Pramāṇa · Search · About · API

Shivapurana 2.3.14: caturdaśo'dhyāyaḥ | tārakavajrāṅgayorupattistattapovarṇanañca

Śivapurāṇa (complete text) 2.3.14

Language
Sanskrit

Contents

caturdaśo'dhyāyaḥ | tārakavajrāṅgayorupattistattapovarṇanañca

2.3.14.1

nārada uvāca |
viṣṇuśiṣya mahāśaiva samyaguktaṃ tvayā vidhe |
caritaṃ paramaṃ hyetacchivāyāśca śivasya ca ||

2.3.14.2

kastārakāsuro brahmanyena devāḥ prapīḍitāḥ |
kasya putrasya vai brūhi tatkathāṃ ca śivāśrayām ||

2.3.14.3

bhasmīcakāra sa kathaṃ śaṅkaraśca smaraṃ vaśī |
tadapi brūhi suprītyā'dbhutaṃ taccaritaṃ vibhoḥ ||

2.3.14.4

kathaṃ śivā tapo'tyugraṃ cakāra sukhahetave |
kathaṃ prāpa patiṃ śambhumādiśaktirjagatparā ||

2.3.14.5

etatsarvamaśeṣeṇa viśeṣeṇa mahābudha |
brūhi me śraddadhānāya svaputrāya śivātmane ||

2.3.14.6

brahmovāca putravarya mahāprājña surarṣe śaṃsitavrata |
vacmyahaṃ śaṅkaraṃ smṛtvā sarvaṃ taccaritaṃ śṛṇu ||

2.3.14.7

prathamaṃ tārakasyaiva bhavaṃ saṃśṛṇu nārada |
yadvadhārthaṃ mahāyatnaḥ kṛto devaiḥ śivāśrayaiḥ ||

2.3.14.8

mama putro marīciryaḥ kaśyapastasya cātmajaḥ |
trayodaśamitāstasya striyo dakṣasutāśca yāḥ ||

2.3.14.9

ditirjyeṣṭhā ca tatstrī hi suṣuve sā sutadvayam |
hiraṇyakaśipurjyeṣṭho hiraṇyākṣo'nujastataḥ ||

2.3.14.10

tau hatau viṣṇunā daityau nṛsiṃhakroḍarūpataḥ |
suduḥkhadau tato devāḥ sukhamāpuśca nirbhayāḥ ||

2.3.14.11

ditiśca duḥkhitāsītsā kaśyapaṃ śaraṇaṃ gatā |
punaḥsaṃsevya taṃ bhaktyā garbhamādhatta suvratā ||

2.3.14.12

tadvijñāya mahendro'pi labdhacchidro mahodyamī |
tadgarbhaṃ vyacchinattatra praviśya pavinā muhuḥ ||

2.3.14.13

tadvratasya prabhāveṇa na tadgarbho mamāra ha |
svapantyā daivayogena sapta saptābhavansutāḥ ||

2.3.14.14

devā āsansutāste ca nāmato maruto'khilāḥ |
svargaṃ yayustadendreṇa devarājātmasātkṛtāḥ ||

2.3.14.15

punarditiḥ patiṃ bheje'nutaptā nijakarmataḥ |
cakāra suprasannaṃ taṃ muniṃ paramasevayā ||

2.3.14.16

kaśyapa uvāca
tapaḥ kuru śucirbhūtvā brahmaṇaścāyutaṃ samāḥ |
cedbhaviṣyati tatpūrvaṃ bhavitā te sutastadā ||

2.3.14.17

tathā dityā kṛtaṃ pūrṇaṃ tattapaḥ śraddhayā mune |
tataḥ patyuḥ prāpya garbhaṃ suṣuve tādṛśaṃ sutam ||

2.3.14.18

vajrāṅganāmā so'bhūdvai ditiputro'maropamaḥ |
nāmatulyatanurvīraḥ supratāpyudbhavādbalī ||

2.3.14.19

jananīśāsanātsadyaḥ sa suto nirjarādhipam |
balāddhṛtvā dadau daṇḍaṃ vividhaṃ nirjarānapi ||

2.3.14.20

ditiḥ sukhamatīvāpa dṛṣṭvā śakrādidurdaśām |
amarā api śakrādyā jagmurduḥkhaṃ svakarmataḥ ||

2.3.14.21

tadāhaṃ kaśyapenāśu tatrāgatya susāmagīḥ |
devānatyājayaṃstasmātsadā devahite rataḥ ||

2.3.14.22

devānmuktvā sa vajrāṅgastataḥ provāca sādaram |
śivabhakto'tiśuddhātmā nirvikāraḥ prasannadhīḥ ||

2.3.14.23

vajrāṅga uvāca
indro duṣṭaḥ prajāghātī māturme svārthasādhakaḥ |
sa phalaṃ prāptavānadya svarājyaṃ hi karotu saḥ ||

2.3.14.24

māturājñāvaśādbrahmankṛtametanmayākhilam |
na me bhogābhilāṣo vai kasyacidbhuvanasya hi ||

2.3.14.25

tattvasāraṃ vidhe brūhi mahyaṃ vedavidāṃvara |
yena syāṃ susukhī nityaṃ nirvikāraḥ prasannadhīḥ ||

2.3.14.26

tacchrutvāhaṃ mune'vocaṃ sāttviko bhāva ucyate |
tattvasāra iti prītyā sṛjāmyekāṃ varāṃ striyam ||

2.3.14.27

varāṅgīṃ nāma tāṃ dattvā tasmai ditisutāya vai |
ayāṃ svadhāma suprītaḥ kaśyapastatpitāpi ca ||

2.3.14.28

tato daityaḥ sa vajrāṅgaḥ sāttvikaṃ bhāvamāśritaḥ |
āsuraṃ bhāvamutsṛjya nirvairaḥ sukhamāptavān ||

2.3.14.29

na babhūva varāṅgyā hi hṛdi bhāvo'tha sāttvikaḥ |
sakāmā svapatiṃ bheje śraddhayā vividhaṃ satī ||

2.3.14.30

atha tatsevanādāśu santuṣṭo'bhūnmahāprabhuḥ |
sa vajrāṅgaḥ patistasyā uvāca vacanaṃ tadā ||

2.3.14.31

vajrāṅgyuvāca |
kimicchasi priye brūhi kiṃ te manasi vartate |
tacchrutvānamya taṃ prāha sā patiṃ svamanoratham ||

2.3.14.32

varāṅgyuvāca |
cet prasanno'bhavastvaṃ vai sutaṃ me dehi satpate |
mahābalaṃ trilokasya jetāraṃ hariduḥkhadam ||

2.3.14.33

brahmovāca |
iti śrutvā priyāvākyaṃ vismito'bhūtsa ākulaḥ |
uvāca hṛdi sa jñānī sāttviko vairavarjitaḥ ||

2.3.14.34

priyecchati virodhaṃ vai surairme na hi rocate |
kiṃ kuryāṃ hi kva gaccheyaṃ kathaṃ naśyenna me paṇaḥ ||

2.3.14.35

priyāmanorathaścaiva pūrṇaḥ syāttrijagadbhavet |
kleśayuṅnitarāṃ bhūyo devāśca munayastathā ||

2.3.14.36

na pūrṇaḥ syātpriyākāmastadā me narako bhavet |
dvidhāpi dharmahānirvai bhavatītyanuśuśruvān ||

2.3.14.37

vajrāṅga itthaṃ babhrāma sa mune dharmasaṅkaṭe |
balābalaṃ dvayostatra vicicinta ca buddhitaḥ ||

2.3.14.38

śivecchayā sa hi mune vākyaṃ mene striyo budhaḥ |
tathāstviti vacaḥ prāha priyāṃ prati sa daityarāṭ ||

2.3.14.39

tadarthamakarottīvraṃ tapo'nyadduṣkaraṃ sa tu |
māṃ samuddiśya suprītyā bahuvarṣaṃ jitendriyaḥ ||

2.3.14.40

varaṃ dātumagāṃ tasmai dṛṣṭvāhaṃ tattapo mahat |
varaṃ brūhi hyavocaṃ taṃ suprasannena cetasā ||

2.3.14.41

vajrāṅgastu tadā prītaṃ māṃ dṛṣṭvā khe sthitaṃ vibhum |
supraṇamya bahustutvā varaṃ vavre priyāhitam ||

2.3.14.42

vajrāṅga uvāca |
sutaṃ dehi svamāturme mahāhitakaraṃ prabho |
mahābalaṃ supratāpaṃ susamarthaṃ taponidhim ||

2.3.14.43

brahmovāca |
ityākarṇya ca tadvākyaṃ tathāstvityabravaṃ mune |
ayāṃ svadhāma taddattvā vimanāḥ saṃsmaracchivam ||

2.3.14.43.c1

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe tārakotpattau vajrāṅgotpattitapovarṇanaṃ nāma caturdaśo'dhyāyaḥ ||

2.3.14.43.p2

śrīgaṇeśāya namaḥ ||

2.3.14.43.p3

śrīgaurīśaṅkarābhyāṃ namaḥ ||

2.3.14.43.p4

śrīśivamahāpurāṇam ||

2.3.14.43.p5

dvitīyāyāṃ rudrasaṃhitāyāṃ tṛtīyaḥ pārvatīkhaṇḍe