Shivapurana 2.3.15: pañcadaśo'dhyāyaḥ | tārakāsurataporājyam
Śivapurāṇa (complete text) 2.3.15
- Language
- Sanskrit
Contents
- 2.3.15.56 — 5 parts
pañcadaśo'dhyāyaḥ | tārakāsurataporājyam
2.3.15.1
brahmovāca |
atha sā garbhamādhatta varāṅgī tatpurādarāt |
sa vavardhābhyantare hi bahuvarṣaiḥ sutejasā ||
2.3.15.2
tataḥ sā samaye pūrṇe varāṅgī suṣuve sutam |
mahākāyaṃ mahāvīryaṃ prajvalantaṃ diśo daśa ||
2.3.15.3
tadaiva ca mahotpātā babhūvurduḥkhahetavaḥ |
jāyamāne sute tasminvarāṅgyāḥ suraduḥkhade ||
2.3.15.4
divi bhuvyantarikṣe ca sarvalokabhayaṅkarāḥ |
anarthasūcakāstāta trividhāḥ tānbravīmyaham ||
2.3.15.5
solkāścāśanayaḥ peturmahāśabdā bhayaṅkarāḥ |
udayaṃ cakrurutkṛṣṭāḥ ketavo duḥkhadāyakāḥ ||
2.3.15.6
cacāla vasudhā sādrirjajvaluḥ sakalā diśaḥ |
cukṣubhuḥ saritaḥ sarvāḥ sāgarāśca viśeṣataḥ ||
2.3.15.7
hūtkārānīrayan ghorānkharasparśo marudvavau |
unmūlayanmahāvṛkṣānvātyānīko rajodhvajaḥ ||
2.3.15.8
sarāhvoḥsūryavidhvostu muhuḥ paridhayo'bhavan |
mahābhayasya viprendra sūcakāḥsukhahārakāḥ ||
2.3.15.9
mahīdhravivarebhyaśca nirghātā bhayasūcakāḥ |
rathanirhrādatulyāśca jajñire'vasare tataḥ ||
2.3.15.10
sṛgālolūkaṭaṅkārairvamantyo mukhato'nalam |
antargrāmeṣu vikaṭaṃ praṇeduraśivāḥ śivāḥ ||
2.3.15.11
yatastato grāmasiṃhā unnamayya śirodharām |
saṅgītavadrodanavadvyamuñcanvividhānravān ||
2.3.15.12
khārkārarabhasā mattāḥ khurairghnanto rasāṃ kharāḥ |
varūthaśaḥ tadā tāta paryadhāvannitastataḥ ||
2.3.15.13
khagā udapatannīḍādrāsabhatrastamānasāḥ |
krośanto vyagracittāśca sthitimāpurna kutracit ||
2.3.15.14
śakṛnmūtramakārṣuśca goṣṭhe'raṇye bhayākulāḥ |
babhramuḥ sthitimāpurno paśavastāḍitā iva ||
2.3.15.15
gāvo'trasannasṛgdohā bāṣpanetrā bhayākulāḥ |
toyadā abhavaṃstatra bhayadāḥ pūyavarṣiṇaḥ ||
2.3.15.16
vyarudanpratimāstatra devānāmutpatiṣṇavaḥ |
vinānilaṃ drumāḥ peturgrahayuddhaṃ babhūva khe ||
2.3.15.17
ityādikā bahūtpātā jajñire munisattama |
ajñānino janāstatra menire viśvasamplavam ||
2.3.15.18
atha prajāpatirnāmākarottasyāsurasya vai |
tāraketi vicāryaiva kaśyapo hi mahaujasaḥ ||
2.3.15.19
mahāvīraḥ sa sahasā vyajyamānātmapauruṣaḥ |
vavṛdhe'tyaśmasāreṇa kāyenādripatiryathā ||
2.3.15.20
atho sa tārako daityo mahābalaparākramaḥ |
tapaḥ kartuṃ jananyāścājñāṃ yayāce mahāmanāḥ ||
2.3.15.21
prāptājñaḥ sa mahāmāyī māyināmapi mohakaḥ |
sarvadevajayaṃ kartuṃ tapo'rthaṃ mana ādadhe ||
2.3.15.22
madhorvanamupāgamya gurvājñāpratipālakaḥ |
vidhimuddiśya vidhivattapastepe sudāruṇam ||
2.3.15.23
ūrdhvabāhuścaikapādo raviṃ paśyansa cakṣuṣā |
śatavarṣaṃ tapaścakre dṛḍhacitto dṛḍhavrataḥ ||
2.3.15.24
aṅguṣṭhena bhuvaṃ spṛṣṭvā śatavarṣaṃ ca tādṛśaḥ |
tepe tapo dṛḍhātmā sa tārako'surarāṭ prabhuḥ ||
2.3.15.25
śatavarṣaṃ jalaṃ prāśnan śatavarṣaṃ ca vāyubhuk |
śatavarṣaṃ jale tiṣṭhañcchataṃ ca sthaṇḍile'tapat ||
2.3.15.26
śatavarṣaṃ tathā cāgnau śatavarṣamadhomukhaḥ |
śatavarṣaṃ tu hastasya talena ca bhuvaṃ sthitaḥ ||
2.3.15.27
śatavarṣaṃ tu vṛkṣasya śākhāmālambya vai mune |
pādābhyāṃ śucidhūmaṃ hi pibaṃścādhomukhastathā ||
2.3.15.28
evaṃ kaṣṭataraṃ tepe sutapaḥ sa tu daityarāṭ |
kāmamuddiśya vidhivacchṛṇvatāmapi dussaham ||
2.3.15.29
tatraivaṃ tapatastasya mahattejo vinissṛtam |
śirasaḥ sarvasaṃsarpi mahopadravakṛnmune ||
2.3.15.30
tenaiva devalokāste dagdhaprāyā babhūvire |
abhito duḥkhamāpannāḥ sarve devarṣayo mune ||
2.3.15.31
indraśca bhayamāpede'dhikaṃ deveśvarastadā |
tapasyatyadya kaścidvai matpadaṃ dharṣayiṣyati ||
2.3.15.32
akāṇḍe caiva brahmāṇḍaṃ saṃhariṣyatyayaṃ prabhuḥ |
iti saṃśayamāpannā niścayaṃ nopalebhire ||
2.3.15.33
tataḥ sarve susammantrya mithaste nirjararṣayaḥ |
mallokamagamanbhītā dīnā māṃ samupasthitāḥ ||
2.3.15.34
māṃ praṇamya susaṃstūya sarve te kliṣṭacetasaḥ |
kṛtastvañjalayo mahyaṃ vṛttaṃ sarvaṃ nyavedayan ||
2.3.15.35
ahaṃ sarvaṃ suniścitya kāraṇaṃ tasya saddhiyā |
varaṃ dātuṃ gatastatra yatra tapyati so'suraḥ ||
2.3.15.36
avocaṃ vacanaṃ taṃ vai varaṃ brūhītyahaṃ mune |
tapastaptaṃ tvayā tīvraṃ nādeyaṃ vidyate tava ||
2.3.15.37
ityevaṃ madvacaḥ śrutvā tārakaḥ sa mahāsuraḥ |
māṃ praṇamya susaṃstūya varaṃ vavre'tidāruṇam ||
2.3.15.38
tāraka uvāca |
tvayi prasanne varade kimasādhyaṃ bhavenmama |
ato yāce varaṃ tvattaḥ śṛṇu tanme pitāmaha ||
2.3.15.39
yadi prasanno deveśa yadi deyo varo mama |
deyaṃ varadvayaṃ mahyaṃ kṛpāṃ kṛtvā mamopari ||
2.3.15.40
tvayā ca nirmite loke sakale'sminmahāprabho |
mattulyo balavānnūnaṃ na bhavetko'pi vai pumān ||
2.3.15.41
śivavīryasamutpannaḥ putraḥsenāpatiryadā |
bhūtvā śastraṃ kṣipenmahyaṃ tadā me maraṇaṃ bhavet ||
2.3.15.42
ityukto'tha tadā tena daityenāhaṃ munīśvara |
varaṃ ca tādṛśaṃ dattvā svalokamagamaṃ drutam ||
2.3.15.43
daityo'pi sa varaṃ labdhvā manasepsitamuttamam |
suprasannataro bhūtvā śoṇitākhyapuraṃ gataḥ ||
2.3.15.44
abhiṣiktastadā rājye trailokyasyāsuraiḥ saha |
śukreṇa daityaguruṇājñayā me sa mahāsuraḥ ||
2.3.15.45
tatastu sa mahādaityo'bhavat trailokyanāyakaḥ |
svājñāṃ pravartayāmāsa pīḍayansacarācaram ||
2.3.15.46
rājyaṃ cakāra vidhivattrilokasya sa tārakaḥ |
prajāśca pālayāmāsa pīḍayannirjarādikān ||
2.3.15.47
tataḥ sa tārako daityasteṣāṃ ratnānyupādade |
indrādilokapālānāṃ svato dattāni tadbhayāt ||
2.3.15.48
indreṇairāvatastasya bhayāttasmai samarpitaḥ |
kubereṇa tadā dattā nidhayo navasaṅkhyakāḥ ||
2.3.15.49
varuṇena hayāḥ śubhrā ṛṣibhiḥ kāmakṛttathā |
indreṇoccaiḥ śravā divyo bhayāttasmai samarpitaḥ ||
2.3.15.50
yatra yatra śubhaṃ vastu dṛṣṭaṃ tenāsureṇa hi |
tattadgṛhītaṃ tarasā nissārastribhavo'bhavat ||
2.3.15.51
samudrāśca tathā ratnānyadustasmai bhayānmune |
akṛṣṭapacyāsītpṛthvī prajāḥ kāmadughākhilāḥ ||
2.3.15.52
sūryaśca tapate tadvattadduḥkhaṃ na yathā bhavet |
candrastu prabhayā dṛśyo vāyuḥ sarvānukūlyavān ||
2.3.15.53
devānāṃ caiva yaddravyaṃ pitṝṇāṃ ca parasya ca |
tatsarvaṃ samupādattamasureṇa durātmanā ||
2.3.15.54
vaśīkṛtya sa lokāṃstrīnsvayamindro babhūva ha |
advitīyaḥ prabhuścāsīdrājyaṃ cakre'dbhutaṃ vaśī ||
2.3.15.55
nissārya sakalāndevāndaityānasthāpayattataḥ |
svayaṃ niyojayāmāsa devayonin svakarmaṇi ||
2.3.15.56
atha tadbādhitā devāḥ sarve śakrapurogamāḥ |
mune māṃ śaraṇaṃ jagmuranāthā ativihvalāḥ ||
2.3.15.56.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe tārakāsurataporājyavarṇanaṃ nāma pañcadaśo'dhyāyaḥ ||
2.3.15.56.p2
śrīgaṇeśāya namaḥ ||
2.3.15.56.p3
śrīgaurīśaṅkarābhyāṃ namaḥ ||
2.3.15.56.p4
śrīśivamahāpurāṇam ||
2.3.15.56.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Kālikāpurāṇa — Sanskrit