Shivapurana 2.3.11: ekādaśo'dhyāyaḥ | śivahimavatsamāgamaḥ
Śivapurāṇa (complete text) 2.3.11
- Language
- Sanskrit
Contents
- 2.3.11.42 — 5 parts
ekādaśo'dhyāyaḥ | śivahimavatsamāgamaḥ
2.3.11.1
brahmovāca |
vardhamānā gireḥ putrī sā śaktirlokapūjitā |
aṣṭavarṣā yadā jātā himālayagṛhe satī ||
2.3.11.2
tajjanma giriśo jñātvā satīvirahakātaraḥ |
kṛtvā tamadbhutāmantarmumodātīva nārada ||
2.3.11.3
tasminnevāntare śambhurlaukikīṃ gatimāśritaḥ |
samādhātuṃ manaḥsamyaktapaḥ kartuṃ samaicchata ||
2.3.11.4
kāṃścidgaṇavarān śāntān nandyādīnavagṛhya ca |
gaṅgāvatāramagamaddhimavatprasthamuttamam ||
2.3.11.5
yatra gaṅgā nipatitā purā brahmapurātsrutā |
sarvāghaughavināśāya pāvanī paramā mune ||
2.3.11.6
tapaḥprārambhamakarotsthitvā tatra vaśī haraḥ |
ekāgraṃ cintayāmāsa svamātmānamatandritaḥ ||
2.3.11.7
ceto jñānabhavaṃ nityaṃ jyotīrūpaṃ nirāmayam |
jaganmayaṃ cidānandaṃ dvaitahīnaṃ nirāśrayam ||
2.3.11.6_2
hare dhyānapare tasminpramathā dhyānatatparāḥ |
abhavankecidapare nandibhṛṅgyādayo gaṇāḥ ||
2.3.11.9
sevāṃ cakrustadā kecidgaṇāḥ śambhoḥ parātmanaḥ |
naivākūjaṃstu maunā hi dvārapāḥ kecanābhavan ||
2.3.11.10
etasminnantare tatra jagāma himabhūdharaḥ |
śaṅkarasyauṣadhiprasthe śrutvāgamanamādarāt ||
2.3.11.11
praṇanāma prabhuṃ rudraṃ sagaṇo bhūdhareśvaraḥ |
samānarca ca suprītastuṣṭāva sa kṛtāñjaliḥ ||
2.3.11.12
himālaya uvāca |
devadeva mahādeva kapardicchaṅkara prabho |
tvayaiva lokanāthena pālitaṃ bhuvanatrayam ||
2.3.11.13
namaste devadeveśa yogirūpadharāya ca |
nirguṇāya namastubhyaṃ saguṇāya vihāriṇe ||
2.3.11.14
kailāsavāsine śambho sarvalokāṭanāya ca |
namaste parameśāya līlākārāya śūline ||
2.3.11.15
paripūrṇaguṇādhānavikārarahitāya te |
namo'nīhāya vīhāya dhīrāya paramātmane ||
2.3.11.16
abahirbhogakārāya janavatsalate namaḥ |
triguṇādhīśa māyeśa brahmaṇe paramātmane ||
2.3.11.17
viṣṇubrahmādisevyāya viṣṇubrahmasvarūpiṇe |
viṣṇubrahmaikadātre te bhaktapriya namo'stu te ||
2.3.11.18
taporata tapaḥsthāna sutapaḥphaladāyine |
tapaḥpriyāya śāntāya namaste brahmarūpiṇe ||
2.3.11.19
vyavahārakarāyaiva lokācārakarāya te |
saguṇāya pareśāya namo'stu paramātmane ||
2.3.11.20
līlā tava maheśānāvedyā sādhusukhapradā |
bhaktādhīnasvarūpo'si bhaktavaśyo hi karmakṛt ||
2.3.11.21
mama bhāgyodayāttatra tvamāgata iha prabho |
sanātha kṛtavānmāṃ tvaṃ varṇito dīnavatsalaḥ ||
2.3.11.22
adya me saphalaṃ janma saphalaṃ jīvanaṃ mama |
adya me saphalaṃ sarvaṃ yadatra tvaṃ samāgataḥ ||
2.3.11.23
jñātvā māṃ dāsamavyagramājñāṃ dehi maheśvara |
tvatsevāṃ ca mahāprītyā kuryāmahamananyadhīḥ ||
2.3.11.24
brahmovāca |
ityākarṇya vacastasya girīśasya maheśvaraḥ |
kiñcidunmīlya netre ca dadarśa sagaṇaṃ girim ||
2.3.11.25
sagaṇaṃ taṃ tathā dṛṣṭvā girirājaṃ vṛṣadhvajaḥ |
uvāca dhyānayogasthaḥ smayanniva jagatpatiḥ ||
2.3.11.26
maheśvara uvāca |
tava pṛṣṭhe tapastaptuṃ rahasyamahamāgataḥ |
yathā na ko'pi nikaṭaṃ samāyātu tathā kuru ||
2.3.11.27
tvaṃ mahātmā tapodhāmā munīnāṃ ca sadāśrayaḥ |
devānāṃ rākṣasānāṃ ca pareṣāṃ ca mahātmanām ||
2.3.11.28
sadā vāso dvijādīnāṃ gaṅgāpūtaśca nityadā |
paropakārī sarveṣāṃ girīṇāmadhipaḥ prabhuḥ ||
2.3.11.29
ahaṃ tapaścarāmyatra gaṅgāvataraṇe sthale |
āśritastava suprīto girirāja yatātmavān ||
2.3.11.30
nirvighnaṃ me tapaścātra hetunā yena śailapa |
sarvathā hi giriśreṣṭha suyatnaṃ kuru sāmpratam ||
2.3.11.31
mamedameva paramaṃ sevanaṃ parvatottama |
svagṛhaṃ gaccha satprītyā tatsampādaya yatnataḥ ||
2.3.11.32
brahmovāca |
ityuktvā jagatāṃ nāthastūṣṇīmāsa sa sūtikṛt |
girirājastadā śambhuṃ praṇayādidamabravīt ||
2.3.11.33
himālaya uvāca |
pūjito'si jagannātha mayā tvaṃ parameśvara |
svāgatenādya viṣaye sthitaṃ tvāṃ prārthayāmi kim ||
2.3.11.34
mahatā tapasā tvaṃ hi devairyatnaparāśritaiḥ |
na prāpyase maheśāna sa tvaṃ svayamupasthitaḥ ||
2.3.11.35
matto'pyanyatamo nāsti na matto'nyo'sti puṇyavān |
bhavāniti ca matpṛṣṭhe tapase samupasthitaḥ ||
2.3.11.36
devendrādadhikaṃ manye svātmānaṃ parameśvara |
sagaṇena tvayāgatya kṛto'nugrahabhāgaham ||
2.3.11.37
nirvighnaṃ kuru deveśa svatantraḥ paramaṃ tapaḥ |
kariṣye'haṃ tathā sevāṃ dāso'haṃ te sadā prabho ||
2.3.11.38
brahmovāca |
ityuktvā girirājo'sau svaṃ veśma drutamāgataḥ |
vṛttāntaṃ taṃ samācakhyau priyāyai ca samādarāt ||
2.3.11.39
nīyamānānparīvārān svagaṇānapi nārada |
samāhūyākhilāñchailapatiḥ provāca tattvataḥ ||
2.3.11.40
himālaya uvāca |
adya prabhṛti no yātu ko'pi gaṅgāvatāraṇam |
macchāsanena matprasthaṃ satyametadbravīmyaham ||
2.3.11.41
gamiṣyati janaḥ kaścittatra cettaṃ mahākhalam |
daṇḍayiṣye viśeṣeṇa satyametanmayoditam ||
2.3.11.42
iti tānsa niyamyāśu svagaṇānnikhilānmune |
suyatnaṃ kṛtavāñchailastaṃ śṛṇu tvaṃ vadāmi te ||
2.3.11.42.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivaśailasamāgamavarṇanaṃ nāmaikādaśo'dhyāyaḥ ||
2.3.11.42.p2
śrīgaṇeśāya namaḥ ||
2.3.11.42.p3
śrīgaurīśaṅkarābhyāṃ namaḥ ||
2.3.11.42.p4
śrīśivamahāpurāṇam ||
2.3.11.42.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (2)
- Kālikāpurāṇa — Sanskrit
- Skandapurāṇa (early; "Ambikākhaṇḍa") (ed. Bakker) — Sanskrit