Shivapurana 2.3.19: ekonaviṃśo'dhyāyaḥ | śivena kāmadevavināśaḥ
Śivapurāṇa (complete text) 2.3.19
- Language
- Sanskrit
Contents
- 2.3.19.52 — 5 parts
ekonaviṃśo'dhyāyaḥ | śivena kāmadevavināśaḥ
2.3.19.1
nārada uvāca |
brahmanvidhe mahābhāga kiṃ jātaṃ tadanantaram |
kathaya tvaṃ prasādena tāṃ kathāṃ pāpanāśinīm ||
2.3.19.2
brahmovāca |
śrūyatāṃ sā kathā tāta yajjātaṃ tadanantaram |
tava snehātpravakṣyāmi śivalīlāṃ mudāvahām ||
2.3.19.3
dhairyasya vyasanaṃ dṛṣṭvā mahāyogī maheśvaraḥ |
vicicinta manasyevaṃ vismito'ti tataḥ param ||
2.3.19.4
śiva uvāca |
kimu vighnāḥ samutpannāḥ kurvatastapa uttamam |
kena me vikṛtaṃ cittaṃ kṛtamatra kukarmiṇā ||
2.3.19.5
kuvarṇanaṃ mayā prītyā parastryupari vai kṛtam |
jāto dharmavirodho'tra śrutisīmā vilaṅghitā ||
2.3.19.6
brahmovāca |
vicintyetthaṃ mahāyogī parameśaḥ satāṃ gatiḥ |
diśo vilokayāmāsa paritaḥ śaṅkitastadā ||
2.3.19.7
vāmabhāge sthitaṃ kāmaṃ dadarśākṛṣṭabāṇakam |
svaśaraṃ kṣeptukāmaṃ hi garvitaṃ mūḍhacetasam ||
2.3.19.8
taṃ dṛṣṭvā tādṛśaṃ kāmaṃ girīśasya parātmanaḥ |
sañjātaḥ krodhasammardastatkṣaṇādapi nārada ||
2.3.19.9
kāmaḥ sthito'ntarikṣe sa dhṛtvā tatsaśaraṃ dhanuḥ |
cikṣepāstraṃ durnivāramamoghaṃ śaṅkare mune ||
2.3.19.10
babhūvāmoghamastraṃ tu moghaṃ tatparamātmani |
samaśāmyattatastasminsaṅkruddhe parameśvare ||
2.3.19.11
moghībhūte śive sve'stre bhayamāpāśu manmathaḥ |
cakampe ca puraḥ sthitvā dṛṣṭvā mṛtyuñjayaṃ prabhum ||
2.3.19.12
sasmāra tridaśānsarvānśakrādīnbhayavihvalaḥ |
sa smaro muniśārdūla svaprayāse nirarthake ||
2.3.19.13
kāmena susmṛtā devāḥ śakrādyāste munīśvara |
āyayuḥ sakalāste hi śambhuṃ natvā ca tuṣṭuvuḥ ||
2.3.19.14
stutiṃ kurvatsu deveṣu kruddhasyāti harasya hi |
tṛtīyāttasya netrādvai nissasāra tato mahān ||
2.3.19.15
lalāṭamadhyagāttasmātsavahnirdrutasambhavaḥ |
jajvālordhvaśikho dīptaḥ pralayāgnisamaprabhaḥ ||
2.3.19.16
utpatya gagane tūrṇaṃ nipatya dharaṇī tale |
bhrāmaṃ bhrāmaṃ svaparitaḥ papāta medinīṃ pari ||
2.3.19.17
bhasmasātkṛtavānsādho madanaṃ tāvadeva hi |
yāvacca marutāṃ vācaḥ kṣamyatāṃ kṣamyatāmiti ||
2.3.19.18
hate tasminsmare vīre deva duḥkhamupāgatāḥ |
rurudurvihvalāścātikrośantaḥ kimabhūditi ||
2.3.19.19
śvetāṅgā vikṛtātmā ca girirājasutā tadā |
jagāma mandiraṃ svaṃ ca samādāya sakhījanam ||
2.3.19.20
kṣaṇamātraṃ ratistatra visaṃjñā sābhavattadā |
bhartṛmṛtyujaduḥkhena patitā sā mṛtā iva ||
2.3.19.21
jātāyāṃ caiva saṃjñāyāṃ ratiratyantavihvalā |
vilalāpa tadā tatroccarantī vividhaṃ vacaḥ ||
2.3.19.22
ratiruvāca |
kiṃ karomi kva gacchāmi kiṃ kṛtaṃ daivatairiha |
matsvāminaṃ samāhūya nāśayāmāsuruddhatam ||
2.3.19.23
hā hā nātha smara svāminprāṇapriya sukhaprada |
idaṃ tu kimabhūdatra hā hā priya priyeti ca ||
2.3.19.24
brahmovāca |
itthaṃ vilapatī sā tu vadantī bahudhā vacaḥ |
hastau pādau tadāsphālya keśānatroṭayattadā ||
2.3.19.25
tadvilāpaṃ tadā śrutvā tatra sarve vanecarāḥ |
abhavanduḥkhitāḥ sarve sthāvarā api nārada ||
2.3.19.26
etasminnantare tatra devāḥ śakrādayo'khilāḥ |
ratimūcuḥ samāśvāsya saṃsmaranto maheśvaram ||
2.3.19.27
devā ūcuḥ |
kiñcidbhasma gṛhītvā tu rakṣa yatnādbhayaṃ tyaja |
jīvayiṣyati sa svāmī lapsyase tvaṃ punaḥ priyam ||
2.3.19.28
sukhadātā na ko'pyasti duḥkhadātā na kaścana |
sarvo'pi svakṛtaṃ bhuṅkte devān śocasi vai vṛthā ||
2.3.19.29
brahmovāca |
ityāśvāsya ratiṃ devāḥ sarve śivamupāgatāḥ |
suprasādya śivaṃ bhaktyā vacanaṃ cedamabruvan ||
2.3.19.30
devā ūcuḥ |
bhagavan śrūyatāmetadvacanaṃ naḥ śubhaṃ prabho |
kṛpāṃ kṛtvā maheśāna śaraṇāgatavatsala ||
2.3.19.31
suvicāraya suprītyā kṛtiṃ kāmasya śaṅkara |
kāmenaitatkṛtaṃ yatra na svārthaṃ tanmaheśvara ||
2.3.19.32
duṣṭena pīḍitairdevaistārakeṇākhilairvibho |
karma tatkāritaṃ nātha nānyathā viddhi śaṅkara ||
2.3.19.33
ratirekākinī deva vilāpaṃ duḥkhitā satī |
karoti giriśa tvaṃ ca tāmāśvāsaya sarvada ||
2.3.19.34
saṃhāraṃ kartukāmo'si krodhenānena śaṅkara |
daivataiḥ saha sarveṣāṃ hatavāṃstaṃ yadi smaram ||
2.3.19.35
duḥkhaṃ tasyā raterdṛṣṭvā naṣṭaprāyāśca devatāḥ |
tasmāttvayā ca kartavyaṃ ratyāśśokāpanodanam ||
2.3.19.36
brahmovāca |
ityākarṇya vacasteṣāṃ prasanno bhagavān śivaḥ |
devānāṃ sakalānāṃ ca vacanaṃ cedamabravīt ||
2.3.19.37
śiva uvāca |
devāśca ṛṣayaḥ sarve madvacaḥ śṛṇutādarāt |
matkopena ca yajjātaṃ tattathā nānyathā bhavet ||
2.3.19.38
anaṅgastāvadeva syātkāmo ratipatiḥ prabhuḥ |
yāvaccāvataretkṛṣṇo dharaṇyāṃ rukmiṇīpatiḥ ||
2.3.19.39
dvārakāyāṃ yadā sthitvā putrānutpādayiṣyati |
tadā kṛṣṇastu rukmiṇyāṃ kāmamutpādayiṣyati ||
2.3.19.40
pradyumnaṃ nāma tasyaiva bhaviṣyati na saṃśayaḥ |
jātamātraṃ tu taṃ putraṃ śambaraḥ saṃhariṣyati ||
2.3.19.41
hṛtvā prāsya samudraṃ taṃ śambaro dānavottamaḥ |
mṛtaṃ jñātvā vṛthā mūḍho nagaraṃ svaṃ gamiṣyati ||
2.3.19.42
tāvacca nagaraṃ tasya rate stheyaṃ yathāsukham |
tatraiva svapateḥ prāptiḥ pradyumnasya bhaviṣyati ||
2.3.19.43
tatra kāmo militvā taṃ hatvā śambaramāhave |
bhaviṣyati sukhī devāḥ pradyumnākhyaḥ svakāminīm ||
2.3.19.44
tadīyaṃ caiva yad dravyaṃ nītvā sa nagaraṃ punaḥ |
gamiṣyati tayā sārdhaṃ devāḥ satyaṃ vaco mama ||
2.3.19.45
brahmovāca |
iti śrutvā vacaḥ śambhordevā ūcuḥ praṇamya tam |
kiñciducchvasitāścitte karau baddhvā natāṅgakāḥ ||
2.3.19.46
devā ūcuḥ |
devadeva mahādeva karuṇāsāgara prabho |
śīghraṃ jīvaya kāmaṃ tvaṃ rakṣa prāṇān raterhara ||
2.3.19.47
brahmovāca |
ityākarṇyāmaravacaḥ prasannaḥ parameśvaraḥ |
punarbabhāṣe karuṇāsāgaraḥ sakaleśvaraḥ ||
2.3.19.48
śiva uvāca |
he devāḥ suprasanno'smi jīvayiṣyāmi cāntare |
kāmaḥ sa madgaṇo bhūtvā vihariṣyati nityaśaḥ ||
2.3.19.49
nākhyeyamidamākhyānaṃ kasyacitpurataḥ surāḥ |
gacchata svasthalaṃ dukhaṃ nāśayiṣyāmi sarvataḥ ||
2.3.19.50
brahmovāca |
ityuktvāntardadhe rudro devānāṃ stuvatāṃ tadā |
sarve devāḥ suprasannā babhūvurgatavismayāḥ ||
2.3.19.51
tatastāṃ ca samāśvāsya rudrasya vacane sthitāḥ |
uktvā vacastadīyaṃ ca svaṃ svaṃ dhāma yayurmune ||
2.3.19.52
kāmapatnī samādiṣṭaṃ nagaraṃ sā gatā tadā |
pratīkṣamāṇā taṃ kālaṃ rudrādiṣṭaṃ munīśvara ||
2.3.19.52.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe kāmanāśavarṇanaṃ nāmaikonaviṃśo'dhyāyaḥ ||
2.3.19.52.p2
śrīgaṇeśāya namaḥ ||
2.3.19.52.p3
śrīgaurīśaṅkarābhyāṃ namaḥ ||
2.3.19.52.p4
śrīśivamahāpurāṇam ||
2.3.19.52.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Brahmavaivartapurāṇa — Vyāsa, Sanskrit