Shivapurana 2.3.10: daśamo'dhyāyaḥ | bhaumotpattistasya śivakṛpayā grahatvaprāptiśca
Śivapurāṇa (complete text) 2.3.10
- Language
- Sanskrit
Contents
- 2.3.10.28 — 5 parts
daśamo'dhyāyaḥ | bhaumotpattistasya śivakṛpayā grahatvaprāptiśca
2.3.10.1
nārada uvāca |
viṣṇuśiṣya mahābhāga vidhe śaivavara prabho |
śivalīlāmimāṃ vyāsātprītyā me vaktumarhasi ||
2.3.10.2
satīvirahayukśambhuḥ kiṃ cakre caritaṃ tathā |
tapaḥ kartuṃ kadāyāto himavatprasthamuttamam ||
2.3.10.3
śivāśivavivādo'bhūtkathaṃ kāmakṣayaśca me |
tapaḥ kṛtvā kathaṃ prāpa śivaṃ śambhuṃ ca pārvatī ||
2.3.10.4
tatsarvamaparaṃ cāpi śivasaccaritaṃ param |
vaktumarhasi me brahmanmahānandakaraṃ śubham ||
2.3.10.9
sūta uvāca |
iti śrutvā nāradasya praśnaṃ lokādhipottamaḥ |
vidhiḥ provāca suprītyā smṛtvā śivapadāmbujam ||
2.3.10.6
brahmovāca |
devarṣe śaivavaryādya tadyaśaḥ śṛṇu cādarāt |
pāvanaṃ maṅgalakaraṃ bhaktivardhanamuttamam ||
2.3.10.7
āgatya svagiriṃ śambhuḥ priyāvirahakātaraḥ |
sasmāra svapriyāṃ devīṃ satīṃ prāṇādhikāṃ hṛdā ||
2.3.10.6_2
gaṇānābhāṣya śocaṃstāṃ tadguṇānpremavardhanān |
varṇayāmāsa suprītyā darśayam̐llaukikīṃ gatim ||
2.3.10.9_2
digambaro babhūvātha tyaktvā gārhasthyasadgatim |
punarbabhrāma lokānvai sarvān līlāviśāradaḥ ||
2.3.10.10
na prāpa darśanaṃ kvāpi satīvirahaduḥkhitaḥ |
punaśca girimāyātaḥ śaṅkaro bhaktaśaṅkaraḥ ||
2.3.10.11
samādhāya mano yatnātsamādhiṃ duḥkhanāśanam |
cakāra ca dadarśāsau svarūpaṃ nijamavyayam ||
2.3.10.12
itthaṃ cirataraṃ sthāṇustasthau dhvastaguṇatrayaḥ |
nirvikārī paraṃ brahma māyādhīśaḥ svayaṃ prabhuḥ ||
2.3.10.13
tataḥ samādhiṃ tatyāja vyatīyurhyamitāḥ samāḥ |
yadā tadā babhūvāśu caritaṃ tadvadāmi vaḥ ||
2.3.10.14
prabhorlalāṭadeśāttu yatpṛṣacchramasambhavam |
papāta dharaṇau tatra sa babhūva śiśurdrutam ||
2.3.10.15
caturbhujo'ruṇākāro ramaṇīyākṛtirmune |
alaukikadyutiḥ śrīmām̐stejasvī paradussahaḥ ||
2.3.10.16
ruroda sa śiśustasya puro hi parameśituḥ |
prākṛtātmajavattatra bhavācāraratasya hi ||
2.3.10.17
tadā vicārya sudhiyā dhṛtvā sustrītanuṃ kṣitiḥ |
āvirbabhūva tatraiva bhayamānīya śaṅkarāt ||
2.3.10.18
taṃ balaṃ drutamutthāya kroḍāyāṃ nidadhe varam |
stanyaṃ sāpāyayatprītyā dugdhaṃ coparisambhavam ||
2.3.10.19
cucumba tanmukhaṃ snehātsmitvā krīḍayadātmajam |
satyabhāvātsvayaṃ mātā parameśahitāvahā ||
2.3.10.20
tad dṛṣṭvā caritaṃ śambhuḥ kautukī sūtikṛtkṛtī |
antaryāmī vihasyāthovāca jñātvā rasāṃ haraḥ ||
2.3.10.21
dhanyā tvaṃ dharaṇi prītyā pālayaitaṃ sutaṃ mama |
tvayyudbhūtaṃ śramajalānmahātejasvino varam ||
2.3.10.22
mama śramakabhūrbālo yadyapi priyakṛtkṣite |
tvannāmnā syādbhavetkhyātastritāparahitaḥ sadā ||
2.3.10.23
asau bālaḥ kudātā hi bhaviṣyati guṇī tava |
mamāpi sukhadātā hi gṛhāṇainaṃ yathāruci ||
2.3.10.24
brahmovāca |
ityuktvā virarāmātha kiñcidvirahamuktadhīḥ |
lokācārakaro rudro nirvikārī satāṃ priyaḥ ||
2.3.10.25
api kṣitirjagāmāśu śivājñāmadhigamya sā |
svasthānaṃ sasutā prāpa sukhamātyantikaṃ ca vai ||
2.3.10.26
sa bālo bhauma ityākhyāṃ prāpya bhūtvā yuvā drutam |
tasyāṃ kāśyāṃ ciraṃ kālaṃ siṣeve śaṅkaraṃ prabhum ||
2.3.10.27
viśveśvaraprasādena grahatvaṃ prāpya bhūmijaḥ |
divyaṃ lokaṃ jagāmāśu śukralokātparaṃ varam ||
2.3.10.28
ityuktaṃ śambhucaritaṃ satīvirahasaṃyutam |
tapasyācaraṇaṃ śambhoḥ śṛṇu cādarato mune ||
2.3.10.28.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe bhaumotpattiśivalīlāvarṇanaṃ nāma daśamo'dhyāyaḥ ||
2.3.10.28.p2
śrīgaṇeśāya namaḥ ||
2.3.10.28.p3
śrīgaurīśaṅkarābhyāṃ namaḥ ||
2.3.10.28.p4
śrīśivamahāpurāṇam ||
2.3.10.28.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe