Shivapurana 2.2.40: catvāriṃśo'dhyāyaḥ | brahmādīnāṃ kailāsayātrā śivadarśanaṃ ca
Śivapurāṇa (complete text) 2.2.40
- Language
- Sanskrit
Contents
- 2.2.40.46 — 5 parts
catvāriṃśo'dhyāyaḥ | brahmādīnāṃ kailāsayātrā śivadarśanaṃ ca
2.2.40.1
nārada uvāca
vidhe vidhe mahāprājña śaivatattvapradarśaka |
śrāvitā ramaṇīprāyā śivalīlā mahādbhutā ||
2.2.40.2
vīreṇa vīrabhadreṇa dakṣayajñaṃ vināśya vai |
kailāsādrau gate tāta kimabhūttadvadādhunā ||
2.2.40.3
brahmovāca |
atha devagaṇāḥ sarve munayaśca parājitāḥ |
rudrānīkairvibhinnāṅgā mama lokaṃ yayustadā ||
2.2.40.4
svayambhuve namaskṛtya mahyaṃ saṃstūya bhūriśaḥ |
tatsvakleśaṃ viṣeśeṇa kārtsnyenaiva nyavedayan ||
2.2.40.5
tadākarṇya tato'haṃ vai putraśokena pīḍitaḥ |
acintayamativyagro dūyamānena cetasā ||
2.2.40.6
kiṃ kāryaṃ kāryamadyāśu mayā devasukhāvaham |
yena jīvatu dakṣo'sau makhaḥ pūrṇo bhavetsuraḥ ||
2.2.40.7
evaṃ vicārya bahudhā nālabhaṃ śamahaṃ mune |
viṣṇuṃ tadā smaran bhaktyā jñānamāpa tadocitam ||
2.2.40.8
atha devaiśca munibhirviṣṇorlokamahaṃ gataḥ |
natvā nutvā ca vividhaiḥ stavairduḥkhaṃ nyavadeyam ||
2.2.40.9
yathādhvaraḥ prapūrṇaḥ syāddeva yajñakaraśca saḥ |
sukhinaḥ syuḥ surāḥ sarve munayaśca tathā kuru ||
2.2.40.10
devadeva ramānātha viṣṇo devasukhāvaha |
vayaṃ tvaccharaṇaṃ prāptāḥ sadevamunayo dhruvam ||
2.2.40.11
brahmovāca |
ityākarṇya vaco me hi brahmaṇaḥ sa rameśvaraḥ |
pratyuvāca śivaṃ smṛtvā śivātmā dīnamānasaḥ ||
2.2.40.12
viṣṇuruvāca |
tejīyasi na sā bhūtā kṛtāgasi bubhūṣatām |
tatra kṣemāya bahudhā bubhūṣā hi kṛtāgasām ||
2.2.40.13
kṛtapāpāḥ surāḥ sarve śive hi parameśvare |
parādaduryajñabhāgaṃ tasya śambhorvidhe yataḥ ||
2.2.40.14
prasādayadhvaṃ sarve hi yūyaṃ śuddhena cetasā |
athāparaprasādaṃ taṃ gṛhītāṅghriyugaṃ śivam ||
2.2.40.15
yasmin prakupite deve vinaśyatyakhilaṃ jagat |
salokapālayajñasya śāsanājjīvitaṃ drutam ||
2.2.40.16
tamāśu priyayā devaṃ vihīnaṃ ca duruktibhiḥ |
kṣamāpayadhvaṃ hṛdviddhaṃ dakṣeṇa sudurātmanā ||
2.2.40.17
ayameva mahopāyastacchāntyai kevalaṃ vidhe |
śambhoḥ santuṣṭaye manye satyamevoditaṃ mayā ||
2.2.40.18
nāhaṃ na tvaṃ surāścānye munayo'pi tanūbhṛtaḥ |
yasya tattvaṃ pramāṇaṃ ca na vidurbalavīryayoḥ ||
2.2.40.19
ātmatantrasya tasyāpi parasya paramātmanaḥ |
ka upāyaṃ vidhitsedvai paraṃ mūḍhaṃ virodhinam ||
2.2.40.20
caliṣye'hamapi brahman sarvaiḥ sārdhaṃ śivālayam |
kṣamāpayāmi giriśaṃ kṛtāgaśca śive dhruvam ||
2.2.40.21
brahmovāca |
itthamādiśya viṣṇurmāṃ brahmāṇaṃ sāmarādikam |
sārdhaṃ devairmatiṃ cakre tadgirau gamanāya saḥ ||
2.2.40.22
yayau svadhiṣṇyanilayaṃ śivasyādrivaraṃ śubham |
kailāsaṃ sāmaramuniprajeśādimayo hariḥ ||
2.2.40.23
atipriyaṃ prabhornityaṃ sujuṣṭaṃ kinnarādibhiḥ |
naretarairapsarobhiryogasiddhairmahonnatam ||
2.2.40.24
nānāmaṇimayaiḥ śṛṅgaiḥ śobhamānaṃ samantataḥ |
nānādhātuvicitraṃ vai nānādrumalatākulam ||
2.2.40.25
nānāmṛgagaṇākīrṇaṃ nānāpakṣisamanvitam |
nānājalaprasravaṇairamaraiḥ siddhayoṣitām ||
2.2.40.26
ramaṇairviharantīnāṃ nānākandarasānubhiḥ |
drumajātibhiranyābhī rājitaṃ rājataprabham ||
2.2.40.27
vyāghrādibhirmahāsattvairnirghuṣṭaṃ krūratojjhitam |
sarvaśobhānvitaṃ divyaṃ mahāvismayakārakam ||
2.2.40.28
paryastaṃ gaṅgayā satyā sthānapuṇyatarodayā |
sarvapāvanasaṅkartryā viṣṇupadyā sunirmalam ||
2.2.40.29
evaṃvidhaṃ giriṃ dṛṣṭvā kailāsākhyaṃ śivapriyam |
yayuste vismayaṃ devā viṣṇvādyāḥ samunīśvarāḥ ||
2.2.40.30
tatsamīpe'lakāṃ ramyāṃ dadṛśurnāma te purīm |
kuberasya mahādivyāṃ rudramitrasya nirjarāḥ ||
2.2.40.31
vanaṃ saugandhikaṃ cāpi dadṛśustatsamīpataḥ |
sarvadrumānvitaṃ divyaṃ yatra tannādamadbhutam ||
2.2.40.32
tadbāhyatastasya divye saritāvatipāvane |
nandā cālakanandā ca darśanātpāpahārike ||
2.2.40.33
papuḥ surastriyo nityamavagūhya svalokataḥ |
vigāhya pumbhistāstatra krīḍanti ratikarśitāḥ ||
2.2.40.34
hitvā yakṣeśvarapurīṃ vanaṃ saugandhikaṃ ca yat |
gacchantaste surā ārāddadṛśuḥ śāṅkaraṃ vaṭam ||
2.2.40.35
paryakkṛtācalacchāyaṃ pādonaviṭapāyatam |
śatayojanakotsedhaṃ nirnīḍaṃ tāpavarjitam ||
2.2.40.36
mahāpuṇyavatāṃ dṛśyaṃ suramyaṃ cātipāvanam |
śambhuyogasthalaṃ divyaṃ yogisevyaṃ mahottamam ||
2.2.40.37
mumukṣuśaraṇe tasmin mahāyogamaye vaṭe |
āsīnaṃ dadṛśuḥ sarve śivaṃ viṣṇvādayaḥ surāḥ ||
2.2.40.38
vidhiputrairmahāsiddhaiḥ śivabhaktirataiḥ sadā |
upāsyamānaṃ samudā śāntaiḥ saṃśāntavigrahaiḥ ||
2.2.40.39
tathā sakhyā kubereṇa bhartrā guhyakarakṣasām |
sevyamānaṃ viśeṣeṇa svagaṇairjñātibhiḥ sadā ||
2.2.40.40
tāpasābhīṣṭasadrūpaṃ bibhrataṃ parameśvaram |
vātsalyādviśvasuhṛdaṃ bhasmādisuvirājitam ||
2.2.40.41
mune tubhyaṃ pravocantaṃ pṛcchate jñānamuttamam |
kuśāsane sūpaviṣṭaṃ sarveṣāṃ śṛṇvatāṃ satām ||
2.2.40.42
kṛtvorau dakṣiṇe savyaṃ caraṇaṃ caiva jānuni |
bāhuprakoṣṭhākṣamālaṃ sthitaṃ sattarkamudrayā ||
2.2.40.43
evaṃvidhaṃ śivaṃ dṛṣṭvā tadā viṣṇvādayaḥ surāḥ |
praṇemustvaritaṃ sarve karau badhvā vinamrakāḥ ||
2.2.40.44
upalabhyāgataṃ rudro mayā viṣṇuṃ satāṃ gatiḥ |
utthāya cakre śirasābhivandanamapi prabhuḥ ||
2.2.40.45
vanditāṅghristadā sarvairdivyairviṣṇvādibhiḥ śivaḥ |
nanāmātha yathā viṣṇuḥ kaśyapaṃ lokasadgatiḥ ||
2.2.40.46
surasiddhagaṇādhīśamaharṣisunamaskṛtam |
samuvāca surairviṣṇuṃ kṛtasannatimādarāt ||
2.2.40.46.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe śivadarśanavarṇanaṃ nāma catvāriṃśo'dhyāyaḥ ||
2.2.40.46.p2
śrīgaṇeśāya namaḥ ||
2.2.40.46.p3
śrīgaurīśaṅkarābhyāṃ namaḥ ||
2.2.40.46.p4
śrīśivamahāpurāṇam ||
2.2.40.46.p5
dvitīyāyāṃ rudrasaṃhitāyāṃ dvitīyaḥ satīkhaṇḍe