Shivapurana 2.3.28: aṣṭāviṃśo'dhyāyaḥ | pārvatyāḥ śivarūpadarśanam
Śivapurāṇa (complete text) 2.3.28
- Language
- Sanskrit
Contents
- 2.3.28.50 — 5 parts
aṣṭāviṃśo'dhyāyaḥ | pārvatyāḥ śivarūpadarśanam
2.3.28.1
pārvatyuvāca |
etāvaddhi mayā jñātaṃ kaścidanyo'yamāgataḥ |
idānīṃ sakalaṃ jñātamavadhyastvaṃ viśeṣataḥ ||
2.3.28.2
tvayoktaṃ viditaṃ deva tadalīkaṃ na cānyathā |
yadi tvayoditaṃ syādvai viruddhaṃ nocyate tvayā ||
2.3.28.3
kadāciddṛśyate tādṛk veṣadhārī maheśvaraḥ |
svalīlayā parabrahma svarāgopāttavigrahaḥ ||
2.3.28.4
brahmacārisvarūpeṇa pratārayitumudyataḥ |
āgataśchalasaṃyuktaṃ vaco'vādīḥ kuyuktitaḥ ||
2.3.28.5
śaṅkarasya svarūpaṃ tu jānāmi suviśeṣataḥ |
śivatattvamato vacmi suvicārya yathārhataḥ ||
2.3.28.6
vastuto nirguṇo brahma saguṇaḥ kāraṇena saḥ |
kuto jātirbhavettasya nirguṇasya guṇātmanaḥ ||
2.3.28.7
sa sarvāsāṃ hi vidyānāmadhiṣṭhānaṃ sadāśivaḥ |
kiṃ tasya vidyayā kāryaṃ pūrṇasya paramātmanaḥ ||
2.3.28.8
vedā ucchvāsarūpeṇa purā dattāśca viṣṇave |
śambhunā tena kalpādau tatsamaḥ ko'sti suprabhuḥ ||
2.3.28.9
sarveṣāmādibhūtasya vayomānaṃ kutastataḥ |
prakṛtistu tato jātā kiṃ śaktestasya kāraṇam ||
2.3.28.10
ye bhajanti ca taṃ prītyā śaktīśaṃ śaṅkaraṃ sadā |
tasmai śaktitrayaṃ śambhuḥ sa dadāti sadāvyayam ||
2.3.28.11
tasyaiva bhajanājjīvo mṛtyuṃ jayati nirbhayaḥ |
tasmānmṛtyuñjayannāma prasiddhaṃ bhuvanatraye ||
2.3.28.12
tasyaiva pakṣapātena viṣṇurviṣṇutvamāpnuyāt |
brahmatvaṃ ca yathā brahmā devā devatvameva ca ||
2.3.28.13
darśanārthaṃ śivasyādau yathā gacchati devarāṭ |
bhūtādayastatparasya dvārapālāḥ śivasya tu ||
2.3.28.14
daṇḍaiśca mukuṭaṃ viddhaṃ mṛṣṭaṃ bhavati sarvataḥ |
kiṃ tasya bahupakṣeṇa svayameva mahāprabhuḥ ||
2.3.28.15
kalyāṇarūpiṇastasya sevayeha na kiṃ bhavet |
kiṃ nyūnaṃ tasya devasya māmicchati sadāśivaḥ ||
2.3.28.16
saptajanmadaridraḥ syātsevedyo yadi śaṅkaram |
tasyaitatsevanālloke lakṣmīḥ syādanapāyinī ||
2.3.28.17
yadagre siddhayo'ṣṭau ca nityaṃ nṛtyanti toṣitum |
avāṅmukhāḥ sadā tatra taddhitaṃ durlabhaṃ kutaḥ ||
2.3.28.18
yadyasya maṅgalānīha sevate śaṅkarasya na |
yathāpi maṅgalaṃ tasya smaraṇādeva jāyate ||
2.3.28.19
yasya pūjāprabhāveṇa kāmāḥ siddhyanti sarvaśaḥ |
kuto vikārastasyāsti nirvikārasya sarvadā ||
2.3.28.20
śiveti maṅgalaṃ nāma mukhe yasya nirantaram |
tasyaiva darśanādanye pavitrāḥ santi sarvadā ||
2.3.28.21
yadyapūtaṃ bhavedbhasma citāyāśca tvayoditam |
nityamasyāṅgagaṃ devaiḥ śirobhirdhāryate katham ||
2.3.28.22
yo devo jagatāṃ kartā bhartā hartā guṇānvitaḥ |
nirguṇaḥ śivasaṃjñaśca sa vijñeyaḥ kathaṃ bhavet ||
2.3.28.23
aguṇaṃ brahmaṇo rūpaṃ śivasya paramātmanaḥ |
tatkathaṃ hi vijānanti tvādṛśāstadbahirmukhāḥ ||
2.3.28.24
durācārāśca pāpāśca vebhyaste vinirgatāḥ |
tattvaṃ te naiva jānanti śivasyāguṇarūpiṇaḥ ||
2.3.28.25
śivanindāṃ karotīha tattvamajñāya yaḥ pumān |
ājanmasañcitaṃ puṇyaṃ bhasmībhavati tasya tat ||
2.3.28.26
tvayā nindā kṛtā yātra harasyāmitatejasaḥ |
tvatpūjā ca kṛtā yanme tasmātpāpaṃ bhajāmyaham ||
2.3.28.27
śivavidveṣiṇaṃ dṛṣṭvā sacailaṃ snānamācaret |
śivavidveṣiṇaṃ dṛṣṭvā prāyaścitaṃ samācaret ||
2.3.28.28
re re duṣṭa tvayā coktamahaṃ jānāmi śaṅkaram |
niścayena na vijñātaśśiva eva sanātanaḥ ||
2.3.28.29
yathā tathā bhavedrudro yathā vā bahurūpavān |
mamābhīṣṭatamo nityaṃ nirvikārī satāṃ priyaḥ ||
2.3.28.30
viṣṇurbrahmāpi na samaḥ tasya kvāpi mahātmanaḥ |
kuto'nye nirjarādyāśca kālādhīnāḥ sadaiva te ||
2.3.28.31
iti buddhyā samālokya svayā satyā sutattvataḥ |
śivārthaṃ vanamāgatya karomi vipulaṃ tapaḥ ||
2.3.28.32
sa eva parameśānaḥ sarveśo bhaktavatsalaḥ |
samprāptuṃ me'bhilāṣo hi dīnānugrahakārakam ||
2.3.28.33
brahmovāca |
ityuktvā girijā sā hi girīśvarasutā mune |
virarāma śivaṃ dadhyau nirvikāreṇa cetasā ||
2.3.28.34
tadākarṇya vaco devyā brahmacārī sa vai dvijaḥ |
punarvacanamākhyātuṃ yāvadeva pracakrame ||
2.3.28.35
uvāca girijā tāvatsvasakhīṃ vijayāṃ drutam |
śivasaktamanovṛttiḥ śivanindāparāṅmukhī ||
2.3.28.36
girijovāca |
vāraṇīyaḥ prayatnena sakhyayaṃ hi dvijādhamaḥ |
punarvaktumanāścaiva śivanindāṃ kariṣyati ||
2.3.28.37
na kevalaṃ bhavetpāpaṃ nindāṃ kartuśśivasya hi |
yo vai śṛṇoti tannindāṃ pāpabhāk sa bhavediha ||
2.3.28.38
śivanindākaro vadhyaḥ sarvathā śivakiṅkaraiḥ |
brāhmaṇaścetsa vai tyājyo gantavyaṃ tatsthalāddrutam ||
2.3.28.39
ayaṃ duṣṭaḥ punarnindāṃ kariṣyati śivasya hi |
brāhmaṇatvādavadhyaścettyājyo'dṛśyaśca sarvathā ||
2.3.28.40
hitvaitatsthalamadyaiva yāsyāmo'nyatra mā ciram |
atha sambhāṣaṇaṃ na syādanenā'viduṣā punaḥ ||
2.3.28.41
brahmovāca |
ityuktvā comayā yāvatpādamutkṣipyate mune |
asau tāvacchivaḥ sākṣādālambe priyayā svayam ||
2.3.28.42
kṛtvā svarūpaṃ subhagaṃ śivādhyānaṃ yathā tathā |
darśayitvā śivāyai tāmuvācāvāṅmukhīṃ śivaḥ ||
2.3.28.43
śiva uvāca |
kutra yāsyasi māṃ hitvā na tvaṃ tyājyā mayā punaḥ |
prasanno'smi varaṃ brūhi nādeyaṃ vidyate tava ||
2.3.28.44
adyaprabhṛti te dāsaḥ tapobhiḥ krīta eva te |
krīto'smi tava saundaryātkṣaṇamekaṃ yugāya te ||
2.3.28.45
tyajyatāṃ ca tvayā lajjā mama patnī sanātanī |
girije tvaṃ hi sadbudhyā vicāraya maheśvari ||
2.3.28.46
mayā parīkṣitāsi tvaṃ bahudhā dṛḍhamānase |
tatkṣamasvāparādhaṃ me lokalīlānusāriṇaḥ ||
2.3.28.47
na tvādṛśīṃ praṇayinīṃ paśyāmi ca trilokake |
sarvathāhaṃ tavādhīnaḥ svakāmaḥ pūryatāṃ śive ||
2.3.28.48
ehi priye matsakāśaṃ patnī tvaṃ me varastava |
tvayā sākaṃ drutaṃ yāsye svagṛhaṃ parvatottamam ||
2.3.28.49
brahmovāca |
ityukte devadevena pārvatī mudamāpa sā |
tapojātaṃ tu yatkaṣṭaṃ tajjahau ca purātanam ||
2.3.28.50
sarvaḥ śramo vinaṣṭo'bhūtsatyāstu munisattama |
phale jāte śramaḥ pūrvo jantornāśamavāpnuyāt ||
2.3.28.50.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe pārvatyā śivarūpadarśanaṃ nāmāṣṭāviṃśo'dhyāyaḥ ||
2.3.28.50.p2
śrīgaṇeśāya namaḥ ||
2.3.28.50.p3
śrīgaurīśaṅkarābhyāṃ namaḥ ||
2.3.28.50.p4
śrīśivamahāpurāṇam ||
2.3.28.50.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe