Shivapurana 2.3.29: ekonatriṃśo'dhyāyaḥ | śivāśivasaṃvādaḥ
Śivapurāṇa (complete text) 2.3.29
- Language
- Sanskrit
Contents
- 2.3.29.42 — 5 parts
ekonatriṃśo'dhyāyaḥ | śivāśivasaṃvādaḥ
2.3.29.1
nārada uvāca |
brahman vidhe mahābhāga kiṃ jātaṃ tadanantaram |
tatsarvaṃ śrotumicchāmi kathaya tvaṃ śivāyaśaḥ ||
2.3.29.2
brahmovāca |
devarṣe śrūyatāṃ samyak kathayāmi kathāṃ mudā |
tāṃ mahāpāpasaṃhartrīṃ śivabhaktivivardhinīm ||
2.3.29.3
pārvatī vacanaṃ śrutvā harassa paramātmanaḥ |
dṛṣṭvānandakaraṃ rūpaṃ jaharṣātīva ca dvija ||
2.3.29.4
pratyuvāca mahāsādhvī svopakaṇṭhasthitaṃ vibhum |
atīva sukhitā devī prītyutphullānanā śivā ||
2.3.29.5
pārvatyuvāca |
tvaṃ nātho mama deveśa tvayā kiṃ vismṛtaṃ purā |
dakṣayajñavināśaṃ hi yadarthaṃ kṛtavānhaṭhāt ||
2.3.29.6
sa tvaṃ sāhaṃ samutpannā menāyāṃ kāryasiddhaye |
devānāṃ devadeveśa tārakāptāsukhātmanām ||
2.3.29.7
yadi prasanno deveśa karoṣi ca kṛpāṃ yadi |
patirbhava mameśāna mama vākyaṃ kuru prabho ||
2.3.29.8
piturgehe mayā samyaggamyate tvadanujñayā |
prasiddhaṃ kriyatāṃ tadvai viśuddhaṃ paramaṃ yaśaḥ ||
2.3.29.9
gantavyaṃ bhavatā nātha himavatpārśvataḥ prabho |
yācasva māṃ tato bhikṣurbhūtvā līlāviśāradaḥ ||
2.3.29.10
tathā tvayā prakartavyaṃ lokeṣu khyāpayan yaśaḥ |
piturme saphalaṃ sarvaṃ kuruṣvaivaṃ gṛhāśramam ||
2.3.29.11
ṛṣibhirbodhitaḥ prītyā svabandhuparivāritaḥ |
kariṣyati na sandehastava vākyaṃ pitā mama ||
2.3.29.12
dakṣakanyā purāhaṃ vai pitrā dattā yadā tava |
yathoktavidhinā tatra vivāho na kṛtastvayā ||
2.3.29.13
na grahāḥ pūjitāstena dakṣeṇa janakena me |
grahāṇāṃ viṣayastena sacchidro'yaṃ mahānabhūt ||
2.3.29.14
tasmādyathoktavidhinā kartumarhasi me prabho |
vivāhaṃ tvaṃ mahādeva devānāṃ kāryasiddhaye ||
2.3.29.15
vivāhasya yathā rītiḥ kartavyā sā tathā dhruvam |
jānātu himavān samyak kṛtaṃ putryā śubhaṃ tapaḥ ||
2.3.29.16
brahmovāca |
ityevaṃ vacanaṃ śrutvā suprasannaḥ sadāśivaḥ |
provāca vacanaṃ prītyā girijāṃ prahasanniva ||
2.3.29.17
śiva uvāca |
śṛṇu devi maheśāni paramaṃ vacanaṃ mama |
yathocitaṃ sumāṅgalyamavikāri tathā kuru ||
2.3.29.18
brahmādikāni bhūtāni tvanityāni varānane |
dṛṣṭaṃ yatsarvametacca naśvaraṃ viddhi bhāmini ||
2.3.29.19
eko'nekatvamāpanno nirguṇo hi guṇānvitaḥ |
svajyotsnayā yo vibhāti parajyotsnānvito'bhavat ||
2.3.29.20
svatantraḥ paratantraśca tvayā devi kṛto hyaham |
sarvakartrī ca prakṛtirmahāmāyā tvameva hi ||
2.3.29.21
māyāmayaṃ kṛtamidaṃ ca jagatsamagraṃ sarvātmanā hi vidhṛtaṃ parayā svabuddhyā |
sarvātmabhiḥ sukṛtibhiḥ paramātmabhāvaiḥ saṃsiktamātmani guṇaiḥ pariveṣṭitañca ||
2.3.29.22
ke grahāḥ ke ṛtugaṇāḥ ke vānye'pi tvayā grahāḥ |
kimuktaṃ cādhunā devi śivārthaṃ varavarṇini ||
2.3.29.23
guṇakāryaprabhedenāvābhyāṃ prādurbhavaḥ kṛtaḥ |
bhaktahetorjagatyasminbhaktavatsalabhāvataḥ ||
2.3.29.24
tvaṃ hi vai prakṛtiḥ sūkṣmā rajaḥ sattvatamomayī |
vyāpāradakṣā satataṃ saguṇā nirguṇāpi ca ||
2.3.29.25
sarveṣāmiha bhūtānāmahamātmā sumadhyame |
nirvikārī nirīhaśca bhaktecchopāttavigrahaḥ ||
2.3.29.26
himālayaṃ na gaccheyaṃ janakaṃ tava śailaje |
tatastvāṃ bhikṣuko bhūtvā na yāceyaṃ kathañcana ||
2.3.29.27
mahāguṇairgariṣṭho'pi mahātmāpi girīndraje |
dehīti vacanātsadyaḥ puruṣo yāti lāghavam ||
2.3.29.28
itthaṃ jñātvā tu kalyāṇi kimasmākaṃ vadasyatha |
kāryaṃ tvadājñayā bhadre yathecchasi tathā kuru ||
2.3.29.29
brahmovāca |
tenoktāpi mahādevī sā sādhvī kamalekṣaṇā |
jagāda śaṅkaraṃ bhaktyā supraṇamya punaḥ punaḥ ||
2.3.29.30
pārvatyuvāca |
tvamātmā prakṛtiścāhaṃ nātra kāryā vicāraṇā |
svatantrau bhaktavaśagau nirguṇau saguṇāvapi ||
2.3.29.31
prayatnena tvayā śambho kāryaṃ vākyaṃ mama prabho |
yācasva māṃ himagireḥ saubhāgyaṃ dehi śaṅkara ||
2.3.29.32
kṛpāṃ kuru maheśāna tava bhaktāsmi nityaśaḥ |
tava patnī sadā nātha hyahaṃ janmani janmani ||
2.3.29.33
tvaṃ brahma paramātmā hi nirguṇaḥ prakṛteḥ paraḥ |
nirvikārī nirīhaśca svatantraḥ parameśvaraḥ ||
2.3.29.34
tathāpi saguṇo'pīha bhaktoddhāraparāyaṇaḥ |
vihārī svātmani rato nānālīlāviśāradaḥ ||
2.3.29.35
sarvathā tvāmahaṃ jāne mahādeva maheśvara |
kimuktena ca sarvajña bahunā hi dayāṃ kuru ||
2.3.29.36
vistāraya yaśo loke kṛtvā līlāṃ mahādbhutām |
yatsugīya janā nāthāñjasottīrṇā bhavāmbudhim ||
2.3.29.37
brahmovāca |
ityevamuktvā girijā supraṇamya punaḥ punaḥ |
virarāma maheśānaṃ nataskandhā kṛtāñjaliḥ ||
2.3.29.38
ityevamuktaḥ sa tayā mahātmā maheśvaro lokaviḍambanāya |
tatheti matvā prahasan babhūva mudānvitaḥ kartumanāstadeva ||
2.3.29.39
tato hyantarhitaśśambhurbabhūva supraharṣitaḥ |
kailāsaṃ prayayau kālyā virahākṛṣṭamānasaḥ ||
2.3.29.40
tatra gatvā maheśāno nandyādibhyaḥ sa ūcivān |
vṛttāntaṃ sakalaṃ taṃ vai paramānandanirbharaḥ ||
2.3.29.41
te'pi śrutvā gaṇāḥ sarve bhairavādyāśca sarvaśaḥ |
babhūvuḥ sukhino'tyantaṃ vidadhuḥ paramotsavam ||
2.3.29.42
mahatsumaṅgalaṃ tatra babhūvātīva nārada |
sarveṣāṃ duḥkhanāśo'bhūdrudraḥ prāpāpi sammudam ||
2.3.29.42.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivāśivasaṃvādavarṇanaṃ nāmaikonatriṃśo'dhyāyaḥ ||
2.3.29.42.p2
śrīgaṇeśāya namaḥ ||
2.3.29.42.p3
śrīgaurīśaṅkarābhyāṃ namaḥ ||
2.3.29.42.p4
śrīśivamahāpurāṇam ||
2.3.29.42.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe