[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Śivapurāṇa](https://indike.org/pramana/in.purana.siva) › [Shivapurana (complete text)](https://indike.org/pramana/in.purana.siva*complete-2) › 2.3.28 # Shivapurana 2.3.28: aṣṭāviṃśo'dhyāyaḥ | pārvatyāḥ śivarūpadarśanam Śivapurāṇa (complete text) 2.3.28 - **Language:** Sanskrit ## Contents - [2.3.28.50](https://indike.org/pramana/in.purana.siva*complete-2.2.3.28.50) — 5 parts ### aṣṭāviṃśo'dhyāyaḥ | pārvatyāḥ śivarūpadarśanam ### [2.3.28.1](https://indike.org/pramana/in.purana.siva*complete-2.2.3.28.1) pārvatyuvāca | etāvaddhi mayā jñātaṃ kaścidanyo'yamāgataḥ | idānīṃ sakalaṃ jñātamavadhyastvaṃ viśeṣataḥ || ### [2.3.28.2](https://indike.org/pramana/in.purana.siva*complete-2.2.3.28.2) tvayoktaṃ viditaṃ deva tadalīkaṃ na cānyathā | yadi tvayoditaṃ syādvai viruddhaṃ nocyate tvayā || ### [2.3.28.3](https://indike.org/pramana/in.purana.siva*complete-2.2.3.28.3) kadāciddṛśyate tādṛk veṣadhārī maheśvaraḥ | svalīlayā parabrahma svarāgopāttavigrahaḥ || ### [2.3.28.4](https://indike.org/pramana/in.purana.siva*complete-2.2.3.28.4) brahmacārisvarūpeṇa pratārayitumudyataḥ | āgataśchalasaṃyuktaṃ vaco'vādīḥ kuyuktitaḥ || ### [2.3.28.5](https://indike.org/pramana/in.purana.siva*complete-2.2.3.28.5) śaṅkarasya svarūpaṃ tu jānāmi suviśeṣataḥ | śivatattvamato vacmi suvicārya yathārhataḥ || ### [2.3.28.6](https://indike.org/pramana/in.purana.siva*complete-2.2.3.28.6) vastuto nirguṇo brahma saguṇaḥ kāraṇena saḥ | kuto jātirbhavettasya nirguṇasya guṇātmanaḥ || ### [2.3.28.7](https://indike.org/pramana/in.purana.siva*complete-2.2.3.28.7) sa sarvāsāṃ hi vidyānāmadhiṣṭhānaṃ sadāśivaḥ | kiṃ tasya vidyayā kāryaṃ pūrṇasya paramātmanaḥ || ### [2.3.28.8](https://indike.org/pramana/in.purana.siva*complete-2.2.3.28.8) vedā ucchvāsarūpeṇa purā dattāśca viṣṇave | śambhunā tena kalpādau tatsamaḥ ko'sti suprabhuḥ || ### [2.3.28.9](https://indike.org/pramana/in.purana.siva*complete-2.2.3.28.9) sarveṣāmādibhūtasya vayomānaṃ kutastataḥ | prakṛtistu tato jātā kiṃ śaktestasya kāraṇam || ### [2.3.28.10](https://indike.org/pramana/in.purana.siva*complete-2.2.3.28.10) ye bhajanti ca taṃ prītyā śaktīśaṃ śaṅkaraṃ sadā | tasmai śaktitrayaṃ śambhuḥ sa dadāti sadāvyayam || ### [2.3.28.11](https://indike.org/pramana/in.purana.siva*complete-2.2.3.28.11) tasyaiva bhajanājjīvo mṛtyuṃ jayati nirbhayaḥ | tasmānmṛtyuñjayannāma prasiddhaṃ bhuvanatraye || ### [2.3.28.12](https://indike.org/pramana/in.purana.siva*complete-2.2.3.28.12) tasyaiva pakṣapātena viṣṇurviṣṇutvamāpnuyāt | brahmatvaṃ ca yathā brahmā devā devatvameva ca || ### [2.3.28.13](https://indike.org/pramana/in.purana.siva*complete-2.2.3.28.13) darśanārthaṃ śivasyādau yathā gacchati devarāṭ | bhūtādayastatparasya dvārapālāḥ śivasya tu || ### [2.3.28.14](https://indike.org/pramana/in.purana.siva*complete-2.2.3.28.14) daṇḍaiśca mukuṭaṃ viddhaṃ mṛṣṭaṃ bhavati sarvataḥ | kiṃ tasya bahupakṣeṇa svayameva mahāprabhuḥ || ### [2.3.28.15](https://indike.org/pramana/in.purana.siva*complete-2.2.3.28.15) kalyāṇarūpiṇastasya sevayeha na kiṃ bhavet | kiṃ nyūnaṃ tasya devasya māmicchati sadāśivaḥ || ### [2.3.28.16](https://indike.org/pramana/in.purana.siva*complete-2.2.3.28.16) saptajanmadaridraḥ syātsevedyo yadi śaṅkaram | tasyaitatsevanālloke lakṣmīḥ syādanapāyinī || ### [2.3.28.17](https://indike.org/pramana/in.purana.siva*complete-2.2.3.28.17) yadagre siddhayo'ṣṭau ca nityaṃ nṛtyanti toṣitum | avāṅmukhāḥ sadā tatra taddhitaṃ durlabhaṃ kutaḥ || ### [2.3.28.18](https://indike.org/pramana/in.purana.siva*complete-2.2.3.28.18) yadyasya maṅgalānīha sevate śaṅkarasya na | yathāpi maṅgalaṃ tasya smaraṇādeva jāyate || ### [2.3.28.19](https://indike.org/pramana/in.purana.siva*complete-2.2.3.28.19) yasya pūjāprabhāveṇa kāmāḥ siddhyanti sarvaśaḥ | kuto vikārastasyāsti nirvikārasya sarvadā || ### [2.3.28.20](https://indike.org/pramana/in.purana.siva*complete-2.2.3.28.20) śiveti maṅgalaṃ nāma mukhe yasya nirantaram | tasyaiva darśanādanye pavitrāḥ santi sarvadā || ### [2.3.28.21](https://indike.org/pramana/in.purana.siva*complete-2.2.3.28.21) yadyapūtaṃ bhavedbhasma citāyāśca tvayoditam | nityamasyāṅgagaṃ devaiḥ śirobhirdhāryate katham || ### [2.3.28.22](https://indike.org/pramana/in.purana.siva*complete-2.2.3.28.22) yo devo jagatāṃ kartā bhartā hartā guṇānvitaḥ | nirguṇaḥ śivasaṃjñaśca sa vijñeyaḥ kathaṃ bhavet || ### [2.3.28.23](https://indike.org/pramana/in.purana.siva*complete-2.2.3.28.23) aguṇaṃ brahmaṇo rūpaṃ śivasya paramātmanaḥ | tatkathaṃ hi vijānanti tvādṛśāstadbahirmukhāḥ || ### [2.3.28.24](https://indike.org/pramana/in.purana.siva*complete-2.2.3.28.24) durācārāśca pāpāśca vebhyaste vinirgatāḥ | tattvaṃ te naiva jānanti śivasyāguṇarūpiṇaḥ || ### [2.3.28.25](https://indike.org/pramana/in.purana.siva*complete-2.2.3.28.25) śivanindāṃ karotīha tattvamajñāya yaḥ pumān | ājanmasañcitaṃ puṇyaṃ bhasmībhavati tasya tat || ### [2.3.28.26](https://indike.org/pramana/in.purana.siva*complete-2.2.3.28.26) tvayā nindā kṛtā yātra harasyāmitatejasaḥ | tvatpūjā ca kṛtā yanme tasmātpāpaṃ bhajāmyaham || ### [2.3.28.27](https://indike.org/pramana/in.purana.siva*complete-2.2.3.28.27) śivavidveṣiṇaṃ dṛṣṭvā sacailaṃ snānamācaret | śivavidveṣiṇaṃ dṛṣṭvā prāyaścitaṃ samācaret || ### [2.3.28.28](https://indike.org/pramana/in.purana.siva*complete-2.2.3.28.28) re re duṣṭa tvayā coktamahaṃ jānāmi śaṅkaram | niścayena na vijñātaśśiva eva sanātanaḥ || ### [2.3.28.29](https://indike.org/pramana/in.purana.siva*complete-2.2.3.28.29) yathā tathā bhavedrudro yathā vā bahurūpavān | mamābhīṣṭatamo nityaṃ nirvikārī satāṃ priyaḥ || ### [2.3.28.30](https://indike.org/pramana/in.purana.siva*complete-2.2.3.28.30) viṣṇurbrahmāpi na samaḥ tasya kvāpi mahātmanaḥ | kuto'nye nirjarādyāśca kālādhīnāḥ sadaiva te || ### [2.3.28.31](https://indike.org/pramana/in.purana.siva*complete-2.2.3.28.31) iti buddhyā samālokya svayā satyā sutattvataḥ | śivārthaṃ vanamāgatya karomi vipulaṃ tapaḥ || ### [2.3.28.32](https://indike.org/pramana/in.purana.siva*complete-2.2.3.28.32) sa eva parameśānaḥ sarveśo bhaktavatsalaḥ | samprāptuṃ me'bhilāṣo hi dīnānugrahakārakam || ### [2.3.28.33](https://indike.org/pramana/in.purana.siva*complete-2.2.3.28.33) brahmovāca | ityuktvā girijā sā hi girīśvarasutā mune | virarāma śivaṃ dadhyau nirvikāreṇa cetasā || ### [2.3.28.34](https://indike.org/pramana/in.purana.siva*complete-2.2.3.28.34) tadākarṇya vaco devyā brahmacārī sa vai dvijaḥ | punarvacanamākhyātuṃ yāvadeva pracakrame || ### [2.3.28.35](https://indike.org/pramana/in.purana.siva*complete-2.2.3.28.35) uvāca girijā tāvatsvasakhīṃ vijayāṃ drutam | śivasaktamanovṛttiḥ śivanindāparāṅmukhī || ### [2.3.28.36](https://indike.org/pramana/in.purana.siva*complete-2.2.3.28.36) girijovāca | vāraṇīyaḥ prayatnena sakhyayaṃ hi dvijādhamaḥ | punarvaktumanāścaiva śivanindāṃ kariṣyati || ### [2.3.28.37](https://indike.org/pramana/in.purana.siva*complete-2.2.3.28.37) na kevalaṃ bhavetpāpaṃ nindāṃ kartuśśivasya hi | yo vai śṛṇoti tannindāṃ pāpabhāk sa bhavediha || ### [2.3.28.38](https://indike.org/pramana/in.purana.siva*complete-2.2.3.28.38) śivanindākaro vadhyaḥ sarvathā śivakiṅkaraiḥ | brāhmaṇaścetsa vai tyājyo gantavyaṃ tatsthalāddrutam || ### [2.3.28.39](https://indike.org/pramana/in.purana.siva*complete-2.2.3.28.39) ayaṃ duṣṭaḥ punarnindāṃ kariṣyati śivasya hi | brāhmaṇatvādavadhyaścettyājyo'dṛśyaśca sarvathā || ### [2.3.28.40](https://indike.org/pramana/in.purana.siva*complete-2.2.3.28.40) hitvaitatsthalamadyaiva yāsyāmo'nyatra mā ciram | atha sambhāṣaṇaṃ na syādanenā'viduṣā punaḥ || ### [2.3.28.41](https://indike.org/pramana/in.purana.siva*complete-2.2.3.28.41) brahmovāca | ityuktvā comayā yāvatpādamutkṣipyate mune | asau tāvacchivaḥ sākṣādālambe priyayā svayam || ### [2.3.28.42](https://indike.org/pramana/in.purana.siva*complete-2.2.3.28.42) kṛtvā svarūpaṃ subhagaṃ śivādhyānaṃ yathā tathā | darśayitvā śivāyai tāmuvācāvāṅmukhīṃ śivaḥ || ### [2.3.28.43](https://indike.org/pramana/in.purana.siva*complete-2.2.3.28.43) śiva uvāca | kutra yāsyasi māṃ hitvā na tvaṃ tyājyā mayā punaḥ | prasanno'smi varaṃ brūhi nādeyaṃ vidyate tava || ### [2.3.28.44](https://indike.org/pramana/in.purana.siva*complete-2.2.3.28.44) adyaprabhṛti te dāsaḥ tapobhiḥ krīta eva te | krīto'smi tava saundaryātkṣaṇamekaṃ yugāya te || ### [2.3.28.45](https://indike.org/pramana/in.purana.siva*complete-2.2.3.28.45) tyajyatāṃ ca tvayā lajjā mama patnī sanātanī | girije tvaṃ hi sadbudhyā vicāraya maheśvari || ### [2.3.28.46](https://indike.org/pramana/in.purana.siva*complete-2.2.3.28.46) mayā parīkṣitāsi tvaṃ bahudhā dṛḍhamānase | tatkṣamasvāparādhaṃ me lokalīlānusāriṇaḥ || ### [2.3.28.47](https://indike.org/pramana/in.purana.siva*complete-2.2.3.28.47) na tvādṛśīṃ praṇayinīṃ paśyāmi ca trilokake | sarvathāhaṃ tavādhīnaḥ svakāmaḥ pūryatāṃ śive || ### [2.3.28.48](https://indike.org/pramana/in.purana.siva*complete-2.2.3.28.48) ehi priye matsakāśaṃ patnī tvaṃ me varastava | tvayā sākaṃ drutaṃ yāsye svagṛhaṃ parvatottamam || ### [2.3.28.49](https://indike.org/pramana/in.purana.siva*complete-2.2.3.28.49) brahmovāca | ityukte devadevena pārvatī mudamāpa sā | tapojātaṃ tu yatkaṣṭaṃ tajjahau ca purātanam || ### [2.3.28.50](https://indike.org/pramana/in.purana.siva*complete-2.2.3.28.50) sarvaḥ śramo vinaṣṭo'bhūtsatyāstu munisattama | phale jāte śramaḥ pūrvo jantornāśamavāpnuyāt || ### [2.3.28.50.c1](https://indike.org/pramana/in.purana.siva*complete-2.2.3.28.50.c1) iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe pārvatyā śivarūpadarśanaṃ nāmāṣṭāviṃśo'dhyāyaḥ || ### [2.3.28.50.p2](https://indike.org/pramana/in.purana.siva*complete-2.2.3.28.50.p2) śrīgaṇeśāya namaḥ || ### [2.3.28.50.p3](https://indike.org/pramana/in.purana.siva*complete-2.2.3.28.50.p3) śrīgaurīśaṅkarābhyāṃ namaḥ || ### [2.3.28.50.p4](https://indike.org/pramana/in.purana.siva*complete-2.2.3.28.50.p4) śrīśivamahāpurāṇam || ### [2.3.28.50.p5](https://indike.org/pramana/in.purana.siva*complete-2.2.3.28.50.p5) dvitīyāyāṃ rudrasaṃhitāyāṃ tṛtīyaḥ pārvatīkhaṇḍe --- Source: [https://indike.org/pramana/in.purana.siva*complete-2.2.3.28](https://indike.org/pramana/in.purana.siva*complete-2.2.3.28) · Pramāṇa