Shivapurana 2.3.17: saptadaśo'dhyāyaḥ | indrakāmadevasaṃvādaḥ
Śivapurāṇa (complete text) 2.3.17
- Language
- Sanskrit
Contents
saptadaśo'dhyāyaḥ | indrakāmadevasaṃvādaḥ
2.3.17.1
brahmovāca |
gateṣu teṣu deveṣu śakraḥ sasmāra vai smaram |
pīḍitastārakenāti daityena ca durātmanā ||
2.3.17.2
āgatastatkṣaṇātkāmaḥ savasanto ratipriyaḥ |
sāvalepo yuto ratyā trailokyavijayī prabhuḥ ||
2.3.17.3
praṇāmaṃ ca tataḥ kṛtvā sthitvā tatpurataḥ smaraḥ |
mahonnatamanāstāta sāñjaliḥ śakramabravīt ||
2.3.17.4
kāma uvāca |
kiṃ kāryaṃ te samutpannaṃ smṛto'haṃ kena hetunā |
tat tvaṃ kathaya deveśa tatkartuṃ samupāgataḥ ||
2.3.17.5
brahmovāca |
tacchrutvā vacanaṃ tasya kandarpasya sureśvaraḥ |
uvāca vacanaṃ prītyā yuktaṃ yuktamiti stuvan ||
2.3.17.6
śakra uvāca |
tava sādhu samārambho yanme kāryamupasthitam |
tatkaturmudyato'si tvaṃ dhanyo'si makaradhvaja ||
2.3.17.7
prastutaṃ śṛṇu madvākyaṃ kathayāmi tavāgrataḥ |
madīyaṃ caiva yatkāryaṃ tvadīyaṃ tanna cānyathā ||
2.3.17.8
mitrāṇi mama santyeva bahūni sumahānti ca |
paraṃ tu smara sanmitraṃ tvattulyaṃ na hi kutracit ||
2.3.17.9
jayārthaṃ me dvayaṃ tāta nirmitaṃ vajramuttamam |
vajraṃ ca niṣphalaṃ syādvai tvaṃ tu naiva kadācana ||
2.3.17.10
yato hitaṃ prajāyeta tataḥ ko nu priyaḥ paraḥ |
tasmānmitravarastvaṃ hi matkāryaṃ kartumarhasi ||
2.3.17.11
mama duḥkhaṃ samutpannamasādhyaṃ cāpi kālajam |
kenāpi naiva tacchakyaṃ dūrīkartuṃ tvayā vinā ||
2.3.17.12
dātuḥ parīkṣā durbhikṣe raṇe śūrasya jāyate |
āpatkāle tu mitrasyāśaktau strīṇāṃ kulasya hi ||
2.3.17.13
vinaye saṅkaṭe prāpte'vitathasya parokṣataḥ |
susnehasya tathā tāta nānyathā satyamīritam ||
2.3.17.14
prāptāyāṃ vai mamāpattāvavāryāyāṃ pareṇa hi |
parīkṣā ca tvadīyādyā mitravarya bhaviṣyati ||
2.3.17.15
na kevalaṃ madīyaṃ ca kāryamasti sukhāvaham |
kiṃ tu sarvasurādīnāṃ kāryametanna saṃśayaḥ ||
2.3.17.16
brahmovāca |
ityetanmaghavadvākyaṃ śrutvā tu makaradhvajāḥ |
uvāca premagambhīraṃ vākyaṃ susmitapūrvakam ||
2.3.17.17
kāma uvāca |
kimarthamitthaṃ vadasi nottaraṃ vacmyahaṃ tava |
upakṛtkṛtrimaṃ loke dṛśyate kathyate na ca ||
2.3.17.18
saṅkaṭe bahu yo brūte sa kiṃ kāryaṃ kariṣyati |
tathāpi ca mahārāja kathayāmi śṛṇu prabho ||
2.3.17.19
padaṃ te karṣituṃ yo vai tapastapati dāruṇam |
pātayiṣyāmyahaṃ taṃ ca śatruṃ te mitra sarvathā ||
2.3.17.20
kṣaṇena bhraṃśayiṣyāmi kaṭākṣeṇa varastriyāḥ |
devarṣidānavādīṃśca narāṇāṃ gaṇanā na me ||
2.3.17.21
vajraṃ tiṣṭhatu dūre vai śastrāṇyanyānyanekaśaḥ |
kiṃ te kāryaṃ kariṣyanti mayi mitra upasthite ||
2.3.17.22
brahmāṇaṃ vā hariṃ vāpi bhraṣṭaṃ kuryāṃ na saṃśayaḥ |
anyeṣāṃ gaṇanā nāsti pātayeyaṃ haraṃ tvapi ||
2.3.17.23
pañcaiva mṛdavo bāṇāste ca puṣpamayā mama |
cāpastridhā puṣpamayaśśiñjinī bhramarārjitā ||
2.3.17.23.p1
balaṃ sudayitā me hi vasantaḥ sacivaḥ smṛtaḥ |
ahaṃ pañcabalo deva mitraṃ mama sudhānidhiḥ | 24 ||
2.3.17.25
senādhipaśca śṛṅgāro hāvabhāvāśca sainikāḥ |
sarve me mṛdavaḥ śakra ahaṃ cāpi tathāvidhaḥ ||
2.3.17.26
yadyena pūryate kāryaṃ dhīmāṃstattena yojayet |
mama yogyaṃ tu yatkāryaṃ sarvaṃ tanme niyojaya ||
2.3.17.27
brahmovāca |
ityevaṃ tu vacastasya śrutvā śakraḥ suharṣitaḥ |
uvāca praṇamanvācā kāmaṃ kāntāsukhāvaham ||
2.3.17.28
śakra uvāca |
yatkāryaṃ manasoddiṣṭaṃ mayā tāta manobhava |
karttuṃ tat tvaṃ samartho'si nānyasmāttasya sambhavaḥ ||
2.3.17.29
śṛṇu kāma pravakṣyāmi yathārthaṃ mitrasattama |
yadarthe ca spṛhā jātā tava cādya manobhava ||
2.3.17.30
tārakākhyo mahādaityo brahmaṇo varamadbhutam |
abhūtajeyaḥ samprāpya sarveṣāmapi duḥkhadaḥ ||
2.3.17.31
tena sampīḍyate loko naṣṭā dharmā hyanekaśaḥ |
duḥkhitā nirjarāḥ sarve ṛṣayaśca tathākhilāḥ ||
2.3.17.32
devaiśca sakalaistena kṛtaṃ yuddhaṃ yathābalam |
sarveṣāṃ cāyudhānyatra viphalānyabhavanpurā ||
2.3.17.33
bhagnaḥ pāśo jaleśasya haricakraṃ sudarśanam |
tatkuṇṭhitamabhūttasya kaṇṭhe kṣiptaṃ ca viṣṇunā ||
2.3.17.34
etasya maraṇaṃ proktaṃ prajeśena durātmanaḥ |
śambhorvīryodbhavādbālānmahāyogīśvarasya hi ||
2.3.17.35
etatkāryaṃ tvayā sādhu kartavyaṃ suprayatnataḥ |
tataḥsyānmitravaryāti devānāṃ naḥ paraṃ sukham ||
2.3.17.36
mamāpi vihitaṃ tasmātsarvalokasukhāvaham |
mitradharmaṃ hṛdi smṛtvā kartumarhasi sāmpratam ||
2.3.17.37
śambhuḥsa girirāje hi tapaḥ paramamāsthitaḥ |
sa prabhurnāpi kāmena svatantraḥ parameśvaraḥ ||
2.3.17.38
tatsamīpe ca devārthaṃ pārvatī svasakhīyutā |
sevamānā tiṣṭhatīti pitrājñaptā mayā śrutam ||
2.3.17.39
yathā tasyāṃ rucistasya śivasya niyatātmanaḥ |
jāyeta nitarāṃ māra tathā kāryaṃ tvayā dhruvam ||
2.3.17.40
iti kṛtvā kṛtī syāstvaṃ sarvaṃ duḥkhaṃ vinaṅkṣyati |
loke sthāyī pratāpaste bhaviṣyati na cānyathā ||
2.3.17.41
brahmovāca |
ityuktaḥ sa tu kāmo hi praphullamukhapaṅkajaḥ |
premṇovāceti deveśaṃ kariṣyāmi na saṃśayaḥ ||
2.3.17.42
ityuktvā vacanaṃ tasmai tathetyomiti tadvacaḥ |
agrahīttarasā kāmaḥ śivamāyāvimohitaḥ ||
2.3.17.43
yatra yogīśvaraḥ sākṣāttapyate paramaṃ tapaḥ |
jagāma tatra suprītaḥ sadāraḥ savasantakaḥ ||
2.3.17.43.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śakrakāmasaṃvādavarṇanaṃ nāma saptadaśo'dhyāyaḥ ||
2.3.17.43.p2
śrīgaṇeśāya namaḥ ||
2.3.17.43.p3
śrīgaurīśaṅkarābhyāṃ namaḥ ||
2.3.17.43.p4
śrīśivamahāpurāṇam ||
2.3.17.43.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Kālikāpurāṇa — Sanskrit