Shivapurana 2.3.27: saptaviṃśo'dhyāyaḥ | brahmacāripratāraṇavākyavarṇanam
Śivapurāṇa (complete text) 2.3.27
- Language
- Sanskrit
Contents
- 2.3.27.39 — 5 parts
saptaviṃśo'dhyāyaḥ | brahmacāripratāraṇavākyavarṇanam
2.3.27.1
pārvatyuvāca |
śṛṇu dvijendra jaṭila madvṛttaṃ nikhilaṃ khalu |
sakhyuktaṃ me'dya yatsatyaṃ tattathaiva na cānyathā ||
2.3.27.2
manasā vacasā sākṣātkarmaṇā patibhāvataḥ |
satyaṃ bravīmi no'satyaṃ vṛto vai śaṅkaro mayā ||
2.3.27.3
jānāmi durlabhaṃ vastu kathamprāpyaṃ mayā bhavet |
tathāpi mana autsukyāttapyate'dya tapo mayā ||
2.3.27.4
brahmovāca |
ityuktvā vacanaṃ tasmai sthitā sā girijā tadā |
uvāca brāhmaṇastatra tacchrutvā pārvatīvacaḥ ||
2.3.27.5
brāhmaṇa uvāca |
etāvatkālaparyantaṃ mamecchā mahatī hyabhūt |
kiṃ vastu kāṅkṣatī devī kurute sumahattapaḥ ||
2.3.27.6
tajjñātvā nikhilaṃ devi śrutvā tvanmukhapaṅkajāt |
ito gacchāmyahaṃ sthānādyathecchasi tathā kuru ||
2.3.27.7
na kathyate tvayā mahyaṃ mitratvaṃ niṣphalaṃ bhavet |
yathā kāryaṃ tathā bhāvi kathanīyaṃ sukhena ca ||
2.3.27.8
brahmovāca |
ityuktvā vacanaṃ tasya yāvadgantumiyeṣa saḥ |
tāvacca pārvatī devī praṇamyovāca taṃ dvijam ||
2.3.27.9
pārvatyuvāca |
kiṃ gamiṣyasi viprendra sthito bhava hitaṃ vada |
ityukte ca tayā tatra sthitvovāca sa daṇḍadhṛk ||
2.3.27.10
dvija uvāca |
yadi śrotumanā devi māṃ sthāpayasi bhaktitaḥ |
vadāmi tattvaṃ tatsarvaṃ yena te vayunaṃ bhavet ||
2.3.27.11
jānāmyahaṃ mahādevaṃ sarvathā gurudharmataḥ |
pravadāmi yathārthaṃ hi sāvadhānatayā śṛṇu ||
2.3.27.12
vṛṣadhvajo mahādevo bhasmadigdho jaṭādharaḥ |
vyāghracarmāmbaradharaḥ saṃvīto gajakṛttinā ||
2.3.27.13
kapāladhārī sarpaughaiḥ sarvagātreṣu veṣṭitaḥ |
viṣadigdho'bhakṣyabhakṣo virūpākṣo vibhīṣaṇaḥ ||
2.3.27.14
avyaktajanmā satataṃ gṛhabhogavivarjitaḥ |
digambaro daśabhujo bhūtapretānvitassadā ||
2.3.27.15
kena vā kāraṇena tvaṃ taṃ bhartāraṃ samīhase |
kva jñānaṃ te gataṃ devi tadvadādya vicārataḥ ||
2.3.27.16
pūrvaṃ śrutaṃ mayā caiva vrataṃ tasya bhayaṅkaram |
śṛṇu te nigadāmyadya yadi te śravaṇe ruciḥ ||
2.3.27.17
dakṣasya duhitā sādhvī satī vṛṣabhavāhanam |
vavre patiṃ purā daivāttatsambhogaḥ pariśrutaḥ ||
2.3.27.18
kapālijāyeti satī dakṣeṇa parivarjitā |
yajñe bhāgapradānāya śambhuścāpi vivarjitaḥ ||
2.3.27.19
sā tathaivāpamānena bhṛśaṃ kopākulā satī |
tatyājāsūnpriyām̐statra tayā tyaktaśca śaṅkaraḥ ||
2.3.27.20
tvaṃ strīratnaṃ tava pitā rājā nikhilabhūbhṛtām |
tathāvidhaṃ patiṃ kasmādugreṇa tapasehase ||
2.3.27.21
dattvā suvarṇamudrāṃ ca grahītuṃ kācamicchasi |
hitvā ca candanaṃ śubhraṃ kardamaṃ leptumicchasi ||
2.3.27.22
sūryatejaḥ parityajya khadyotadyutimicchasi |
cīnāṃśukaṃ vihāyaiva carmāmbaramihecchasi ||
2.3.27.23
gṛhavāsaṃ parityajya vanavāsaṃ samīhase |
lohamicchasi deveśi tyaktvā śevadhimuttamam ||
2.3.27.24
indrādilokapālāṃśca hitvā śivamanuvratā |
naitatsūktaṃ hi lokeṣu viruddhaṃ dṛśyate'dhunā ||
2.3.27.25
kva tvaṃ kamalapatrākṣī kvāsau vai trivilocanaḥ |
śaśāṅkavadanā tvaṃ ca pañcavaktraḥ śivaḥ smṛtaḥ ||
2.3.27.26
veṇī śirasi te divyā sarpiṇīva vibhāsitā |
jaṭājūṭaṃ śivasyaiva prasiddhaṃ paricakṣate ||
2.3.27.27
candanaṃ ca tvadīyāṅge citābhasma śivasya ca |
kva dukūlaṃ tvadīyaṃ vai śāṅkaraṃ kva gajājinam ||
2.3.27.28
kva bhūṣaṇāni divyāni kva sarpāḥ śaṅkarasya ca |
kva carā devatāḥsarvāḥ kva ca bhūtabalipriyaḥ ||
2.3.27.29
kva vā mṛdaṅgavādaśca kva ca taḍḍamarustathā |
kva ca bherīkalāpaśca kva ca śṛṅgaravo'śubhaḥ ||
2.3.27.30
kva ca ḍhakkāmayaḥ śabdo galanādaḥ kva cāśubhaḥ |
bhavatyāśca śivasyaiva na yuktaṃ rūpamuttamam ||
2.3.27.31
yadi dravyaṃ bhavettasya kathaṃ syātsa digambaraḥ |
vāhanaṃ ca balīvardaḥ sāmagrī kāpi tasya na ||
2.3.27.32
vareṣu ye guṇāḥ proktā nārīṇāṃ sukhadāyakāḥ |
tanmadhye hi virūpākṣe eko'pi na guṇaḥ smṛtaḥ ||
2.3.27.33
tavāpi kāmo dayito dagdhastena hareṇa ca |
anādarastadā dṛṣṭo hitvā tvāmanyato gataḥ ||
2.3.27.34
jātirna dṛśyate tasya vidyājñānaṃ tathaiva ca |
sahāyāśca piśācā hi viṣaṃ kaṇṭhe hi dṛśyate ||
2.3.27.35
ekākī ca sadā nityaṃ virāgī ca viśeṣataḥ |
tasmāttvaṃ hi hareṇaiva mano yoktuṃ tu cārhasi ||
2.3.27.36
kva ca hārastvadīyo vai kva ca tanmuṇḍamālikā |
aṅgarāgaḥ kva te divyaḥ citābhasma kva tattanau ||
2.3.27.37
sarvaṃ viruddhaṃ rūpādi tava devi harasya ca |
mahyaṃ na rocate hyetadyadicchasi tathā kuru ||
2.3.27.38
asadvastu ca yatkiñcit tatsarvaṃ svayamīhase |
nivartaya manastasmānno cedicchasi tatkuru ||
2.3.27.39
brahmovāca |
ityevaṃ vacanaṃ śrutvā tasya viprasya pārvatī |
uvāca kruddhamanasā śivanindāparaṃ dvijam ||
2.3.27.39.c1
itiśrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe brahmacāripratāraṇavākyavarṇanaṃ nāma saptaviṃśo'dhyāyaḥ ||
2.3.27.39.p2
śrīgaṇeśāya namaḥ ||
2.3.27.39.p3
śrīgaurīśaṅkarābhyāṃ namaḥ ||
2.3.27.39.p4
śrīśivamahāpurāṇam ||
2.3.27.39.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Kālikāpurāṇa — Sanskrit