Shivapurana 2.2.41: ekacatvāriṃśo'dhyāyaḥ | devaiḥ kṛtā śivastutiḥ
Śivapurāṇa (complete text) 2.2.41
- Language
- Sanskrit
Contents
- 2.2.41.52 — 5 parts
ekacatvāriṃśo'dhyāyaḥ | devaiḥ kṛtā śivastutiḥ
2.2.41.1
viṣṇvādaya ūcuḥ |
devadeva mahādeva laukikācārakṛtprabho |
brahma tvāmīśvaraṃ śambhuṃ jānīmaḥ kṛpayā tava ||
2.2.41.2
kiṃ mohayasi nastāta māyayā parayā tava |
durjñeyayā sadā puṃsāṃ mohinyā parameśvara ||
2.2.41.3
prakṛteḥ puruṣasyāpi jagato yonibījayoḥ |
parabrahma parastvaṃ ca manovācāmagocaraḥ ||
2.2.41.4
tvameva viśvaṃ sṛjasi pāsyatsi nijatantrataḥ |
svarūpāṃ śivaśaktiṃ hi krīḍannūrṇapaṭo yathā ||
2.2.41.5
tvameva kratumīśāna sasarjitha dayāparaḥ |
dakṣeṇa sūtreṇa vibho sadā trayyabhipattaye ||
2.2.41.6
tvayaiva loke'vasitāḥ setavo yān dhṛtavratāḥ |
śuddhān śraddadhate viprā vedamārgavicakṣaṇāḥ ||
2.2.41.7
kartustvaṃ maṅgalānāṃ hi svaparaṃ tu sukhe vibho |
amaṅgalānāṃ ca hitaṃ miśraṃ vātha viparyayam ||
2.2.41.8
sarvakarmaphalānāṃ hi sadā dātā tvameva hi |
sarve hi proktāḥ paśavastatpatistvaṃ śrutiśrutaḥ ||
2.2.41.9
pṛthagdhiyaḥ karmadṛśo'runtudāśca durāśayāḥ |
vitudanti parān mūḍhā duruktairmatsarānvitāḥ ||
2.2.41.10
teṣāṃ daivavadhānāṃ bho bhūyāttvacca vadho vibho |
bhagavanparameśāna kṛpāṃ kuru paraprabho ||
2.2.41.11
namo rudrāya śāntāya brahmaṇe paramātmane |
kapardine maheśāya jyotsnāya mahate namaḥ ||
2.2.41.12
tvaṃ hi viśvasṛjāṃ sraṣṭā dhātā tvaṃ prapitāmahaḥ |
triguṇātmā nirguṇaśca prakṛteḥ puruṣātparaḥ ||
2.2.41.13
namaste nīlakaṇṭhāya vedhase paramātmane |
viśvāya viśvabījāya jagadānandahetave ||
2.2.41.14
oṅkārastvaṃ vaṣaṭkāraḥ sarvārambhapravartakaḥ |
hantakāraḥ svadhākāro havyakavyānnabhuk sadā ||
2.2.41.15
kṛtaḥ kathaṃ yajñabhaṅgastvayā dharmaparāyaṇa |
brahmaṇyastvaṃ mahādeva kathaṃ yajñahano vibho ||
2.2.41.16
brāhmaṇānāṃ gavāṃ caiva dharmasya pratipālakaḥ |
śaraṇyo'si sadānantyaḥ sarveṣāṃ prāṇināṃ prabho ||
2.2.41.17
namaste bhagavan rudra bhāskarāmitatejase |
namo bhavāya devāya rasāyāmbumayāya te ||
2.2.41.18
śarvāya kṣitirūpāya sadā surabhiṇe namaḥ |
rudrāyāgnisvarūpāya mahātejasvine namaḥ ||
2.2.41.19
īśāya vāyave tubhyaṃ saṃsparśāya namo namaḥ |
paśūnāṃ pataye tubhyaṃ yajamānāya vedhase ||
2.2.41.20
bhīmāya vyomarūpāya śabdamātrāya te namaḥ |
mahādevāya somāya pravṛttāya namo'stu te ||
2.2.41.21
ugrāya sūryarūpāya namaste karmayogine |
namaste kālakālāya namaste rudramanyave ||
2.2.41.22
namaḥ śivāya bhīmāya śaṅkarāya śivāya te |
ugro'si sarvabhūtānāṃ niyantā yacchivo'si naḥ ||
2.2.41.23
mayaskarāya viśvāya brahmaṇe hyārtināśine |
ambikāpataye tubhyamumāyāḥ pataye namaḥ ||
2.2.41.24
śarvāya sarvarūpāya puruṣāya parātmane |
sadasadvyaktihīnāya mahataḥ kāraṇāya te ||
2.2.41.25
jātāya bahudhā loke prabhūtāya namo namaḥ |
nīlāya nīlarudrāya kadrudrāya pracetase ||
2.2.41.26
mīḍhuṣṭamāya devāya śipiviṣṭāya te namaḥ |
mahīyase namastubhyaṃ hantre devāriṇāṃ sadā ||
2.2.41.27
tārāya ca sutārāya taruṇāya sutejase |
harikeśāya devāya maheśāya namo namaḥ ||
2.2.41.28
devānāṃ śambhave tubhyaṃ vibhave paramātmane |
paramāya namastubhyaṃ kālakaṇṭhāya te namaḥ ||
2.2.41.29
hiraṇyāya pareśāya hiraṇyavapuṣe namaḥ |
bhīmāya bhīmarūpāya bhīmakarmaratāya ca ||
2.2.41.30
bhasmadigdhaśarīrāya rudrākṣābharaṇāya ca |
namo hrasvāya dīrghāya vāmanāya namo'stu te ||
2.2.41.31
dūrevadhāya te devāgrevadhāya namo namaḥ |
dhanvine śūline tubhyaṃ gadine haline namaḥ ||
2.2.41.32
nānāyudhadharāyaiva daityadānavanāśine |
sadyāya sadyarūpāya sadyojātāya vai namaḥ ||
2.2.41.33
vāmāya vāmarūpāya vāmanetrāya te namaḥ |
aghorāya pareśāya vikaṭāya namo namaḥ ||
2.2.41.34
tatpuruṣāya nāthāya purāṇapuruṣāya ca |
puruṣārthapradānāya vratine parameṣṭhine ||
2.2.41.35
īśānāya namastubhyamīśvarāya namo namaḥ |
brahmaṇe brahmarūpāya namaḥ sākṣātparātmane ||
2.2.41.36
ugro'si sarvaduṣṭānāṃ niyantāsi śivo'si naḥ |
kālakūṭāśine tubhyaṃ devādyavanakāriṇe ||
2.2.41.37
vīrāya vīrabhadrāya rakṣadvīrāya śūline |
mahādevāya mahate paśūnāṃ pataye namaḥ ||
2.2.41.38
vīrātmane suvidyāya śrīkaṇṭhāya pinākine |
namo'nantāya sūkṣmāya namaste mṛtyumanyave ||
2.2.41.39
parāya parameśāya parātparatarāya te |
parātparāya vibhave namaste viśvamūrtaye ||
2.2.41.40
namo viṣṇukalatrāya viṣṇukṣetrāya bhānave |
bhairavāya śaraṇyāya tryambakāya vihāriṇe ||
2.2.41.41
mṛtyuñjayāya śokāya triguṇāya guṇātmane |
candrasūryāgninetrāya sarvakāraṇasetave ||
2.2.41.42
bhavatā hi jagatsarvaṃ vyāptaṃ svenaiva tejasā |
parabrahma nirvikārī cidānandaḥ prakāśavān ||
2.2.41.43
brahmaviṣṇvindracandrādipramukhāḥsakalāḥ surāḥ |
munayaścāpare tvattaḥ samprasūtā maheśvara ||
2.2.41.44
yato bibharṣi sakalaṃ vibhajya tanumaṣṭadhā |
aṣṭamūrtiritīśaśca tvamādyaḥ karuṇāmayaḥ ||
2.2.41.45
tvadbhayādvāti vāto'yaṃ dahatyagnirbhayāttava |
sūryastapati te bhītyā mṛtyurdhāvati sarvataḥ ||
2.2.41.46
dayāsindho maheśāna prasīda parameśvara |
rakṣa rakṣa sadaivāsmān yasmānnaṣṭān vicetasaḥ ||
2.2.41.47
rakṣitāḥ satataṃ nātha tvayaiva karuṇānidhe |
nānāpadbhyo vayaṃ śambho tathaivādya prapāhi naḥ ||
2.2.41.48
yajñasyoddharaṇaṃ nātha kuru śīghraṃ prasādakṛt |
asamāptasya durgeśa dakṣasya ca prajāpateḥ ||
2.2.41.49
bhago'kṣiṇī prapadyeta yajamānaśca jīvatu |
pūṣṇo dantāśca rohantu bhṛgoḥ śmaśrūṇi pūrvavat ||
2.2.41.50
bhavatānugṛhītānāṃ devādīnāṃ ca sarvaśaḥ |
ārogyaṃ bhagnagātrāṇāṃ śaṅkara tvāyudhāśmabhiḥ ||
2.2.41.51
pūrṇabhāgo'stu te nāthāvaśiṣṭe'dhvarakarmaṇi |
rudrabhāgena yajñaste kalpito nānyathā kvacit ||
2.2.41.52
ityuktvā saprajeśaśca rameśaśca kṛtāñjaliḥ |
daṇḍavatpatito bhūmau kṣamāpayitumudyataḥ ||
2.2.41.52.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe devastutivarṇanaṃ nāmaikacatvāriṃśo'dhyāyaḥ ||
2.2.41.52.p2
śrīgaṇeśāya namaḥ ||
2.2.41.52.p3
śrīgaurīśaṅkarābhyāṃ namaḥ ||
2.2.41.52.p4
śrīśivamahāpurāṇam ||
2.2.41.52.p5
dvitīyāyāṃ rudrasaṃhitāyāṃ dvitīyaḥ satīkhaṇḍe
Linked texts (2)
- Hālāsyamāhātmya — Sanskrit
- Vidhānapārijāta — Ananta Bhaṭṭa 1600, Sanskrit