[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Śivapurāṇa](https://indike.org/pramana/in.purana.siva) › [Shivapurana (complete text)](https://indike.org/pramana/in.purana.siva*complete-2) › 2.3.22 # Shivapurana 2.3.22: dvāviṃśo'dhyāyaḥ | pārvatītapovarṇanam Śivapurāṇa (complete text) 2.3.22 - **Language:** Sanskrit ## Contents - [2.3.22.3](https://indike.org/pramana/in.purana.siva*complete-2.2.3.22.3) — 2 parts - [2.3.22.11](https://indike.org/pramana/in.purana.siva*complete-2.2.3.22.11) — 2 parts - [2.3.22.71](https://indike.org/pramana/in.purana.siva*complete-2.2.3.22.71) — 5 parts ### dvāviṃśo'dhyāyaḥ | pārvatītapovarṇanam ### [2.3.22.1](https://indike.org/pramana/in.purana.siva*complete-2.2.3.22.1) brahmovāca | tvayi devamune yāte pārvatī hṛṣṭamānasā | tapaḥsādhyaṃ haraṃ mene tapo'rthaṃ mana ādadhe || ### [2.3.22.2](https://indike.org/pramana/in.purana.siva*complete-2.2.3.22.2) tataḥ sakhyau samādāya jayāṃ ca vijayāṃ tathā | mātaraṃ pitaraṃ caiva sakhībhyāṃ paryapṛcchata || ### [2.3.22.3](https://indike.org/pramana/in.purana.siva*complete-2.2.3.22.3) prathamaṃ pitaraṃ gatvā himavantaṃ nageśvaram | paryapṛcchatsupraṇamya vinayena samanvitā || ### [2.3.22.3.p1](https://indike.org/pramana/in.purana.siva*complete-2.2.3.22.3.p1) sakhyāvūcatuḥ - himavan śrūyatāṃ putrīvacanaṃ kathyate'dhunā || ### [2.3.22.3.p2](https://indike.org/pramana/in.purana.siva*complete-2.2.3.22.3.p2) sā svayaṃ caiva dehasya rūpasyāpi tathā punaḥ | 4 || ### [2.3.22.5](https://indike.org/pramana/in.purana.siva*complete-2.2.3.22.5) bhavato hi kulasyāsya sāphalyaṃ kartumicchati | tapasā sādhanīyo'sau nānyathā dṛśyatāṃ vrajet || ### [2.3.22.6](https://indike.org/pramana/in.purana.siva*complete-2.2.3.22.6) tasmācca parvataśreṣṭha deyājñā bhavatādhunā | tapaḥ karotu girijā vanaṃ gatveti sādaram || ### [2.3.22.7](https://indike.org/pramana/in.purana.siva*complete-2.2.3.22.7) brahmovāca | ityevaṃ ca tadā pṛṣṭaḥ sakhībhyāṃ munisattama | pārvatyā suvicāryātha girirājo'bravīdidam || ### [2.3.22.8](https://indike.org/pramana/in.purana.siva*complete-2.2.3.22.8) himālaya uvāca | mahyaṃ ca rocate'tyarthaṃ menāyai rucyatāṃ punaḥ | yathedaṃ bhavitavyaṃ ca kimataḥ paramuttamam || ### [2.3.22.9](https://indike.org/pramana/in.purana.siva*complete-2.2.3.22.9) sāphalyaṃ tu madīyasya kulasya ca na saṃśayaḥ | mātre tu rucyate cedvai tataḥ śubhataraṃ nu kim || ### [2.3.22.10](https://indike.org/pramana/in.purana.siva*complete-2.2.3.22.10) brahmovāca | ityevaṃ vacanaṃ pitrā proktaṃ śrutvā tu te tadā | jagmaturmātaraṃ sakhyau tadājñapte tayā saha || ### [2.3.22.11](https://indike.org/pramana/in.purana.siva*complete-2.2.3.22.11) gatvā tu mātaraṃ tasyāḥ pārvatyāste ca nārada | supraṇamya karau badhvocaturvacanamādarāt || ### [2.3.22.11.p1](https://indike.org/pramana/in.purana.siva*complete-2.2.3.22.11.p1) sakhyāvūcatuḥ mātastvaṃ vacanaṃ putryāḥ śṛṇu devi namo'stu te || ### [2.3.22.11.p2](https://indike.org/pramana/in.purana.siva*complete-2.2.3.22.11.p2) suprasannatayā tadvai śrutvā kartumihārhasi | 12 || ### [2.3.22.13](https://indike.org/pramana/in.purana.siva*complete-2.2.3.22.13) taptukāmā tu te putrī śivārthaṃ paramaṃ tapaḥ | prāptānujñā pituścaiva tubhyaṃ ca paripṛcchati || ### [2.3.22.14](https://indike.org/pramana/in.purana.siva*complete-2.2.3.22.14) iyaṃ svarūpasāphalyaṃ kartukāmā pativrate | tvadājñā yadi jāyeta tapyate ca tathā tapaḥ || ### [2.3.22.15](https://indike.org/pramana/in.purana.siva*complete-2.2.3.22.15) brahmovāca | ityuktvā ca tataḥsakhyau tūṣṇīmāstāṃ munīśvara | nāṅgīcakāra menā sā tadvākyaṃ khinnamānasā || ### [2.3.22.16](https://indike.org/pramana/in.purana.siva*complete-2.2.3.22.16) tataḥ sā pārvatī prāha svayamevātha mātaram | karau baddhvā vinītātmā smṛtvā śivapadāmbujam || ### [2.3.22.17](https://indike.org/pramana/in.purana.siva*complete-2.2.3.22.17) pārvatyuvāca | mātastaptuṃ gamiṣyāmi prātaḥ prāptuṃ maheśvaram | anujānīhi māṃ gantuṃ tapase'dya tapovanam || ### [2.3.22.18](https://indike.org/pramana/in.purana.siva*complete-2.2.3.22.18) brahmovāca | ityākarṇya vacaḥ putryā menā duḥkhamupāgatā | sopāhūya tadā putrīmuvāca vikalā satī || ### [2.3.22.19](https://indike.org/pramana/in.purana.siva*complete-2.2.3.22.19) menovāca | duḥkhitāsi śive putrī tapastaptuṃ purā yadi | tapaścara gṛhe'dya tvaṃ na bahirgaccha pārvati || ### [2.3.22.20](https://indike.org/pramana/in.purana.siva*complete-2.2.3.22.20) kutra yāsi tapaḥ kartuṃ devāḥ santi gṛhe mama | tīrthāni ca samastāni kṣetrāṇi vividhāni ca || ### [2.3.22.21](https://indike.org/pramana/in.purana.siva*complete-2.2.3.22.21) kartavyo na haṭhaḥ putri gantavyaṃ na bahiḥ kvacit | sādhitaṃ kiṃ tvayā pūrvaṃ punaḥ kiṃ sādhayiṣyasi || ### [2.3.22.22](https://indike.org/pramana/in.purana.siva*complete-2.2.3.22.22) śarīraṃ komalaṃ vatse tapastu kaṭhinaṃ mahat | etasmāttu tvayā kāryaṃ tapo'tra na bahirvraja || ### [2.3.22.23](https://indike.org/pramana/in.purana.siva*complete-2.2.3.22.23) strīṇāṃ tapovanagatirna śrutā kāmanārthinī | tasmāttvaṃ putri mā kārṣīḥ tapo'rthaṃ gamanaṃ prati || ### [2.3.22.24](https://indike.org/pramana/in.purana.siva*complete-2.2.3.22.24) brahmovāca | ityevaṃ bahudhā putrī tanmātrā vinivāritā | saṃvade na sukhaṃ kiñcidvinārādhya maheśvaram || ### [2.3.22.25](https://indike.org/pramana/in.purana.siva*complete-2.2.3.22.25) taponiṣiddhā tapase vanaṃ gantuṃ ca menayā | hetunā tena someti nāma prāpa śivā tadā || ### [2.3.22.26](https://indike.org/pramana/in.purana.siva*complete-2.2.3.22.26) atha tāṃ duḥkhitāṃ jñātvā menā śailapriyā śivām | nideśaṃ sā dadau tasyāḥ pārvatyāstapase mune || ### [2.3.22.27](https://indike.org/pramana/in.purana.siva*complete-2.2.3.22.27) māturājñāṃ ca samprāpya suvratā munisattama | tataḥ svānte sukhaṃ lebhe pārvatī smṛtaśaṅkarā || ### [2.3.22.28](https://indike.org/pramana/in.purana.siva*complete-2.2.3.22.28) mātaraṃ pitaraṃ sātha praṇipatya mudā śivā | sakhībhyāṃ ca śivaṃ smṛtvā tapastaptuṃ samudgatā || ### [2.3.22.29](https://indike.org/pramana/in.purana.siva*complete-2.2.3.22.29) hitvā matānyanekāni vastrāṇi vividhāni ca | valkalāni dhṛtānyāśu mauñjīṃ baddhvā tu śobhanām || ### [2.3.22.30](https://indike.org/pramana/in.purana.siva*complete-2.2.3.22.30) hitvā hāraṃ tathā carma mṛgasya paramaṃ dhṛtam | jagāma tapase tatra gaṅgāvataraṇaṃ prati || ### [2.3.22.31](https://indike.org/pramana/in.purana.siva*complete-2.2.3.22.31) śambhunā kurvatā dhyānaṃ yatra dagdho manobhavaḥ | gaṅgāvataraṇo nāma prastho himavataḥsa ca || ### [2.3.22.32](https://indike.org/pramana/in.purana.siva*complete-2.2.3.22.32) haraśūnyo'tha dadṛśe sa prastho himabhūbhṛtaḥ | kālyā tatretya bhostāta pārvatyā jagadambayā || ### [2.3.22.33](https://indike.org/pramana/in.purana.siva*complete-2.2.3.22.33) yatra sthitvā purā śambhuḥ taptavāndustaraṃ tapaḥ | tatra kṣaṇaṃ tu sā sthitvā babhūva virahārditā || ### [2.3.22.34](https://indike.org/pramana/in.purana.siva*complete-2.2.3.22.34) hā hareti śivā tatra rudantī sā gireḥ sutā | vilalāpātiduḥkhārtā cintāśokasamanvitā || ### [2.3.22.35](https://indike.org/pramana/in.purana.siva*complete-2.2.3.22.35) tataścireṇa sā mohaṃ dhairyātsaṃstabhya pārvatī | niyamāyābhavattatra dīkṣitā himavatsutā || ### [2.3.22.36](https://indike.org/pramana/in.purana.siva*complete-2.2.3.22.36) tapaścakāra sā tatra śṛṅgitīrthe mahottame | gaurīśikhara nāmāsīttattapaḥkaraṇāddhi tat || ### [2.3.22.37](https://indike.org/pramana/in.purana.siva*complete-2.2.3.22.37) sundarāśca drumāstatra pavitrāśśivayā mune | āropitāḥ parīkṣārthaṃ tapasaḥ phalabhāginaḥ || ### [2.3.22.38](https://indike.org/pramana/in.purana.siva*complete-2.2.3.22.38) bhūbhiśuddhiṃ tataḥ kṛtvā vedīṃ nirmāya sundarī | tathā tapaḥsamārabdhaṃ munīnāmapi duṣkaram || ### [2.3.22.39](https://indike.org/pramana/in.purana.siva*complete-2.2.3.22.39) vigṛhya manasā sarvāṇīndriyāṇi sahāśu sā | samupasthānike tatra cakāra paramaṃ tapaḥ || ### [2.3.22.40](https://indike.org/pramana/in.purana.siva*complete-2.2.3.22.40) grīṣme ca parito vahniṃ prajvalantaṃ divāniśam | kṛtvā tasthau ca tanmadhye satataṃ japatī manum || ### [2.3.22.41](https://indike.org/pramana/in.purana.siva*complete-2.2.3.22.41) satataṃ caiva varṣāsu sthaṇḍile susthirāsanā | śilāpṛṣṭhe ca saṃsiktā babhūva jaladhārayā || ### [2.3.22.42](https://indike.org/pramana/in.purana.siva*complete-2.2.3.22.42) śīte jalāntare śaśvattasthau sā bhaktitatparā | anāhārātapattatra nīhāreṣu niśāsu ca || ### [2.3.22.43](https://indike.org/pramana/in.purana.siva*complete-2.2.3.22.43) evaṃ tapaḥ prakurvāṇā pañcākṣarajape ratā | dadhyau śivaṃ śivā tatra sarvakāmaphalapradam || ### [2.3.22.44](https://indike.org/pramana/in.purana.siva*complete-2.2.3.22.44) svāropitān śubhānvṛkṣānsakhībhissiñcatī mudā | pratyahaṃ sāvakāśe sā tatrātithyamakalpayat || ### [2.3.22.45](https://indike.org/pramana/in.purana.siva*complete-2.2.3.22.45) vātaścaiva tathā śītavṛṣṭiśca vividhā tathā | dussaho'pi tathā gharmastayā sehe sucittayā || ### [2.3.22.46](https://indike.org/pramana/in.purana.siva*complete-2.2.3.22.46) duḥkhaṃ ca vividhaṃ tatra gaṇitaṃ na tayāgatam | kevalaṃ mana ādhāya śive sāsītsthitā mune || ### [2.3.22.47](https://indike.org/pramana/in.purana.siva*complete-2.2.3.22.47) prathamaṃ phalabhogena dvitīyaṃ parṇabhojanaiḥ | tapaḥ prakurvatī devī kramānninye'mitāḥ samāḥ || ### [2.3.22.48](https://indike.org/pramana/in.purana.siva*complete-2.2.3.22.48) tataḥ parṇānyapi śivā nirasya himavatsutā | nirāhārābhavaddevī tapaścaraṇasaṃratā || ### [2.3.22.49](https://indike.org/pramana/in.purana.siva*complete-2.2.3.22.49) āhāre tyaktaparṇābhūdyasmāddhimavataḥ sutā | tena devairaparṇeti kathitā nāmataḥ śivā || ### [2.3.22.50](https://indike.org/pramana/in.purana.siva*complete-2.2.3.22.50) ekapādasthitā sāsīcchivaṃ saṃsmṛtya pārvatī | pañcākṣaraṃ japantī ca manuṃ tepe tapo mahat || ### [2.3.22.51](https://indike.org/pramana/in.purana.siva*complete-2.2.3.22.51) cīravalkalasaṃvītā jaṭāsaṅghātadhāriṇī | śivacintanasaṃsaktā jigāya tapasā munīn || ### [2.3.22.52](https://indike.org/pramana/in.purana.siva*complete-2.2.3.22.52) evaṃ tasyāstapasyantyā cintayantyā maheśvaram | trīṇi varṣasahasrāṇi jagmuḥ kālyāstapovane || ### [2.3.22.53](https://indike.org/pramana/in.purana.siva*complete-2.2.3.22.53) ṣaṣṭivarṣasahasrāṇi yatra tepe tapo haraḥ | tatra kṣaṇamathoṣitvā cintayāmāsa sā śivā || ### [2.3.22.54](https://indike.org/pramana/in.purana.siva*complete-2.2.3.22.54) niyamasthāṃ mahādeva kiṃ māṃ jānāsi nādhunā | yenāhaṃ suciraṃ tena nānuyātā taporatā || ### [2.3.22.55](https://indike.org/pramana/in.purana.siva*complete-2.2.3.22.55) loke vede ca giriśo munibhirgīyate sadā | śaṅkaraḥ sa hi sarvajñaḥ sarvātmā sarvadarśanaḥ || ### [2.3.22.56](https://indike.org/pramana/in.purana.siva*complete-2.2.3.22.56) sarvabhūtiprado devaḥ sarvabhāvānubhāvanaḥ | bhaktābhīṣṭaprado nityaṃ sarvakleśanivāraṇaḥ || ### [2.3.22.57](https://indike.org/pramana/in.purana.siva*complete-2.2.3.22.57) sarvakāmānparityajya yadi cāhaṃ vṛṣadhvaje | anuraktā tadā so'tra samprasīdatu śaṅkaraḥ || ### [2.3.22.58](https://indike.org/pramana/in.purana.siva*complete-2.2.3.22.58) yadi nāradatantroktamantro japtaḥ śarākṣaraḥ | subhaktyā vidhinā nityaṃ samprasīdatu śaṅkaraḥ || ### [2.3.22.59](https://indike.org/pramana/in.purana.siva*complete-2.2.3.22.59) yadi bhaktyā śivasyāhaṃ nirvikārā yathoditam | sarveśvarasya cātyantaṃ samprasīdatu śaṅkaraḥ || ### [2.3.22.60](https://indike.org/pramana/in.purana.siva*complete-2.2.3.22.60) evaṃ cintayatī nityaṃ tepe sā suciraṃ tapaḥ | adhomukhī nirvikārā jaṭāvalkaladhāriṇī || ### [2.3.22.61](https://indike.org/pramana/in.purana.siva*complete-2.2.3.22.61) tathā tayā tapastaptaṃ munīnāmapi duṣkaram | smṛtvā ca puruṣāstatra paramaṃ vismayaṃ gatāḥ || ### [2.3.22.62](https://indike.org/pramana/in.purana.siva*complete-2.2.3.22.62) tattapodarśanārthaṃ hi samājagmuśca te'khilāḥ | dhanyānnijānmanyamānā jagaduśceti sammatāḥ || ### [2.3.22.63](https://indike.org/pramana/in.purana.siva*complete-2.2.3.22.63) mahatāṃ dharmavṛddheṣu gamanaṃ śreya ucyate | pramāṇaṃ tapaso nāsti mānyo dharmaḥsadā budhaiḥ || ### [2.3.22.64](https://indike.org/pramana/in.purana.siva*complete-2.2.3.22.64) śrutvā dṛṣṭvā tapo'syāstu kimanyaiḥ kriyate tapaḥ | asmāttapo'dhikaṃ loke na bhūtaṃ na bhaviṣyati || ### [2.3.22.65](https://indike.org/pramana/in.purana.siva*complete-2.2.3.22.65) jalpanta iti te sarve supraśasya śivātapaḥ | jagmuḥ svaṃ dhāma muditāḥ kaṭhināṅgāśca ye hyapi || ### [2.3.22.66](https://indike.org/pramana/in.purana.siva*complete-2.2.3.22.66) anyacchṛṇu maharṣe tvaṃ prabhāvaṃ tapaso'dhunā | pārvatyā jagadambāyāḥ parāścaryakaraṃ mahat || ### [2.3.22.67](https://indike.org/pramana/in.purana.siva*complete-2.2.3.22.67) tadāśramagatā ye ca svabhāvena virodhinaḥ | te'pyāsam̐statprabhāveṇa virodharahitāstadā || ### [2.3.22.68](https://indike.org/pramana/in.purana.siva*complete-2.2.3.22.68) siṃhā gāvaśca satataṃ rāgādidoṣasaṃyutāḥ | tanmahimnā ca te tatra nābādhanta parasparam || ### [2.3.22.69](https://indike.org/pramana/in.purana.siva*complete-2.2.3.22.69) athānye ca muniśreṣṭha mārjārā mūṣakādayaḥ | nisargādvairiṇo yatra vikriyante sma na kvacit || ### [2.3.22.70](https://indike.org/pramana/in.purana.siva*complete-2.2.3.22.70) vṛkṣāśca saphalāstatra tṛṇāni vividhāni ca | puṣpāṇi ca vicitrāṇi tatrāsanmunisattama || ### [2.3.22.71](https://indike.org/pramana/in.purana.siva*complete-2.2.3.22.71) tadvanaṃ ca tadā sarvaṃ kailāsenopamānvitam | jātaṃ ca tapasastasyāḥ siddhirūpamabhūttadā || ### [2.3.22.71.c1](https://indike.org/pramana/in.purana.siva*complete-2.2.3.22.71.c1) iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe pārvatītapovarṇanaṃ nāma dvāviṃśo'dhyāyaḥ || ### [2.3.22.71.p2](https://indike.org/pramana/in.purana.siva*complete-2.2.3.22.71.p2) śrīgaṇeśāya namaḥ || ### [2.3.22.71.p3](https://indike.org/pramana/in.purana.siva*complete-2.2.3.22.71.p3) śrīgaurīśaṅkarābhyāṃ namaḥ || ### [2.3.22.71.p4](https://indike.org/pramana/in.purana.siva*complete-2.2.3.22.71.p4) śrīśivamahāpurāṇam || ### [2.3.22.71.p5](https://indike.org/pramana/in.purana.siva*complete-2.2.3.22.71.p5) dvitīyāyāṃ rudrasaṃhitāyāṃ tṛtīyaḥ pārvatīkhaṇḍe ## Linked texts (5) - [Kālikāpurāṇa](https://indike.org/pramana/in.purana.upa.sakta.kalika.3.1868) — Sanskrit - [Brahmavaivartapurāṇa](https://indike.org/pramana/in.purana.brahmavaivarta.3.38.31) — Vyāsa, Sanskrit - [Lalitāsahasranāmastotra](https://indike.org/pramana/in.sampradaya.general.devistotra.lalita.lalitasahasranamastotra.146_2087) — Śambhu, Sanskrit - [Kṛṣṇajanmakhaṇḍa](https://indike.org/pramana/in.purana.krsnajanmakhanda.50.15) — Sanskrit - [Janmakhaṇḍa](https://indike.org/pramana/in.sampradaya.general.sakta.janmakhanda.41.15) — Sanskrit --- Source: [https://indike.org/pramana/in.purana.siva*complete-2.2.3.22](https://indike.org/pramana/in.purana.siva*complete-2.2.3.22) · Pramāṇa