Shivapurana 2.3.16: ṣoḍaśo'dhyāyaḥ | tārakāsurabhītānāṃ devānāṃ kṛte śivena sāntvanādānam
Śivapurāṇa (complete text) 2.3.16
- Language
- Sanskrit
Contents
- 2.3.16.46 — 5 parts
ṣoḍaśo'dhyāyaḥ | tārakāsurabhītānāṃ devānāṃ kṛte śivena sāntvanādānam
2.3.16.1
brahmovāca |
atha te nirjarāḥ sarve supraṇamya prajeśvaram |
tuṣṭuvuḥ parayā bhaktyā tārakeṇa prapīḍitāḥ ||
2.3.16.2
ahaṃ śrutvāmaranutiṃ yathārthāṃ hṛdayaṅgamām |
suprasannataro bhūtvā pratyavocaṃ divaukasaḥ ||
2.3.16.3
svāgataṃ svādhikārā vai nirvighnāḥ santi vaḥ surāḥ |
kimarthamāgatā yūyamatra sarve vadantu me ||
2.3.16.4
iti śrutvā vaco me te natvā sarve divaukasaḥ |
māmūcurnatakā dīnāstārakeṇa prapīḍitāḥ ||
2.3.16.5
devā ūcuḥ |
lokeśa tārako daityo vareṇa tava darpitaḥ |
nirasyāsmānhaṭhātsthānānyagrahīnno balāt svayam ||
2.3.16.6
bhavataḥ kimu na jñātaṃ duḥkhaṃ yannaḥ upasthitam |
tadduḥkhaṃ nāśaya kṣipraṃ vayaṃ te śaraṇaṃ gatāḥ ||
2.3.16.7
aharniśaṃ bādhate'smān yatra tatrāsthitānsa vai |
palāyamānāḥ paśyāmo yatra tatrāpi tārakam ||
2.3.16.8
tārakānnaśca yadduḥkhaṃ sambhūtaṃ sakaleśvara |
tena sarve vayaṃ tāta pīḍitā vikalā ati ||
2.3.16.9
agniryamo'tha varuṇo nirṛtirvāyureva ca |
anye dikpatayaścāpi sarve yadvaśagāminaḥ ||
2.3.16.10
sarve manuṣyadharmāṇaḥsarvaiḥ parikarairyutāḥ |
sevante taṃ mahādaityaṃ na svatantrāḥ kadācana ||
2.3.16.11
evaṃ tenārditā devā vaśagāstasya sarvadā |
tadicchākāryaniratāḥ sarve tasyānujīvinaḥ ||
2.3.16.12
yāvatyo vanitāḥ sarvā ye cāpyapsarasāṃ gaṇāḥ |
sarvāṃstānagrahīddaityastārako'sau mahābalī ||
2.3.16.13
na yajñāḥsampravartante na tapasyanti tāpasāḥ |
dānadharmādikaṃ kiñcinna lokeṣu pravarttate ||
2.3.16.14
tasya senāpatiḥ krauñco mahāpāpyasti dānavaḥ |
sa pātālatalaṃ gatvā bādhate tvaniśaṃ prajāḥ ||
2.3.16.15
tena nastārakeṇedaṃ sakalaṃ bhuvanatrayam |
hṛtaṃ haṭhājjagaddhātaḥ pāpenākaruṇātmanā ||
2.3.16.16
vayaṃ ca tatra yāsyāmo yatsthānaṃ tvaṃ vinirdiśeḥ |
svasthāstadvāritāstena lokanātha surāriṇā ||
2.3.16.17
tvaṃ no gatiśca śāstā ca dhātā trātā tvameva hi |
vayaṃ sarve tārakākhyavahnau dagdhāḥ suvihvalāḥ ||
2.3.16.18
tena krūrā upāya naḥ sarve hatabalāḥ kṛtāḥ |
vikāre sānnipāte vā vīryavantyauṣadhāni ca ||
2.3.16.19
yatrāsmākaṃ jayāśā hi haricakre sudarśane |
tatkuṇṭhitamabhūttasya kaṇṭhe puṣpamivārpitam ||
2.3.16.20
brahmovāca ityetadvacanaṃ śrutvā nirjarāṇāmahaṃ mune |
pratyavocaṃ surānsarvāṃstatkālasadṛśaṃ vacaḥ ||
2.3.16.21
brahmovāca mamaiva vacasā daityastārakākhyaḥ samedhitaḥ |
na mattastasya hananaṃ yujyate hi divaukasaḥ ||
2.3.16.22
tato naiva vadho yogyo yato vṛddhimupāgataḥ |
viṣavṛkṣo'pi saṃvardhya svayaṃ chettumasāmpratam ||
2.3.16.23
yuṣmākaṃ cākhilaṃ kāryaṃ kartuṃ yogyo hi śaṅkaraḥ |
kintu svayaṃ na śakto hi pratikartuṃ pracoditaḥ ||
2.3.16.24
tārakākhyastu pāpena svayameṣyati saṅkṣayam |
yathā yūyaṃ saṃvidadhvamupadeśakarastvaham ||
2.3.16.25
na mayā tārako vadhyo hariṇāpi hareṇa ca |
nānyenāpi surairvāpi madvarātsatyamucyate ||
2.3.16.26
śivavīryasamutpanno yadi syāttanayaḥ surāḥ |
sa eva tārakākhyasya hantā daityasya nāparaḥ ||
2.3.16.27
yamupāyamahaṃ vacmi taṃ kurudhvaṃ surottamāḥ |
mahādevaprasādena siddhimeṣyati sa dhruvam ||
2.3.16.28
satī dākṣāyaṇī pūrvaṃ tyaktadehā tu yābhavat |
sotpannā menakāgarbhātsā kathā viditā hi vaḥ ||
2.3.16.29
tasyā avaśyaṃ giriśaḥ kariṣyati karagraham |
tatkurudhvamupāyaṃ ca tathāpi tridivaukasaḥ ||
2.3.16.30
tathā vidhadhvaṃ sutarāṃ tasyāṃ tu pariyatnataḥ |
pārvatyāṃ menakājāyāṃ retaḥpratinipātane ||
2.3.16.31
tamūrdhvaretasaṃ śambhuṃ saiva pracyutaretasam |
kartuṃ samarthā nānyāsti tathā kāpyabalā balāt ||
2.3.16.32
sā sutā girirājasya sāmprataṃ prauḍhayauvanā |
tapasyantaṃ himagirau nityaṃ saṃsevate haram ||
2.3.16.33
vākyāddhimavataḥ kālī svapiturhaṭhataśśivā |
sakhībhyāṃ sevate sārdhaṃ dhyānasthaṃ parameśvaram ||
2.3.16.34
tāmagrato'rcamānāṃ vai trailokye varavarṇinīm |
dhyānāsakto maheśo hi manasāpi na hīyate ||
2.3.16.35
bhāryāṃ samīheta yathā sa kālīṃ candraśekharaḥ |
tathā vidhadhvaṃ tridaśā na cirādeva yatnataḥ ||
2.3.16.36
sthānaṃ gatvātha daityasya tamahaṃ tārakaṃ tataḥ |
nivārayiṣye kuhaṭhātsvasthānaṃ gacchatāmarāḥ ||
2.3.16.37
ityuktvāhaṃ surān śīghraṃ tārakākhyāsurasya vai |
upasaṅgamya suprītyā samābhāṣyedamabravam ||
2.3.16.38
brahmovāca tejoḥsāramimaṃ svargaṃ rājyaṃ tvaṃ paripāsi naḥ |
yadarthaṃ sutapastaptaṃ vāñchasi tvaṃ tato'dhikam ||
2.3.16.39
varaścāpyavaro datto na mayā svargarājyatā |
tasmātsvargaṃ parityajya kṣitau rājyaṃ samācara ||
2.3.16.40
devayogyāni tatraiva kāryāṇi nikhilānyapi |
bhaviṣyantyasuraśreṣṭha nātra kāryā vicāraṇā ||
2.3.16.41
ityuktvāhaṃ ca sambodhyāsuraṃ taṃ sakaleśvaraḥ |
smṛtvā śivāṃ ca saśivaṃ tatrāntardhānamāgataḥ ||
2.3.16.42
tārako'pi parityajya svargaṃ kṣitimathābhyagāt |
śoṇitākhyapure sthitvā sarvarājyaṃ cakāra saḥ ||
2.3.16.43
devāḥsarve'pi tacchutvā madvākyaṃ supraṇamya mām |
śakrasthānaṃ yayuḥ prītyā śakreṇa susamāhitāḥ ||
2.3.16.44
tatra gatvā militvā ca vicārya ca parasparam |
te sarve marutaḥ prītyā maghavantaṃ vaco'bruvan ||
2.3.16.45
devā ūcuḥ |
śambhoryathā śivāyāṃ vai rucirjāyeta kāmataḥ |
maghavaṃste prakartavyaṃ brahmoktaṃ sarvameva tat ||
2.3.16.46
brahmovāca |
ityevaṃ sarvavṛttāntaṃ vinivedya sureśvaram |
jagmuste sarvato devāḥ svaṃ svaṃ sthānaṃ mudānvitāḥ ||
2.3.16.46.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe devasāntvanavarṇanaṃ nāma ṣoḍaśo'dhyāyaḥ ||
2.3.16.46.p2
śrīgaṇeśāya namaḥ ||
2.3.16.46.p3
śrīgaurīśaṅkarābhyāṃ namaḥ ||
2.3.16.46.p4
śrīśivamahāpurāṇam ||
2.3.16.46.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Kālikāpurāṇa — Sanskrit