Shivapurana 2.3.18: aṣṭādaśo'dhyāyaḥ | kāmakṛtavikāravarṇanam
Śivapurāṇa (complete text) 2.3.18
- Language
- Sanskrit
Contents
- 2.3.18.45 — 5 parts
aṣṭādaśo'dhyāyaḥ | kāmakṛtavikāravarṇanam
2.3.18.1
kāmavikāravarṇanaṃ brahmovāca |
tatra gatvā smaro garvī śivamāyāvimohitaḥ |
mohakaḥ sa madhoścādau dharmaṃ vistārayansthitaḥ ||
2.3.18.2
vasantasya ca yo dharmaḥ prasasāra sa sarvataḥ |
tapaḥsthāne maheśasyauṣadhiprasthe munīśvara ||
2.3.18.3
vanāni ca praphullāni pādapānāṃ mahāmune |
āsanviśeṣatastatra tatprabhāvānmunīśvara ||
2.3.18.4
puṣpāṇi sahakārāṇāmaśokavanikāsu vai |
virejussusmaroddīpakarāṇi surabhīṇyapi ||
2.3.18.5
kairavāṇi ca puṣpāṇi bhramarākalitāni ca |
babhūvurmadanāveśakarāṇi ca viśeṣataḥ ||
2.3.18.6
sukāmoddīpanakaraṃ kokilākalakūjitam |
āsīdati suramyaṃ hi manoharamatipriyam ||
2.3.18.7
bhramarāṇāṃ tathā śabdā vividhā abhavanmune |
manoharāśca sarveṣāṃ kāmoddīpakarā api ||
2.3.18.8
candrasya viśadā kāntirvikīrṇā hi samantataḥ |
kāmināṃ kāminīnāṃ ca dūtikā iva sābhavat ||
2.3.18.9
mānināṃ preraṇāyāsīttatkāle kāladīpikā |
mārutaśca sukhaḥ sādho vavau virahiṇo'priyaḥ ||
2.3.18.10
evaṃ vasantavistāro madanāveśakārakaḥ |
vanaukasāṃ tadā tatra munīnāṃ dussaho'tyabhūt ||
2.3.18.11
acetasāmapi tadā kāmāsaktirabhūnmune |
sucetasāṃ hi jīvānāṃ seti kiṃ varṇyate kathā ||
2.3.18.12
evaṃ cakāra sa madhuḥ svaprabhāvaṃ sudussaham |
sarveṣāṃ caiva jīvānāṃ kāmoddīpanakārakaḥ ||
2.3.18.13
akālanirmitaṃ tāta madhorvīkṣya harastadā |
āścaryaṃ paramaṃ mene svalīlāttatanuḥ prabhuḥ ||
2.3.18.14
atha līlākarastatra tapaḥ paramaduṣkaram |
tatāpa sa vaśīśo hi haro duḥkhaharaḥ prabhuḥ ||
2.3.18.15
vasante prasṛte tatra kāmo ratisamanvitaḥ |
cūtaṃ bāṇaṃ samākṛṣya sthitastadvāmapārśvataḥ ||
2.3.18.16
svaprabhāvaṃ vitastāra mohayansakalān janān |
ratyā yuktaṃ tadā kāmaṃ dṛṣṭvā ko vā na mohitaḥ ||
2.3.18.17
evaṃ pravṛttasuratau śṛṅgāro'pi gaṇaiḥ saha |
hāvabhāvayutastatra praviveśa harāntikam ||
2.3.18.18
madanaḥ prakaṭastatra nyavasaccittago bahiḥ |
na dṛṣṭavāṃstadā śambhośchidraṃ yena praviśyate ||
2.3.18.19
yadā cāprāptavivarastasminyogivare smaraḥ |
mahādeve tadā so'bhūnmahābhayavimohitaḥ ||
2.3.18.20
jvalajjvālāgnisaṅkāśabhālanetrasamanvitam |
dhyānasthaṃ śaṅkaraṃ ko vā samāsādayituṃ kṣamaḥ ||
2.3.18.21
etasminnantare tatra sakhībhyāṃ saṃyutā śivā |
jagāma śivapūjārthaṃ nītvā puṣpāṇyanekaśaḥ ||
2.3.18.22
pṛthivyāṃ yādṛśaṃ lokaiḥ saundaryaṃ varṇyate mahat |
tatsarvamadhikaṃ tasyāṃ pārvatyāmasti niścitam ||
2.3.18.23
ārtavāṇi supuṣpāṇi dhṛtāni ca tayā yadā |
tatsaundaryaṃ kathaṃ varṇyamapi varṣaśatairapi ||
2.3.18.24
yadā śivasamīpe tu gatā sā parvatātmajā |
tadaiva śaṅkaro dhyānaṃ tyaktvā kṣaṇamavasthitaḥ ||
2.3.18.25
tacchidraṃ prāpya madanaḥ prathamaṃ harṣaṇena tu |
bāṇena harṣayāmāsa pārśvasthaṃ candraśekharam ||
2.3.18.26
śṛṅgāraiśca tadā bhāvaiḥ sahitā pārvatī haram |
jagāma kāmasāhāyye mune surabhiṇā saha ||
2.3.18.27
tadaivākṛṣya taccāpaṃ rucyarthaṃ śūladhāriṇaḥ |
drutaṃ puṣpaśaraṃ tasmai smaro'muñcatsusaṃyataḥ ||
2.3.18.28
yathā nirantaraṃ nityamāgacchati tathā śivam |
taṃ namaskṛtya tatpūjāṃ kṛtvā tatpurataḥ sthitā ||
2.3.18.29
sā dṛṣṭā pārvatī tatra prabhuṇā giriśena hi |
vivṛṇvatī tadāṅgāni strīsvabhāvātsulajjayā ||
2.3.18.30
susaṃsmṛtya varaṃ tasyā vidhidattaṃ purā prabhuḥ |
śivo'pi varṇayāmāsa tadaṅgāni mudā mune ||
2.3.18.31
śiva uvāca |
kiṃ mukhaṃ kiṃ śaśāṅkaśca kiṃ netre cotpale ca kim |
bhrukuṭyau dhanuṣī caite kandarpasya mahātmanaḥ ||
2.3.18.32
adharaḥ kiṃ ca bimbaṃ kiṃ kiṃ nāsā śukacañcukā |
kiṃ svaraḥ kokilālāpaḥ kiṃ madhyaṃ cātha vedikā ||
2.3.18.33
kiṃ gatirvarṇyate hyasyāḥ kiṃ rūpaṃ varṇyate muhuḥ |
puṣpāṇi kiṃ ca varṇyante vastrāṇi ca tathā punaḥ ||
2.3.18.34
lālityaṃ cāru yatsṛṣṭau tadekatra vinirmitam |
sarvathā ramaṇīyāni sarvāṅgāni na saṃśayaḥ ||
2.3.18.35
aho dhanyatarā ceyaṃ pārvatyadbhutarūpiṇī |
etatsamā na trailokye nārī kāpi surūpiṇī ||
2.3.18.36
sulāvaṇyanidhiśceyamadbhutāṅgāni bibhratī |
vimohinī munīnāṃ ca mahāsukhavivardhīnī ||
2.3.18.37
brahmovāca |
ityevaṃ varṇayitvā tu tadaṅgāni muhurmuhuḥ |
vidhidattavarādhyāsāddharastu virarāma ha ||
2.3.18.38
hastaṃ vastrāntare yāvadacālayata śaṅkaraḥ |
strīsvabhāvācca sā tatra lajjitā dūrato gatā ||
2.3.18.39
vivṛṇvatī nijāṅgāni paśyantī ca muhurmuhuḥ |
suvīkṣaṇairmahāmodātsusmitābhūcchivā mune ||
2.3.18.40
evaṃ ceṣṭāṃ tadā dṛṣṭvā śambhurmohamupāgataḥ |
uvāca vacanaṃ caivaṃ mahālīlo maheśvaraḥ ||
2.3.18.41
asyā darśanamātreṇa mahānando bhavatyalam |
yadāliṅganametasyāḥ kuryāṃ kintu tataḥ sukham ||
2.3.18.42
kṣaṇamātraṃ vicāryetthaṃ sampūjya girijāṃ tataḥ |
prabuddhaḥ sa mahāyogī suvirakto jagāviti ||
2.3.18.43
kiṃ jātaṃ caritaṃ citraṃ kimahaṃ mohamāgataḥ |
kāmena vikṛtaścādya bhūtvāpi prabhurīśvaraḥ ||
2.3.18.44
īśvaro'haṃ yadīccheyaṃ parāṅgasparśanaṃ khalu |
tarhi ko'nyo'kṣamaḥ kṣudraḥ kiṃ kiṃ naiva kariṣyati ||
2.3.18.45
evaṃ vairāgyamāsādya paryaṅkāsādanaṃ ca tat |
vārayāmāsa sarvātmā pareśaḥ kiṃ patediha ||
2.3.18.45.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe kāmakṛtavikāravarṇanaṃ nāmāṣṭādaśo'dhyāyaḥ ||
2.3.18.45.p2
śrīgaṇeśāya namaḥ ||
2.3.18.45.p3
śrīgaurīśaṅkarābhyāṃ namaḥ ||
2.3.18.45.p4
śrīśivamahāpurāṇam ||
2.3.18.45.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Kālikāpurāṇa — Sanskrit