Shivapurana 2.3.12: dvādaśo'dhyāyaḥ | śivahimavatsaṃvādaḥ
Śivapurāṇa (complete text) 2.3.12
- Language
- Sanskrit
Contents
dvādaśo'dhyāyaḥ | śivahimavatsaṃvādaḥ
2.3.12.1
brahmovāca |
atha śailapatirhṛṣṭaḥ satpuṣpaphalasañcayam |
samādāya svatanayāsahito'gāddharāntikam ||
2.3.12.2
sa gatvā trijagannāthaṃ praṇamya dhyānatatparam |
arpayāmāsa tanayāṃ kālīṃ tasmai hṛdādbhutām ||
2.3.12.3
phalapuṣpādikaṃ sarvaṃ tattadagre nidhāya saḥ |
agre kṛtvā sutāṃ śambhumidamāha ca śailarāṭ ||
2.3.12.4
himagiriruvāca |
bhagavaṃstanayā me tvāṃ sevituṃ candraśekharam |
samutsukā samānītā tvadārādhanakāṅkṣayā ||
2.3.12.5
sakhībhyāṃ saha nityaṃ tvāṃ sevatāmeva śaṅkaram |
anujānīhi tāṃ nātha mayi te yadyanugrahaḥ ||
2.3.12.6
brahmovāca |
atha tāṃ śaṅkaro'paśyatprathamārūḍhayauvanām |
phullendīvarapatrābhāṃ pūrṇacandranibhānanām ||
2.3.12.7
samastalīlāsaṃsthānaśubhaveṣavijṛmbhitām |
kambugrīvāṃ viśālākṣīṃ cārukarṇayugojjvalām ||
2.3.12.8
mṛṇālāyataparyantabāhuyugmamanoharām |
rājīvakuḍmalaprakhyau ghanapīnaudṛḍhaustanau ||
2.3.12.9
bibhratīṃ kṣīṇamadhyāṃ ca trivalīmadhyarājitām |
sthalapadmapratīkāśapādayugmavirājitām ||
2.3.12.10
dhyānapañjaranirbaddhamunimānasamapyalam |
darśanādbhraṃśane śaktāṃ yoṣidgaṇaśiromaṇim ||
2.3.12.11
dṛṣṭvā tāṃ tādṛśīṃ tāta dhyānināṃ ca manoharām |
vigrahe tantramantrāṇāṃ vardhinīṃ kāmarūpiṇīm ||
2.3.12.12
nyamīlayadṛśau śīghraṃ dadhyau svaṃ rūpamuttamam |
paratattvaṃ mahāyogī triguṇātparamavyayam ||
2.3.12.33
dṛṣṭvā tadānīṃ sakaleśvaraṃ vibhuṃ tapo juṣāṇaṃ vinimīlitekṣaṇam |
kapardinaṃ candrakalāvibhūṣaṇaṃ vedāntavedyaṃ paramāsane sthitam ||
2.3.12.14
vavanda śīrṣṇā ca punarhimācalaḥ sa saṃśayaṃ prāpadadīnasattvaḥ |
uvāca vākyaṃ jagadekabandhuṃ girīśvaro vākyavidāṃ variṣṭhaḥ ||
2.3.12.15
himācala uvāca |
devadeva mahādeva karuṇākara śaṅkara |
paśya māṃ śaraṇaṃ prāptamunmīlya nayane vibho ||
2.3.12.16
śiva śarva maheśāna jagadānandakṛtprabho |
tvāṃ nato'haṃ mahādeva sarvāpadvinivartakam ||
2.3.12.17
na tvāṃ jānanti deveśa vedāḥ śāstrāṇi kṛtsnaśaḥ |
atīto mahimādhvānaṃ tava vāṅmanasoḥ sadā ||
2.3.12.18
atadvyāvṛttitastvāṃ vai cakitaṃ cakitaṃ sadā |
abhidhatte śrutiḥ sarvā pareṣāṃ kā kathā matā ||
2.3.12.19
jānanti bahavo bhaktāstvatkṛpāṃ prāpya bhaktitaḥ |
śaraṇāgata bhaktānāṃ na kutrāpi bhramādikam ||
2.3.12.20
vijñaptiṃ śṛṇu matprītyā svadāsasya mamādhunā |
tava devājñayā tāta dīnatvādvarṇayāmi hi ||
2.3.12.21
sabhāgyo'haṃ mahādeva prasādāttava śaṅkara |
matvā svadāsaṃ māṃ nātha kṛpāṃ kuru namo'stu te ||
2.3.12.22
pratyahaṃ cāgamiṣyāmi darśanārthaṃ tava prabho |
anayā sutayā svāminnideśaṃ dātumarhasi ||
2.3.12.23
brahmovāca |
ityākarṇya vacastasyonmīlya netre maheśvaraḥ |
tyaktadhyānaḥ parāmṛśya devadevo'bravīdvacaḥ ||
2.3.12.24
maheśvara uvāca |
āgantavyaṃ tvayā nityaṃ darśanārthaṃ mamācala |
kumārīṃ sadane sthāpya nānyathā mama darśanam ||
2.3.12.25
brahmovāca |
maheśavacanaṃ śrutvā śivātātastathāvidham |
acalaḥ pratyuvācedaṃ giriśaṃ natakandharaḥ ||
2.3.12.26
himācala uvāca |
kasmānmayānayā sārdhaṃ nāgantavyaṃ taducyatām |
sevane kimayogyeyaṃ nāhaṃ vedmyatra kāraṇam ||
2.3.12.27
brahmovāca |
tato'bravīdgiriṃ śambhuḥ prahasanvṛṣabhadhvajaḥ |
lokācāraṃ viśeṣeṇa darśayanhi kuyoginām ||
2.3.12.28
śambhuruvāca |
iyaṃ kumārī suśroṇī tanvī candrānanā śubhā |
nānetavyā matsamīpe vārayāmi punaḥ punaḥ ||
2.3.12.29
māyārūpā smṛtā nārī vidvadbhirvedapāragaiḥ |
yuvatī tu viśeṣeṇa vighnakartrī tapasvinām ||
2.3.12.30
ahaṃ tapasvī yogī ca nirlipto māyayā sadā |
prayojanaṃ na yuvatyā vai striyā kiṃ me'sti bhūdhara ||
2.3.12.31
evaṃ punarna vaktavyaṃ tapasvivarasaṃśrita |
vedadharmapravīṇastvaṃ yato jñānivaro budhaḥ ||
2.3.12.32
bhavatyacala tatsaṅgādviṣayotpattirāśu vai |
vinaśyati ca vairāgyaṃ tato bhraśyati sattapaḥ ||
2.3.12.32.p1
atastapasvinā śaila na kāryā strīṣu saṅgatiḥ ||
2.3.12.33_2
mahāviṣayamūlaṃ sā jñānavairāgyanāśinī ||
2.3.12.34
brahmovāca |
ityādyuktvā bahutaraṃ mahāyogī maheśvaraḥ |
virarāma girīśaṃ taṃ mahāyogivaraḥ prabhuḥ ||
2.3.12.35
etacchrutvā vacanaṃ tasya śambho-rnirāmayaṃ niḥspṛhaṃ niṣṭhuraṃ ca |
kālītātaścakito'bhūtsurarṣe tadvatkiñcidvyākulaścāsa tūṣṇīm ||
2.3.12.36
tapasvinoktaṃ vacanaṃ niśamya tathā girīśaṃ cakitaṃ vicārya |
ataḥ praṇamyaiva śivaṃ bhavānī jagāda vākyaṃ viśadantadānīm ||
2.3.12.36.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivahimācalasaṃvādavarṇanaṃ nāma dvādaśo'dhyāyaḥ ||
2.3.12.36.p2
śrīgaṇeśāya namaḥ ||
2.3.12.36.p3
śrīgaurīśaṅkarābhyāṃ namaḥ ||
2.3.12.36.p4
śrīśivamahāpurāṇam ||
2.3.12.36.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (2)
- Kālikāpurāṇa — Sanskrit
- Skandapurāṇa (early; "Ambikākhaṇḍa") (ed. Bakker) — Sanskrit