[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Śivapurāṇa](https://indike.org/pramana/in.purana.siva) › [Shivapurana (complete text)](https://indike.org/pramana/in.purana.siva*complete-2) › 2.2.43 # Shivapurana 2.2.43: tricatvāriṃśo'dhyāyaḥ | dakṣayajñānusandhānam Śivapurāṇa (complete text) 2.2.43 - **Language:** Sanskrit ## Contents - [2.2.43.44](https://indike.org/pramana/in.purana.siva*complete-2.2.2.43.44) — 2 parts ### tricatvāriṃśo'dhyāyaḥ | dakṣayajñānusandhānam ### [2.2.43.1](https://indike.org/pramana/in.purana.siva*complete-2.2.2.43.1) brahmovāca | iti stuto rameśena mayā caiva surarṣibhiḥ | tathānyaiśca mahādevaḥ prasannaḥ sambabhūva ha || ### [2.2.43.2](https://indike.org/pramana/in.purana.siva*complete-2.2.2.43.2) atha śambhuḥ kṛpādṛṣṭyā sarvān ṛṣisurādikān | brahmaviṣṇū samādhāya dakṣametaduvāca ha || ### [2.2.43.3](https://indike.org/pramana/in.purana.siva*complete-2.2.2.43.3) mahādeva uvāca | śṛṇu dakṣa pravakṣyāmi prasanno'smi prajāpate | bhaktādhīnaḥ sadāhaṃ vai svatantro'pyakhileśvaraḥ || ### [2.2.43.4](https://indike.org/pramana/in.purana.siva*complete-2.2.2.43.4) caturvidhā bhajante māṃ janāḥ sukṛtinaḥ sadā | uttarottarataḥ śreṣṭhāsteṣāṃ dakṣa prajāpate || ### [2.2.43.5](https://indike.org/pramana/in.purana.siva*complete-2.2.2.43.5) ārto jijñāsurarthārthī jñānī caiva caturthakaḥ | pūrve trayaśca sāmānyāścaturtho hi viśiṣyate || ### [2.2.43.6](https://indike.org/pramana/in.purana.siva*complete-2.2.2.43.6) tatra jñānī priyataro mama rūpaṃ ca sa smṛtaḥ | tasmātpriyataro nānyaḥ satyaṃ satyaṃ vadāmyaham || ### [2.2.43.7](https://indike.org/pramana/in.purana.siva*complete-2.2.2.43.7) jñānagamyo'hamātmajño vedāntaśrutipāragaiḥ | vinā jñānena māṃ prāptuṃ yatante cālpabuddhayaḥ || ### [2.2.43.8](https://indike.org/pramana/in.purana.siva*complete-2.2.2.43.8) na vedaiśca na yajñaiśca na dānaistapasā kvacit | na śaknuvanti māṃ prāptuṃ mūḍhāḥ karmavaśā narāḥ || ### [2.2.43.9](https://indike.org/pramana/in.purana.siva*complete-2.2.2.43.9) kevalaṃ karmaṇā tvaṃ sma saṃsāraṃ tartumicchasi | ata evābhavaṃ ruṣṭo yajñavidhvaṃsakārakaḥ || ### [2.2.43.10](https://indike.org/pramana/in.purana.siva*complete-2.2.2.43.10) itaḥ prabhṛti bho dakṣa matvā māṃ parameśvaram | buddhyā jñānaparo bhūtvā kuru karma samāhitaḥ || ### [2.2.43.11](https://indike.org/pramana/in.purana.siva*complete-2.2.2.43.11) anyacca śṛṇu sadbuddhyā vacanaṃ me prajāpate | vacmi guhyaṃ dharmahetoḥ saguṇatve'pyahaṃ tava || ### [2.2.43.12](https://indike.org/pramana/in.purana.siva*complete-2.2.2.43.12) ahaṃ brahmā ca viṣṇuśca jagataḥ kāraṇaṃ param | ātmeśvara upadraṣṭā svayandṛgaviśeṣaṇaḥ || ### [2.2.43.13](https://indike.org/pramana/in.purana.siva*complete-2.2.2.43.13) ātmamāyāṃ samāviśya so'haṃ guṇamayīṃ mune | sṛjan rakṣanharanviśvaṃ dadhe saṃjñāḥ kriyocitāḥ || ### [2.2.43.14](https://indike.org/pramana/in.purana.siva*complete-2.2.2.43.14) advitīye pare tasmin brahmaṇyātmani kevale | ajñaḥ paśyati bhedena bhūtāni brahma ceśvaram || ### [2.2.43.15](https://indike.org/pramana/in.purana.siva*complete-2.2.2.43.15) śiraḥkarādisvāṅgeṣu kurute na yathā pumān | pārakyaśemuṣīṃ kvāpi bhūteṣvevaṃ hi matparaḥ || ### [2.2.43.16](https://indike.org/pramana/in.purana.siva*complete-2.2.2.43.16) sarvabhūtātmanāmekabhāvanāṃ yo na paśyati | trisurāṇāṃ bhidāṃ dakṣa sa śāntimadhigacchati || ### [2.2.43.17](https://indike.org/pramana/in.purana.siva*complete-2.2.2.43.17) yaḥ karoti trideveṣu bhedabuddhiṃ narādhamaḥ | narake sa vasennūnaṃ yāvadācandratārakam || ### [2.2.43.18](https://indike.org/pramana/in.purana.siva*complete-2.2.2.43.18) matparaḥ pūjayeddevān sarvānapi vicakṣaṇaḥ | sa jñānaṃ labhate yena muktirbhavati śāśvatī || ### [2.2.43.19](https://indike.org/pramana/in.purana.siva*complete-2.2.2.43.19) vidhibhaktiṃ vinā naiva bhaktirbhavati vaiṣṇavī | viṣṇubhaktiṃ vinā me na bhaktiḥ kvāpi prajāyate || ### [2.2.43.20](https://indike.org/pramana/in.purana.siva*complete-2.2.2.43.20) ityuktvā śaṅkaraḥ svāmī sarveṣāṃ parameśvaraḥ | sarveṣāṃ śṛṇvatāṃ tatrovāca vāṇīṃ kṛpākaraḥ || ### [2.2.43.21](https://indike.org/pramana/in.purana.siva*complete-2.2.2.43.21) haribhakto hi māṃ nindettathā śaivo bhavedyadi | tayoḥ śāpā bhaveyuste tattvaprāptirbhavenna hi || ### [2.2.43.22](https://indike.org/pramana/in.purana.siva*complete-2.2.2.43.22) brahmovāca | ityākarṇya maheśasya vacanaṃ sukhakārakam | jaharṣuḥ sakalāstatra suramunyādayo mune || ### [2.2.43.23](https://indike.org/pramana/in.purana.siva*complete-2.2.2.43.23) dakṣo'bhavanmahāprītyā śivabhaktiratastadā | sakuṭumbaḥ surādyāste śivaṃ matvākhileśvaram || ### [2.2.43.24](https://indike.org/pramana/in.purana.siva*complete-2.2.2.43.24) yathā yena kṛtā śambhoḥ saṃstutiḥ paramātmanaḥ | tathā tasmai varo dattaḥ śambhunā tuṣṭacetasā || ### [2.2.43.25](https://indike.org/pramana/in.purana.siva*complete-2.2.2.43.25) jñaptaḥ śivenāśu dakṣaḥ śivabhaktaḥ prasannadhīḥ | yajñaṃ cakāra sampūrṇaṃ śivānugrahato mune || ### [2.2.43.26](https://indike.org/pramana/in.purana.siva*complete-2.2.2.43.26) dadau bhāgānsurebhyo hi pūrṇabhāgaṃ śivāya saḥ | dānaṃ dadau dvijebhyaśca prāptaḥ śambhoranugrahaḥ || ### [2.2.43.27](https://indike.org/pramana/in.purana.siva*complete-2.2.2.43.27) atha devasya sumahattatkarma vidhipūrvakam | dakṣaḥ samāpya vidhivatsahartvigbhiḥ prajāpatiḥ || ### [2.2.43.28](https://indike.org/pramana/in.purana.siva*complete-2.2.2.43.28) evaṃ dakṣamakhaḥ pūrṇo'bhavattatra munīśvara | śaṅkarasya prasādena parabrahmasvarūpiṇaḥ || ### [2.2.43.29](https://indike.org/pramana/in.purana.siva*complete-2.2.2.43.29) atha devarṣayaḥ sarve śaṃsantaḥ śāṅkaraṃ yaśaḥ | svadhāmāni yayustuṣṭāḥ pare'pi sukhatastadā || ### [2.2.43.30](https://indike.org/pramana/in.purana.siva*complete-2.2.2.43.30) ahaṃ viṣṇuśca suprītāvapi svaṃ svaṃ paraṃ mudā | gāyantau suyaśaḥ śambhoḥ sarvamaṅgaladaṃ sadā || ### [2.2.43.31](https://indike.org/pramana/in.purana.siva*complete-2.2.2.43.31) dakṣasammānitaḥ prītyā mahādevo'pi sadgatiḥ | kailāsaṃ sa yayau śailaṃ suprītaḥ sagaṇo nijam || ### [2.2.43.32](https://indike.org/pramana/in.purana.siva*complete-2.2.2.43.32) āgatya svagiriṃ śambhuḥ sasmāra svapriyāṃ satīm | gaṇebhyaḥ kathayāmāsa pradhānebhyaśca tatkathām || ### [2.2.43.33](https://indike.org/pramana/in.purana.siva*complete-2.2.2.43.33) kālaṃ nināya vijñānī bahu taccaritaṃ vadan | laukikīṃ gatimāśritya darśayan kāmitāṃ prabhuḥ || ### [2.2.43.34](https://indike.org/pramana/in.purana.siva*complete-2.2.2.43.34) nānītikārakaḥ svāmī parabrahma satāṃ gatiḥ | tasya mohaḥ kva vā śokaḥ kva vikāraḥ paro mune || ### [2.2.43.35](https://indike.org/pramana/in.purana.siva*complete-2.2.2.43.35) ahaṃ viṣṇuśca jānīvastadbhedaṃ na kadācana | ke pare munayo devā mānuṣādyāśca yoginaḥ || ### [2.2.43.36](https://indike.org/pramana/in.purana.siva*complete-2.2.2.43.36) mahimā śāṅkaro'nanto durvijñeyo manīṣibhiḥ | bhaktajñātaśca sadbhaktyā tatprasādādvinā śramam || ### [2.2.43.37](https://indike.org/pramana/in.purana.siva*complete-2.2.2.43.37) eko'pi na vikāro hi śivasya paramātmanaḥ | sandarśayati lokebhyaḥ kṛtvā tāṃ tādṛśīṃ gatim || ### [2.2.43.38](https://indike.org/pramana/in.purana.siva*complete-2.2.2.43.38) yatpaṭhitvā ca saṃśrutya sarvalokasudhīrmune | labhate sadgatiṃ divyāmihāpi sukhamuttamam || ### [2.2.43.39](https://indike.org/pramana/in.purana.siva*complete-2.2.2.43.39) itthaṃ dākṣāyaṇī hitvā nijadehaṃ satī punaḥ | jajñe himavataḥ patnyāṃ menāyāmiti viśrutam || ### [2.2.43.40](https://indike.org/pramana/in.purana.siva*complete-2.2.2.43.40) punaḥ kṛtvā tapastatra śivaṃ vavre patiṃ ca sā | gaurī bhūtvārdhavāmāṅgī līlāścakre'dbhutāḥ śivā || ### [2.2.43.41](https://indike.org/pramana/in.purana.siva*complete-2.2.2.43.41) itthaṃ satīcaritraṃ te varṇitaṃ paramādbhutam | bhuktimuktipradaṃ divyaṃ sarvakāmapradāyakam || ### [2.2.43.42](https://indike.org/pramana/in.purana.siva*complete-2.2.2.43.42) idamākhyānamanaghaṃ pavitraṃ parapāvanam | svargyaṃ yaśasyamāyuṣyaṃ putrapautraphalapradam || ### [2.2.43.43](https://indike.org/pramana/in.purana.siva*complete-2.2.2.43.43) ya idaṃ śṛṇuyād bhaktyā śrāvayedbhaktimānnarān | sarvakarmā labhettāta paratra paramāṃ gatim || ### [2.2.43.44](https://indike.org/pramana/in.purana.siva*complete-2.2.2.43.44) yaḥ paṭhetpāṭhayedvāpi samākhyānamidaṃ śubham | so'pi bhuktvākhilān bhogānante mokṣamavāpnuyāt || ### [2.2.43.44.c1](https://indike.org/pramana/in.purana.siva*complete-2.2.2.43.44.c1) iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe dakṣayajñānusandhānavarṇanaṃ nāma tricatvāriṃśo'dhyāyaḥ || ### [2.2.43.44.c2](https://indike.org/pramana/in.purana.siva*complete-2.2.2.43.44.c2) iti śrīśivamahāpurāṇe dvitīyarudrasaṃhitāyāṃ dvitīyaḥ satīkhaṇḍaḥ samāptaḥ || ## Linked texts (5) - [Bhāgavatapurāṇa](https://indike.org/pramana/in.purana.bhagavata.4.7.50) — Vyāsa, Sanskrit - [Skandapurāṇa (early; "Ambikākhaṇḍa") (ed. Bakker)](https://indike.org/pramana/in.purana.skanda*early*bakker.1.6.41.p1) — Sanskrit - [Bhāgavatamāhātmya](https://indike.org/pramana/in.sampradaya.vaisnava.tantra.bhagavatamahatmya.90.50) — Kṛṣṇacandra, Sanskrit - [Anvitārthaprakāśikā](https://indike.org/pramana/in.purana.anvitarthaprakasika.79.50) — Gaṅgāsahāya Śarman, Sanskrit - [Vaiṣṇavakhaṇḍa](https://indike.org/pramana/in.purana.vaisnavakhanda.9.42) — Sanskrit --- Source: [https://indike.org/pramana/in.purana.siva*complete-2.2.2.43](https://indike.org/pramana/in.purana.siva*complete-2.2.2.43) · Pramāṇa