.2.39.25
dagdhuṃ devān matiṃ cakre sāyudhān saśikhaṃ ca tat |
prajvalatsarvataḥ śaivaṃ yugāntāgnyadhikaprabham ||
2.2.39.26
nārāyaṇendramukhyaistu devaiḥ kṣiptāni yāni ca |
āyudhāni samastāni praṇemustriśikhaṃ ca tat ||
2.2.39.27
devāśca dudruvuḥ sarve dhvastavīryā divaukasaḥ |
tasthau tatra harirbhītaḥ kevalaṃ māyināṃ varaḥ ||
2.2.39.28
sasarja bhagavān viṣṇuḥ svadehātpuruṣottamaḥ |
ātmanaḥ sadṛśān divyān lakṣalakṣāyutān gaṇān ||
2.2.39.29
te cāpi yuyudhustatra vīrā viṣṇugaṇāstataḥ |
muninaikena devarṣe dadhīcena śivātmanā ||
2.2.39.30
tato viṣṇugaṇāṃstānvai niyudhya bahuśo raṇe |
dadāha sahasā sarvān dadhīcaḥ śaivasattamaḥ ||
2.2.39.31
tatastadvismayārthāya dadhīcasya munerhariḥ |
viśvamūrtirabhūcchīghraṃ mahāmāyāviśāradaḥ ||
2.2.39.32
tasya dehe hareḥ sākṣādapaśyad dvijasattamaḥ |
dadhīco devatādīnāṃ jīvānāṃ ca sahasrakam ||
2.2.39.33
bhūtānāṃ koṭayaścaiva gaṇānāṃ koṭayastathā |
aṇḍānāṃ koṭayaścaiva viśvamūrtestanau tadā ||
2.2.39.34
dṛṣṭvaitadakhilaṃ tatra cyāvaniḥ satataṃ tadā |
viṣṇumāha jagannāthaṃ jagatstavamajaṃ vibhum ||
2.2.39.35
dadhīca uvāca |
māyāṃ tyaja mahābāho pratibhāso vicārataḥ |
vijñātāni sahasrāṇi durvijñeyāni mādhava ||
2.2.39.36
mayi paśya jagatsarvaṃ tvayā yuktamatandritaḥ |
brahmāṇaṃ ca tathā rudraṃ divyāṃ dṛṣṭiṃ dadāmi te ||
2.2.39.37
brahmovāca |
ityuktvā darśayāmāsa svatanau nikhilaṃ muniḥ |
brahmāṇḍaṃ cyāvaniḥ śambhutejasā pūrṇadehakaḥ ||
2.2.39.38
tadāha viṣṇuṃ deveśaṃ dadhīcaḥ śaivasattamaḥ |
saṃsmaran śaṅkaraṃ citte vihasan vibhayaḥ sudhīḥ ||
2.2.39.39
dadhīca uvāca |
māyayā tvanayā kiṃ vā mantraśaktyātha vā hare |
satkāmanāmimāṃ kṛtvā yoddhumarhasi yatnataḥ ||
2.2.39.40
brahmovāca |
etacchutvā munestasya vacanaṃ nirbhayastadā |
śambhutejomayaṃ viṣṇuḥ cukopātīva taṃ munim ||
2.2.39.41
devāśca dudruvurbhūyo devaṃ nārāyaṇaṃ ca tam |
yoddhukāmāśca muninā dadhīcena pratāpinā ||
2.2.39.42
etasminnantare tatrāgamanmatsaṅgamaḥ kṣuvaḥ |
avārayantaṃ niśceṣṭaṃ padmayoniṃ hariṃ surān ||
2.2.39.43
niśamya vacanaṃ me hi brāhmaṇo na vinirjitaḥ |
jagāma nikaṭaṃ tasya praṇanāma muniṃ hariḥ ||
2.2.39.44
kṣuvo dīnataro bhūtvā gatvā tatra munīśvaram |
dadhīcamabhivādyaiva prārthayāmāsa viklavaḥ ||
2.2.39.45
kṣuva uvāca |
prasīda muniśārdūla śivabhaktaśiromaṇe |
prasīda parameśāna durlakṣyo durjanaiḥ sadā ||
2.2.39.46
brahmovāca |
ityākarṇya vacastasya rājñaḥ suragaṇasya hi |
anujagrāha taṃ vipro dadhīcastapasāṃ nidhiḥ ||
2.2.39.47
atha dṛṣṭvā rameśādīn krodhavihvalito muniḥ |
hṛdi smṛtvā śivaṃ viṣṇuṃ śaśāpa ca surānapi ||
2.2.39.48
dadhīca uvāca |
rudrakopāgninā devāḥ sadevendrā munīśvarāḥ |
dhvastā bhavantu devena viṣṇunā ca samaṃ gaṇaiḥ ||
2.2.39.49
brahmovāca |
evaṃ śaptvā surān prekṣya kṣuvamāha tato muniḥ |
devaiśca pūjyo rājendra nṛpaiścaiva dvijottamaḥ ||
2.2.39.50
brāhmaṇā eva rājendra balinaḥ prabhaviṣṇavaḥ |
ityuktvā sa sphuṭaṃ vipraḥ praviveśa nijāśramam ||
2.2.39.51
dadhīcamabhivandyaiva kṣuvo nijagṛhaṃ gataḥ |
viṣṇurjagāma svaṃ lokaṃ suraiḥ saha yathāgatam ||
2.2.39.52
tadevaṃ tīrthamabhavat sthāneśvara iti smṛtam |
sthāneśvaramanuprāpya śivasāyujyamāpnuyāt ||
2.2.39.53
kathitastava saṅkṣepādvādaḥ kṣuvadadhīcayoḥ |
nṛpāptaśāpayostāta brahmaviṣṇvoḥ śivaṃ vinā ||
2.2.39.54
ya idaṃ kīrtayennityaṃ vādaṃ kṣuvadadhīcayoḥ |
jitvāpamṛtyuṃ dehānte brahmalokaṃ prayāti saḥ ||
2.2.39.55
raṇe yaḥ kīrtayitvedaṃ praviśettasya sarvadā |
mṛtyubhītirbhavennaiva vijayī ca bhaviṣyati ||
2.2.39.55.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe viṣṇudadhīcayuddhavarṇanaṃ nāmaikonacatvāriṃśo'dhyāyaḥ ||
2.2.39.55.p2
śrīgaṇeśāya namaḥ ||
2.2.39.55.p3
śrīgaurīśaṅkarābhyāṃ namaḥ ||
2.2.39.55.p4
śrīśivamahāpurāṇam ||
2.2.39.55.p5
dvitīyāyāṃ rudrasaṃhitāyāṃ dvitīyaḥ satīkhaṇḍe
Linked texts (2)
- Liṅgapurāṇa — Vyāsa, Sanskrit
- Liṅgapurāṇa — Ativīrarāma Pāṇṭiyar 1500, Sanskrit