Shivapurana 2.3.20: viṃśo'dhyāyaḥ | vaḍavānalacaritam
Śivapurāṇa (complete text) 2.3.20
- Language
- Sanskrit
Contents
viṃśo'dhyāyaḥ | vaḍavānalacaritam
2.3.20.1
nārada uvāca |
vidhe netrasamudbhūtavahnijvālā harasya sā |
gatā kutra vada tvaṃ taccaritaṃ śaśimaulinaḥ ||
2.3.20.2
brahmovāca |
yadā bhasma cakārāśu tṛtīyanayanānalaḥ |
śambhoḥ kāmaṃ prajajvāla sarvato viphalastadā ||
2.3.20.2.p1
hāhākāro mahānāsīt trailokye sacarācare |
sarve devarṣayastāta śaraṇaṃ māṃ yayurdrutam | 3 ||
2.3.20.4
sarve nivedayāmāsustadduḥkhaṃ mahyamākulāḥ |
supraṇamya susaṃstūya karau baddhvā natānanāḥ ||
2.3.20.5
tacchrutvāhaṃ śivaṃ smṛtvā taddhetuṃ suvimṛśya ca |
gatastatra vinītātmā trilokāvanahetave ||
2.3.20.6
sandagdhukāmaḥ sa śucirjvālāmālātidīpitaḥ |
stambhito'raṃ mayā śambhuprasādāptasutejasā ||
2.3.20.7
atha krodhamayaṃ vahniṃ dagdhukāmaṃ jagattrayam |
vāḍavaṃ tamakarṣaṃ ca saumyajvālāmukhaṃ mune ||
2.3.20.8
taṃ vāḍavatanumahaṃ samādāya śivecchayā |
sāgaraṃ samagāṃ lokahitāya jagatāṃ patiḥ ||
2.3.20.9
āgataṃ māṃ samālokya sāgarassāñjalirmune |
dhṛtvā ca pauruṣaṃ rūpamāgataḥ sannidhiṃ mama ||
2.3.20.10
supraṇamyātha māṃ sindhuḥ saṃstūya ca yathāvidhi |
sa māmuvāca suprītyā sarvalokapitāmaham ||
2.3.20.11
sāgara uvāca |
kimarthamāgato'si tvaṃ brahmannatrākhilādhipa |
tannideśaya suprītyā matvā māṃ ca svasevakam ||
2.3.20.12
athāhaṃ sāgaravacaḥ śrutvā prītipurassaram |
prāvocaṃ śaṅkaraṃ smṛtvā laukikaṃ hitamāvahan ||
2.3.20.13
brahmovāca |
śṛṇu tāta mahādhīmansarvalokahitāvaha |
vacmyahaṃ prītitaḥsindho śivecchāprerito hṛdā ||
2.3.20.14
ayaṃ krodho maheśasya vāḍavātmā mahāprabhuḥ |
dagdhvā kāmaṃ drutaṃ sarvaṃ dagdhukāmo'bhavattataḥ ||
2.3.20.15
prārthito'haṃ suraiḥ śīghraṃ pīḍitaiḥ śaṅkarecchayā |
tatrāgatya drutaṃ taṃ vai tāta stambhitavān śucim ||
2.3.20.16
vāḍavaṃ rūpamādhatta tamādāyāgato'tra ha |
nirdiśāmi jalādhāra tvāmahaṃ karuṇākaraḥ ||
2.3.20.17
ayaṃ krodhī maheśasya vāḍavaṃ rūpamāśritaḥ |
jvālāmukhastvayā dhāryo yāvadābhūtasamplavam ||
2.3.20.18
yadātrāhaṃ samāgamya vatsyāmi saritāṃ pate |
tadā tvayā parityājyaḥ krodho'yaṃ śāṅkaro'dbhutaḥ ||
2.3.20.19
bhojanaṃ toyametasya tava nityaṃ bhaviṣyati |
yatnādevāvadhāryo'yaṃ yathā nopaiti cāntaram ||
2.3.20.20
ityukto hi mayā sindhuraṅgīcakre tadā dhruvam |
grahītuṃ vāḍavaṃ vahniṃ raudraṃ cāśakyamanyataḥ ||
2.3.20.21
tataḥ praviṣṭo jaladhau sa vāḍavatanuḥ śuciḥ |
vāryaughānsudahaṃstasya jvālāmālābhidīpitaḥ ||
2.3.20.22
tataḥsantuṣṭacetaskaḥ svaṃ dhāmāhaṃ gato mune |
antardhānamagātsindhurdivyarūpaḥ praṇamya mām ||
2.3.20.23
svāsthyaṃ prāpa jagatsarvaṃ nirmuktaṃ tadbhavādbhayāt |
devā babhūvuḥ sukhino munayaśca mahāmune ||
2.3.20.23.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe vaḍavānalacaritavarṇanaṃ nāma viṃśo'dhyāyaḥ ||
2.3.20.23.p2
śrīgaṇeśāya namaḥ ||
2.3.20.23.p3
śrīgaurīśaṅkarābhyāṃ namaḥ ||
2.3.20.23.p4
śrīśivamahāpurāṇam ||
2.3.20.23.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe